Zechariah 13

Luganda (BIBU1) (BIBULIYA ENTUKUVU)

← Chapter 12 Jump to: Chapter 14 →

1“Ku olwo walibaawo oluzzi oluliggulibwa olw'ennyumba ya Dawudi ne bonna abasula mu Yeruzaalemu okubanaazaako ebibi byabwe n'obujama.

2“Ku olwo, Omukama w'Amagye y'agamba, ndikomya amannya g'ebifaananyi bya balubaale okuva mu nsi, era tegagenda kuddayo kujjukirwa n'akamu. Era mu nsi ndimalamu abalanzi n'omwoyo omugwagwa.

3Bwe walibaawo akyalanga, kitaawe ne nnyina abaamuzaala balimugamba nti: ‘Ojja kufa, kubanga oyogera bya bulimba mu linnya ly'Omukama.’ Bw'aliranga, kitaawe ne nnyina abaamuzaala balimufumita.

4Ku olwo, buli mulanzi aliswala olw'eby'alabikirwa; talyessaako munagiro gwa byoya abalimberimbe,

5wabula aligamba nti ‘Nze siri mulanzi, ndi musajja mulimi, kubanga ettaka kye kyampeebwa okuva mu buvubuka bwange.’

6Bwe balimubuuza nti: ‘Ate bino ebiwundu mu kifuba kyo?’ agenda kubaddamu nti: ‘Bino ebiwundu nabifunira eyo mu nnyumba ya mikwano gyange.’ ”

7“Zuukuka, ggwe ekitala, situkira mu musumba wange, ne mu musajja anninaanye!” Omukama w'Amagye y'agamba. “Kuba omusumba endiga zibune emiwabo, nange omukono gwange nzija kugukyukiza ku bato.

8Mu nsi yonna,” Omukama y'agamba, “ebyokusatu bibiri birikubwa ne bizikirira, naye ekitundu ekyokusatu kye kirisigalamu.

9Ekyokusatu kino ndikiyisa mu muliro, ndibatukuza nga ffeeza bw'atukuzibwa, ndibageza nga zaabu bw'agezebwa. Balikoowoola erinnya lyange, nange ndibaanukula. Ndigamba nti: ‘Bano bantu bange,’ nabo baligamba nti: ‘Omukama ye Katonda wange.’ ”

← Chapter 12 Jump to: Chapter 14 →