2 Corinthians 12

Luganda (BIBU1) (BIBULIYA ENTUKUVU)

← Chapter 11 Jump to: Chapter 13 →

1Nina okwetenda; kino temuli mugaso, naye era ka ntuuke ku Mukama bye yandaga ne bye yambikkulira.

2Mmanyi omuntu omu mu Kristu, emyaka kkumi n'ena emabega, eyasitulibwa n'atwalibwa mu ggulu eryokusatu. Oba yali mu mubiri oba si mu mubiri, simanyi; Katonda y'amanyi.

3Mmanyi ng'omuntu oyo, yasitulibwa n'atwalibwa mu kifo ky'okwesiima, oba yali mu mubiri, oba si mu mubiri, simanyi; Katonda y'amanyi,

4n'awulira ebigambo ebitayogerekeka, omuntu by'atakkirizibwa kwogera.

5Neetenda ku lw'omuntu ono, naye nze ku lwange sijja kwetenda okuggyako mpozzi obuteeyinza bwange.

6Bwe njagala okwetenda, sandibadde musiru, kubanga naaba njogera mazima. Naye sijja kukikola, wabulewo andowoozaako ebisinga ku ebyo by'andabamu oba by'ampulirako.

7Okunziyiza okwewanika olw'ebiyitirivu ebyambikkulirwa, naweebwa eriggwa mu mubiri gwange, malayika wa Sitaani ankube, nneme kwewanika.

8Nawanjagira Omukama emirundi esatu kinveeko;

9yanziramu kimu nti: “Eneema yange ekumala; amaanyi gange geeragira mu bunafu.” Awo nno nzija kweetendera mu bunafu bwange n'okusingawo ate nga ndi musanyufu, amaanyi ga Kristu galyoke gambeereko.

10Ku lwa Kristu kyenva nsanyukira mu bunafu bwange, mu bivumo, mu bizibu, mu biyigganyizo ne mu bubenje, kubanga bwe mba omunafu lw'emba ow'amaanyi.

11Nasiriwadde! Mmwe mubinjagazizza, anti mmwe mwandibadde ab'okutenda. Anti ddala siri mutene mu maaso g'abo abatume abakulu, newandibadde nga siri kantu.

12Obubonero obulaga omutume yennyini bwakolebwa mu mmwe mu bugumiikiriza bwonna mu bubonero, ebyewuunyo n'ebikolwa eby'amaanyi.

13Kale mmwe muli bubi ki okusinga ekleziya endala? Mpozzi kimu kyokka, nze obutabaako kye mbakaluubirizaamu. Ensobi eno muginsonyiwe.

14Anti nzuuno neetegese okujja ewammwe omulundi ogwokusatu; era sijja kubaako kye mbakaluubirizaamu, kubanga ebyammwe si bye nnoonya, wabula mmwe. Anti abaana si be baterekera ababazaala, wabula abazadde be baterekera abaana.

15Naye nze nzennyini nzija kwewaayo nga ndi musanyufu, era nzija kuweebwayo olw'okubeera emyoyo gyammwe. Bwe mbaagala bwe ntyo, ate olwo mmwe ne mukendeeza mu ku njagala?

16Weewaawo saabakaluubiriza nzennyini, naye nali mukalabakalaba, ne mbafunira mu bukujjukujju.

17Waliwo omu ku abo be nabatumira gwe nayitamu okubalyakula?

18Neegayirira Tito ajje, ne mutumirako n'owooluganda. Tito ye yabalyakula? Ffembi tetwali ba mutima gumu? Ekisinde tetwakwata kimu?

19Kati nno obwedda mulowooza nti twewozaako gye muli? Tubadde twogera mu maaso ga Katonda mu Kristu, nga mu byonna, abaagalwa, tugenderera kubazimba.

20Naye ntya nti oboolyawo nnyinza okujja ne sibasanga nga bwe nandyagadde, nange ne mutansanga nga bwe mwandyagadde; oboolyawo ne wabaawo mpaka, buggya, busungu, kwefaako, kuwaayiriza, ŋŋambo, lunkulu, kutabangula.

21Era ntya nti oboolyawo bwe najja eyo Katonda yandintoowaza mu maaso gammwe, ne nkaabira abangi abayonoona edda naye nga tebanneenenya eby'obuseegu, obwenzi n'obugwenyufu bye baakola.

← Chapter 11 Jump to: Chapter 13 →