Isaiah 66

Lahu Bible Edited © Thailand Bible Society and Bible Society of Myanmar, 2010, 2020.

← Chapter 65 Jump to:

1Gʼuiˬsha kʼoˆ ve, Mvuhˇ naw ma lehˬ ngaˬ ve kʼaw jaw hpeh‸ leh, miˬguiˬ lehˬ ngaˬ ve hkui sheh taˍ kuiˬ hpeh‸ ve yoˬ. Nawˬ hui ngaˬ awˬ pon hkʼaˬ hkʼe ve yehˬ te laˇ tuˬ le.

2Miˬguiˬ mvuhˇ naw chi hkʼa peu-eˬ ve hta‸ ngaˬ te hpanˍ taˍ ve yoˬ. Nyi ma nehˬ lehˍ taˍ ve chaw, venˇbaˆ dawˇ hpfuhˆ puiˉ ve chaw, ngaˬ hta‸ kawˆ ve puiˉ ve chaw, leh ngaˬ ve tawˇ hkawˇ hta‸ na yuˬ puiˉ ve chaw hui hta‸ ngaˬ nyi ma cawˇ ve yoˬ.

3Chaw yaˇ teˇ hpaˍ lehˬ yawˇ hui te gaˇ ve hkʼe te chehˇ ve yoˬ. Yawˇ hui lehˬ nuˇ, maˇ heˆ kʼo chaw hta‸ yuˬ leh tuˉ tanˇ chehˇ ve yoˬ. Yawˇ hui lehˬ yawˬ ehˉ tuˉ tanˇ leh, hpuiˇ ve kʼawˍ peˍ hta‸ awˉ hteh piˇ ve yoˬ. Yawˇ hui lehˬ awˬ shiˍ awˬ nu, maˇ heˆ kʼo, va‸ awˬ suhˍ tuˉ tanˇ chehˇ ve yoˬ. Yawˇ hui lehˬ sha hawnˉ tuˉ tanˇ leh, shaˉ ho‸ hta‸ oˉ kʼoˍ pui chehˇ ve yoˬ. Yawˇ hui lehˬ a shu yawˇ dawˇ tawˆ ve hkʼe te leh, oˉ kʼoˍ pui chehˇ ve yoˬ.

4Chi hta‸ pa taw, ngaˬ lehˬ yawˇ hui kawˆ jaˇ chehˇ ve kawˆ tuˬ dawˇ haˍ tuˬ awˬ ceuˬ yawˇ hui awˬ hkʼoˆ gaˬ la piˇ tuˬ yoˬ. Awˬ lawn kʼo, yawˇ hui lehˬ ngaˬ tawˇ yaw chehˇ ve hta‸ maˇ na yuˬ leh, haiˬ ve kanˉ hta‸ te chehˇ ve yoˬ, teh‸ Gʼuiˬsha kʼoˆ ve yoˬ.

5Gʼuiˬsha hta‸ kawˆ leh yawˇ ve tawˇ hta‸ na yuˬ chehˇ ve chaw hui-oˬ, yawˇ kʼoˆ chehˇ ve tawˇ hta‸ na sheˍ. Awˬ lawn kʼo, nawˬ hui lehˬ ngaˬ hta‸ ka ti‸ yeˬ chehˇ ve pa taw, nawˬ hui ve chaw teˇ hpaˍ hpaˍ nawˬ hui hta‸ canˇ leh, nawˬ hui hta‸ awˬ chawˇ te laˇ tuˬ ve maˇ heˆ. Nawˬ hui ha lehˬ ha kʼa gʼa chehˇ ve hta‸ ngaˬ hui mawˬ gaˇ ve yoˬ. Chi hta‸ pa taw, Gʼuiˬsha yawˇ hkʼaˬ ma uiˍ jaˇ mvuh jaˇ ve nawˬ hui hta‸ maˍ laˇ leh, nawˬ hui hta‸ htaiˍ hkʼaw‸ laˇ piˇ-oˆ, teh‸ yawˇ hui nawˬ hui hta‸ maˇ shawˍ maˇ caˆ kʼoˆ tuˬ yoˬ.

6Na sheˍ. Venˇ hkʼaw lo bon yehˬ hkʼaw lo bvuhˬ tawˆ la chehˇ ve awˬ hkawˇ oˇ ve lehˬ, Gʼuiˬsha yawˇ ve canˇ paˍ teˇ hpaˍ hta‸ ciˍ yanˍ piˇ chehˇ ve awˬ hkawˇ hpeh‸ ve yoˬ.

7Ngaˬ ve da‸ kehˬ ve venˇ lehˬ, gʼoˇ peˬ maˇ naˬ sheˍ ve htawˇ yaˇ paw tawˆ la ve yaˇ miˇ hta‸ shuˍ ve yoˬ.

8Chi hkʼe ve hta‸ chaw teˇ gʼaˇ gʼaˇ kaˇ jaw mawˬ jaw laˇ. Chaw ceuˬ teˇ ceuˬ teˇ nyi tiˉ awˬ hkʼaw lo paw la gʼa-aw laˇ. Ziˉonˍ venˇ lehˬ, yaˇ maˇ paw sheˍ gʼuˇ suhˍ chi taw taw gʼa hkanˍ jaˇ tuˬ ve maˇ heˆ.

9Ngaˬ ve chaw teˇ hpaˍ hta‸ paw la piˇ tuˬ ve awˬ yanˇ gaˬ peuˬ ve ka‸, ngaˬ maˇ paw la piˇ taˬ teh‸ taˇ ca dawˇ, teh‸ Gʼuiˬsha kʼoˆ ve yoˬ

10Yeˍruˆsaˍlehnˍ venˇ geh teˇ geh ha lehˬ chehˇ-oˆ. Venˇ chi awˬ pon dawˇ haˍ chehˇ ve chaw hui-oˬ, chi beu‸ yawˇ geh teˇ geh ha lehˬ chehˇ-oˆ.

11Yaˇ ehˉ teˇ gʼaˇ lehˬ yawˇ awˬ e ve cuˉ hta‸ ha lehˬ chehˇ ve hkʼe, nawˬ hui htawˇ yawˇ da‸ la uiˍ la ve pa taw ha lehˬ chehˇ tuˬ yoˬ.

12Gʼuiˬsha kʼoˆ ve, Ngaˬ nawˬ hui hta‸ co co taiˍ taiˍ uiˍ la da‸ la piˇ tuˬ yoˬ. Awˬ nu ve chaw ceuˬ teˇ hpaˍ ve hpu shi mawˇ jeˬ teˇ hpaˍ lehˬ, maˇ fiˍ kʼai puiˉ ve iˉ kaˆ lawˬ hkʼa shuˍ nawˬ hui geh ya‸ la tuˬ yoˬ. Nawˬ hui lehˬ awˬ e ha‸ jaˇ ve pa taw, yawˇ ve la‸ sheh hkʼaw lo chiˇ taˍ leh cuˉ taw piˇ chehˇ ve yaˇ ehˉ teˇ gʼaˇ hkʼe hpeh‸ la tuˬ yoˬ.

13Awˬ e teˇ gʼaˇ yawˇ ve yaˇ hta‸ dawˇ sha tuˬ te piˇ ve hkʼe, Yeˍruˆsaˍlehnˍ venˇ hkʼaw lo ngaˬ nawˬ hui hta‸ dawˇ sha tuˬ te laˇ tuˬ yoˬ.

14Chi hkʼe hpeh‸ la chehˇ ve hta‸ nawˬ hui gʼa mawˬ ve teˇ yanˇ, nawˬ hui gʼa ha lehˬ tuˬ yoˬ. Nawˬ hui chehˇ sha leh awˬ gʼaˇ uiˍ la tuˬ yoˬ. Oˇ htaˇ, ngaˬ lehˬ ngaˬ ve tawˇ hta‸ na yuˬ ve chaw hui hta‸ ga piˇ leh, ngaˬ ve canˇ paˍ teˇ hpaˍ hta‸ ngaˬ nyi ma zuhˆ ve teˇ ceuˬ hpeu‸ maˍ piˇ chehˇ ve hta‸ nawˬ hui shiˍ la tuˬ yoˬ, teh‸ kʼoˆ ve yoˬ.

15Gʼuiˬsha lehˬ aˬ miˍ geh teˇ geh laˬ tuˬ yoˬ. Yawˇ nyi ma zuhˆ ve chaw hui hta‸ ciˍ yanˍ piˇ tuˬ, mvuhˇ haw mvuhˇ yeˬ lonˉ ve toˍ la‸ kʼuˉ hkʼoˆ ciˇ laˬ tuˬ yoˬ.

16Aˬ miˍ leh aˉhtaw hta‸ cuˇ ve hkʼaw, yawˇ lehˬ venˇbaˆ cawˬ ve chaw hkʼa peu-eˬ hta‸ ciˍ yanˍ piˇ leh, yawˇ hui hkʼa peu-eˬ suh-e tuˬ yoˬ.

17Gʼuiˬsha kʼoˆ ve, A shu yawˇ awˬ to hta‸ da‸ kehˬ tuˬ te leh, hko hkʼaw lo te taˍ ve shaˉ ho‸ hta‸ oˉ kʼoˍ ca pui tuˬ kʼai chehˇ ve chaw teˇ hpaˍ lehˬ, luˬ kʼai sheˆ kʼai la paˇ neˇ ve yoˬ. Yawˇ hui lehˬ va‸ shaˍ, faˆ cha‸ shaˍ, leh awˬ nu ve cha‸ chiˆ ve caˇ tuˬ teˇ hpaˍ hta‸ caˇ chehˇ ve yoˬ.

18Yawˇ hui ve dawˇ hkʼaˇ leh yawˇ hui ve kanˉ hkʼa peu-eˬ hta‸ ngaˬ shiˍ chehˇ ve yoˬ. Ngaˬ lehˬ chaw ceuˬ hkʼa peu-eˬ ve hta‸ teˇ geh shaw hpoˆ tuˬ laˬ ve yoˬ. Yawˇ hui teˇ geh hpawnˬ gaˬ la ve teˇ yanˇ, ngaˬ ve kanˇ paˆ hkʼaˬ hkʼe te puiˉ ve hta‸ yawˇ hui gʼa mawˬ leh,

19ngaˬ yawˇ hui hta‸ ciˍ yanˍ piˇ chehˇ ve hta‸ yawˇ hui shiˍ la tuˬ yoˬ. Ya‸ hkʼaˇ, yawˇ hui teˇ hpaˍ hpaˍ hta‸ ngaˬ ponˬ piˇ leh, ngaˬ ve awˬ me‸ awˬ hponˇ leh kanˇ paˆ hta‸ maˇ mawˬ jaw, maˇ kaˇ jaw sheˍ ve vuiˇ jaˇ ve mvuhˇmiˬ hkʼaw chehˇ ve chaw ceuˬ teˇ hpaˍ geh kʼai peu tuˬ yoˬ. Saˍpenˍ mvuhˇmiˬ, Liˆbyaˇ mvuhˇmiˬ, Luˇdaˆ mvuhˇmiˬ, Tuˇbaˍ laˆ mvuhˇmiˬ, leh Aˍhkaˍyaˆ mvuhˇmiˬ chi teˇ hpaˍ lo kʼai peu tuˬ yoˬ. Yawˇ hui lehˬ, chaw ceuˬ oˇ ve teˇ hpaˍ hta‸ ngaˬ hkʼaˬ ma uiˍ jaˇ mvuh jaˇ ve awˬ lawn kʼoˆ maˍ piˇ tuˬ yoˬ.

20Yawˇ hui lehˬ awˬ nu ve chaw ceuˬ teˇ hpaˍ awˬ hkʼaw lo, nawˬ hui ve mvuhˇmiˬ yaˇ teˇ hpaˍ hta‸ la‸ shawnˍ hkʼa shuˍ ngaˬ geh lo shiˍ hkʼaw‸ veu laˇ tuˬ yoˬ. Iˉsaˍreˍlaˆ chaw hui lehˬ, Gʼuiˬsha hta‸ tanˇ piˇ tuˬ ve awˬ shiˍ awˬ nu teˇ hpaˍ hta‸ da‸ kehˬ ve hkehˇ hkʼaw keu leh bon yehˬ lo yuˬ laˬ chehˇ ve hkʼe, yawˇ hui lehˬ chaw oˇ ve teˇ hpaˍ hta‸ iˉ mvuhˇ, piˉlaˬ, kaˍlaˍoˆ, iˉmvuhˇ lawˬ hkʼoˆ ciˇ tcuh leh, Yeˍruˆsaˍlehnˍ venˇ hkʼaw cawˬ ve ngaˬ ve da‸ kehˬ ve hkʼaw lo shiˍ laˬ tuˬ yoˬ.

21Yawˇ hui awˬ hkʼaw lo ve chaw teˇ hpaˍ hpaˍ hta‸, ngaˬ paw hkuˇ leh Leˍviˆ chaw te tcuh tuˬ yoˬ.

22Miˬguiˬ awˬ suhˉ leh mvuhˇ naw ma awˬ suhˉ lehˬ, ngaˬ ve kanˇ paˆ hta‸ pa taw yeˬ chehˇ ve hkʼe, nawˬ hui ve awˬ ceuˬ awˬ hkʼaˇ teˇ hpaˍ leh nawˬ hui ve awˬ meh htawˇ yeˬ chehˇ tuˬ yoˬ.

23Ha pa tawˬ htaˇ te ve pawehˇ leh, shinˉ nyi gaˬ la ve teˇ pawˆ le le miˬguiˬ chaw ceuˬ hkʼa peu-e, choˬ kaˬ Yeˍruˆsaˍlehnˍ venˇ lo laˬ leh ngaˬ hta‸ oˉ kʼoˍ ca pui la tuˬ yoˬ.

24Yawˇ hui tu kʼo‸-e chehˇ ve teˇ yanˇ, ngaˬ hta‸ hpfuhˆ ve chaw hui suh taˍ ve awˬ to hta‸ yawˇ hui gʼa mawˬ tuˬ yoˬ. Yawˇ hui hta‸ caˇ chehˇ ve awˬ shehˍ ma teˇ hpaˍ lehˬ teˇ pawˆ ka‸ maˇ suh leh, yawˇ hui hta‸ to‸ chehˇ ve aˬ miˍ hta‸ htawˇ teˇ pawˆ ka‸ shiˉ pehˍ gʼa tuˬ ve maˇ heˆ. Awˬ ceuˬ oˇ ve hta‸ gʼa mawˬ ve chaw hkʼa peu-eˬ hkanˍ haˍ jaˇ tuˬ yoˬ, teh‸ Gʼuiˬsha kʼoˆ ve yoˬ.

← Chapter 65 Jump to:

Recommended Reading

Commentary Isaiah Commentaries → Devotional Isaiah Devotional Guide → Get This Bible Lahu Bible Edited © Thailand Bible Society and Bible Society of Myanmar, , . Study Bible →