Zechariah 3

Luganda (BIBU1) (BIBULIYA ENTUKUVU)

← Chapter 2 Jump to: Chapter 4 →

1Awo n'andaga Yoswa kabona omukulu ng'ayimiridde mu maaso ga malayika wa Katonda, ne Sitaani ng'ayimiridde ku ddyo we okumuwawaabira.

2Omukama n'agamba Sitaani nti: “Omukama akukomeko, ggwe Sitaani! Omukama eyalonda Yeruzaalemu akukomeko! Ono si kye kiti ekyaka ekiggyiddwa mu muliro?”

3Yoswa yali ayambadde ebigoye ebijama ng'ayimiridde mu maaso ga malayika.

4Malayika n'agamba abaali bamuyimiridde mu maaso nti: “Mumwambulemu ebigoye ebijama.” N'agamba Yoswa nti: “Nzuuno kati nkuggyeko ebibi byo, ŋŋenda okukwambaza emivuluya.”

5N'agamba nti: “Mumuteekeko ettambaala eritukula.” Ne bamutikkira ettambaala eritukula, ne bamwambaza n'ebyambalo, ne malayika w'Omukama ng'ayimiridde awo.

6Malayika w'Omukama n'akomereza Yoswa nti:

7“Omukama w'Amagye kino ky'agamba: ‘Bw'olitambulira mu makubo gange n'otuukiriza bye nkuutira, olwo oliramula ennyumba yange, n'okuuma empya zange; ndikuwa ebifo mu abo abayimiridde awo.

8Wulira ggwe Yoswa kabona omukulu ne banno abakutudde awo mu maaso, abo akabonero k'ebinajja, ŋŋenda kuleeta omuweereza wange 'Ttabi'.

9Laba ejjinja liirino nditadde awo mu maaso ga Yoswa. Ku jjinja eryo erimu kuliko amaaso musanvu; nzija kwolako ekiwandiiko, Omukama w'Amagye y'agamba, era nzija kuggyawo ekibi ky'ensi eno mu lunaku lumu.

10Ku lunaku olwo, Omukama w'Amagye y'agamba, omu aliyita munne ne batuula wansi w'omuzabbibu ne wansi w'omukunyu.’ ”

← Chapter 2 Jump to: Chapter 4 →