Nehemiah 6

Luganda (BIBU1) (BIBULIYA ENTUKUVU)

← Chapter 5 Jump to: Chapter 7 →

1Sanuballati, Tobiya, Gesemu Omuwarabu n'abalabe baffe abalala bwe baawulira nga bbugwe mmuzimbye, nga tewakyali mabanga gatabunidde, newandibadde nga n'okutuusa mu kadde ako nali sinnassaamu nzigi mu miryango,

2Sanuballati ne Gesemu ne bansindikira obubaka buno nti: “Jjangu, tusisinkane mu kyalo ekimu mu museetwe gwa Ono.” Baali bansalira lukwe kunkolako bulabe,

3nange ne mbatumira ababaka nga ŋŋamba nti: “Ndi ku mulimu munene, sisobola kuserengeta eyo. Lwaki omulimu guyimirira nga nze nserengese eyo gye muli?”

4Ne bantumira emirundi ena nga bayogera batyo, nange nga mbaanukula mu ngeri ye emu.

5Sanuballati n'antumira omulundi ogwokutaano; ku luno yatuma omuweereza we ng'alina mu ngalo ebbaluwa etaali nsibe, omwali muwandiikiddwa bino:

6“Eŋŋambo zigenda ziyitaayita mu mawanga, ne Gasumu akikakasa, nti ggwe n'Abayudaaya mutegeka okujeema, kyova ozimba bbugwe; era ng'eŋŋambo bwe zigamba, oyagala kwefuula kabaka waabwe;

7era otaddewo n'abalanzi balangirire mu Yeruzaalemu ku ggwe nti: ‘Mu Yuda mulimu kabaka.’ Eŋŋambo zino zijja kutuuka kabaka; kale nno jjangu, tusalire wamu amagezi.”

8Ne mmutumira nga mmuddamu ku ebyo nti: “Si bwe kiri nga ggwe bw'oyogera; ebyo obifumbiridde mu mutima gwo.”

9Anti bonna baali batutiisatiisa nga balowooza nti: “Emikono gyabwe gijja kulagaya mu kukola omulimu, tegujja kumalirizibwa.” Mukama, nnyongeraamu amaanyi mu mikono gyange.

10Olumu bwe nayingira mu nnyumba ya Semaaya mutabani wa Delaaya mutabani wa Meetabeli, eyali assiddwako ekkomo, n'agamba nti: “Tusisinkane mu Kiggwa kya Katonda, munda mu Kitukuvu, tusibe emiryango gy'Ekiggwa, kubanga bajja bakutte; ekiro bajja kujja bakutte.”

11Ne ŋŋamba nti: “Omusajja ali nga nze naye adduka? Omusajja ali nga nze yandiyingidde Ekiggwa okwewonya? Sijja kuyingira.”

12Ne ntegeera nti Katonda si ye yali amutumye, wabula yali alanga bubi ku nze, kubanga Tobiya ne Sanuballati baali bamuguliridde.

13Yali aguliriddwa antiisetiise, nkole ekyo, bwe ntyo ngwe mu kibi, bansiige ekko, bayime okwo okunvunaana.

14Ayi Katonda wange, jjukira Tobiya ne Sanuballati olw'ebikolwa byabwe bino, n'omulanzi omukazi Nowadiya, n'abalanzi abalala abantiisatiisa.

15Bbugwe yamalirizibwa ku lunaku olwabiri mu ettano olw'omwezi Eluli, mu nnaku amakumi ataano mu bbiri.

16Abalabe baffe bonna bwe baawulira, n'amawanga gonna agatwetoolodde bwe gaalaba, ne batoowazibwa, kubanga baamanya nti omulimu guno Katonda y'agukoze.

17Era mu budde obwo abakungu Abayudaaya baaweerezanga ebbaluwa nkumu eri Tobiya, n'eziva ewa Tobiya nga tezita kubatuukako.

18Kubanga bangi mu Yuda baali beekobye naye, kubanga yali mukoddomi wa Sekaniya mutabani wa Ara, ne mutabani wa Yokanani eyali awasizza Mesullamu muwala wa Berekiya.

19Tebaatanga kutendereza bikolwa bye ebirungi we ndi, ate bye njogedde nga babimubuulira; Tobiya n'asindikanga ebbaluwa antiisetiise.

← Chapter 5 Jump to: Chapter 7 →