Zechariah 5

Luganda (BIBU1) (BIBULIYA ENTUKUVU)

← Chapter 4 Jump to: Chapter 6 →

1Bwe natunula era ne ndaba: waaliwo omuzingo ogubuuka mu bbanga.

2N'aŋŋamba nti: “Olaba ki?” Ne ŋŋamba nti: “Ndaba omuzingo ogubuuka mu bbanga, nga gwa mikono amakumi abiri obuwanvu n'emikono kkumi obugazi.”

3N'aŋŋamba nti: “Ekyo kye kikolimo ekigenda kibuna mu nsi yonna; kuba, nga bwe kigambye, buli mubbi wa kwerawo, era nga bwe kigambye, buli alayira eby'obulimba naye wa kwerawo.

4Nzija kukisindika, Omukama w'Amagye y'agamba, kijja kuyingira mu nnyumba y'omubbi ne mu y'oyo alayira mu linnya lyange eby'obulimba. Kijja kusigala mu nnyumba ye kigizikirize, na byombi embaawo zaakyo n'amayinja gaakyo.”

5Awo malayika eyali ayogera nange n'afuluma, n'aŋŋamba nti: “Yimusa amaaso go olabe. Kiki ekyo ekiyitawo?”

6Ne ŋŋamba nti: “Kiki ekyo?” N'aŋŋamba nti: “Kisero kye kiyitawo.” N'agamba nti: “Kino kye kibi kyabwe mu nsi yonna.”

7Awo ekisaanikirako eky'essasi ne kibikkulibwa; munda mu kisero mwalimu omukazi ng'atudde.

8N'agamba nti: “Ono bwe buseegu!” N'amusindika n'addayo munda, n'asaanikira n'amaanyi ekiyinja eky'essasi ku kamwa kaakyo.

9Ne nsitula amaaso ne ndaba: waaliwo abakazi babiri nga bafuluma, ebiwaawaatiro byabwe nga bisitulwa empewo. Ebiwaawaatiro byabwe nga bifaanana ng'ebya ssekanyolya, ne basitula ekisero wakati w'ensi n'eggulu.

10Ne mbuuza malayika eyali ayogera nange nti: “Bano ekisero bakitwala wa?”

11N'aŋŋamba nti: “Mu nsi ya Sinari bakizimbire ennyumba. Bw'eriba emaliriziddwa, ekisero balikitereeza eyo mu kifo kyakyo.”

← Chapter 4 Jump to: Chapter 6 →