Zechariah 12

Luganda (BIBU1) (BIBULIYA ENTUKUVU)

← Chapter 11 Jump to: Chapter 13 →

1Obubaka: Ekigambo ky'Omukama ku Yisirayeli ne ku Yuda. Omukama abamba eggulu, abangawo ensi n'akola omwoyo gw'omuntu mu muntu, agamba nti:

2“Yeruzaalemu ŋŋenda kumukolamu ekikompe ekinaatamiiza abantu bonna abeetooloddewo. Kiribaawo mu kulumbibwa kwa Yuda ne mu kuzindibwa kwa Yeruzaalemu.

3Ku olwo ndifuula Yeruzaalemu ejjinja ezzito eririrema abantu okusitula; abalirisitula balyetuusaako ebinuubule. Amawanga gonna ag'ensi galyekuŋŋaanya okumulwanyisa.

4Ku olwo, Omukama y'agamba, buli mbalaasi ndigireetera okusattira, n'omwebagazi waayo ndimusuula eddalu. Eriiso lyange ndirissa ku Yuda, naye embalaasi zonna ez'amawanga ndiziziba amaaso.

5Olwo abafuzi bonna mu Yuda baligamba mu mitima gyabwe nti: ‘Abantu b'omu Yeruzaalemu ba maanyi kubanga Omukama w'Amagye ye Katonda waabwe.’

6“Ku lunaku olwo ndifuula abafuzi ba Yuda ng'entamu eyengeredde ku nku, ng'ekitawuliro mu binywa by'essubi; balivaabira abantu bonna abeetooloddewo ku ddyo ne ku kkono, naye Yeruzaalemu kirisigala kikkalidde mu kifo kyakyo mu Yeruzaalemu.

7Omukama alisooka kuwonya weema za Yuda, ekitiibwa ky'ennyumba ya Dawudi n'ekitiibwa ky'abasula mu Yeruzaalemu bireme kuyisa Yuda.

8Ku olwo Omukama alitaasa abasula mu Yeruzaalemu, asinga obunafu mu bo ku olwo aliba nga Dawudi, n'ennyumba ya Dawudi eriba nga Katonda, nga malayika w'Omukama abakulembeddemu.

9“Ku olwo ndivaayo okuzikiriza amawanga gonna agajja okulumba Yeruzaalemu.

10“Ndiyiwa ku nnyumba ya Dawudi ne ku bantu b'e Yeruzaalemu omwoyo omusaasizi n'ogw'okwegayirira. Balitunula kw'oyo gwe baafumita; balimukaabira ng'akaabira omwana omuzaale omu; balyaziirana ku lulwe ng'abaaziiranira omwana omuggulanda.

11Ku olwo ebiwoobe biriba binene mu Yeruzaalemu, ng'ebiwoobe by'e Adadi-Rimmoni mu museetwe gw'e Megiddo.

12Ensi eriwooba, buli maka gokka: amaka g'ennyumba ya Dawudi gokka, ne bakazi baabwe bokka; amaka g'ennyumba ya Natani gokka, ne bakazi baabwe bokka;

13amaka g'ennyumba ya Leevi gokka, ne bakazi baabwe bokka; amaka ga Simeyi gokka, ne bakazi baabwe bokka;

14amaka gonna agasigaddewo, buli maka gokka ne bakazi baabwe bokka.”

← Chapter 11 Jump to: Chapter 13 →