Hebrews 5

Luganda (BIBU1) (BIBULIYA ENTUKUVU)

← Chapter 4 Jump to: Chapter 6 →

1Buli kabona omukulu aggyibwa mu bantu n'assibwawo ku lw'abantu ku bidda eri Katonda, aweereze ebitone n'ebitambiro olw'ebibi.

2Asobola okukwata n'ekisa abatalina kye bamanyi n'abawaba, anti nga naye yennyini mu buli wantu muyabayaba.

3Kyava talema kutambira lwa bibi bye yennyini nga bw'akola olw'ebibi by'abantu abalala.

4Tewali yeewa kitiibwa ekyo, wabula ayitibwa Katonda nga bwe kyali ku Aroni.

5Ne Kristu bw'atyo si ye yeegulumiza okufuuka kabona omukulu; wabula oli eyamugamba nti: “Oli Mwana wange, olwa leero nkuzadde;”

6era nga bw'agamba n'awalala nti: “Ggwe oli kabona emirembe gyonna mu lubu lwa Melekisedeki.”

7Ebbanga lye yamala ng'ali mu mubiri, yaweereza okwegayirira n'okuwanjaga mu kuleekaana n'amaanyi ne mu maziga eri oyo eyalina obuyinza okumuwonya olumbe; yawulirwa kubanga yatya Katonda.

8Nandibadde yali Mwana, yayiga obuwulize ng'ayita mu ebyo bye yabonaabonamu.

9Ng'amaze okumalirizibwa mu bujjuvu, bonna abaamugondera yabafuukira nsulo ya kulokoka okw'emirembe gyonna,

10ne Katonda n'amulangirira nti ye kabona omukulu mu lubu lwa Melekisedeki.

11Ku nsonga eno tulina bingi eby'okwogera ate nga bizibu okunnyonnyola, kubanga kati mukaluubirirwa okuwulira.

12Kati obudde we butuuse mazima mwandibadde bayigiriza, naye laba mukyetaagisa okuddamu okuyigirizibwa ekigambo kya Katonda okuviira ddala ku bisooka. Mwetaaga mata si mmere ŋŋumu.

13Mu mazima, oli akyali ku mata taba mukugu mu kigambo kya butuukirivu, kubanga akyali muwere.

14Naye emmere eŋŋumu ye y'abakuza; ey'abo, olw'ebyo bye bayiseemu, emitima gyabwe egitendekeddwa mu kwawula ekirungi ku kibi.

← Chapter 4 Jump to: Chapter 6 →