Leviticus 17

Kamba (MBIVILIA ŨVOO MŨSEO)

← Chapter 16 Jump to: Chapter 18 →

1Mwĩai Ngai nĩwaneenie na Mwose amwĩa atĩĩ,

2“Neena na Alũni na ana make na andũ onthe ma Ĩsilaeli ũmanenge mĩao ĩno:

3Mũndũ o na wĩva wa Ĩsilaeli ũla wĩũaĩa ng'ombe, ĩlondu, kana mbũi maeemanĩ kana amyũaĩe ũtee wa vala maeema mambĩtwe,

4vandũ va kũete nyamũ ĩsu mũvĩanĩ wa Ĩeema ĩtheu ya kũkomanĩa na Mwĩai Ngai nĩ kana ambumĩsye nyie Mwĩai Ngai e mbee wa Ĩeema, akatalawa kwĩthĩwa na ĩvĩtyo ya kwĩta nthakame. Mũndũ ũsu akeethĩawa e na ĩvĩtyo ya kwĩta nthakame na kwoou akaeka kũtalwa ta ũmwe wa andũ ma Ĩsilaeli.

5Kĩeleelo kya mwĩao ũũ nĩ kana kuma yu andũ ma Ĩsilaeli makandeteae nyie Mwĩai Ngai nyamũ ila manathembeaa kũndũ kũngĩ eka mũvĩanĩ wa Ĩeema ĩtheu ya kũkomanĩa na Ngai. Yu makaeteae mũthembi nyamũ isu mũvĩanĩ wa Ĩeema ĩtheu ya kũkomanĩa na Ngai na iyũawa nĩ kana syĩthĩwe nthembo sya ngwatanĩo.

6Mũthembi akaminzangĩasya nthakame ĩsu ngalĩkonĩ inya sya kĩthembeo kĩla kĩ mũvĩanĩ wa Ĩeema ĩtheu ya kũkomanĩa na Ngai na aivĩvya mathunya nĩ kana maumye mũuke mũseo ũla ũmbendeeasya nyie Mwĩai Ngai.

7Andũ ma Ĩsilaeli mayaĩlĩte kũendeea kwĩthĩwa mate aĩkĩĩku kwakwa nyie Mwĩai Ngai kwa kũaĩa nyamũ syoo ithekanĩ masyumye nthembo kwondũ wa ngai sya mĩvw'anano syĩ na wũmbo wa mbũi. Andũ ma Ĩsilaeli no nginya meanĩasye ũtw'ĩo ũũ ĩvindanĩ yonthe yĩla yũkĩte.

8“O ta ũu matavye ũmee mũndũ o na wĩva wa andũ ma Ĩsilaeli, kana mũeni ũla ũtũaa katĩ woo, ũla wĩthemba nthembo ya kũvĩvw'a kana nthembo ya mũthemba ũngĩ,

9na ailea kũmĩete mũvĩanĩ wa Ĩeema ĩtheu ya kũkomanĩa na Ngai, nĩ kana amĩthembee Mwĩai Ngai, akaeka kũtalwa ta ũmwe wa andũ makwa.

10“Ethĩwa mũndũ o na wĩva wa andũ ma Ĩsilaeli, kana mũeni ũla ũtũaa katĩ woo akaya nyama yĩna nthakame, nyie Mwĩai Ngai ngathatĩa mũndũ ũsu, na ngaeka kũmũtala ta ũmwe wa andũ makwa.

11Thayũ wa syũmbe syonthe ila syĩ thayũ wĩ nthakamenĩ, na kĩu nĩkyo kĩtumi nĩaĩte ngasya nthakame yaĩlĩte kũtulũlawa kĩthembeonĩ nĩ kana andũ maekewe naĩ syoo. Nthakame nĩ thayũ na kwoou nĩvetangĩaa andũ naĩ.

12Kĩu nĩkyo kĩtumi nĩneenete na andũ ma Ĩsilaeli ngasya kana vai ũmwe katĩ woo kana mũeni ũtũaa katĩ woo waĩlĩte kũya nyama yĩna nthakame.

13“Ethĩwa mũndũ o na wĩva wa andũ ma Ĩsilaeli, kana mũeni ũtũaa katĩ woo nĩwasyĩma nyamũ kana nyũnyi yaĩlĩte kũĩwa, no nginya ete nthakame ya yo nthĩ na aimĩvw'ĩka na mũthanga.

14Thayũ wa syũmbe syonthe wĩ nthakamenĩ, na kĩu nĩkyo kĩtumi nyie Mwĩai Ngai nĩneenete na andũ ma Ĩsilaeli ngasya kana mayaĩlĩte kũya nyama o na yĩva yĩna nthakame, na mũndũ o na wĩva ũla wĩĩka ũu akaeka kũtalwa ta ũmwe wa andũ makwa.

15“Mũndũ o na wĩva, wa andũ ma Ĩsilaeli, kana mũeni ũtwĩe katĩ woo, ũla wĩya nyama ya nyamũ ngw'ũ, kana yũaĩtwe nĩ nyamũ sya kĩthekanĩ, no nginya avũe ngũa syake na aithamba, ĩndĩ ũu wĩ o vo akaendeea kwĩthĩwa e mũvuku nginya ĩa mawĩoo, na ĩtina wa ũu ĩndĩ ayĩthĩwa e mũtheu.

16Mũndũ ũsu alea kũvũa ngũa syake na kũthamba no nginya aĩvĩe naĩ yake.”

← Chapter 16 Jump to: Chapter 18 →