Leviticus 7

Kamba (MBIVILIA ŨVOO MŨSEO)

← Chapter 6 Jump to: Chapter 8 →

1“Aa nĩmo motw'ĩo ala maĩlĩte kũatĩĩwa yĩla nthembo kwondũ wa mavĩtyo ĩkumw'a, ĩla nĩ nthembo ntheu:

2Nyamũ ya nthembo kwondũ wa mavĩtyo yaĩlĩte kũaĩwa vala nyamũ sya nthembo sya kũvĩvw'a syũaĩawa. Nthakame ya yo ĩminzangĩw'e ngalĩkonĩ inya sya kĩthembeo.

3Mathunya ma nyamũ ĩsu onthe nĩmaumw'e na maivĩvĩw'a kĩthembeonĩ, methĩwe nthembo: Mathunya ma mwĩthe, mathunya ala me ĩũlũ wa nyama sya nda,

4mbio syelĩ na mathunya ala me ĩũlũ wasyo vakuvĩ na kĩnyunyu, o vamwe na kĩlungu kĩla kĩseo kya ĩtema.

5Mũthembi nĩavĩvĩsye mathunya asu onthe kĩthembeonĩ methĩwe nthembo ya kũvĩvw'a na mwaki ĩthembewe Mwĩai Ngai; ĩsu nĩ nthembo kwondũ wa mavĩtyo.

6Mũndũ-ũme o na wĩva kuma mũsyĩnĩ wa athembi nũtonya kũya nthembo ĩsu. Nthembo ĩsu yaĩlĩte kũĩĩwa vandũ vatheu, nũndũ nĩ ntheu mũno.

7“Ve ũtw'ĩo wa mũthemba ũmwe ũla waĩlĩte kũatĩĩwa yĩla nthembo kwondũ wa ũekeo wa naĩ na nthembo kwondũ wa mavĩtyo ikumw'a, naw'o nĩ kana nyama sya nthembo isu syaĩlĩte kwĩthĩwa syĩ sya mũthembi ũla ũkumya nthembo ĩsu ya kũvĩvw'a.

8Kĩthuma kya nyamũ ĩla yumĩtw'e nĩ mũndũ yĩthĩwe nthembo ya kũvĩvw'a nĩ kya mũthembi ũla waumya nthembo ĩsu.

9Nthembo syonthe sya ngetha ya mbaa mbeke ila iuĩwe ĩikonĩ, kalaĩnĩ kavũthũ, kana kalaĩnĩ ka mĩkate nĩ sya mũthembi ũla waumĩsya Ngai nthembo ĩsu.

10Ĩndĩ nthembo ya ngetha ya mbaa mbeke ĩla ĩte ndue, o na ethĩwa nĩ mbulany'e na mauta kana ti mbulany'e, nĩ ya ana ma Alũni onthe ala nĩ athembi na no nginya mamĩaane ilungu syĩanene.

11“Aa nĩmo motw'ĩo ala maĩlĩte kũatĩĩwa yĩla mũndũ ũkumĩsya Mwĩai Ngai nthembo ya ngwatanĩo.

12Ethĩwa mũndũ eumya nthembo ĩsu yĩthĩwe nthembo ya kũtũngĩa Ngai mũvea, aumanĩsye nyamũ ĩsu ĩkũthembwa na nthembo ya ilungu sya mũkate ũvulanĩtw'e na mauta na ũuĩtwe ũte mbota, tũmĩkate tũvũthũ tũvake mauta tũuĩtwe tũte mbota, na mĩkate ĩngĩ ĩuĩtwe na mũtu mũvinyu ũkimĩtwe nesa na ũvulanĩtw'e na mauta.

13O vamwe na nthembo ĩsu ya ngwatanĩo ya kũtũnga mũvea, mũndũ ũsu nĩaumye nthembo ya mĩkate ĩuĩtwe na mũtu wĩkĩĩtwe mbota.

14Nĩaumye kĩlungu kĩmwe kya kĩla mũthemba wa mĩkate ĩsu kĩthĩwe nthembo ya mwanya kũla kwĩ Mwĩai Ngai. Kĩlungu kĩu nĩ kya mũthembi ũla wosaa nthakame ya nyamũ ĩsu akamĩminzangĩsya kĩthembeonĩ.

15Nyama sya nyamũ ĩla yumĩtw'e nĩ mũndũ yĩthĩwe nthembo ya ngwatanĩo kwondũ wa kũtũnga mũvea no nginya iĩwe mũthenyanĩ o ũla syathembwa. Mũthembi ndaĩlĩte kũtialya nyama o na ĩmwe yĩkale nginya ũnĩ ũsu ũngĩ kwakya.

16“Ethĩwa mũndũ nĩwaete nthembo ya ngwatanĩo yĩthĩwe nthembo ya kwĩanĩĩsya wĩvĩto, kana yĩthĩwe nthembo ya kumya na ngoo ya kwenda, nthembo ĩsu yalea kũĩwa ĩthele mũthenyanĩ ũla yathembwa, ĩla yatiala nĩtonya kũĩwa ũnĩ ũsu.

17Nyama o na yĩva ya nthembo ĩla ĩkũtiala ĩvikye mũthenya wa katatũ no nginya ĩvĩvw'e ĩthele.

18Ethĩwa nyama o na yĩva ya nthembo ĩsu nĩyaĩwa mũthenyanĩ wa katatũ, nyie Ngai ndiĩtĩkĩla mũndũ ũsu; mũndũ ũsu ndimũtalĩla ta wumĩtye nthembo, nayo nthembo ĩsu yĩtalwa ta nthembo ĩte ntheu, na mũndũ ũla wĩmĩya no nginya aĩvĩe naĩ yake.

19Ethĩwa nyama o na yĩva nĩyakiita kĩndũ o na kĩva kĩte kĩtheu, nyama ĩsu ndyaĩlĩte kũĩwa, ĩndĩ yaĩlĩte kũvĩvw'a. “Mũndũ o na wĩva ũla wĩtheetye nũtonya kũya nyama ĩla nthembewe,

20ĩndĩ ethĩwa mũndũ ũtetheetye nĩwaya nyama isu sya nthembo ya ngwatanĩo, ũsu akaeka kũtalwa ta ũmwe wa andũ makwa nyie Ngai.

21O ta ũu ethĩwa mũndũ o na wĩva nĩwaya nyama sya nthembo ĩsu ĩtina wa kũkiita kĩndũ o na kĩva kĩte kĩtheu, o na ethĩwa nĩ kuma mũndũnĩ kana nyamũnĩ, mũndũ ũsu akaeka kũtalwa ta ũmwe wa andũ ma Ngai.”

22Mwĩai Ngai nĩwanengie Mwose motw'ĩo aa amwĩa atĩĩ,

23“Neena na andũ ma Ĩsilaeli ũmee kana mayaĩlĩte kũya mathunya ma ng'ombe, mbũi kana ma malondu.

24Mathunya ma nyamũ yeethĩwa yĩ ngw'ũ kana yũaĩtwe nĩ nyamũ ya kĩthekanĩ mayaĩlĩte kũĩwa, ĩndĩ nĩmatonya kũtũmĩwa kwondũ wa mavata angĩ.

25Mũndũ o na wĩva ũla wĩya mathunya ma nyamũ ĩla ĩtonya kumĩw'a Mwĩai Ngai ta nthembo ya kũvĩvw'a, akaeka kũtalwa ta ũmwe wa andũ ma Ngai.

26Andũ ma Ĩsilaeli mayaĩlĩte o na vanini kwĩsa kũya nthakame ya nyũnyi kana ya nyamũ ta lĩu me vala matwĩe o na ethĩwa nĩva.

27Mũndũ o na wĩva ũla wĩtũla mwĩao ũsu akaeka kũtalwa ta ũmwe wa andũ makwa nyie Ngai.”

28Mwĩai Ngai nĩwanengie Mwose motw'ĩo aa amwĩa atĩĩ,

29“Neena na andũ ma Ĩsilaeli ũmee kana mũndũ o na wĩva ũla ũkumya nthembo ya ngwatanĩo no nginya ambumĩsye nyie Mwĩai Ngai kĩlungu kĩmwe kyayo ta mũthĩnzĩo wa mwanya.

30We mwene no nginya aete kĩlungu kĩu kya nthembo ya kũvĩvw'a akĩkuite na moko make. Nĩaete mathunya ma nyamũ ĩsu vamwe na nyama ya kĩng'eng'eeto nĩ kana numĩw'e nyama ĩsu yĩthĩwe nthembo ya kũkĩlw'a.

31Mũthembi nĩavĩvĩsye mathunya asu kĩthembeonĩ, ĩndĩ nyama ĩsu ya kĩng'eng'eeto ĩyĩthĩwa yĩ ya athembi.

32Nyama ya kũũ kwa ĩtina kwa ngalĩko ya kw'oko kwa aũme kwa nyamũ ĩsu ĩnenganwe ta nthembo ya mwanya

33kũla kwĩ mũthembi ũla ũkumya nthembo ya ngwatanĩo ya nthakame na mathunya.

34Nyama ya kĩng'eng'eeto kya nyamũ ĩla ĩkumw'a nthembo ya kũkĩlw'a, na nyama ya kũũ kwa ĩtina kwa ngalĩko ya kw'oko kwa aũme kwa nyamũ ĩsu, nĩ nthembo ya mwanya ĩla nyie Mwĩai Ngai nosete kuma andũnĩ ma Ĩsilaeli na ngamĩnenga athembi. Andũ ma Ĩsilaeli no nginya manengae athembi nyama isu ĩvindanĩ yonthe yĩla yũkĩte.

35Kĩu nĩkyo kĩlungu kya Alũni na ana make kuma nthembonĩ ila nyie Mwĩai Ngai numĩaw'a kwa kũvĩvw'a, kĩla manengiwe mũthenya ũla matw'ĩkĩthiw'e athembi.

36Mũthenyanĩ o ũsu matw'ĩkĩthiw'e athembi nĩw'o nyie Mwĩai Ngai neeaĩie andũ ma Ĩsilaeli manengae athembi kĩlungu kĩu kya nthembo. Andũ ma Ĩsilaeli maĩlĩte kwĩanĩsya ũtw'ĩo ũsu ĩvindanĩ yonthe yĩla yũkĩte.”

37Asu nĩmo motw'ĩo ala maĩlĩte kũatĩĩwa yĩla nthembo sya kũvĩvw'a, nthembo sya ngetha ya mbaa mbeke, nthembo kwondũ wa ũekeo wa naĩ, nthembo kwondũ wa mavĩtyo, nthembo ila syumaw'a ĩvindanĩ yĩla mũndũ ũkũtw'ĩkĩthw'a mũthembi, na nthembo sya ngwatanĩo ikumw'a.

38Mwĩai Ngai anengeie Mwose mĩao ĩsu Kĩĩmanĩ kya Sinaĩ kĩla kĩ weũnĩ, mũthenyanĩ ũla weeie andũ ma Ĩsilaeli mamumĩsye nthembo syoo.

← Chapter 6 Jump to: Chapter 8 →

Recommended Reading

Commentary Leviticus Commentaries → Devotional Leviticus Devotional Guide → Get This Bible Kamba (MBIVILIA ŨVOO MŨSEO) Study Bible →