Hebrews 6

Luganda (BIBU1) (BIBULIYA ENTUKUVU)

← Chapter 5 Jump to: Chapter 7 →

1Awo nno tuve ku bino ebisookerwako bye twayiga ku Kristu, tulinnyuke ku by'ekikulu nga tetuzzeemu ate ku bye twasokerako eby'okwekomako ku bikolwa ebifu era n'okukkiriza Katonda,

2okunnyonnyola batismu, okussibwako emikono, okuzuukira kw'abafu, n'okulamulibwa okutaggwaawo.

3Kino tulikikola nga Katonda ayagadde.

4Kubanga kizibu okukomyawo nate abo olumu abaamulisibwa, ne balega ku kirabo eky'omu ggulu, ne bagabana ku Mwoyo Mutuukirivu,

5ne balega ku bulungi bw'ekigambo kya Katonda n'amaanyi ag'emirembe egirijja,

6ate ne bagwa, okubazza omulundi omulala ne beenenya, anti baba ku bwabwe bakomerera Mwana wa Katonda ku musaalaba na kumusekerera.

7Ettaka erinywa enkuba eritonnyako bulijjo, ne lizza ebimera ebigasa abalirima, lifuna omukisa okuva ewa Katonda.

8Naye bwe lizza amaggwa n'amatovu, teririna kye ligasa, ligwanye kuvumirirwa. Enkomerero yaalyo kubeera kwokebwa muliro.

9Abaagalwa, lwa kwogera tutyo, naye ku mmwe tukakasa nga muli ba kufuna ebirungi ebisingawo eby'okulokoka.

10Kubanga Katonda si gw'ogamba nti si mwenkanya, eyeerabira omulimu gwe mukoze, n'okwagala kwe mulaga mu linnya lye, nga muweereza abatuukirivu era nga bwe mukyabaweereza.

11Twegomba nti buli omu mu mmwe alage obunyiikivu bwe bumu okutuusa ku nkomerero okulaba nga bye musuubira bituukirizibwa,

12ne mutabeera awo nga mugayadde, wabula abalabira ku abo olw'okukkiriza kwabwe n'obugumiikiriza abasikira ebisuubizo.

13Katonda bwe yali asuubiza Yiburayimu, olw'obutabaawo amukira gwe yandirayidde, kyeyava yeerayirira yennyini nti:

14“Ddala nzija kukuwa omukisa, nkuwe n'okwala.”

15Bw'atyo Yiburayimu olw'okugumiikiriza yafuna ekyamusuubizibwa.

16Abantu bo balayira oyo abasingako obukulu; abantu bwe baba mu mpaka zaabwe, ekirayiro kye kikakasa eky'enkomerero.

17Ne Katonda bwe yayagala okukakasa abalisikira ebisuubizo nga ky'ateesa bwe kitakyuka, yayingizaawo ekirayiro;

18bwe kityo mu bibiri ebitakyuka Katonda mw'atayinza kulimbira, ffe abanoonya obwewogomo tulyoke tugumizibwe n'amaanyi, tunyweze essuubi erituweereddwa.

19Essuubi eryo ye nnanga y'omwoyo gye tulina ennywevu etesagaasagana; essuubi eriyingirira ddala munda emabega w'olutimbe,

20Yezu eyatukulemberamu gye yayingira ku lwaffe, ng'amaze okufuuka kabona omukulu emirembe gyonna mu lubu lwa Melekisedeki.

← Chapter 5 Jump to: Chapter 7 →