Leviticus 2

Kamba (MBIVILIA ŨVOO MŨSEO)

← Chapter 1 Jump to: Chapter 3 →

1“Yĩla mũndũ o na wĩva wambumĩsya nyie Mwĩai Ngai nthembo ya ngetha ya mbaa mbeke, no nginya ambe kũmĩthia ĩtw'ĩke mũtu. Nĩekĩe mauta na ũvani nthembonĩ ĩsu,

2na aietee ana ma Alũni, ala nĩ athembi. Mũthembi nĩaute ngundi ya mũtu ũsu na mauta vamwe na ũvani w'onthe na ayĩivĩvĩsya kĩthembeonĩ syĩthĩwe kĩlungu kya ũlilikany'o. Mũuke wa nthembo ĩsu ya lĩu nũmbendeeasya nyie Mwĩai Ngai.

3Nthembo ila ingĩ sya ngetha ya mbaa mbeke nĩ sya athembi; nĩ ntheu vyũ nũndũ syumĩtw'e lĩunĩ ũla ũthembeetwe Mwĩai Ngai.

4“Ethĩwa mũndũ nĩwaete nthembo ya ngetha ya mbaa mbeke ya mũkate ũuĩwe ĩikonĩ ya kũuĩa mĩkate, no nginya yĩthĩwe yĩ ya tũmĩkate tũuĩtwe na mũtu mũvinyu ũte mwĩkĩe mbota, na ũyĩthĩwa ũvulanĩtw'e na mauta. Nthembo ĩsu nĩtonya kwĩthĩwa yĩ ya tũmĩkate tũvũthũ tũvakĩtwe mauta ĩũlũ.

5“Ethĩwa nthembo ĩsu ya ngetha ya mbaa mbeke nĩ ya mũkate ũuĩtwe na kalaĩ ka kũua mĩkate, mũkate ũsu ũuwe na mũtu mũvinyu ũvulanĩtw'e na mauta na ũte mwĩkĩe mbota.

6Mĩkate ĩsu ĩtilangwe tũlungu na kwĩtĩkĩw'a mauta yĩla ĩkumw'a yĩthĩwe nthembo.

7“Ethĩwa nthembo ĩsu ya ngetha ya mbaa mbeke nĩ ya mũkate ũuĩwe kalaĩnĩ kavũthũ, ũuwe na mũtu mũvinyu ũvulanĩtw'e na mauta.

8Nthembo ĩsu ĩetwe kũla nĩĩ nyie Mwĩai Ngai, na ĩinenganwe kũla kwĩ mũthembi nake aimĩtwaa kĩthembeonĩ.

9Mũthembi nĩose kĩlungu kya ũlilikany'o kuma nthembonĩ ĩsu ya ngetha ya mbaa mbeke na kũmĩvĩvĩsya kĩthembeonĩ. Mũuke wa nthembo ĩsu ya lĩu nũmbendeeasya nyie Mwĩai Ngai.

10Nthembo ila ingĩ sya ngetha ya mbaa mbeke nĩ sya athembi, nĩ ntheu vyũ nũndũ syumĩtw'e lĩunĩ ũla ũthembeetwe Mwĩai Ngai.

11“Nthembo syonthe sya ngetha ya mbaa mbeke ila nĩumĩaw'a nyie Mwĩai Ngai no nginya syĩthĩwe iseũvĩtw'e ite mbota. Mũikekĩe mbota kana ũkĩ wa nzũkĩ nthembonĩ ya lĩu ũla ũthembeetwe nyie Mwĩai Ngai.

12Nthembo ya ũsyao wa mbee ũla mũkethaa kĩla mwaka ĩetwe kũla kwĩ Mwĩai Ngai, ĩndĩ ndĩkavĩvĩw'e kĩthembeonĩ.

13Ĩkĩaai nthembo syonthe sya ngetha ya mbaa mbeke mũnyũ, nũndũ mũnyũ wonanasya ũtianĩo katĩ wenyu na Ngai. No nginya mwĩkĩae nthembo syenyu syonthe mũnyũ.

14Ethĩwa nĩmwandetee nyie Mwĩai Ngai nthembo ya ũsyao wa mbee wamina kũkethwa, nthembeei ngetha ya mbaa mbeke yĩ mbĩvye na yĩ nthie ĩkatw'ĩka mũtu.

15Ongelaai mauta na mũyĩkĩaa ũvani nthembonĩ ĩsu ya mbaa mbeke.

16Mũthembi nĩavĩvye kĩlungu kya ũlilikany'o kya ngetha ĩsu ya mbaa mbeke nthie, vamwe na mauta, na ũvani w'onthe. Ĩsu nĩ nthembo ya kũvĩvw'a ĩthembewe Mwĩai Ngai.

← Chapter 1 Jump to: Chapter 3 →