Hebrews 7

Luganda (BIBU1) (BIBULIYA ENTUKUVU)

← Chapter 6 Jump to: Chapter 8 →

1Ono Melekisedeki, kabaka w'e Saalemu, kabona wa Katonda Ali Waggulu ddala, yasisinkana Yiburayimu ng'adda eka ng'amaze okugoba bakabaka, n'amuwa omukisa;

2ne Yiburayimu n'amwawulizaako ekitundu eky'ekkumi ku bintu byonna. Okusooka, erinnya lye livvuunulibwa nti 'kabaka ow'obutuukirivu', era litegeeza kabaka w'e Saalemu, kwe kugamba nti 'kabaka ow'emirembe'.

3Talina kitaawe, talina nnyina, talina lulyo, talina lunaku lwe yasookerako yadde enkomerero y'obulamu bwe. Ali ng'Omwana wa Katonda; asigala kabona ennaku zonna.

4Mulabe bw'ali omukulu! Oyo Kitaffe Omukulu Yiburayimu gwe yawa n'ekyekkumi eky'omunyago gwe.

5Ate n'abaana ba Leevi bwe baafunanga obwakabona baalagirwanga okuggya ekyekkumi ku bantu ng'Etteeka bwe ligamba. Kwe kugamba nti bakiggya nno ku baganda baabwe, sso nga nabo bazzukulu ba Yiburayimu.

6Sso ono atali wa lulyo lwabwe, yaggya ekyekkumi ku Yiburayimu, n'amuwa n'omukisa, Yiburayimu eyali asuubiziddwa.

7Tewali kuwannaanya nti omuto y'afuna omukisa ew'omukulu.

8Wano abafuna ekyekkumi be bantu abafa; naye wali, afuna aba akakasibwa ng'akyali mulamu.

9Oyinza okugamba nti Leevi oyo yennyini afuna ekyekkumi naye yakiweera mu Yiburayimu,

10Kubanga yali akyali mu ntumbwe za jjajjaawe Yiburayimu Melekisedeki lwe yamusisinkana.

11Singa obwakabona bwa Leevi bwali bumala okutuusa ku kutuukirira mu bujjuvu, - anti mu bwo Etteeka mwe lyaweerwa abantu, - ate kiki ekyandireesezza kabona omulala ow'omu lubu lwa Melekisedeki atamenyerwa mu lubu lwa Aroni?

12Obwakabona bwe bukyuka, n'etteeka ggwe wamma lirina kukyuka.

13Anti ono gwe boogerako mu bino wa kika kirala omutavanga n'omu yali aweerezza ku mwaliiro.

14Kimanyiddwa bulungi nga Mukama waffe yasibuka mu Yuda, ekika Musa ky'atayogerangako ku bikwata ku bakabona.

15Ekyatangaaza byonna kwe kusitukawo kabona omulala ali mu lubu lwa Melekisedeki,

16eyafuuka kabona, si lwa bulombolombo bwa mu Tteeka obwesiba ku ndyo z'abantu, wabula olw'amaanyi ag'obulamu obutalisaanyizibwawo.

17Anti ye gwe bajulira nti: “Ggwe oli kabona emirembe gyonna; mu lubu lwa Melekisedeki.”

18Ekiragiro nno eky'edda kyadibizibwa, kubanga kyali kinafu nga tekirina kye kiyamba -

19anti Etteeka tewali kye lyamaliriza - naye waaleetebwawo essuubi erisingawo, mwe tuyima okusemberera Katonda.

20Ate nno ekyo tekyajja nga tekuli kirayiro. Abo edda baafuukanga bakabona nga tekuli kirayiro,

21naye ono ye yaliko n'ekirayiro, okuva ew'oyo eyamugamba nti: “Omukama yalayira, era tagenda kwejjusa: ggwe oli kabona emirembe gyonna.”

22Olwa kino Yezu yafuuka omuyima ow'endagaano ekira.

23Era bakabona ab'edda baali bangi, anti ng'olumbe terubaganya kusigalawo.

24Sso ono kubanga asigalawo emirembe gyonna, n'obwakabona bw'alina bwa mirembe gyonna.

25Awo nno abayita ku ye okusembera eri Katonda kyava aba n'obuyinza okubalokola ennaku zonna, anti nga bulijjo waali mulamu okubawolereza.

26Twali twetaaga okuba ne kabona ow'engeri eyo, omutuukirivu, ataliiko musango, ataliiko bbala, ayawuliddwa ku boonoonyi, asukkulumye okukira eggulu,

27ateetaaga kukola nga bakabona bali bwe baakolanga, buli lunaku okuweereza ebitambiro, ekisooka olw'ebibi bye, ate ne ky'aweereza ku lwa bantu. Ye ekyo yakikola omulundi gumu n'amala bwe yeeweereza yennyini.

28Etteeka be lifuula bakabona abakulu baba bantu bayabayaba; naye ekigambo ky'ekirayiro ekyaddirira Etteeka kyalonda Omwana eyafuulibwa atuukiridde emirembe gyonna.

← Chapter 6 Jump to: Chapter 8 →