Hebrews 1

Luganda (BIBU1) (BIBULIYA ENTUKUVU)

Jump to: Chapter 2 →

1Edda Katonda yayogeranga ne bajjajjaffe emirundi mingi ate mu ngeri ezitali zimu ng'ayita mu balanzi;

2ddaaki mu nsangi zino ez'oluvannyuma n'ayogera naffe mu Mwana gwe yawa okusikira byonna; mu oyo mwe yatondera ensi.

3Ye kwe kutangalijja kw'ekitiibwa kya Katonda, ye nfaanana ye yennyini, awanirira obutonde bwonna n'amaanyi g'ekigambo kye. Bwe yamala abantu okubatukuzaako ebibi, n'atuula ku gwa ddyo gw'Oweekitiibwa ali waggulu,

4ng'amaze okusukkulumizibwa n'okusinga bamalayika kyenkana ng'erinnya lye yasikira bwe libasukkiridde ekitiibwa.

5Kale malayika ani Katonda gwe yali agambye nti: “Ggwe oli Mwana wange, olwa leero nkuzadde”? Oba era nti: “Ndibeera Kitaawe, naye alibeera mwana wange”?

6Ate era bw'aba ayingiza Omwana we omuggulanda mu nsi, agamba nti: “Bamalayika ba Katonda bonna bamusinze.”

7Ku bamalayika agamba nti: “Oyo afuula bamalayika be empewo, n'abaweereza be abafuula ennimi z'omuliro.”

8Sso ku Mwana, agamba nti: “Nnamulondo yo, ayi Katonda, ya mirembe na mirembe; ddamula w'obwakabaka bwo ddamula wa butuukirivu.

9Wayagala obutuukirivu n'okyawa obugwenyufu. Katonda nno, Katonda wo, kyavudde akusiiga omuzigo, omuzigo ogw'essanyu okusinga ne banywanyi bo.”

10Ate nti: “Ayi Mukama, mu kusookera ddala wabangawo ensi, n'eggulu mulimu gwa mikono gyo.

11Ebyo birizikirira, naye ggwe osigalawo;

12birikaddiwa ng'olugoye, olibizingako ng'omunagiro, birikyuka ng'ekyambalo, naye ggwe osigala ggwe omu, n'emyaka gyo tegiriiko kkomo.”

13Naye malayika ani gwe yali agambye nti: “Tuula ku mukono gwange ogwa ddyo, okutuusa abalabe bo lwe ndibafuula akatebe k'ebigere byo”?

14Gyonna egyo si myoyo egikola ogw'obuweereza egy'atumibwa olw'abo ab'okusikira obulokofu?

Jump to: Chapter 2 →