Leviticus 4

Kamba (MBIVILIA ŨVOO MŨSEO)

← Chapter 3 Jump to: Chapter 5 →

1Mwĩai Ngai nĩwaneenie na Mwose amwĩa atĩĩ,

2“Neena na andũ ma Ĩsilaeli ũmee kana ethĩwa mũndũ nĩweeka naĩ kwa kũtũla ũmwe wa mĩao yakwa nyie Mwĩai Ngai atesĩ, no nginya eanĩsye maũndũ aa maatĩĩe:

3“Ethĩwa Mũthembi ũla Mũnene nĩwe ũvĩtĩtye na kũtuma andũ ala angĩ makwatwa nĩ ĩvĩtyo yĩu, no nginya anthembee nyie Mwĩai Ngai kasalũ kate kĩema kethĩwe nthembo kwondũ wa ũekeo wa naĩ yake.

4Nĩaete kasalũ kau mũvĩanĩ wa Ĩeema ĩtheu ya kũkomanĩa na Ngai na ayilĩĩla kw'oko kwake mũtwenĩ wako. Nĩoaĩe kasalũ kau vau mbee wa Mwĩai Ngai.

5Nĩvo ĩndĩ Mũthembi ũsu Mũnene wĩosa nthakame ĩmwe ya kasalũ kau na aimĩtwaa Ĩeemanĩ ĩtheu ya kũkomanĩa na Ngai.

6Nĩatole nthakamenĩ ĩsu na kyaa kyake na aimĩminzangĩsya mavinda mũonza mbee wa suka ĩla ĩvw'ĩkĩte vala Vandũ Vatheu e mbee wa Mwĩai Ngai.

7Ĩtina wa ũu Mũthembi ũsu Mũnene nĩetĩkĩsye nthakame ĩmwe mĩthyanĩ ĩna ĩla yĩ konanĩ sya kĩthembeo kya kũvĩvĩsya ũvani, kĩla kĩ Ĩeemanĩ ĩtheu ya kũkomanĩa na Ngai. Nĩatulũle nthakame ĩla ĩkũtiala ĩtinanĩ ya kĩthembeo kĩla kĩtũmĩawa kwa kũthembea nthembo sya kũvĩvw'a, kĩla kĩ mũvĩanĩ wa Ĩeema yĩu ya kũkomanĩa na Ngai.

8Kuma nyamanĩ sya kasalũ kau nĩose mathunya onthe, mathunya ala me ĩũlũ wa nyama sya nda,

9mbio syelĩ na mathunya ala me ĩũlũ wasyo vakuvĩ na kĩnyunyu, na ayumya kĩlungu kĩla kĩseo kya ĩtema.

10Mũthembi ũsu Mũnene nĩose mathunya asu na aimavĩvĩsya kĩthembeonĩ kĩla kĩthembeawa nthembo sya kũvĩvw'a, o ũndũ wĩkanaa na mathunya kuma nyamũnĩ ila syũaawa syĩthĩwe nthembo sya ngwatanĩo.

11Ĩndĩ nĩose kĩthuma, nyama syonthe sya kasalũ kau, mũtwe wako, mathaio mako, na nyama sya nda syĩ o vamwe na mũyoo wasyo,

12na ayikua aitwae vandũnĩ vatheu ũtee wa vala maeema mambĩtwe, vala mũu wĩtawa. Nĩavĩvĩsye syĩndũ isu syonthe vau na mwaki wa ngũ.

13“Ethĩwa andũ onthe ma mbaĩ ya Ĩsilaeli nĩmavĩtĩtye matesĩ kwa kũtũla ũmwe wa mĩao ya Mwĩai Ngai na ũyĩthĩa aingĩ moo maikwona ĩvĩtyo yoo,

14naĩ yoo yamina kũmanyĩka oou nĩmaete kasalũ kamwe kethĩwe nthembo kwondũ wa ũekeo wa naĩ. Maete kasalũ kau Ĩeemanĩ ĩtheu ya kũkomanĩa na Mwĩai Ngai.

15Atongoi ma andũ ma Ĩsilaeli nĩmailĩĩle moko moo mũtwenĩ wa kasalũ kau, na kayũaĩwa vau mbee wa Mwĩai Ngai.

16Mũthembi Mũnene nĩose nthakame ĩmwe ya kasalũ kau amĩtwae Ĩeemanĩ ĩtheu ya kũkomanĩa na Ngai.

17Nĩatole nthakamenĩ ĩsu na kyaa kyake na aimĩminzangĩsya mavinda mũonza mbee wa suka ĩla ĩvw'ĩkĩte Vala Vandũ Vatheu e mbee wa Mwĩai Ngai.

18Mũthembi ũsu nĩetĩkĩsye nthakame ĩmwe mĩthyanĩ ĩla yĩ konanĩ sya kĩthembeo kya kũvĩvĩsya ũvani kĩla kĩ Ĩeemanĩ ĩtheu ya kũkomanĩa na Ngai. Nĩatulũle nthakame ĩla ĩkũtiala ĩtinanĩ ya kĩthembeo kĩla kĩtũmĩawa kwa kũthembea nthembo sya kũvĩvw'a, kĩla kĩ mũvĩanĩ wa Ĩeema yĩu ya kũkomanĩa na Ngai.

19Kuma nyamanĩ sya kasalũ kau nĩose mathunya onthe na aimavĩvĩsya kĩthembeonĩ.

20Nĩekane na kasalũ kau o ũndũ wĩkanaa na kasalũ kala kathembawa kethĩwe nthembo kwondũ wa ũekeo wa naĩ. Kwa nzĩa ĩsu mũthembi akeethĩawa aumya nthembo ya kũvĩvw'a kwondũ wa naĩ ya andũ, namo makaekeawa naĩ yoo.

21Nĩvo ĩndĩ mũthembi wĩtwaa kasalũ kau ũtee wa vala maeema mambĩtwe na aikavĩvya o tondũ ũvĩvasya kasalũ kala kathembetwe kwondũ wa naĩ yake. Ĩsu nĩ nthembo ya kũvetangĩa andũ onthe naĩ.

22“Ethĩwa mũtongoi nĩweeka naĩ atesĩ kwa kũtũla ũmwe wa mĩao yakwa nyie Mwĩai Ngai, Ngai wake, e na ĩvĩtyo.

23Amanyĩthw'a ĩũlũ wa naĩ yake, nĩaumye nthembo yake ya nthenge ĩte kĩema.

24Nĩailĩĩle kw'oko kwake mũtwenĩ wa nthenge ĩsu na aimyũaĩa vala nyamũ sya nthembo ya kũvĩvw'a syũaĩawa mbee wa Mwĩai Ngai. Ĩsu nĩ nthembo kwondũ wa ũekeo wa naĩ.

25Mũthembi nĩatole nthakamenĩ ya nthenge ĩsu na kyaa kyake na aimĩvaka mĩthyanĩ ĩla yĩ konanĩ sya kĩthembeo kya nthembo sya kũvĩvw'a, na aitulũla nthakame ĩla ĩkũtiala ĩtinanĩ ya kĩthembeo kĩu.

26Nĩvo ĩndĩ wĩvĩvĩsya mathunya ma nthenge ĩsu kĩthembeonĩ, o ũndũ mathunya ma nyamũ ila syũaĩtwe syĩthĩwe nthembo ya ngwatanĩo mavĩvaw'a. Kwa nzĩa ĩsu mũthembi akeethĩwa aumya nthembo ĩsu ya kũvĩvw'a kwondũ wa naĩ ya mũtongoi, nake mũtongoi ũsu aiekewa naĩ yake.

27“Ethĩwa mũndũ ũngĩ kuma andũnĩ ma mbaĩ ya Ĩsilaeli nĩweeka naĩ kwa kũtũla ũmwe wa mĩao ya Mwĩai Ngai atevangĩte kwĩka ũu,

28na aimanyĩthw'a ĩũlũ wa naĩ yake, nĩaumye nthembo yake ya mbaika ĩte kĩema kwondũ wa naĩ ĩla wĩkĩte.

29Nĩailĩĩle kw'oko kwake mũtwenĩ wa mbaika ĩsu na aimyũaĩa ngalĩkonĩ ya ĩũlũ ya kĩthembeo, vala nyamũ sya nthembo ya kũvĩvw'a syũaĩawa.

30Mũthembi nĩatole nthakamenĩ ya mbaika ĩsu na kyaa kyake, na aimĩvaka mĩthyanĩ ĩla yĩ konanĩ sya kĩthembeo kya nthembo ya kũvĩvw'a, na aitulũla nthakame ĩla ĩkũtiala ĩtinanĩ ya kĩthembeo kĩu.

31Nĩvo ĩndĩ mũthembi wĩumya mathunya onthe ma mbaika ĩsu o ũndũ mathunya ma nyamũ ila syũaawa syĩthĩwe nthembo sya ngwatanĩo maumaw'a. Nĩavĩvĩsye mathunya asu kĩthembeonĩ nĩ kana methĩwe mũuke mũseo ũla ũmbendeeasya nyie Mwĩai Ngai. Kwa nzĩa ĩsu mũthembi akeethĩawa aumya nthembo ĩsu ya kũvĩvw'a kwondũ wa naĩ ya mũndũ ũsu, nake ũ mũndũ aiekewa naĩ yake.

32“Ethĩwa mũndũ nĩwaete ĩlondu yĩthĩwe nthembo kwondũ wa ũekeo wa naĩ, no nginya yĩthĩwe ĩlondu ĩka yĩte kĩema.

33Nĩailĩĩle kw'oko kwake mũtwenĩ wa ĩlondu yĩu na aiyũaĩa vala nyamũ sya nthembo ya kũvĩvw'a syũaĩawa.

34Mũthembi nĩatole nthakamenĩ ya ĩlondu yĩu na kyaa kyake na aimĩvaka mĩthyanĩ ĩla yĩ konanĩ sya kĩthembeo kya nthembo sya kũvĩvw'a, na aitulũla nthakame ĩla ĩkũtiala ĩtinanĩ ya kĩthembeo kĩu.

35Nĩvo ĩndĩ wĩumya mathunya onthe ma ĩlondu yĩu o ũndũ mathunya ma ĩlondu yĩla yũaawa yĩthĩwe nthembo sya ngwatanĩo maumaw'a. Nĩavĩvanĩsye mathunya asu vamwe na nthembo ila ingĩ sya kũvĩvw'a syumĩaw'a Mwĩai Ngai. Kwa nzĩa ĩsu mũthembi akeethĩawa aumya nthembo ĩsu ya kũvĩvw'a kwondũ wa naĩ ya mũndũ ũsu, nake ũ mũndũ aiekewa naĩ yake.

← Chapter 3 Jump to: Chapter 5 →