2 Corinthians 10

Luganda (BIBU1) (BIBULIYA ENTUKUVU)

← Chapter 9 Jump to: Chapter 11 →

1Nze, Pawulo, nzennyini mbeegayiridde mu buteefu n'eggonjebwa ebya Kristu, nze omwetoowaze bw'emba nga tugasimbaganye, naye bwe mba ewala abagambisa amaanyi,

2mbeegayiridde nti nga ndi nammwe mumponye okukozesa amaanyi n'okwemanya bye njagala okukozesa eri abo abatuteebereza okuba nga tweyisa mu ngeri ya nsi.

3Weewaawo tukyali mu nsi, naye olutalo tetulwana lwa mu nsi,

4kubanga eby'okulwanyisa bye tukozesa mu lutabaalo lwaffe si bya mu nsi, wabula ebyo ebirina amaanyi ga Katonda okuzikiriza ebigo;

5tumenya okuwakanawakana na buli ekigulumira okuziyiza okumanya Katonda; buli kirowoozo kyonna tukiwamba ne tukigondeza Kristu,

6nga twetegese okubonereza obutawulira bwonna amangu ddala nga mumaze okufuuka abawulize.

7Mutunuulire ekyo ekibali mu maaso: oyo eyeekakasa nti wa Kristu, addemu yejjukize nti wa Kristu, ate nti naffe bwe tuli.

8Ne bwe naddamu okwetenda ne mpitirizaamu olw'obuyinza Omukama bwe yatuwa olw'okubazimba, sso si olw'okubazikiriza, ekyo tekijja kunkwasa nsonyi.

9Sandyagadde kubeera ng'abakanga n'amabaluwa.

10Anti mbiwulira nti: “Sso ebbaluwa ze nzito, za maanyi; naye bw'aba awo, munafu n'ebigambo bye obigaya.”

11Oyo ayogera atyo ategeere nti bye twogera mu bbaluwa nga tetuli eyo, bye tukola nga tuli eyo.

12Ffe tetuguma kwesimba ku abo wadde okwegeranya n'abo abeetenda. Naye bwe beefuula omu olugero lwa munne, ne beegeranya bokka na bokka, baba tebategeera.

13Ffe tetujja kwetenda kusukkiriza, wabula tujja kwekuumira mu lugero Katonda lwe yatuwa, nti tusobodde mmwe okubatuuka.

14Tetusukka we twapimirwa ng'abataabatuukako; ate nno ffe twasookera ddala okubatuukako, nga tujja n'Evangili ya Kristu.

15Awo nno tetwetendera mu by'abalala bye baakola kisukkiridde. Naye okukkiriza kwammwe bwe kunaaba kunnywedde, omulimu gwaffe mu mmwe tusuubira okugugaziyiza ddala okusinziira ku bipimo byaffe,

16tuyigirize Evangili tusukke n'ewammwe, nga tetutaddeeko kwetenda olw'omulimu ogwakolebwa edda awalala.

17Eyeetenda, yeetendere mu Mukama.

18Kubanga eyeetenda yekka si y'asiimwa, wabula oyo Katonda gw'atenda.

← Chapter 9 Jump to: Chapter 11 →