Leviticus 12

Kamba (MBIVILIA ŨVOO MŨSEO)

← Chapter 11 Jump to: Chapter 13 →

1Mwĩai Ngai nĩwaneenie na Mwose amwĩa atĩĩ,

2“Neena na andũ ma Ĩsilaeli ũmee ethĩwa mũndũ mũka nĩwaitava na kũsyaa kavĩsĩ, akeethĩawa ate mũtheu vandũ va mĩthenya mũonza, o tondũ wĩthĩawa ate mũtheu ĩvindanĩ ya mwei wake.

3Kana kau nĩkaĩlĩte kwaĩkwa mũthenyanĩ wa nyanya wa ũkũũ wako.

4Inyia wa kana kau aendeeaa kwĩthĩwa ate mũtheu vandũ va mĩthenya mĩongo ĩtatũ na ĩtatũ, nginya ĩvinda ya kũthew'a kuma ũvukunĩ wa kwasya nthakame yĩthele. Ĩvindanĩ yĩu ya ũvuku wake, mũndũ mũka ũsu ndaĩlĩte kũkiita kĩndũ kĩtheu, kana kũthi Ĩeemanĩ ĩtheu ya kũkomanĩa na Ngai, nginya yĩla ĩvinda yake ya kũthew'a yĩkathela.

5Ĩndĩ ethĩwa mũndũ mũka asyaa kelĩtu akeethĩawa ate mũtheu vandũ va syumwa ilĩ o tondũ wĩthĩawa ĩvindanĩ ya mwei wake. Mũndũ mũka ũsu akeeteelaa mĩthenya ĩngĩ mĩongo thanthatũ na thanthatũ nĩ kana athew'e kuma ũvukunĩ wa kwasya nthakame.

6“Ĩvinda ya kũthew'a kwa mũndũ mũka ĩtina wa kũsyaa kavĩsĩ kana kelĩtu yathela, mũndũ mũka ũsu no nginya ose katena ka ĩlondu kena ũkũũ wa mwaka ũmwe, akatwae mũvĩanĩ wa Ĩeemanĩ ya kũkomanĩa na Mwĩai Ngai, na aikanenga mũthembi kethĩwe nthembo ya kũvĩvw'a, na o ta ũu aimũnenga ndumbũ kana ĩswii ya ĩvũĩ yĩthĩwe nthembo kwondũ wa ũekeo wa naĩ.

7“Mũthembi nĩaumĩsye Mwĩai Ngai nthembo ĩsu ya mũndũ mũka ũsu na ayĩka maũndũ ala maĩlĩte nĩ kana mũndũ mũka ũsu athew'e kuma ũvukunĩ wake, na eĩthĩwa athew'a. Asu nĩmo motw'ĩo ala maĩlĩte kũatĩĩwa yĩla mũndũ mũka wasyaa.

8“Ethĩwa mũndũ mũka ũsu ndatonya kwona katena ka ĩlondu, nĩatwaĩe mũthembi ndumbũ ilĩ kana maswii elĩ ma ĩvũĩ, yĩmwe yĩthĩwe nthembo ya kũvĩvw'a na yĩla yĩngĩ yĩyĩthĩwa nthembo kwondũ wa ũekeo wa naĩ. Mũthembi nĩeke maũndũ ala maĩlĩte nĩ kana mũndũ mũka ũsu athew'e kuma ũvukunĩ wake, na mũndũ eĩthĩwa athew'a.”

← Chapter 11 Jump to: Chapter 13 →