2 Corinthians 4

Luganda (BIBU1) (BIBULIYA ENTUKUVU)

← Chapter 3 Jump to: Chapter 5 →

1Katonda yamala okutukwasa omulimu guno olw'ekisa kye, tetuterebuka.

2Twemansulira ddala empisa eziswaza ez'enkiso; tetuliimu bukujjukujju oba okulimbisa Ekigambo kya Katonda; tweyogerako kyere mu mazima eri buli muntu mu maaso ga Katonda.

3Oba Evangili yaffe ekyabikkiddwa, ab'okuzikirira b'ebeerera embikke;

4beebo abatakkiriza, lubaale w'ensi eno baazibye amaaso n'abagaana okulaba ekitangaala ky'Evangili y'ekitiibwa kya Kristu, abeera ekifaananyi kya Katonda.

5Ffe gwe tulangirira si ye ffe ffennyini, wabula Kristu Yezu nti ye Mukama; ate ffe nti tuli baweereza bammwe ku bwa Yezu.

6Kubanga Katonda eyalagira nti: “Ekitangaala kyake okuva mu kizikiza,” y'oyo eyaleeta ekitangaala mu mitima gyaffe, mwakiremu ekitangaala eky'okumanya ekitiibwa kya Katonda, ekitangalijjira mu maaso ga Yezu.

7Ekkula lino tulitwalira mu bibya bya bbumba, kyerage lwatu nti amaanyi amasukkirivu ga Katonda, si gaffe.

8Tunyigirizibwa ku njuyi zonna, naye tetugonda; tusobezebwa, naye tetuterebuka;

9tuyigganyizibwa, naye tetwabulirwa; tukubwa wansi naye tetuttibwa.

10Bulijjo okufa okwa Yezu tuyita nakwo mu mubiri gwaffe, obulamu bwa Yezu busobole okulabikira mu mubiri gwaffe.

11Nga tukyali balamu, bulijjo tugenda tuweebwayo mu kufa olw'okubeera Yezu, obulamu bwa Yezu busobole okulabika mu mubiri gwaffe ogw'okufa.

12Mu ffe nno kufa kwe kukola, naye mu mmwe bulamu.

13Ng'omwoyo ogw'okukkiriza gwe tulina gwe gumu n'ogw'oyo eyawandiika nti: “Nakkiriza, kyennava njogera,” naffe tukkiriza, kyetuva twogera,

14nga tumanyi nti eyazuukiza Omukama Yezu naffe alituzuukiza wamu ne Yezu, n'atutwala wamu nammwe gy'ali.

15Byonna ebyo lwa kubeera mmwe, ennema gy'ekomya okusaasaana n'etuuka ku bangi, gy'eba eyongera n'okwaza okwebaza ku lw'ekitiibwa kya Katonda.

16Kyetuva tutaterebuka; kuno kungulu ne bwe tukenena, muli munda tuzzibwa buggya buli lunaku.

17Zino ennaku entono ez'akadde kano zitutegekera ettu eritaggwaawo ery'ekitiibwa ekitageraageranyizika,

18kubanga tetufa ku bino ebirabika, wabula ku biri ebitalabika; anti bino ebirabika biyita buyisi, naye biri ebitalabika tebiggwaawo.

← Chapter 3 Jump to: Chapter 5 →