Hebrews 13

Luganda (LBR) (EKITABO EKITUKUVU, BAIBULI)

← Chapter 12 Jump to:

1Okwagalana ng'ab'oluganda kweyongere.

2Temwerabiranga kusembeza bagenyi: kubanga olw'okwo waaliwo abaasembeza bamalayika nga tebamanyi.

3Mujjukirenga abasibe, ng'abasibirwa awamu nabo; era n'abalaba ennaku, kubanga nammwe muli mu mubiri.

4Obufumbo bussibwemu ekitiibwa abantu bonna, n'ekitanda kibeere kirongoofu; kubanga abakaba n'abenzi Katonda alibasalira omusango.

5Mubeerenga n'empisa ey'obutaagalanga bintu; bye mulina bibamalenga: kubanga ye yennyini yagamba nti Sirikuleka n'akatono, so sirikwabulira n'akatono.

6Kye tuva twaŋŋanga okwogera n'obuvumu nti, “Mukama ye mubeezi wange, ssiityenga. Omuntu ayinza kunkola ki?”

7Mujjukirenga abakulembeze bammwe, abaababuulira ekigambo kya Katonda, nga mutunuulira empisa zaabwe era mugobererenga okukkiriza kwabwe.

8Yesu Kristo jjo ne leero aba bumu okutuusa emirembe n'emirembe.

9Temutwalibwatwalibwanga kuyigiriza okw'engeri ennyingi okuggya, kubanga kirungi omutima okunywezebwa ekisa, so si kunywezebwa na mpisa ez'okulyanga, ezitagasa abo abazitambuliramu.

10Tulina ekyoto abaweereza eby'omu weema kye batalagirwa kuliirangako.

11Kubanga ebisolo biri, ebitwalibwamu omusaayi gwabyo kabona asinga obukulu mu kifo ekitukuvu olw'ekibi, emibiri gyabyo gyokerwa bweru wa lusiisira.

12Era ne Yesu kyeyava abonaabonera ebweru wa wankaaki, alyoke atukuze abantu n'omusaayi gwe ye.

13Kale tufulume okugenda gy'ali ebweru w'olusiisira nga twetisse ekivume kye.

14Kubanga wano tetulina kibuga ekibeerera, naye tunoonya ekigenda okujja.

15Kale mu oyo tuweereyo eri Katonda bulijjo ssaddaaka ey'ettendo, kye kibala eky'emimwa egyatula erinnya lye.

16Naye okukola obulungi n'okukkaanya temwerabiranga: kubanga ssaddaaka eziri ng'ezo zimusanyusa nnyo Katonda.

17Muwulirenga abo ababafuga mubagonderenga: kubanga abo batunula olw'obulamu bwammwe, nga baliwoza bwe baakola; balyoke bakolenga bwe batyo n'essanyu nga tebeemulugunya, kubanga bwe babeemulugunyiza tekibagasa mmwe.

18Mutusabirenga, kubanga tumanyidde ddala nga tulina omwoyo omulungi, nga twagala okubanga n'empisa ennungi mu byonna.

19Era okusinga ennyo mbeegayirira okukolanga bwe mutyo, ndyoke nkomezebwewo mangu gye muli.

20Naye Katonda ow'emirembe, eyakomyawo okuva mu bafu omusumba w'endiga omukulu olw'omusaayi ogw'endagaano ey'olubeerera, ye Mukama waffe Yesu,

21abatuukirize mu buli kigambo ekirungi okukolanga by'ayagala, ng'akolera mu ffe ekisiimibwa mu maaso ge, ku bwa Yesu Kristo; aweebwenga ekitiibwa emirembe n'emirembe. Amiina.

22Naye mbabuulirira, ab'oluganda, mugumiikirizenga ekigambo eky'okubuulirirwa, kubanga mbawandiikidde mu bigambo bitono.

23Mumanye nga ow'oluganda Timoseewo yateebwa; bw'alijja amangu, ndibalabira wamu naye.

24Mulamuse abakulembeze bammwe bonna, n'abatukuvu bonna. Ab'omu Italiya babalamusizza.

25Ekisa kibeerenga nammwe mwenna. Amiina.

← Chapter 12 Jump to: