2 Corinthians 3

Luganda (BIBU1) (BIBULIYA ENTUKUVU)

← Chapter 2 Jump to: Chapter 4 →

1Tuttukizza buto okwetenda? Oba okufaanana ng'abalala naffe twetaaga bbaluwa ey'okutwanjula gye muli oba eva gye muli?

2Mmwe mwennyini mmwe bbaluwa yaffe; yawandiikibwa mu mitima gyaffe, emanyibwe era esomebwe abantu bonna.

3Mweragira ddala nti mmwe bbaluwa eva ewa Kristu gye twawandiika; etaawandiikibwa mu bwino, wabula eyawandiikibwa ne Mwoyo wa Katonda omulamu; si ku mpande za mayinja, wabula ku mpande z'emitima gyammwe egy'obuntu.

4Obwesige bwe tulina mu Katonda bwe butyo bwe buli obw'amaanyi ku bwa Kristu.

5Si kubanga tulina ke tusobola ku bwaffe, tulyoke tugambe nti waliwo akava gye tuli, wabula obusobozi bwaffe butuviira wa Katonda,

6eyatusaanyiza okubeera abaweereza n'endagaano empya etali ya nnukuta mpandiike, wabula eya Mwoyo; anti ennukuta empandiike ereeta kufa, sso Mwoyo aleeta bulamu.

7Oba omulimu oguleeta olumbe, ogwayolebwa ku mayinja mu nnukuta gwalina ekitiibwa ekyenkana awo, nga n'abaana ba Yisirayeli tebasobola kutunuulira Musa mu maaso olw'okutemagana kwago, sso nga kwali kwa kaseera buseera,

8omulimu ogwa Mwoyo gunaalema gutya okusinzaawo ekitiibwa?

9Oba omulimu oguleeta omusango gwalina ekitiibwa, omulimu oguleeta obutuukirivu guteekwa okusinzaawo ddala ekitiibwa.

10Ddala ku nsonga eno, ekyali eky'ekitiibwa luli kyatuuka obutakyaba na kitiibwa olw'ekitiibwa kiri ekiyitirivu okukisinga.

11Ddala oba ekyaggwaawo kyajjira mu kitiibwa ekitaggwaawo, ekisigalawo kiteekwa nno okuba n'ekitiibwa ekisingawo.

12Nga bwe tulina essuubi eryenkana awo, tuli bagumu.

13Tetuli nga Musa eyeebikkanga ekiremba ku maaso abaana ba Yisirayeli baleme kutunuulira nkomerero ya kitiibwa ekyali kizimeera.

14Kati nno emitima gyabwe gyaguguba; n'okutuusa ku lunaku luno olwa leero, bwe basoma endagaano enkadde ekiremba kye kimu kisigala tekibikuddwa, anti kisobola kuggyibwawo Kristu yekka.

15N'okutuusa ku lunaku luno olwa leero Musa buli lw'asomebwa, ekiremba kibisse emitima gyabwe;

16naye omuntu oludda ew'Omukama nga kiggyibwawo.

17Omukama oyo ye Mwoyo; ate Mwoyo w'Omukama w'abeera, wabeerawo ddembe.

18Sso ffenna n'amaaso gaffe agatali mabikkeko twakaayakana n'ekitiibwa ky'Omukama, tugenda tufuulibwa nga twekwanya ekifaananyi kye nga bwe tweyongera ekitiibwa ku kitiibwa. Anti ekyo kiva ku Mukama abeera Mwoyo.

← Chapter 2 Jump to: Chapter 4 →