Zechariah 8

Luganda (BIBU1) (BIBULIYA ENTUKUVU)

← Chapter 7 Jump to: Chapter 9 →

1Ekigambo ky'Omukama w'Amagye kyanzijira nga kigamba nti:

2“Omukama w'Amagye kino ky'agamba: Siyoni ankwasa ensaalwa; mbabirirwa muli olw'okumusaalirwa.

3Omukama kino ky'agamba: Nzija kukomawo mu Siyoni, wakati mu Yeruzaalemu. Olwo Yeruzaalemu kiriyitibwa Kibuga kya Mazima, n'olusozi lw'Omukama w'Amagye luliyitibwa Olusozi Olutukuvu.

4Omukama w'Amagye kino ky'agamba: Abakadde abasajja n'abakazi baliddamu okutuula ku makubo mu Yeruzaalemu, buli omu ng'alina omuggo mu ngalo ze olw'obukadde bwe.

5Amakubo mu kibuga galijjula abaana abalenzi n'abawala abazannyiramu.

6Omukama w'Amagye kino ky'agamba: Kino kirabika ng'ekyewuunyo eri abaasigalawo mu bantu bano mu nnaku ezo, naye ne mu maaso gange bwe kirindabikira? Omukama w'Amagye y'agamba.

7Omukama w'Amagye kino ky'agamba: Nze nzija kuwonya abantu bange okuva mu nsi y'ebuvanjuba n'ey'ebugwanjuba.

8Nzija kubaleeta era balisula mu Yeruzaalemu; balibeera bantu bange nange ndibeera Katonda waabwe omwesigwa era omutuukirivu gye bali.

9“Omukama w'Amagye kino ky'agamba: Mmwe abawulira mu nnaku zino ebigambo bino ebiva mu kamwa k'abalanzi abaaliwo ku lunaku Ekiggwa ky'Omukama w'Amagye lwe ky'abangibwawo, emikono gyammwe gigume Ekiggwa kisobole okuzimbibwa.

10Mu bbanga eryakulembera ennaku ezo tewaaliwo mpeera eri muntu oba ekisolo; omuntu yagendanga ku mirimu gye naye nga talina buweerero ku mulabe, kubanga buli muntu nali mukyawaganyizza ne munne.

11Naye kati abaasigalawo mu bantu bano sijja kubayisa nga bwe nakola mu biseera ebiyise, Omukama w'Amagye y'agamba.

12Ensigo erikula mu ddembe, omuzabbibu gulireeta ebibala byagwo n'ettaka liribaza ekibala kyalyo. Bino byonna ndibiwa abaasigalawo mu bantu bano bibeere byabwe.

13Mmwe ennyumba ya Yuda n'ennyumba ya Yisirayeli, nga bwe mwali ekivumo mu mawanga, kale nno nzija kubawonya, mubeere omukisa. Muleke kutya, emikono gyammwe gigume.

14“Kubanga Omukama w'Amagye kino ky'agamba: Nga bwe nali nteesezza okubakola akabi naye ne mbasaasira, luli bajjajjammwe lwe bannyiiza, y'agamba Omukama w'Amagye,

15kale nno nteesezza mu nnaku zino, nkolere bulungi Yeruzaalemu n'ennyumba ya Yuda; muleke kutya.

16Bino bye muba mukola: buli omu abuulire munne amazima, mu mbuga mulamule mu bwenkanya mwereetere emirembe;

17temuteesa kukoleragana bubi mu mitima gyammwe, n'okulayira eby'obulimba temukyagalanga, kubanga ebyo byonna mbikyawa, Omukama y'agamba.”

18Naye ekigambo ky'Omukama w'Amagye kyanzijira nti:

19“Omukama w'Amagye kino ky'agamba: Ekisiibo ky'omwezi ogwokuna, eky'ogwokutaano, eky'ogwomusanvu n'eky'ogw'ekkumi kirireetera ennyumba ya Yuda essanyu n'okusagambiza n'embaga ennungi; awo nno mwagale amazima n'eddembe.”

20“Omukama w'Amagye kino ky'agamba: Abantu bangi ko n'abasula mu bibuga ebinene balijja,

21n'ab'omu kibuga ekimu baligenda mu kirala ne bagamba nti: ‘Tugende, tuwanjagire mu maaso g'Omukama, tunoonye Omukama w'Amagye; nze ŋŋenda.’

22Abantu bangi balijja, n'amawanga ag'amaanyi galijja okunoonya Omukama w'Amagye mu Yeruzaalemu n'okuwanjagira Omukama.

23“Omukama w'Amagye kino ky'agamba: Mu nnaku ezo, abantu kkumi okuva mu nnimi zonna n'amawanga balikwata omukugiro gw'omusajja Omuyudaaya ne bamugamba nti: ‘Tujja kugenda nammwe, kubanga twawulira nti Katonda ali nammwe.’ ”

← Chapter 7 Jump to: Chapter 9 →