Zechariah 10

Luganda (BIBU1) (BIBULIYA ENTUKUVU)

← Chapter 9 Jump to: Chapter 11 →

1Musabe Omukama enkuba mu budde obwa Ttoggo; Omukama y'aleeta ebire ebya kibuyaga; awa abantu ebire by'enkuba, na buli omu n'amuwa ebimera mu nnimiro ye.

2Bulubaale bwammwe obw'awaka bwogera bitaliimu, n'abalaguzi balabikirwa bya bulimba; ebirooto byabwe temuli kantu, okukubagiza kwabyo kuguya buguyaaguya. Abantu kyebava batangatanga ng'endiga, nga banyiikaavu kubanga tebalina musumba.

3“Obusungu bwange bweseredde ku basumba, nzija kubonereza abakulembeze. Kubanga Omukama w'Amagye alabirira eggana lye, ennyumba ya Yuda; alibafuula ng'embalaasi ze ennwanyi ze yeewaaniramu.

4Mu ye mwe muliva ejjinja ery'entabiro, mwe muliva n'enkondo ya weema; mwe muliva omusaale gw'olutalo, mwe muliva buli mufuzi.

5Bonna wamu baliba ng'abatabaazi abazira, nga basambirira ebitoomi by'omu nguudo mu lutalo; balitabaala kubanga Omukama aliba nabo; baliswaza abeebagazi.

6“Nzija kugumya ennyumba ya Yuda, ndirokola ennyumba ya Yozefu; ŋŋenda kubakomyawo kubanga ndi wa kisa gye bali. Balibeera nga be sigobangako, anti nze Mukama Katonda waabwe, ŋŋenda kubaanukula.

7Ab'omu Efurayimu baliba ng'abatabaazi abazira, n'emitima gyabwe giricamuka ng'egy'abanywedde evviini. Abaana baabwe baliraba ne basanyuka; emitima gyabwe girijaguliza mu Mukama,

8ŋŋenda kubatemyako mbakuŋŋaanye. Mazima ndibanunula; balibeera bangi nga bwe baali mu kusooka.

9Nabasaasaanya mu mawanga, naye baliyima ewala eyo ne banzijukira, bo n'abaana baabwe balirama era balikomawo.

10Ndibakomyawo okuva mu nsi y'e Misiri, ndibakuŋŋaanyaayo mu Assuri; ndibazza mu Gileyaadi ne Lebanoni, n'ekifo ekibamala kiribula.

11Baliyita mu nnyanja y'ennaku, amayengo g'ennyanja galikubwa, n'eddubi lya Kiyira lirifuulibwa kkalu; olwetumbu lwa Assuri lulikkakkanyizibwa, ne ddamula wa Misiri alivaawo.

12Ndibagumya mu Mukama, balitambulira mu linnya lye,” Omukama y'agamba.

← Chapter 9 Jump to: Chapter 11 →