Judges 10

Lahu Bible Edited © Thailand Bible Society and Bible Society of Myanmar, 2010, 2020.

← Chapter 9 Jump to: Chapter 11 →

1Aˍbiˆmaˍlehˆ suh peuˬ hkʼaw‸ nawˉ, Iˉsaˍreˍlaˆ chaw hui hta‸ ponˬ piˇ tuˬ, Doˉdoˍve awˬ hawehˍ Hpuˇ-aˬ ve yaˇ Tawˇlaˆ tawˆ la ve yoˬ. Yawˇ lehˬ Iˉsaˍhkaˍ awˬ ceuˬ awˬ hkʼaˇ hpeh‸ leh, Eˇhpaˍ renˍ mvuhˇmiˬ hkʼaw cawˬ ve Shaˍmiˇraˆ venˇ hkʼaw chehˇ ve yoˬ.

2Yawˇ lehˬ Iˉsaˍreˍlaˆ chaw hui hta‸ 23 hkʼaw‸ uˉ peunˍ ve yoˬ. Peuˬ hkʼaw‸ nawˉ yawˇ suh-e leh, Shaˍmiˇraˆ venˇ hkʼaw tuˍ piˇ ve yoˬ.

3Tawˇlaˆ hkʼaw‸ nawˉ, Giˇlaˆ venˇ hkʼaw chehˇ ve Yaˍiˇraˆ kʼaw‸ tawˆ la ve yoˬ. Yawˇ lehˬ Iˉsaˍ reˍlaˆ chaw hui hta‸ 22 hkʼaw‸ uˉ peunˍ ve yoˬ.

4Yawˇ lehˬ yaˇ paˍ 30 gʼaˇ cawˬ leh, yawˇ hui lehˬ piˉ laˬ 30 hkeh ciˇ ve yoˬ. Giˇlaˆ mvuhˇmiˬ hkʼaw venˇ 30 venˇ cawˬ leh, ya‸ nyi hkʼa gaˬ venˇ oˇ ve teˇ hpaˍ hta‸ Yaˍiˇraˆ ve hkʼaˆ teh‸ meh piˇ taˍ ve yoˬ.

5Yaˍiˇraˆ suh-e leh yawˇ hta‸ Kaˍmonˍ venˇ hkʼaw tuˍ piˇ ve yoˬ.

6Iˉsaˍreˍlaˆ chaw teˇ hpaˍ, Gʼuiˬsha hta‸ teˇ pawˆ kʼaw‸ te ya‸ ve yoˬ. Yawˇ hui lehˬ, Baˍlaˆ gʼuiˬsha, Aˍshaˆtaˍrehˆ gʼuiˬsha, Suˇriˆ gʼuiˬsha, Siˉdonˍ gʼuiˬsha, Mawˇ baˆ gʼuiˬsha, Aˍmonˍ gʼuiˬsha, leh Hpiˇliˇtiˆ gʼuiˬsha teˇ hpaˍ hta‸ oˉ kʼoˍ pui leh Gʼuiˬsha hta‸ chiˇ baˬ ve yoˬ.

7Hkʼe te leh Gʼuiˬsha Iˉsaˍreˍlaˆ chaw hui hta‸ nyi ma zuhˆ leh, yawˇ hui hta‸ Hpiˇliˇtiˆ chaw leh Aˍmawˇniˆ chaw hui ve la‸ sheh hkʼaw lo chiˇ a‸ piˇ ve yoˬ.

8Oˇ ve teˇ hkʼaw‸ hta‸ te leh, yawˇ hui Iˉsaˍreˍlaˆ chaw hui hta‸ teˇ chi hinˉ hkʼaw‸ hkʼa gaˬ fawˉ mehˍ piˇ ve yoˬ. Iˉsaˍreˍlaˆ chaw teˇ hpaˍ lehˬ, Aˍmawˇniˆ chaw hui chehˇ kuiˬ, Yawˇdanˍ iˉ kaˆ law mvuhˇ nyi tawˆ hpawˇ lo cawˬ ve Giˇlaˆ mvuhˇmiˬ hkʼaw chehˇ taˍ ve yoˬ.

9Aˍmawˇniˆ chaw teˇ hpaˍ lehˬ, Yawˇdanˍ iˉ kaˆ lawˬ hta‸ hkanˍ leh, Yuˇda‸, Beˍyaˍmenˍ leh Eˇhpaˍrenˍ awˬ ceuˬ awˬ hkʼaˇ teˇ hpaˍ hta‸ ca bawˆ la ve yoˬ. Hkʼe te leh, Iˉsaˍreˍlaˆ chaw hui dawˇ tui‸ jaˇ ve yoˬ.

10Oˇ htaˇ Iˉsaˍreˍlaˆ chaw teˇ hpaˍ Gʼuiˬsha hta‸ kuˬ leh, Ngaˬ hui ve Gʼuiˬsha-oˬ, ngaˬ hui lehˬ nawˬ hta‸ te ya‸ jaˇ peuˬ. Awˬ lawn kʼo, ngaˬ hui nawˬ hta‸ baˬ taˉ leh Baˍlaˆ gʼuiˬsha teˇ hpaˍ hta‸ oˉ kʼoˍ pui peuˬ ve yoˬ, teh‸ kʼoˆ ve yoˬ.

11Gʼuiˬsha yawˇ hui hta‸ kʼaw‸ yaw hkʼaw‸ leh kʼoˆ piˇ ve, Ponˬ laˬ htaˇ Eˇjiˇtu‸ chaw, Aˍmawˇriˆ chaw, Aˍ mawˇ niˆ chaw, Hpiˇliˇtiˆchaw,

12Siˉdonˍ chaw, Aˍmaˍlehˆ chaw, leh Miˇdiˍanˍ chaw nawˬ hui hta‸ fawˉ mehˍ leh, nawˬ hui ngaˬ hta‸ kuˬ jaw ve yoˬ. Nawˬ hui hta‸ ngaˬ yawˇ hui ve la‸ sheh awˬ hkʼaw lo hkʼe leˇ baˬ taˉ laˇ jaw laˇ.

13Ya‸ hkʼaˇ, nawˬ hui lehˬ ngaˬ hta‸ baˬ taˉ leh, awˬ nu ve gʼuiˬsha teˇ hpaˍ hta‸ oˉ kʼoˍ ca pui ve yoˬ. Chi hta‸ pa taw, ngaˬ nawˬ hui hta‸ teˇ pawˆ kʼaw‸ htaiˍ hkʼaw‸ laˇ tuˬ ve maˇ heˆ.

14Nawˬ hui leuˆ yuˬ taˍ ve awˬ nu ve gʼuiˬsha teˇ hpaˍ hta‸ ca lawˬ hkawˉ loˬ. Nawˬ hui dawˇ haˍ kuiˬ lo gaˬ ve teˇ yanˇ, yawˇ nawˬ hui hta‸ htaiˍ hkʼaw‸ laˇ piˇ-oˆ, teh‸ yawˇ hui hta‸ kʼoˆ piˇ ve yoˬ.

15Ya‸ hkʼaˇ, Iˉsaˍreˍlaˆ chaw teˇ hpaˍ kʼoˆ ve, Gʼuiˬsha-oˬ, ngaˬ hui nawˬ hta‸ te ya‸ jaˇ peuˬ. Nawˬ ngaˬ hui hta‸ te laˇ gaˇ ve hkʼe te laˇ-oˆ, teh‸ Gʼuiˬsha hta‸ lawˬ hkawˉ ve yoˬ.

16Hkʼe te leh, yawˇ hui lehˬ awˬ kaˍ awˬ nu gʼuiˬsha teˇ hpaˍ hta‸ baˬ taˉ leh, Gʼuiˬsha hta‸ oˉ kʼoˍ kʼaw‸ pui ve yoˬ. Oˇ htaˇ Gʼuiˬsha lehˬ, yawˇ hui tu‸ chehˇ hkanˍ chehˇ ve hta‸ kʼaw‸ nyi maˇ hpeh‸ ve yoˬ.

17Oˇ htaˇ Aˍmawˇniˆ chaw teˇ hpaˍ laˬ leh, Giˇlaˆ mvuhˇmiˬ hkʼaw deh chehˇ taˍ ve yoˬ. Iˉsaˍreˍlaˆ chaw teˇ hpaˍ htawˇ laˬ leh, Miˆsaˍpaˍ venˇ hkʼaw deh chehˇ taˍ ve yoˬ.

18Oˇ htaˇ Iˉsaˍreˍlaˆ chaw hui ve awˬ hoˉ awˬ naˬ teˇ hpaˍ lehˬ, A shu awˬ hoˉ te leh Aˍmawˇniˆ chaw hui hta‸ ca bawˆ tuˬ ve le. Chaw oˇ ve lehˬ, Giˇlaˆ mvuhˇmiˬ hkʼaw chehˇ ve chaw hkʼa peu-eˬ hta‸ gʼa uˉ peunˍ tuˬ yoˬ, teh‸ teˇ gʼaˇ leh teˇ gʼaˇ kʼoˆ da‸ ve yoˬ.

← Chapter 9 Jump to: Chapter 11 →