Zechariah 7

Luganda (BIBU1) (BIBULIYA ENTUKUVU)

← Chapter 6 Jump to: Chapter 8 →

1Mu mwaka ogwokuna ogwa kabaka Dariyo, ekigambo ky'Omukama ne kijjira Zakariya ku lwokuna olw'omwezi ogwomwenda, gwe mwezi Kisulevu.

2Abantu b'e Beteli baali batumye Sareezeri, Regemu-Meleki ne basajja baabwe okuwanjagira Omukama,

3babuuze ne bakabona b'Ekiggwa ky'Omukama w'Amagye n'abalanzi nti: “Nkungubage ko n'okusiiba mu mwezi ogwokutaano nga bwe nzize nkola emyaka mingi egiyise?”

4Ekigambo ky'Omukama w'Amagye ne kinzijira nti:

5“Buuza abantu bonna ab'omu ggwanga ne bakabona nti: ‘Bwe mwasiibanga ne mukaaba mu mwezi ogwokutaano n'ogwomusanvu emyaka gino gyonna ensanvu, mwasiibanga ku lwange?

6Bwe mwalyanga ne munywa, temwalyanga ne munywa ku lwammwe?

7Ebyo si bye bigambo Omukama bye yayogera ng'ayita mu balanzi abaakulembera, luli nga Yeruzaalemu n'ebibuga byakyo ebikyetoolodde bitebenkedde biri mirembe, ne Negevu ne Sefela nga bikyasengeddwamu?’ ”

8Ekigambo ky'Omukama ne kijjira Zakariya nti:

9“Omukama w'Amagye kino ky'agamba: ‘Mulamule mu butuufu, buli omu abeere wa kisa eri munne, amuddiremu.

10Temunyigiriza nnamwandu, mulekwa, omugwira n'omwavu; mu mitima gyammwe buli muntu aleme kulowooleza munne bubi.’ ”

11Naye tebaategereza, wabula ate baamukuba mabega nga bakola emputtu, ne baggala amatu gaabwe.

12Emitima gyabwe ne bagigumya ng'ejjinja baleme kuwulira tteeka na bigambo Omukama w'Amagye bye yabasindikira mu Mwoyo we nga yeeyamba abalanzi abaasooka. Omukama w'Amagye n'anyiiga nnyo.

13“Bwe nakoowoola, tebaawuliriza, nange nno bwe baakoowoola, saabawuliriza, Omukama w'Amagye y'agamba.

14Nabasaasaanya ne kibuyaga mu mawanga wonna ge baali batamanyi. Ensi n'esigala matongo nga bagenze, nga tewakyali ajjamu na kuvaamu, bwe batyo ensi eyeegombebwa ne bagifuula ddungu.”

← Chapter 6 Jump to: Chapter 8 →