Hebrews 2

Luganda (BIBU1) (BIBULIYA ENTUKUVU)

← Chapter 1 Jump to: Chapter 3 →

1Awo nno ffe tuteekwa okussa omwoyo ku ebyo bye twawulira, sikulwa nga tubyebengulako.

2Obanga kale biri bamalayika bye baalangirira byali bisiba ng'etteeka, nga buli kubimenya n'obutabigondera bibonerezebwa mu ngeri esaanide,

3leero ffe tunaawonera wa bwe twekolera ne tugayaalirira ekigambo eky'okulokoka ekikulu kityo? Kwasooka kulangirirwa Mukama, ne kututegeezebwa bali abaamuwulira.

4Ne Katonda yakakasa bye boogedde ng'akola obubonero, ebyewuunyo n'ebyamagero ebitali bimu, n'ebitone bya Mwoyo Mutuukirivu bye yagabanga nga bwe yayagalanga.

5Ensi erijja gye twogerako bamalayika Katonda si be yagikwasa.

6Waliwo awajulizibwa, omu ng'agamba nti: “Omuntu ye ani gw'ojjukira, oba omwana w'Omuntu ye ani gw'ossaako omwoyo?

7Wamubuzaako katono okuba nga bamalayika; wamutikkira ekitiibwa n'ettendo;

8byonna n'obissa wansi w'ebigere bye.” Byonna bwe yabissa wansi we, tewali kye yalekayo ky'atassa mu buyinza bwe. Weewaawo kati tetulaba nga byonna biri mu buyinza bwe.

9Naye tulaba Yezu, oyo eyamala akabanga ng'atoowaziddwa n'akirwa bamalayika, kati atikkiddwa engule ey'ekitiibwa n'ettendo ebyamuviira mu kubonaabona ne mu kufa; ye olw'eneema ya Katonda yateekwa okulega ku lumbe ku lwa buli muntu.

10Kubanga kyali kisaana, olw'okutuusa abaana abangi mu kitiibwa, oyo byonna gwe bibeererawo ku lulwe era abeesaawo byonna, oli eyali ow'okubakulembera abatuuse ku kulokoka kwabwe, okumufuula omutuukirivu ng'ayita mu kubonaabona.

11Anti oli atukuza n'abo b'atukuza bonna basibuka ku kikolo kimu; kyava takwatibwa nsonyi kubayita baganda be,

12ng'agamba nti: “Ndirangirira erinnya lyo mu baganda bange, ndikutendereza mu kibiina wakati.”

13Era nti: “Mu ye mwe ndissa obwesige bwange.” Era nti: “Nzuuno, nze n'abaana abange Katonda be yampa.”

14Kubanga abaana abo baali ba luse lumu, omubiri n'omusaayi, naye lwe luse lumu olwo kwe yagabana, alyoke azikirize oyo eyalina obuyinza obw'okufa, anti ye Sitaani,

15asumulule abo abaali mu buddu obulamu bwabwe bwonna olw'okutya okufa.

16Mu mazima bamalayika si be yafaako, wabula yafa ku bazzukulu ba Yiburayimu.

17Kyeyava agwanira okufaanana baganda be mu byonna, alyoke afuuke kabona omukulu omusaasizi era omwesigwa mu ebyo ebidda ku Katonda, addaabirize olw'ebibi by'abantu.

18Kubanga yennyini yayita mu kugezebwa, kati asobola bulungi okuyamba abalala abali mu kugezebwa.

← Chapter 1 Jump to: Chapter 3 →