Nehemiah 1

Luganda (BIBU1) (BIBULIYA ENTUKUVU)

Jump to: Chapter 2 →

1Ebigambo bya Nekemiya mutabani wa Kakaliya. Mu mwezi Kisulevi, omwaka ogw'amakumi abiri, bwe nali mu kigo ky'e Susa,

2Kanani omu ku baganda bange n'ajja ng'ava mu Yuda, yali n'abasajja abamu; ne mbabuuza ebifa ku basajja okuva mu Yuda bakaawonawo abaali basumattuse obuwaŋŋanguse, ne ku Yeruzaalemu.

3Ne baŋŋamba nti: “Bakaawonawo abaasumattuka obuwaŋŋanguse abaddayo mu kitundu ky'eyo, bali mu kabi kanene na mu buswavu, ne bbugwe wa Yeruzaalemu yamenyebwa, n'emiryango gyaggya omuliro.”

4Bwe nawulira ebigambo ebifaanana bityo, natuula ne nkaaba. Namala ennaku nga nkungubaga; nasiibanga ne nsaba mu maaso ga Katonda w'eggulu.

5Ne ŋŋamba nti: “Ayi Mukama Katonda w'eggulu, nkwegayiridde, Katonda omukulu, ow'entiisa, akuumira endagaano n'ekisa abakwagala n'abakwata ebiragiro byo,

6okutu kwo kuwulirize n'amaaso go gazibukire essaala y'omuweereza wo eyeegayirira mu maaso go emisana n'ekiro nga nsabira abaweereza bo Abayisirayeli. Neetonda olw'ensobi z'Abayisirayeli, nange n'ab'ennyumba ya kitange ze twakusobya.

7Twakola bubi nnyo gy'oli; tetwakwata biragiro, amateeka n'ennamula bye walagira Musa omuweereza wo.

8“Jjukira ebigambo bye walagira Musa omuweereza wo, n'ogamba nti: ‘Bwe muliba mweyisizza bubi, ŋŋenda kubasaasaanya mu mawanga;

9naye bwe muliba mukomyewo gye ndi ne mukwata ebiragiro byange ne mubissa mu nkola, abawaŋŋangusibwa bo ne bwe baliba ewala eggulu gye likoma, ndibakuŋŋaanyaayo eyo ne mbakomyawo mu kifo kye nalonda kibeere ekisulo ky'erinnya lyange.’

10Abo bennyini baweereza bo era bantu bo, be wanunula n'obuyinza obungi, n'omukono gwo ogw'amaanyi.

11Ayi Mukama, okutu kwo kuwulirize essaala y'omuwereza wo n'okw'abaweereza bo abeegomba okuwa erinnya lyo ekitiibwa; omuweereza wo muwe ebintu bimulamire olwa leero, omuwe omusajja ono amusangeko ekisa.” Nze nali omusenero wa kabaka.

Jump to: Chapter 2 →