2 Corinthians 9

Luganda (BIBU1) (BIBULIYA ENTUKUVU)

← Chapter 8 Jump to: Chapter 10 →

1Seetaaga kubawandiikira ku by'okuyamba abatuukirivu,

2kubanga mmanyi bwe mukyagala; era ku kino mbadde mbatenda mu bantu b'omu Masedoniya, nga mbagamba nti Akayiya yo neetegefu n'okuva mu mwaka guli. Entakabana gye mutakabanyeemu ekakamudde bangi ddala.

3Naye ntumye abooluganda okwenyumiriza kwaffe kwe tubeenyumirizaamu kuleme kubeera kwa busa mu kintu kino. Nammwe mubeere beetegefu nga bwe nagamba,

4sikulwa ng'ab'omu Masedoniya bajja nange ne basanga nga temwetegese; mmwe nga siboogeddeeko, ekyo ffe kyandikubye ensonyi okuba nga twabeesiga.

5Kyennava nteesa okusaba abooluganda banneesookeyo gye muli; okusonda kwe mwetema bakutegekerewo; kubeere nga kutegeke ng'ekirabo ekiweeseddwa okwagala, sso si ekikake.

6Kino kikulu: asiga ekitono, alikungula kitono; asiga mu bungi, alikungula mu bungi.

7Buli muntu awe nga bwe yateesa mu mutima gwe; tawa ng'aganiriza, oba na kukakibwa, kubanga Katonda ayagala agaba nga musanyufu.

8Katonda ayinza okubawa buli mukisa gwonna mu buyitirivu, mulyoke bulijjo mubeere na byonna ebibamala, era musobole okuwa mu buyitirvu eby'okukola emirimo emirala gyonna emirungi.

9Nga bwe kyawandiikibwa nti: “Yamansa n'agabira abaavu; obutuukirivu bwe busigalawo emirembe gyonna.”

10Oyo alabira omusizi ensigo n'omugati ogw'okulya agenda kubawa ensigo yammwe, n'ebibala byammwe eby'obutuukirivu abiwe okwala.

11Mujja kugaggawazibwa mu buli kintu musobole okugaba; ebyo binaayitanga ku ffe ne bifuuka okwebaza Katonda.

12Kubanga okukola omulimu guno tekugasa kufunira batuukirivu bibabulako kyokka, naye era kwongera abantu okwebaza Omukama.

13Okulaba kye mukoze ekyo, bajja kutendereza Katonda nga balabye bwe mukkiriza ne mwatula Evangili ya Kristu, n'engeri gye mulumiddwa omutima ne mubayamba, bo n'abalala bonna.

14N'essaala zaabwe ku lwammwe ziryoleka nga bwe babaagala olw'eneema empitirivu Katonda gy'abawadde.

15Katonda yeebale olw'ekirabo kye kino ekitanyumizika.

← Chapter 8 Jump to: Chapter 10 →