Numbers 36

Khmer (ព្រះគម្ពីរបរិសុទ្ធកែសម្រួល ២០១៦)

← Chapter 35 Jump to:

1ពួកមេលើវង្សា‌នុវង្សនៃពូជអំបូរកូនចៅកាឡាដ ជាកូនរបស់ម៉ាគារ ដែលត្រូវជាកូនរបស់ម៉ាណា‌សេ ក្នុងពូជអំបូរកូនចៅយ៉ូសែប នាំគ្នាចូលមកជម្រាបនៅចំពោះមុខលោកម៉ូសេ និងពួកមេដឹកនាំ ជាមេលើវង្សា‌នុវង្សរបស់ឪពុកនៃកូនចៅអ៊ីស្រា‌អែលថា៖

2«ព្រះ‌យេហូវ៉ាបានបង្គាប់មកលោកម្ចាស់យើងខ្ញុំ ឲ្យចែកស្រុកជាមត៌កដល់កូនចៅអ៊ីស្រា‌អែល ដោយចាប់ឆ្នោត ហើយលោកម្ចាស់យើងខ្ញុំក៏បានទទួលបង្គាប់ព្រះ‌យេហូវ៉ា និងចែកមត៌ករបស់ស្លូផិហាត ជាបងប្អូនយើងខ្ញុំ ដល់ពួកកូនស្រីរបស់គាត់។

3ប៉ុន្ដែ ប្រសិន‌បើពួកនាងរៀបការជា‌មួយកូនប្រុសៗ នៅក្នុងកុល‌សម្ព័ន្ធផ្សេងទៀតរបស់កូនចៅអ៊ីស្រា‌អែល នោះមត៌ករបស់ពួកនាងនឹងត្រូវដកចេញពីមត៌កដូនតារបស់យើងខ្ញុំ ទៅថែមបញ្ចូលក្នុងមត៌ករបស់កុល‌សម្ព័ន្ធដែលពួកនាងរៀបការនោះវិញ ដូច្នេះ មត៌កនោះនឹងត្រូវដកចេញពីចំណែកមត៌ករបស់យើងខ្ញុំ។

4លុះចូលដល់ឆ្នាំប្រោសលោះ សម្រាប់កូនចៅអ៊ីស្រា‌អែល នោះមត៌ករបស់ពួកនាងនឹងត្រូវរាប់បញ្ចូលទៅក្នុងមត៌ករបស់កុល‌សម្ព័ន្ធដែលពួកនាងបានរៀបការ ហើយមត៌ករបស់ពួកនាងនឹងត្រូវដកចេញពីមត៌ករបស់កុល‌សម្ព័ន្ធឪពុកយើងខ្ញុំ»។

5ពេលនោះ លោកម៉ូសេបានបង្គាប់កូនចៅអ៊ីស្រា‌អែល តាមព្រះ‌បន្ទូលរបស់ព្រះ‌យេហូវ៉ាថា៖ «កុល‌សម្ព័ន្ធនៃកូនចៅរបស់យ៉ូសែបនិយាយត្រូវ។

6នេះជាសេចក្ដីដែលព្រះ‌យេហូវ៉ាបង្គាប់ ពីដំណើរនៃពួកកូនស្រីរបស់ស្លូផិហាត គឺថា ចូរឲ្យពួកនាងរៀបការជា‌មួយអ្នកដែលខ្លួនចូលចិត្តចុះ ប៉ុន្តែ ត្រូវរៀបការតែក្នុងពូជអំបូរនៃកុល‌សម្ព័ន្ធរបស់ឪពុកនាងប៉ុណ្ណោះ

7ដើម្បីកុំឲ្យមត៌ករបស់កូនចៅអ៊ីស្រា‌អែល ត្រូវផ្ទេរពីកុល‌សម្ព័ន្ធមួយទៅកុល‌សម្ព័ន្ធមួយផ្សេងទៀត ដ្បិតកូនចៅអ៊ីស្រា‌អែលទាំងអស់ត្រូវរក្សាមត៌ករបស់កុល‌សម្ព័ន្ធនៃបុព្វ‌បុរសរបស់ខ្លួន។

8គ្រប់ទាំងកូនស្រីដែលទទួលមត៌កនៅក្នុងកុល‌សម្ព័ន្ធណាមួយនៃកូនចៅអ៊ីស្រា‌អែល ត្រូវតែរៀបការជា‌មួយបុរសដែលមកពីពូជអំបូរនៃកុល‌សម្ព័ន្ធរបស់ឪពុកនាង ដើម្បីឲ្យកូនចៅអ៊ីស្រា‌អែលទាំងអស់អាចកាន់កាប់មត៌ករបស់ឪពុកគេរៀងខ្លួន។

9ដូច្នេះ មិនត្រូវផ្ទេរមត៌កពីកុល‌សម្ព័ន្ធមួយ ទៅកុល‌សម្ព័ន្ធមួយផ្សេងទៀតឡើយ ដ្បិតកុល‌សម្ព័ន្ធនៃកូនចៅអ៊ីស្រា‌អែល ត្រូវនៅជាប់នឹងមត៌ករបស់គេរៀងខ្លួន»។

10ពួកកូនស្រីរបស់ស្លូផិហាតបានធ្វើដូចព្រះ‌យេហូវ៉ាបានបង្គាប់លោកម៉ូសេ

11ដ្បិតម័សឡា ធើសា ហុកឡា មីលកា និងណូហា ជាកូនស្រីរបស់ស្លូផិហាត បានរៀបការជា‌មួយកូនប្រុសរបស់បងប្អូនឪពុកពួកនាងគ្រប់គ្នា។

12ពួកនាងបានរៀបការក្នុងពូជអំបូរកូនចៅម៉ាណា‌សេ ជាកូនរបស់យ៉ូសែប ហើយមត៌ករបស់ពួកគេក៏បាននៅជាប់ក្នុងកុល‌សម្ព័ន្ធនៃពូជអំបូររបស់ឪពុកពួកនាងតទៅ។

13នេះហើយជាបញ្ញត្តិ និងច្បាប់ទាំងប៉ុន្មានដែលព្រះ‌យេហូវ៉ាបានបង្គាប់ដល់កូនចៅអ៊ីស្រា‌អែល ដោយ‌សារលោកម៉ូសេ នៅវាលទំនាបស្រុកម៉ូអាប់ ក្បែរទន្លេយ័រ‌ដាន់ ទល់មុខក្រុងយេរីខូរ។:៚

← Chapter 35 Jump to: