Nehemiah 4

Luganda (BIBU1) (BIBULIYA ENTUKUVU)

← Chapter 3 Jump to: Chapter 5 →

1Sanuballati, Tobiya, Abawarabu, Abammoni n'ab'e Asudodi bwe baawulira ng'okuddaabiriza bbugwe wa Yeruzaalemu kugenda mu maaso, ng'amabanga gagenda gazibwa, ne basunguwala nnyo.

2Bonna ne beekoba bajje balwanyise Yeruzaalemu, bakireetemu okutabukatabuka.

3Ne tusaba ewa Katonda waffe, ne tussaawo omukuumi emisana n'ekiro okubeekuuma.

4Ate bo abantu ba Yuda baalinga bagamba nti: “Omwetissi amaanyi gamuwedde; amafunfugu mangi; tetujja kusobola kuzimba bbugwe.”

5N'abalabe baffe ne bagamba nti: “Baliba tebannamanya na kutulaba, ffe nga tubaguddemu, nga tubatta, omulimu nga tugukomya awo.”

6Abayudaaya abaali basula okumpi nabo ne bajja batugamba emirundi kkumi miramba nti: “Bajja kuva mu bifo wonna gye babeera batulumbe.”

7Nze kwe kuteeka abasajja abamu wansi ku bbugwe mu bifo ebyereere, nga mbatereezezza mu ndyo zaabwe, nga balina ebitala byabwe, amafumu gaabwe n'obusaale bwabwe.

8Bwe nekkaanya, ne nsituka, ne ŋŋamba abakungu, abalamuzi n'abantu abalala bonna nti: “Muleke kubatya. Mujjukire Omukama omukulu, ow'entiisa, mulwanirire baganda bammwe, batabani bammwe, bawala bammwe, bakazi bammwe n'ennyumba zammwe.”

9Abalabe baffe ne bamanya nga tutegeezeddwako, ne Katonda ng'agootaanyizza entegeka zaabwe, ffe ne tudda ku kigo, buli omu ku mulimu gwe.

10Okuva ku olwo, ekitundu ekyokubiri eky'abakozi bange ne basigala ku mulimu, ate ekyokubiri ekirala nga bakutte amafumu, engabo, obusaale n'ebizibawo. Abakulembeze bonna ne baba mabega w'abantu bonna aba Yuda

11abaali bazimba ekigo. Abaakolanga ogw'obwetissi omulimu baagukozesanga omukono ogumu, omulala nga gukutte ekyokulwanyisa.

12Abazimbi nabo baazimbanga buli omu ng'alina ekitala ku lukugunyu. Kyokka ye eyafuuwanga eŋŋombe yasigalanga we ndi.

13Ne ŋŋamba abakungu, abalamuzi n'abantu abalala bonna nti: “Omulimu munene ate mugazi, ku bbugwe buli omu asuulaganye ne munne;

14ekifo we munaawulira eddoboozi ly'eŋŋombe, mwenna mudduke mulage eyo. Katonda waffe ajja kutulwanirira.”

15Ne twongera bwe tutyo omulimu mu maaso; ekyokubiri kyaffe nga bakutte amafumu okuva ku mmambya ng'asala okutuusa emmunyeenye okuvaayo.

16Mu budde obwo nagamba abantu nti: “Buli omu asule n'omuweereza we mu Yeruzaalemu; ekiro batukolere ogw'okukuuma, emisana bakole.”

17Nze, baganda bange, basajja bange n'abakuumi bange nga tetweyambula; buli omu ng'abeera n'ekyokulwanyisa kye mu mukono gwe.

← Chapter 3 Jump to: Chapter 5 →