Hebrews 12

Luganda (BIBU1) (BIBULIYA ENTUKUVU)

← Chapter 11 Jump to: Chapter 13 →

1Tumaze okuba n'ekire ekinene eky'abajulirwa ekitwetoolodde wonna, awo nno naffe tusuule eri buli kiziyizo, naddala ekibi ekitwezinzeeko, ate tudduke n'obugumiikiriza embiro ezituteereddwawo,

2amaaso nga tugasimbye ku Yezu omutandisi w'okukkiriza kwaffe era akutuusa ku kumalirizibwa mu bujjuvu; oyo olw'essanyu eryali limuteereddwawo, yagumira omusaalaba, n'anyooma okuswala, atudde ku gwa ddyo gwa nnamulondo ya Katonda.

3Mulowooze ku oyo eyagumira obukyayi aboonoonyi bwe baamulaga, nammwe muleme kuggwamu maanyi mu mutima gwammwe na kuterebuka.

4Mu lutalo lwammwe n'ekibi temunnafunvubira kutuuka ku kuyiwa musaayi.

5Mwerabidde ebigambo ebyo ebigumya bye babagamba ng'abaana nti: “Mwana wange, togayanga ŋŋunjula ya Mukama; toggwangamu maanyi bw'akukomangako.

6Kuba Omukama gw'ayagala amugunjula, aswanyuula buli mwana we gw'afuna”?

7Olw'okubeera okugunjulwa mugume. Katonda abayisa ng'abaana; mwana ki kitaawe gw'atagunjula?

8Oba temugunjulwa mutyo, nga bonna bwe baakolebwa, awo nno muli baana ba mu bwenzi, temuli baana ddala.

9Ekirala, twalina bakitaffe ab'omu mubiri okutugunjula, era twabassangamu ekitiibwa, alabisa nno Kitaffe ow'emyoyo! Tetuumugondere okusingawo ne tuba balamu?

10Bakitaffe mu mubiri batugunjulira ebbanga ttono nga bakikola ku lwa bulungi bwabwe, naye ye atugunjula lwa kutugasa, tusobole okugabana ku butuukirivu bwe.

11Weewaawo, okugunjula kwonna bwe kubeera kukolebwa, mulimu ng'okulumwa, si ssanyu; naye oluvannyuma abo ababa bayise mu kubangulwa kuno, kubaleetera ebibala eby'eddembe n'eby'obutuukirivu.

12Kale nno emikono egiragaye n'entegetege ezifambye mubizzeemu amaanyi.

13Mugolole amakubo g'ebigere byammwe; ekitundu ekirema kireme kusowokera ddala, wabula kiwone buwonyi.

14Muluubirirenga okuba mu ddembe n'abantu bonna, era n'obutuukirivu, anti we butali, mpaawo aliraba Katonda.

15Mwekkaanye wabulewo afiirwa eneema ya Katonda; wabulewo omulandira gw'obukaawu ogututunuka ne guleeta akabi, bangi ne boonooneka olw'okubeera gwo.

16Wabulewo omuseegu oba omwonoonefu nga Ezawu, eyatunda obukulu bw'obuggulanda bwe olw'olulya olumu luti.

17Nammwe mumanyi ng'oluvannyuma bwe yayagala okusikira omukisa, yagaanibwa, kubanga teyasanga mukisa gwa kweddamu, ne bwe yagunoonya mu maziga.

18Anti temuzze eri lusozi olukwatikako, eri omuliro ogubumbujja, eri ekizikiza ne kazigizigi, eri kikuŋŋunta,

19eri okunyaanyaagira kw'eŋŋombe n'eddoboozi ly'ekigambo eryaleeteranga abaaliwuliriza okuwanjaga likome okwo okwogera.

20Kubanga bali tebaasobola kugumira ekyo kye baalagirwa nti: “Ne bwe kinaaba kisolo ne kikwata ku lusozi, kya kukubibwa mayinja.”

21Ggwe wamma ekyalabika kyali kitiisa, ne Musa n'agamba nti: “Ntidde, nkankana.”

22Naye mmwe muzze eri olusozi Siyoni, eri ekibuga kya Katonda omulamu, Yeruzaalemu eky'omu ggulu, eri bamalayika enkumi n'enkumi, ku lukuŋŋaana olw'embaga enkulu,

23ku lukuŋŋaana lw'abaggulanda bonna abaawandiikibwa edda mu ggulu, eri Katonda omulamuzi wa byonna, eri emyoyo gy'abatuukirivu abawedde okutuukirizibwa,

24eri Yezu omutabaganya ow'endagaano empya, n'eri omusaayi ogwamansibwa ogwogera obulungi n'okusinga ogwa Abeli.

25Mwekkaanye, temumugaana oyo ayogera. Oba kale bali tebaawona bwe baagaana okuwulira oli eyali alabula ku nsi, ffe tunaawonera wa bwe tunaagaana oyo alabula ng'ayima mu ggulu?

26Luli eddoboozi lye lyayuuguumya ensi; naye kati asuubizza nti: “Era n'omulundi omulala sijja kuyuuguumya nsi yokka, naye n'eggulu.”

27Ebigambo 'era n'omulundi omulala' bitegeeza ng'ebintu ebiyuuguumizibwa bijja kuggyibwawo, anti nga bino bintu buntu bitonde, walyoke wasigalewo biri byokka ebitayuuguumizibwa.

28Kale nno nga bwe tufuna obwakabaka obutayuuguumizibwa, twebaze, ate mu kwebaza tuweereze Katonda mu ngeri emusanyusa, n'ekitiibwa ko n'okumutya,

29Kubanga Katonda waffe muliro ogusenkenya.

← Chapter 11 Jump to: Chapter 13 →