Zechariah 1

Luganda (BIBU1) (BIBULIYA ENTUKUVU)

Jump to: Chapter 2 →

1Mu mwezi ogwomunaana, mu mwaka ogwokubiri ogwa Dariyo, ekigambo ky'Omukama ne kijjira Zakariya omulanzi mutabani wa Berekiya, mutabani wa Yiddo, nga kigamba nti:

2“Omukama asunguwalidde bajjajjammwe.

3Bagambe nti: ‘Omukama w'Amagye kino ky'agamba: Mudde gye ndi, Omukama w'Amagye y'agamba, nange nzija kudda gye muli, Omukama w'Amagye y'agamba.

4Muleme kubeera nga bajjajjammwe, abalanzi abaakulembera be baagambanga nti: “Omukama w'Amagye kino ky'agamba: Muve ku bibi byammwe n'ebirowoozo byammwe ebibi,” naye bo ne batawulira, ne batategereza, Omukama y'agamba.

5Kati bajjajjammwe bali ludda wa? Bo abalanzi babeerawo emirembe gyonna?

6Ddala ddala ebigambo byange n'amateeka gange bye nalagira abaweereza bange abalanzi tebyatuukirira ku bajjajjammwe? Beenenya ne bagamba nti: “Omukama w'Amagye atukoze nga bwe yateesa okutukola nga bwe kyali kitugwanidde ng'agerera ku makubo gaffe n'endowooza yaffe.” ’ ”

7Ku lunaku olw'amakumi abiri mu ennya olw'omwezi ogw'ekkumi n'ogumu, nga gwe mwezi ogwa Sebati, mu mwaka ogwokubiri ogwa Dariyo, ekigambo ky'Omukama ne kijjira Zakariya mutabani wa Berekiya, mutabani wa Yiddo, nga kigamba nti:

8“Mu kiro nalabikirwa: omusajja yali atudde ku mbalaasi emmyufu. Yali ayimiridde mu miti gya jjambula mu luwonko, emabega we ng'eriyo embalaasi emmyufu, eya kikuusi n'enjeru.

9Ne mbuuza nti: ‘Mukama, bano baki?’ Malayika eyali ayogera nange n'aŋŋamba nti: ‘Nzija kukulaga kye bali.’

10Omusajja eyali ayimiridde mu miti gya jjambula n'agamba nti: ‘Bano be baabo Omukama b'atumye okuyitaayita mu nsi.’

11Ne baanukula malayika w'Omukama eyali ayimiridde mu miti gya jjambula, ne bamugamba nti: ‘Tuyiseeyise mu nsi, ensi yonna etebenkedde, eri mu ddembe.’

12Malayika w'Omukama n'ayanukula nti: ‘Ayi Mukama w'Amagye, onootuusa wa obutasaasira Yeruzaalemu n'ebibuga bya Yuda, bye wasunguwalira kati gino emyaka nsanvu?’

13Omukama n'addamu n'ebigambo ebirungi ebikubagiza malayika eyali ayogera nange.

14Malayika eyali ayogera nange n'aŋŋamba nti ‘Langirira nti: “Omukama w'Amagye kino ky'agamba: Yeruzaalemu ne Siyoni bankwasa nnyo ensaalwa,

15naye nnyiigidde nnyo amawanga ageetuulidde entende; nali nsunguwaddemu katono naye bo akabi ne bakabiggyisa.”

16“ ‘N'olw'ekyo Omukama w'Amagye kino ky'agamba: Nzija kudda eri Yeruzaalemu mmusaasire, n'eyo Ekiggwa kyange gye kinaazimbibwa, Omukama w'Amagye y'agamba, n'olukoba olupima lulikubibwa ku Yeruzaalemu.’

17Era langirira nti: ‘Omukama w'Amagye kino ky'agamba: Ebibuga binaddamu ne bibooga ebirungi, n'Omukama ajja kukubagiza Siyoni, alonde Yeruzaalemu.’ ”

Jump to: Chapter 2 →