Hebrews 13

Luganda (BIBU1) (BIBULIYA ENTUKUVU)

← Chapter 12 Jump to:

1Okwagalana ng'ab'oluganda kweyongere mu maaso.

2Temwerabiranga kwaniriza bagenyi; abamu mu kukola batyo baayaniriza bamalayika nga tebategedde.

3Abali mu kkomera mubajjukire, kyenkana ng'abali nabo mu kkomera; era n'abo abayisibwa obubi, anti nammwe mukyali mu mubiri.

4Obufumbo bussibwemu ekitiibwa mu bonna, ekitanda ky'abafumbo kireme kujaajaamizibwa, anti Katonda aliramula abakaba n'abenzi.

5Mwesammule omululu gwa ssente, mumatire ne kye mulina; anti Katonda yennyini yagamba nti: “Sirikuleka, sirikwabulira.”

6Naffe nno kyetuva twogeza buvumu nti: “Omukama ye muyambi wange, sijja kutya; omuntu obuntu anankola ki?”

7Mujjukire abakulembeze bammwe abaababuulira ekigambo kya Katonda; mulabe ebyava mu ngeri gye baayisaamu, nammwe mugoberere okukkiriza kwabwe.

8Yezu Kristu nga bwe yali jjo, y'omu leero n'emirembe gyonna.

9Temuwubisibwa njigiriza ezitali zimu engwira. Kubanga kirungi omutima okufuna amaanyi nga gava mu neema, sso si mu mmere; abo abagoberera obulombolombo bw'emmere mpaawo kye baggyeemu.

10Tulina omwaliiro abaweereza Weema kwe batakkirizibwa kulya.

11Kubanga ennyama y'ebisolo ereetebwa kabona omukulu mu Kitukuvu ng'ekitambiro olw'ekibi eyokerwa bweru wa lusiisira.

12Ne Yezu naye yabonaabonera bweru wa wankaaki alyoke atukuze abantu n'omusaayi gwe.

13Naffe nno tugende gy'ali ebweru w'olusiisira nga twetisse ebivumo ebimuvumibwa.

14Kubanga kuno tetulinaako kibuga kya lubeerera, wabula tuluubirira kiri ekijja.

15Bulijjo tuyite ku ye okuweereza Katonda ekitambiro eky'okumutenda, kye kibala ky'emimwa egyatula erinnya lye.

16Temwerabiranga kukolera bulungi bantu n'okuyambagana mu byetaago; ebitambiro eby'engeri eyo bisanyusa Katonda.

17Muwulirenga abakulembeze bammwe, mubagondere, anti bakola ogw'okukuuma emyoyo gyammwe ng'abantu abaliwoza omulimu gwabwe. Mubaleke omulimu bagukoze ssanyu, sso si nga batokooterera, kubanga ekyo mmwe tekyandibagasizza.

18Mutusabire; twekakasa ng'emmeeme yaffe ntereevu; twagala kweyisa bulungi mu buli kintu.

19Mbasaba nga mbeesengereza kino mukikole nsobole okubaddizibwa amangu.

20Katonda ow'emirembe, eyaggyayo Yezu Kristu Mukama waffe mu bafu, omusumba omukulu ow'endiga olw'omusaayi gw'endagaano eteggwaawo,

21abawe musobole okukola buli kirungi mutuukirize mutyo ky'ayagala; akole mu ffe buli ekimusanyusa mu maaso ge, ng'ayita mu Yezu Kristu; oyo aweebwe ekitiibwa emirembe n'emirembe. Amiina.

22Abooluganda, mbeegayiridde, ebigambo bino bye mbabuuliridde mumale gabikkiriza, anti mbawandiikidde mu bufunze.

23Mutegeere ng'owooluganda Timotewo yateebwa; bw'alyanguwa okujja, ndijja naye okubalaba.

24Mundabire bonna ababakulembera n'abatuukirivu bonna. Bo okuva mu Yitale babatumidde.

25Eneema ebeere nammwe mwenna.

← Chapter 12 Jump to: