Judges 9 — Lahu Bible Edited © Thailand Bible Society and Bible Society of Myanmar, 2010, 2020.

1Giˉdonˍ ve yaˇ Aˍbiˆmaˍlehˆ lehˬ, yawˇ awˬ e ve awˬ viˉ awˬ nyi teˇ hpaˍ chehˇ taˍ kuiˬ Sheˍhkenˍvenˇ lo kʼai ve yoˬ.

2Yawˇ kʼoˆ ve, Sheˍhkenˍ venˇ yaˇ teˇ hpaˍ-oˬ, nawˬ hui a shu hta‸ heuˆ gaˇ ve le. Giˉdonˍ ve yaˇ suhˍ chi gʼaˇ hkʼa peu-eˬ nawˬ hui hta‸ uˉ peunˍ ve hta‸ heuˆ gaˇ laˇ. Maˇ heˆ kʼo, chaw teˇ gʼaˇ ceh tiˉ uˉ peunˍ ve hta‸ heuˆ gaˇ laˇ. Ngaˬ lehˬ, nawˬ hui ve awˬ suhˍ awˬ shaˍ hpeh‸ ve yoˬ, teh‸ yawˇ hui hta‸ kʼoˆ piˇ ve yoˬ.

3Yawˇ awˬ e ve awˬ viˉ awˬ nyi teˇ hpaˍ lehˬ, awˬ lawn chi ve Sheˍhkenˍ venˇ yaˇ teˇ hpaˍ hta‸ kʼoˆ maˍ piˇ ve yoˬ. Yawˇ lehˬ yawˇ hui ve awˬ viˉ awˬ nyi hpeh‸ ve pa taw, venˇ yaˇ hkʼa peu-eˬ Aˍbiˆmaˍlehˆ hpawˇ chehˇ tuˬ jehˬ cheˆ ve yoˬ.

4Yawˇ hui lehˬ Baˍlaˆ gʼuiˬsha ve bon yehˬ hkʼaw cawˬ ve hpu 70 hteh‸ yuˬ leh, Aˍbiˆmaˍlehˆ hta‸ piˇ ve yoˬ. Yawˇ lehˬ hpu oˇ ve hta‸ yuˬ leh, chaw haiˬ teˇ hpaˍ hta‸ ngaˍ taˍ ve yoˬ.

5Oˇ ve hkʼaw‸ nawˉ, Awˇhpaˍraˆ venˇ hkʼaw cawˬ ve yawˇ awˬ pa ve yehˬ hkʼaw kʼo‸-e leh, yawˇ awˬ pa Giˉdonˍ ve yaˇ paˍ 70 gʼaˇ hta‸ haˉ pui teˇ shiˍ tiˉ awˬ hkʼoˆ tiˇ pehˍ piˇ ve yoˬ. Ya‸ hkʼaˇ, Giˉdonˍ ve yaˇ paˍ Yawˇtanˍ lehˬ ca hpaw va‸ taˍ ve pa taw gʼa ponˬ ve yoˬ.

6Oˇ hkʼe te peuˬ hkʼaw‸ nawˉ, Sheˍhkenˍ leh Behˆmiˍlawˇ venˇ yaˇ teˇ hpaˍ lehˬ, Sheˍhkenˍ venˇ hkʼaw cawˬ ve da‸ kehˬ ve maˉ kuˇ cehˬ lo hpawnˬ kʼai leh, Aˍbiˆmaˍlehˆ hta‸ jawˇmawˇ te tcuh ve yoˬ.

7Awˬ lawn chi ve hta‸ Yawˇtanˍ gʼa kaˇ ve teˇ yanˇ, yawˇ lehˬ Geˍraˍzenˍ hkʼaw hkʼoˆ huˉ taˍ leh, yawˇ hui hta‸ chi hkʼe kʼoˆ piˇ ve yoˬ. Sheˍhkenˍ venˇ yaˇ teˇ hpaˍ-oˬ, ngaˬ ve tawˇ hta‸ na sheˍ. Oˇ hkʼe te ve kʼo, Gʼuiˬsha nawˬ hui ve tawˇ hta‸ na yuˬ laˇ tuˬ yoˬ.

8Teˇ pawˆ htaˇ, suhˆ cehˬ teˇ hpaˍ lehˬ yawˇ hui hta‸ uˉ peunˍ laˇ tuˬ, jawˇmawˇ teˇ gʼaˇ hta‸ gʼa‸ ca kʼai ve yoˬ ceˇ. Yawˇ hui shaˍlonˍ ceh hta‸ mawˬ leh, Nawˬ ngaˬ hui hta‸ uˉ peunˍ laˇ-oˆ, teh‸ yawˇ hta‸ kʼoˆ piˇ ve yoˬ.

9Oˇ htaˇ shaˍlonˍ cehˬ lehˬ, Ngaˬ nawˬ hui hta‸ uˉ peunˍ ve kʼo, gʼuiˬsha hta‸ ka‸ chaw yaˇ teˇ hpaˍ hta‸ ka‸, awˬ me‸ awˬ hponˇ cawˬ piˇ gʼa ve ngaˬ ve awˬ chu teˇ hpaˍ hta‸ gʼa baˬ taˉ tuˬyoˬ, teh‸ yawˇ hui hta‸ kʼaw‸ yaw hkʼaw‸ piˇ ve yoˬ.

10Teˇ pawˆ suhˆ cehˬ oˇ ve teˇ hpaˍ maˉ nawˆ cehˬ geh kʼai leh, Ngaˬ hui hta‸ uˉ peunˍ laˇ-oˆ, teh‸ kʼoˆ piˇ ve yoˬ.

11Oˇ htaˇ maˉ nawˆ cehˬ kʼoˆ ve, Ngaˬ nawˬ hui hta‸ uˉ peunˍ ve kʼo, mehˬ jaˇ ve ngaˬ ve awˬ shiˍ teˇ hpaˍ hta‸ gʼa baˬ taˉ tuˬ yoˬ, teh‸ yawˇ hui hta‸ kʼaw‸ yaw hkʼaw‸ piˇ ve yoˬ.

12Teˇ pawˆ suhˆ cehˬ oˇ ve teˇ hpaˍ a pehˉ meuˇ te geh kʼai leh, Ngaˬ hui hta‸ uˉ peunˍ laˇ-oˆ, teh‸ yawˇ hta‸ kʼoˆ piˇ ve yoˬ.

13Oˇ htaˇ a pehˉ meuˇ te lehˬ, Ngaˬ nawˬ hui hta‸ uˉ peunˍ ve kʼo, Gʼuiˬsha leh chaw yaˇ teˇ hpaˍ hta‸ ha lehˬ piˇ gʼa ve a pehˉ meuˇ gʼuiˬ hta‸ ngaˬ gʼa baˬ taˉ tuˬ yoˬ, teh‸ yawˇ hui hta‸ kʼoˆ piˇ ve yoˬ.

14Teˇ pawˆ suhˆ cehˬ oˇ ve teˇ hpaˍ aˉ chuˇ buiˇ geh kʼai leh, Ngaˬ hui hta‸ uˉ peunˍ laˬˇ-oˆ, teh‸ yawˇ hta‸ kʼoˆpiˇ ve yoˬ.

15Oˇ htaˇ aˉ chuˇ buiˇ lehˬ, Nawˬ hui ngaˬ hta‸ awˬ tehˬ awˬ na jawˇmawˇ te tcuh gaˇ ve kʼo, ngaˬ awˬ hawˉ lo ca chehˇ taˍ la-o. Nawˬ hui oˇ hkʼe maˇ te ve kʼo, aˉ chuˇ buiˇ awˬ hkʼaw lo aˬ miˍ to‸ tawˆ la leh, Leˍbaˍ nonˍ hkʼaw hkʼoˆ lo cawˬ ve htawˇ cehˬ teˇ hpaˍ hta‸ aˬ miˍ to‸ baˬ tuˬ yoˬ, teh‸ yawˇ hui hta‸ kʼoˆ piˇ ve yoˬ ceˇ.

16Chi hta‸ pa taw, hteˇ ve cawˇ ve hkʼaw nawˬ hui Aˍbiˆmaˍlehˆ hta‸ jawˇmawˇ te tcuh taˍ ve laˇ. Giˉdonˍ leh yawˇ ve yehˬ yaˇ kʼa yaˇ teˇ hpaˍ te laˇ taˍ peuˬ ve kanˉ hta‸ keunˍ da‸ ve hkʼe, nawˬ hui yawˇ hta‸ kʼaw‸ te hkʼaw‸ piˇ peuˬ laˇ.

17Ngaˬ ve awˬ pa nawˬ hui awˬ pon ma‸ bawˆ taˍ peuˬ ve hta‸ dawˇ nawˇ-oˆ. Yawˇ a sha‸ tanˇ leh, nawˬ hui hta‸ Meˉdiˍanˍ chaw hui ve la‸ sheh hkʼaw htaiˍ hkʼaw‸ laˇ taˍ peuˬ ve yoˬ.

18Ya‸ hkʼaˇ, nawˬ hui lehˬ ngaˬ pa ve yehˬ yaˇ kʼa yaˇ teˇ hpaˍ hta‸ kʼaw‸ hpfuhˆ ve yoˬ. Nawˬ hui lehˬ, yawˇ ve yaˇ paˍ suhˍ chi gʼaˇ hta‸ haˉ pui teˇ shiˍ tiˉ awˬ hkʼoˆ lo tiˇ pehˍ piˇ leh, nawˬ hui ve awˬ ceuˬ awˬ hkʼaˇ hpeh‸ ve yawˇ ve awˬ miˇ ma i ve yaˇ paˍ Aˍbiˆmaˍlehˆ hta‸, Sheˍhkenˍ venˇ hkʼaw jawˇmawˇ te tcuh ve yoˬ.

19Ya‸ nyi nawˬ hui lehˬ, Giˉdonˍ leh yawˇ ve yehˬ yaˇ kʼa yaˇ teˇ hpaˍ hta‸ hteˇ ve cawˇ ve kanˉ te piˇ taˍ ve yoˬ teh‸ dawˇ ve kʼo, Aˍbiˆmaˍlehˆ geh teˇ geh ha lehˬ chehˇ-oˆ. Yawˇ htawˇ, nawˬ hui geh ha lehˬ chehˇ piˇ-oˆ.

20Oˇ hkʼe maˇ heˆ ve kʼo, Aˍbiˆmaˍlehˆ awˬ hkʼaw lo aˬ miˍ tawˆ la leh, Sheˍhkenˍ leh Behˆmaˍlawˇ venˇ yaˇ teˇ hpaˍ hta‸ to‸ baˬ piˇ lawˬ-o‸. Sheˍhkenˍ leh Behˆmaˍlawˇ venˇ yaˇ teˇ hpaˍ awˬ hkʼaw lo aˬ miˍ tawˆ la leh, Aˍbiˆmaˍlehˆ hta‸ to‸ baˬ piˇ lawˬ-o‸, teh‸ kʼoˆ ve yoˬ.

21Oˇ hkʼe kʼoˆ taˉ peuˬ hkʼaw‸ nawˉ, Yawˇtanˍ gʼuiˇ hpaw-e ve yoˬ. Yawˇ lehˬ, awˬ viˉ paˍ Aˍbiˆmaˍlehˆ hta‸ kawˆ ve pa taw, Beˍraˆ venˇ lo ca hpaw chehˇ kʼai ve yoˬ.

22Aˍbiˆmaˍlehˆ lehˬ, Iˉsaˍreˍlaˆ chaw hui hta‸ shehˆ hkʼaw‸ uˉ peunˍ ve yoˬ.

23Oˇ ve hkʼaw‸ nawˉ, Gʼuiˬsha lehˬ Aˍbiˆmaˍlehˆ leh Sheˍhkenˍ venˇ yaˇ maˇ cawˇ da‸ tuˬ te piˇ ve yoˬ. Hkʼe te leh yawˇ hui Aˍbiˆmaˍlehˆ hta‸ kʼaw‸ hpfuhˆ ve yoˬ.

24Chi hkʼe hpeh‸ la ve lehˬ, Aˍbiˆmaˍlehˆ Giˉdonˍ ve yaˇ pa 70 gʼaˇ hta‸ tiˇ pehˍ tuˬ dawˇ hkʼaˇ piˇ ve Sheˍhkenˍ venˇ yaˇ teˇ hpaˍ hta‸ ciˍ yanˍ piˇ tuˬ awˬ pon hpeh‸ ve yoˬ.

25Sheˍhkenˍ venˇ yaˇ teˇ hpaˍ lehˬ, Aˍbiˆmaˍlehˆ hta‸ hkʼawˇ tiˇ pehˍ tuˬ, yawˇ hui ve chaw teˇ hpaˍ hta‸ hkʼaw hkʼoˆ lo teh taˍ leh, oˇ kaˬ lo hpanˍ kʼai ve chaw teˇ hpaˍ hta‸ yawˇ hui hinˉ yuˬ lu yuˬ chehˇ ve yoˬ. Awˬ lawn chi ve hta‸ Aˍbiˆmaˍlehˆ gʼa kaˇ ve yoˬ.

26Awˇbehˆ ve yaˇ paˍ Gaˍlaˆ leh yawˇ ve awˬ nyi paˍ teˇ hpaˍ, Sheˍhkenˍ venˇ lo laˬ leh venˇ yaˇ teˇ hpaˍ yawˇ hui hta‸ gʼaˇ va ve yoˬ.

27Yawˇ hui hkʼaw hkʼoˆ lo kʼai leh a pehˉ meuˇ shiˍ shaˉ veu laˇ peuˬ hkʼaw‸ nawˉ, a pehˉ meuˇ gʼuiˬ nyiˉ leh pawehˇ te ve yoˬ. Yawˇ hui Gʼuiˬsha ve bon yehˬ hkʼaw ha lehˬ ha kʼa hti caˇ hti dawˬ leh, Aˍbiˆmaˍlehˆ hta‸ maˇ shawˍ maˇ caˆ kʼoˆ ve yoˬ.

28Oˇ htaˇ Gaˍlaˆ kʼoˆ ve, Aˬ hto‸ ma pa taw ngaˬ hui Aˍbiˆmaˍlehˆ ve awˬ ceˬ te chehˇ ve le. Sheˍhkenˍ venˇ hkʼaw chehˇ taˍ ve ngaˬ hui lehˬ, hkʼaˬ hkʼe ve chaw hpeh‸ ve le. Yawˇ lehˬ a shu le. Yawˇ lehˬ Giˉdonˍ ve yaˇ hpeh‸ leh, Zeˍbuˍlaˆ lehˬ yawˇ ve ma‸ poˍ hpeh‸ ve yoˬ. Aˬ hto‸ ma pa taw, ngaˬ hui yawˇ ve awˬ ceˬ gʼa te chehˇ ve le. Nawˬ hui ve awˬ puˍ lonˉ Haˍmawˍ hta‸ taˍ uiˍ leh yawˇ hta‸ ka ti‸ yeˬ cawˇ ve yoˬ.

29Chaw chi teˇ hpaˍ hta‸ ngaˬ sheh kʼai piˇ gaˇ ve yoˬ. Oˇ htaˇ, ngaˬ lehˬ Aˍbiˆmaˍlehˆ hta‸ yuˬ baˬ tuˬ yoˬ. Nawˬ ve ma‸ moˍ shawˍ leh ma‸ ca bawˆ la-o, teh‸ ngaˬ yawˇ hta‸ kʼoˆ piˇ gaˇ ve yoˬ, teh‸ kʼoˆ ve yoˬ.

30Venˇ oˇ ve hta‸ uˉ peunˍ chehˇ ve Zeˍbuˍlaˆ lehˬ, Gaˍlaˆ kʼoˆ ve tawˇ hta‸ gʼa kaˇ ve teˇ yanˇ nyi ma zuhˆ jaˇ ve yoˬ.

31Hkʼe te leh yawˇ lehˬ Aˍruˆmaˍ venˇ hkʼaw chehˇ taˍ ve Aˍbiˆmaˍlehˆ hta‸ tawˇ chi hkʼe shanˍ feu piˇ ve yoˬ. Awˇbehˆ ve yaˇ Gaˍlaˆ leh yawˇ ve awˬ nyi paˍ teˇ hpaˍ Sheˍhkenˍ lo laˬ leh, yawˇ hui lehˬ nawˬ hta‸ venˇ chi hkʼaw kʼaw‸ la tcuh tuˬ ve maˇ heˆ.

32Chi hta‸ pa taw, nawˬ leh nawˬ ve ma‸ yaˇ teˇ hpaˍ, mvuhˇ hpeu‸ htaˇ heh puiˉ hkʼaw lo ca hpaw va‸ taˍ cawˇ ve yoˬ.

33Shawˉ pawˍ mvuhˇ nyi tawˆ la ve teˇ yanˇ, venˇ chi hta‸ ca bawˆ la cawˇ ve yoˬ. Gaˍlaˆ leh yawˇ ve chaw teˇ hpaˍ nawˬ hta‸ ca bawˆ la tuˬ tawˆ la ve teˇ yanˇ, nawˬ te puiˉ te hpeh‸ ve hkʼe, yawˇ hui hta‸ te piˇ-oˆ, teh‸ shanˍ feu piˇ ve yoˬ.

34Oˇ htaˇ, Aˍbiˆmaˍlehˆ leh yawˇ ve ma‸ yaˇ teˇ hpaˍ mvuhˇ hpeu‸ htaˇ tawˆ la leh, chaw awˇ moˍ pehˬ peuˬ hkʼaw‸ nawˉ, Sheˍhkenˍ venˇ paˇ lo va‸ taˍ ve yoˬ.

35Gaˍlaˆ venˇ taˍ meu‸ hpe‸ lo huˉ chehˇ ve hta‸ yawˇ hui gʼa mawˬ ve teˇ yanˇ, Aˍbiˆmaˍlehˆ leh yawˇ ve ma‸ yaˇ teˇ hpaˍ va‸ taˍ kuiˬ lo tawˆ la ve yoˬ.

36Gaˍlaˆ yawˇ hui hta‸ mawˬ ve teˇ yanˇ, Nyi loˬ, hkʼaw hkʼoˆ lo chaw teˇ hpaˍ ya‸ la chehˇ ve yoˬ, teh‸ Zeˍbuˍlaˆ hta‸ kʼoˆ piˇ ve yoˬ. Oˇ htaˇ Zeˍbuˍlaˆ kʼoˆ ve, Yawˇ hui lehˬ chaw hpeh‸ ve maˇ heˆ. Hkʼaw hkʼoˆ lo ve aˉ gʼuiˬ ha hpeh‸ ve yoˬ, teh‸ kʼaw‸ yaw hkʼaw‸ piˇ ve yoˬ.

37Gaˍlaˆ teˇ pawˆ kʼaw‸ kʼoˆ ve, Nyi loˬ, chaw teˇ hpaˍ hpaˍ kʼaˍ le‸ hkʼaw ya‸ la chehˇ leh, teˇ hpaˍ hpaˍ mawˉ paˍ hui ve maˉ kuˇ cehˬ hpawˇ lo laˬ chehˇ ve yoˬ, teh‸ kʼoˆ ve yoˬ.

38Oˇ htaˇ Zeˍbuˍlaˆ yawˇ hta‸ kʼoˆ piˇ ve, Nawˬ nyi ma uiˍ ve hkʼaˬ hkʼe kʼai le. Aˬ hto‸ ma pa taw, ngaˬ hui Aˍbiˆmaˍlehˆ ve awˬ ceˬ gʼa te tuˬ le, teh‸ nawˬ kʼoˆ ve yoˬ. Nawˬ maˇ shawˍ maˇ caˆ kʼoˆ chehˇ ve chaw lehˬ, chaw oˇ ve hpaˇ hpeh‸ ve yoˬ. Chi beu‸ yawˇ hui hta‸ ca bawˆ-e loˬ, teh‸ Gaˍlaˆ hta‸ kʼoˆ piˇ ve yoˬ.

39Oˇ htaˇ Gaˍlaˆ lehˬ Sheˍhkenˍ venˇ yaˇ teˇ hpaˍ hta‸ shiˍ veu leh, Aˍbiˆmaˍlehˆ hta‸ ca bawˆ-e ve yoˬ.

40Aˍbiˆmaˍlehˆ yawˇ hta‸ gʼa‸ yuˬ leh, Gaˍlaˆ gʼuiˇ hpaw-e ve yoˬ. Venˇ yehˬmiˉhpe‸ lo chaw maˇ maˇ suh-e ve yoˬ.

41Oˇ ve hkʼaw‸ nawˉ, Aˍbiˆmaˍlehˆ lehˬ Aˍruˆmaˍ venˇ lo kʼaw‸ kʼo‸-e leh, Zeˍbuˍlaˆ lehˬ Gaˍlaˆ leh yawˇ ve awˬ nyi paˍ teˇ hpaˍ hta‸ venˇ hkʼaw lo gʼa‸ kʼoˬ piˇ ve yoˬ.

42Shawˉ pawˍ teˇ nyi Sheˍhkenˍ venˇ yaˇ teˇ hpaˍ venˇ baˬ lo tawˆ kʼai tuˬ awˬ hkʼaˇ gu chehˇ ve awˬ hkawˇ hta‸ Aˍbiˆmaˍlehˆ gʼa kaˇ ve yoˬ.

43Hkʼe te leh, yawˇ ve ma‸ yaˇ teˇ hpaˍ hta‸ shehˆ moˍ pehˬ leh, heh puiˉ hkʼaw lo ca va‸ taˍ tcuh ve yoˬ. Chaw oˇ ve teˇ hpaˍ venˇ hkʼaw tawˆ la chehˇ ve hta‸ yawˇ gʼa mawˬ ve teˇ yanˇ, yawˇ hui va‸ taˍ kuiˬ lo tu la leh, chaw oˇ ve teˇ hpaˍ hta‸ tiˇ pehˍ piˇ ve yoˬ.

44Aˍbiˆmaˍlehˆ leh yawˇ ve ma‸ yaˇ teˇ hpaˍ venˇ taˍ meu‸ hpe‸ lo gʼuiˇ kʼai leh, oˇ kaˬ lo shaw taˍ ve yoˬ. Awˬ nu ve ma‸ yaˇ nyiˇ moˍ lehˬ, venˇ hkʼaw tawˆ la chehˇ ve chaw oˇ ve teˇ hpaˍ hta‸ gʼa‸ yuˬ leh tiˇ pehˍ piˇ ve yoˬ.

45Teˇ nyi tanˇ vanˇ Aˍbiˆmaˍlehˆ lehˬ, venˇ yaˇ oˇ ve teˇ hpaˍ hta‸ bawˆ da‸ chehˇ taˍ ve yoˬ. Yawˇ lehˬ venˇ oˇ ve hta‸ bawˆ yuˬ leh, venˇ yaˇ teˇ hpaˍ hta‸ tiˇ pehˍ piˇ ve yoˬ. Venˇ oˇ ve hta‸ htawˇ yawˇ te luˬ leh, aˉ leh‸ hkaˆ sheˍ ve yoˬ.

46Awˬ lawn oˇ ve hta‸ Sheˍhkenˍ ta‸ yehˬ lon ˉ hkʼaw chehˇ ve chaw teˇ hpaˍ gʼa kaˇ ve teˇ yanˇ, yawˇ hui Baˍlaˆ gʼuiˬsha ve bon yehˬ lonˉ hkʼaw cawˬ ve ta‸ yehˬ hkʼaw ca hpaw va‸ taˍ ve yoˬ.

47Yawˇ hui oˇ kaˬ lo hpaw va‸ chehˇ ve awˬ hkawˇ hta‸, Aˍbiˆmaˍlehˆ gʼa kaˇ ve yoˬ.

48Oˇ htaˇ yawˇ lehˬ, yawˇ ve ma‸ yaˇ teˇ hpaˍ hta‸ shiˍ veu leh, Zaˍlaˍmonˍ hkʼaw hkʼoˆ taˆ-e ve yoˬ. Yawˇ lehˬ ceˉ ceˇ teˇ maˬ yuˬ leh suhˆ kʼaˉ ku-iˍ tawˆ taˆ peuˬ hkʼaw‸ nawˉ, yawˇ ve chaw teˇ hpaˍ hta‸ htawˇ yawˇ hkʼe te tuˬ kʼoˆ piˇ ve yoˬ.

49Hkʼe te leh, yawˇ hui suhˆ kʼaˉ ku-iˍ oˇ ve teˇ hpaˍ hta‸, ta‸ yehˬ hkuiˉ pui lo hpoˆ taˍ ve yoˬ. Yawˇ hui ta‸ yehˬ oˇ ve hta‸ aˬ miˍ tuˉ keu leh, oˇ kaˬ lo chehˇ taˍ ve chaw teˇ hinˉ gʼaˇ hkʼa peu-eˬ suh-e ve yoˬ.

50Oˇ ve hkʼaw‸ nawˉ Aˍbiˆmaˍlehˆ Teˍbehˆ venˇ lo kʼai leh, venˇ oˇ ve hta‸ kʼaw‸ bawˆ yuˬ ve yoˬ.

51Oˇ kaˬ lo yeˬ jaˇ ve ta‸ yehˬ teˇ maˬ cawˬ ve yoˬ. Hkʼe te leh, venˇ oˇ ve hkʼaw chehˇ ve chaw hkʼa peu-eˬ, ta‸ yehˬ oˇ ve hkʼaw gʼuiˇ lo‸-e ve yoˬ. Yawˇ hui lehˬ, yehˬ miˉ hkʼa deh‸ hoˆ peu hkʼaw‸ nawˉ ta‸ yehˬ hkʼoˆ taˆ-e ve yoˬ.

52Aˍbiˆmaˍlehˆ lehˬ, ta‸ yehˬ oˇ ve hta‸ aˬ miˍ tuˉ keu leh te luˬ piˇ tuˬ, yehˬ miˉ cawˬ kuiˬ lo kʼai ve yoˬ.

53Oˇ htaˇ, yaˇ miˇ teˇ gʼaˇ yawˇ ve oˉ kʼoˍ hkʼoˆ lo haˉ pui mawˍ teˇ maˬ hpehˇ ce piˇ leh, yawˇ ve oˉ kʼoˍ hkoˇ kʼai ve yoˬ.

54Oˇ htaˇ, yawˇ lehˬ ma‸ yaˇ teˇ gʼaˇ hta‸ haˆ haˆ kuˬ yuˬ leh, Ngaˬ hta‸ tiˇ pehˍ laˇ-oˆ. Ngaˬ yaˇ miˇ ma ve la‸ sheh hkʼaw gʼa suh-e ve teh‸ kʼoˆ ve hta‸ maˇ hkanˍ gaˇ, teh‸ kʼoˆ piˇ ve yoˬ. Hkʼe te leh, ma‸ yaˇ oˇ ve yawˇ hta‸ juˆ pehˍ piˇ ve yoˬ.

55Aˍbiˆmaˍlehˆ suh-e peuˬ ve hta‸ Iˉsaˍreˍlaˆ chaw gʼa mawˬ ve teˇ yanˇ, yawˇ hui a shu yawˇ ve yehˬ lo kʼo‸-e ve yoˬ.

56Aˍbiˆmaˍlehˆ lehˬ, yawˇ awˬ pa ve yaˇ 70 gʼaˇ hta‸ tiˇ pehˍ ve pa taw, Gʼuiˬsha yawˇ hta‸ oˇ hkʼe kʼaw‸ te hkʼaw‸ piˇ ve yoˬ.

57Sheˍhkenˍ venˇ yaˇ teˇ hpaˍ htawˇ haiˬ jaˇ ve pa taw, Giˉdonˍ ve yaˇ Yawˇtanˍ yawˇ hui hta‸ hkeu piˇ taˍ ve hkʼe, Gʼuiˬsha yawˇ hui hta‸ ciˍ yanˍ piˇ ve yoˬ.