Hebrews 10

Luganda (BIBU1) (BIBULIYA ENTUKUVU)

← Chapter 9 Jump to: Chapter 11 →

1Etteeka kye lirina bisiikirize busiikirize eby'ebirungi ebirijja, sso si byo ddala; awo nno terisobola n'akatono abo abaweereza kubafuula batuukirivu olw'ebitambiro bye bimu ebiddiŋŋanwa buli mwaka.

2Singa bwe guli, singa tebyalekera awo dda okuweerezebwa? Anti ng'abaweereza bamaze okutukuzibwa omulundi gumu, tebandizzeeyo kumanya kibi mu mwoyo gwabwe.

3Sso ekibaawo, mu bitambiro bino mulimu okujjukiza ekibi buli mwaka.

4Kubanga omusaayi gw'ente ennume n'embuzi tegusobola kuggyawo bibi.

5Kristu yennyini ng'ajja mu nsi kyeyava agamba nti: “Ebitambiro n'ebitone tewabyagala, sso nze wantegekera omubiri;

6ebitambiro ebyokye n'ebitambiro olw'ekibi tebyakusanyula.

7Nze kwe kugamba nti: ‘Nzuuno nzize, ayi Katonda, okukola ggwe ky'oyagala,’ nga bwe kyampandiikibwako mu muzingo gw'ekitabo.”

8Agamba waggulu nti: “Ebyonziira n'ebitone, ebitambiro ebyokye n'ebitambiro olw'ekibi tewabyagala era tebyakusanyula,” – sso bino biweerezebwa ng'Etteeka bwe liragira.

9Awo n'agattako nti: “Nzuuno nzize okukola ky'oyagala.” Aggyawo ekyasooka alyoke azzeewo ekyokubiri.

10Olw'okubeera okwagala okwo, twatukuzibwa, omubiri gwa Yezu Kristu bwe gwaweerezebwa omulundi gumu nga gwe gwamala.

11Buli lunaku buli kabona abeera wo ku mulimu ng'aweereza lutata ebitambiro bye bimu, ebitasobola kuggyawo bibi n'akatono.

12Sso Kristu yaweereza ekitambiro kimu olw'ebibi ate eky'ennaku zonna, n'atuula ku mukono ogwa ddyo ogwa Katonda.

13Okuva olwo alindirira okutuusa abalabe be lwe balifuulibwa akatebe k'ebigere bye.

14Mu kweweereza okwo okumu kwokka, abo bonna b'atukuza yabafunira obutuukirivu obw'emirembe gyonna.

15Ne Mwoyo Mutuukirivu atukakasa, kubanga ng'amaze okugamba nti:

16“Eno ye ndagaano gye ndikuba n'abo oluvannyuma lw'ennaku ezo, Omukama y'agamba; amateeka gange nzija kugassa ku mitima gyabwe, ngawandiike mu myoyo gyabwe,” agattako nti:

17“Siriddayo kujjukira bibi byabwe yadde ebisobyo byabwe.”

18Kale nno awali okusonyiyibwa kwa bino waba tewakyali kitambiro olw'ekibi.

19Kale nno, abooluganda, tulina obwesige nti tuyinza okuyingira mu Kitukuvu olw'omusaayi gwa Kristu,

20nga tuyitira mu kkubo eriggya era eddamu lye yatuggulira eriyita mu lutimbe, gwe mubiri gwe.

21Tumaze okuba nno ne kabona omukulu akulira ennyumba ya Katonda,

22tusembere nno n'emitima egijjudde amazima n'okukkiriza okukakafu, egimaze okumansibwako ne giggyibwamu emmeeme embi, n'emibiri egimaze okunaazibwa n'amazzi amalongoofu.

23Tunywereze ddala awatali kuddirira essuubi ly'enzikiriza yaffe, anti eyatusuubiza mwesigwa.

24Buli omu asse omwoyo na ddala ku ky'okukoleezaŋŋanamu okwagalana n'okukola ebikolwa ebirungi.

25Tuleme kugayaalirira kukuŋŋaana, ng'abamu bwe bamanyidde okukola, wabula tugumyaŋŋane, naddala kati, anti mulaba olunaku lujja lusembera.

26Tumala tukola ebibi nga tugenderedde sso ate nga tumaze okumanya amazima, waba tewakyali kitambiro lwa bibi,

27wabula okulindirira mu kutya okulamulibwa n'omuliro ogw'obusungu ogw'okusenkenya abalabe.

28Omuntu amenye etteeka lya Musa afa awatali kuddirwamu kasita wabaawo obujulizi bw'ababiri oba abasatu.

29Mulowooza ekibonerezo kiryenkana wa obubi ekirigwanira oyo alinnyirira Omwana wa Katonda n'omusaayi gw'endagaano ogwamutukuza n'agunyooma n'avuma ne Mwoyo ow'eneema?

30Anti tumanyi eyagamba nti: “Okuwoolera eggwanga kwange, nze ndisasula,” era nti: “Omukama aliramula abantu be.”

31Kya ntiisa okugwa mu mikono gya Katonda omulamu.

32Mujjukire ebiro ebyasooka nga mwakafuna ekitangaala, olutalo olunene olw'ebibonoobono lwe mwavvuunuka.

33Oluusi nga muvumibwa mu lujjudde n'okubalabya ennaku, olulala nga mubeera wamu n'abo abayisibwa batyo.

34Anti nammwe mwalumirwa abaali mu nvuba, ne mukkiriza n'essanyu okunyagibwako ebyammwe, kubanga mwali mumanyi nti mmwe mulinayo ebisinga obulungi eby'okusigalawo.

35Temusuula nno bwesige bwe mulina; empeera yaabwo nnene.

36Okugumiikiriza mukwetaagira ddala; lwe munaatuukiriza Katonda ky'ayagala ne mufuna kye yasuubiza.

37“Kubanga wasigadde akabanga katono oli ow'okujja ajje, tajja kulwa.

38Kyokka omutuukirivu wange aliba mulamu olw'okukkiriza. Naye bw'akuba akaddannyuma, omutima gwange tegumusanyukira.”

39Naye ffe tetuli mu abo abakuba akaddannyuma ne tuzikirira, naye mu abo abakkiriza ne tusigaza emyoyo gyaffe.

← Chapter 9 Jump to: Chapter 11 →