Judges 11

Lahu Bible Edited © Thailand Bible Society and Bible Society of Myanmar, 2010, 2020.

1Giˇlaˆ mvuhˇmiˬ hkʼaw chehˇ ve Yeˍhpaˍtaˆ lehˬ, ha‸ hanˉ jaˇ ve ma‸ yaˇ teˇ gʼaˇ hpeh‸ ve yoˬ. Yawˇ awˬ pa lehˬ Giˇlaˆ hpeh‸ leh, yawˇ ve awˬ e lehˬ meh maˬ lanˉ teˇ gʼaˇ hpeh‸ ve yoˬ.

2Giˇlaˆ miˇ ma lehˬ, awˬ kaˍ awˬ nu ve yaˇ paˍ teˇ hpaˍ cawˬ ve yoˬ. Yaˇ paˍ oˇ ve teˇ hpaˍ uiˍ la ve teˇ yanˇ, yawˇ hui Yeˍhpaˍtaˆ hta‸ gʼa‸ kʼoˬ piˇ leh kʼoˆ ve, Nawˬ lehˬ ngaˬ hui ve awˬ pa geh te‸ chiˉ awˬ shinˉ gʼa tuˬ ve maˇ heˆ. Awˬ lawn kʼo, nawˬ lehˬ awˬ kaˍ awˬ nu ve yaˇ miˇ teˇ gʼaˇ ve yaˇ hpeh‸ ve yoˬ, teh‸ yawˇ hta‸ kʼoˆ piˇ ve yoˬ.

3Hkʼe te leh Yeˍhpaˍtaˆ lehˬ, yawˇ ve awˬ viˉ awˬ nyi teˇ hpaˍ geh tawˆ kʼai leh, Tawˇbaˆ mvuhˇmiˬ hkʼaw ca chehˇ taˍ ve yoˬ. Oˇ kaˬ lo haiˬ ve chaw teˇ hpaˍ yawˇ hta‸ awˬ chawˇ ca te la leh, yawˇ hui teˇ geh te toˇ chehˇ ve yoˬ.

4Oˇ ve hkʼaw‸ nawˉ, Aˍmawˇriˆ chaw hui leh Iˉsaˍreˍlaˆ chaw hui ma‸ bawˆ da‸ ve yoˬ.

5Chi hkʼe hpeh‸ la ve teˇ yanˇ, Giˇlaˆ mvuhˇmiˬ ve awˬ hoˉ awˬ naˬ teˇ hpaˍ lehˬ, Tawˇbaˆ mvuhˇmiˬ hkʼaw chehˇ ve Yeˍhpaˍtaˆ hta‸ ca shiˍ hkʼaw‸ la leh kʼoˆ ve,

6Ngaˬ hui Aˍmawˇniˆ chaw hui hta‸ bawˆ da‸ hpeh‸ tuˬ, ngaˬ hui hta‸ awˬ hoˉ te leh sheh kʼai laˇ-oˆ, teh‸ yawˇ hta‸ kʼoˆ piˇ ve yoˬ.

7Oˇ htaˇ Yeˍhpaˍtaˆ kʼaw‸ yaw hkʼaw‸ leh kʼoˆ ve, Nawˬ hui ngaˬ hta‸ nyi bawˬ leh, ngaˬ pa ve yehˬ hkʼaw gʼa‸ kʼoˬ laˇ ve yoˬ. Chi beu‸ nawˬ hui dawˇ haˍ kuiˬ hkʼaw gaˬ ve teˇ yanˇ, aˬ hto‸ ma pa taw ngaˬ geh laˬ ve le, teh‸ yawˇ hui hta‸ kʼoˆ piˇ ve yoˬ.

8Yawˇ hui kʼaw‸ kʼoˆ ve, Chi beu‸ ngaˬ hui nawˬ geh laˬ ve yoˬ. Awˬ lawn kʼo, Giˇlaˆ mvuhˇmiˬ hkʼaw chehˇ ve chaw hkʼa peu-eˬ hta‸ shiˍ leh, Aˍmawˇniˆ chaw hui hta‸ ca bawˆ tuˬ nawˬ hta‸ ngaˬ hui geh kʼai tcuh gaˇ ve yoˬ, teh‸ yawˇ hta‸ kʼoˆ piˇ ve yoˬ.

9Oˇ htaˇ Yeˍhpaˍtaˆ lehˬ, Aˍmawˇniˆ chaw hui hta‸ ca bawˆ tuˬ nawˬ hui ngaˬ hta‸ shiˍ kʼo‸-e leh, Gʼuiˬsha ngaˬ hta‸ gʼaˇ shehˍ hpaˇ hpeh‸ la piˇ ve kʼo, ngaˬ hta‸ nawˬ hui ve awˬ hoˉ te tcuh laˇ tuˬ ve laˇ, teh‸ yawˇ hui hta‸ na nyi ve yoˬ.

10Yawˇ hui lehˬ, Nawˬ kʼoˆ ve hkʼe ngaˬ hui te tuˬ yoˬ. Gʼuiˬsha lehˬ, ngaˬ hui awˬ kaˍ lo shaˉ hkiˆ hpeh‸ ve yoˬ, teh‸ kʼoˆ ve yoˬ.

11Hkʼe te leh, Yeˍhpaˍtaˆ lehˬ Giˇlaˆ mvuhˇmiˬ ve awˬ hoˉawˬ naˬ teˇ hpaˍ geh kʼo‸-e leh, yawˇ hui yawˇ hta‸ awˬ hoˉ te tcuh ve yoˬ. Yeˍhpaˍtaˆ lehˬ, tawˇ oˇ ve hkʼa peu-eˬ Miˇsaˍpaˍ venˇ hkʼaw Gʼuiˬsha mehˆ gʼuˇ suhˍ teˇ pawˆ kʼaw‸ kʼoˆ ve yoˬ.

12Oˇ ve hkʼaw‸ nawˉ Yeˍhpaˍtaˆ Aˍmawˇniˆ jawˇmawˇ hta‸ tawˇ shanˍ feu piˇ leh, Aˬ hto‸ ma pa taw, nawˬ ngaˬ hui hta‸ ca ya‸ la ve le. Aˬ hto‸ ma pa taw, nawˬ ngaˬ hui ve mvuhˇmiˬ hta‸ ca bawˆ la ve le, teh‸ na nyi ve yoˬ.

13Oˇ htaˇ Aˍmawˇniˆ jawˇmawˇ tawˇ kʼaw‸ shanˍ feu laˇ leh kʼoˆ ve, Iˉsaˍreˍlaˆ chaw teˇ hpaˍ Eˇjiˇtu‸ mvuhˇmiˬ hkʼaw tawˆ la ve teˇ yanˇ, Aˍnonˍ iˉ kaˆ lawˬ, Yaˍboˆ iˉ kaˆ lawˬ, Yawˇdanˍ iˉ kaˆ lawˬ chi teˇ hpaˍ awˬ kaˍ lo cawˬ ve ngaˬ hui ve mvuhˇmiˬ hta‸ hinˉ yuˬ kʼai taˍ ve yoˬ. Chi beu‸ mvuhˇmiˬ oˇ ve teˇ hpaˍ ngaˬ hui hta‸ kʼaw‸ pe‸ laˇ-oˆ, teh‸ yawˇ hta‸ kʼoˆ piˇ ve yoˬ.

14Oˇ htaˇ Yeˍhpaˍtaˆ Aˍmawˇniˆ jawˇmawˇ geh tawˇ kʼaw‸ shanˍ feu leh kʼoˆ ve,

15Iˉsaˍreˍlaˆ chaw hui lehˬ, Mawˇbaˆ chaw hui ve mvuhˇmiˬ leh, Aˍmonˍ chaw hui ve mvuhˇmiˬ htaˬ maˇ bawˆ yuˬ.

16Iˉsaˍreˍlaˆ chaw teˇ hpaˍ Eˇjiˇtu‸ mvuhˇmiˬ hkʼaw tawˆ la ve teˇ yanˇ, yawˇ hui lehˬ hteunˍ lonˉ leh laˇ tsuhˇ gʼuiˬ nyi hta‸ hpanˍ kʼai peuˬ hkʼaw‸ nawˉ, Kaˍdeˍshaˆ venˇ lo gaˬ la ve yoˬ.

17Oˇ htaˇ yawˇ hui lehˬ, Eˇdonˍ mvuhˇmiˬ hkʼaw hpanˍ kʼai tuˬ, Eˇdonˍ jawˇmawˇ geh a hkaw-anˬ lawˬ ve yoˬ. Ya‸ hkʼaˇ, Eˇdon jawˇmawˇ yawˇ hui hta‸ a hkaw-anˬ maˇ piˇ. Chi hta‸ pa taw, Iˉsaˍreˍlaˆ chaw teˇ hpaˍ Kaˍdeˍshaˆ venˇ hkʼaw lo chehˇ taˍ ve yoˬ.

18Oˇ ve hkʼaw‸ nawˉ, yawˇ hui lehˬ hteunˍ lonˉ hta‸ hpanˍ kʼai ve yoˬ. Yawˇ hui lehˬ, Eˇdonˍ mvuhˇmiˬ leh Mawˇbaˆ mvuhˇmiˬ hta‸ caw kʼai leh, Aˍnonˍ iˉ kaˆ lawˬ oˇ hpawˇ lo cawˬ ve Mawˇbaˆ mvuhˇmiˬ mvuhˇ nyi tawˆ hpawˇ lo gaˬ la ve yoˬ. Yawˇ hui lehˬ Aˍnonˍ iˉ kaˆ lawˬ hta‸ maˇ hkanˍ tawˆ-e. Awˬ lawn kʼo, iˉ kaˆ lawˬ oˇ ve lehˬ Mawˇbaˆ chaw hui ve miˬ tcuhˉ hpeh‸ ve pa taw yoˬ.

19Oˇ ve hkʼaw‸ nawˉ, Iˉsaˍreˍlaˆ chaw teˇ hpaˍ lehˬAˍmawˇriˆ mvuhˇmiˬ hta‸ hpanˍ kʼai tuˬ, Heˍsaˍbonˍ jawˇmawˇ Siˉhonˍ geh a hkaw-anˬ lawˬ ve yoˬ.

20Ya‸ hkʼaˇ, jawˇmawˇ Shiˉhonˍ lehˬ yawˇ hui hta‸ a hkaw-anˬ maˇ piˇ. Yawˇ lehˬ, ma‸ yaˇ hkʼa peu-eˬ ve hta‸ shiˍ veu laˇ leh, Iˉsaˍreˍlaˆ chaw hta‸ ca bawˆ la tuˬ, Yaˍhaˆ venˇ lo chehˇ taˍ ve yoˬ.

21Ya‸ hkʼaˇ, Iˉsaˍreˍlaˆ chaw hui ve Jawˇmawˇ Gʼuiˬsha lehˬ, Siˉhonˍ leh yawˇ ve ma‸ yaˇ hkʼa peu-eˬ hta‸ Iˉsaˍreˍlaˆ chaw hui ve la‸ sheh hkʼaw lo chiˇ a‸ piˇ ve yoˬ. Chi hta‸ pa taw, Iˉsaˍreˍlaˆ chaw hui lehˬ, oˇ kaˬ lo chehˇ taˍ ve Aˍmawˇriˆ chaw hui ve mawˇ jeˬ hkʼa peu-eˬ hta‸ yuˬ kʼai ve yoˬ.

22Yawˇ hui lehˬ, awˬ hawˉ hpawˇ Aˍnonˍ iˉ kaˆ lawˬ hta‸ te leh, awˬ na hpawˇ Yaˍboˆ iˉ kaˆ lawˬ lo hkʼa gaˬ, mvuhˇ nyi tawˆ hpawˇ lo cawˬ ve hteunˍ lonˉ hta‸ te leh, mvuhˇ nyi kʼehˬ hpawˇ lo cawˬ ve Yawˇdanˍ iˉ kaˆ lawˬ lo hkʼa gaˬ, awˬ kaˍ lo cawˬ taˍ ve Aˍmawˇriˆ chaw hui ve mvuhˇmiˬ hkʼa peu-eˬ hta‸ bawˆ yuˬ ve yoˬ.

23Chi hta‸ pa taw Iˉsaˍreˍlaˆ chaw hui awˬ pon Aˍmawˇriˆ chaw hui hta‸ gʼa‸ kʼoˬ piˇ shehˍ hpaˇ lehˬ, Iˉsaˍ reˍlaˆ chaw hui ve Jawˇmawˇ Gʼuiˬsha hpeh‸ ve yoˬ.

24Nawˬ hui lehˬ, mvuhˇmiˬ oˇ ve hta‸ kʼaw‸ bawˆ yuˬ tuˬ coˇ caˇ chehˇ ve laˇ. Nawˬ hui ve Hkeˍmuˇshaˆ gʼuiˬsha nawˬ hui hta‸ piˇ taˍ ve mvuhˇmiˬ hta‸ tiˉ ha‸ shaˉ taˍ-o‸. Ngaˬ hui ve Jawˇmawˇ Gʼuiˬsha ngaˬ hui hta‸ piˇ laˇ taˍ peuˬ ve mvuhˇmiˬ hta‸ ngaˬ hui ha‸ shaˉ taˍ tuˬ yoˬ.

25Mawˇbaˆ mvuhˇmiˬ hta‸ uˉ peunˍ chehˇ ve Ziˆpawˇraˆ ve yaˇ Baˍlehˆ a‸ kehˉ nawˬ hui da‸ leuˉ ve yoˬ, teh‸ dawˇ chehˇ ve laˇ. Yawˇ lehˬ Iˉsaˍreˍlaˆ chaw hui hta‸ teˇ pawˆ ka‸ maˇ tawˍ da‸ jaw. Yawˇ ngaˬ hui hta‸ teˇ pawˆ pawˆ ca bawˆ la jaw laˇ.

26Iˉsaˍreˍlaˆ chaw hui lehˬ, Heˍsaˍbonˍ venˇ, Aˍyawˍ venˇ, leh Aˍnonˍ iˉ kaˆ lawˬ pfuhˍ lo cawˬ ve venˇ teˇ hpaˍ hta‸ shehˆ ha hkʼaw‸ hkʼa gaˬ uˉ peunˍ chehˇ ve yoˬ. Awˬ yanˇ oˇ ve teˇ hpaˍ awˬ hkʼaw lo, aˬ hto‸ ma pa taw nawˬ hui venˇ oˇ ve teˇ hpaˍ hta‸ maˇ kʼaw‸ bawˆ hkʼaw‸ ve le.

27Ngaˬ lehˬ, nawˬ hui hta‸ te‸ chiˉ te ya‸ kuiˬ maˇ cawˬ. Nawˬ hui ngaˬ hta‸ ma‸ ca bawˆ la ve lehˬ, nawˬ hui te ya‸ jaˇ ve yoˬ. Gʼuiˬsha lehˬ, suhˉ jehˬ shehˍ hpaˇ hpeh‸ ve yoˬ. Iˉsaˍreˍlaˆ chaw leh Aˍmawˇniˆ chaw hui awˬ kaˍ lo, ya‸ nyi Gʼuiˬsha suhˉ jehˬ laˇ tuˬ yoˬ, teh‸ kʼaw‸ kʼoˆ feu piˇ ve yoˬ.

28Ya‸ hkʼaˇ, Aˍmawˇniˆ jawˇmawˇ lehˬ Yeˍhpaˍtaˆ kʼaw‸ yaw hkʼaw‸ feu piˇ ve tawˇ hta‸ maˇ na yuˬ.

29Oˇ htaˇ Gʼuiˬsha ve Awˬ ha hpu Yeˍhpaˍtaˆ awˬ hkʼoˆ ya‸ la ve yoˬ. Hkʼe te leh, yawˇ lehˬ Giˇlaˆ leh Maˍnaˍseˍ mvuhˇmiˬ lo kʼai taˉ peuˬ hkʼaw‸ nawˉ, Giˇlaˆ mvuhˇmiˬ hkʼaw cawˬ ve Miˆsaˍpa venˇ lo kʼaw‸ la ve yoˬ. Peuˬ leh Aˍmonˍ chaw hui ve mvuhˇmiˬ lo kʼaw‸ kʼai ve yoˬ.

30Oˇ htaˇ Yeˍhpaˍtaˆ Gʼuiˬsha hta‸ ka ti‸ te leh kʼoˆ ve, Gʼuiˬsha-oˬ, Aˍmawˇniˆ chaw hui hta‸ nawˬ ngaˬ ve la‸ sheh hkʼaw chiˇ a‸ laˇ ve kʼo,

31ngaˬ ma‸ bawˆ gʼaˇ taˉ leh kʼaw‸ la ve teˇ yanˇ, ngaˬ hta‸ awˉ lawˉ peuˇ ca ha‸ la ve chaw teˇ gʼaˇ hta‸ ngaˬ yuˬ leh nawˬ hta‸ tuˉ tanˇ laˇ tuˬ yoˬ, teh‸ kʼoˆ ve yoˬ.

32Yawˇ oˇ hkʼe kʼoˆ peuˬ hkʼaw‸ nawˉ, Aˍmawˇriˆ chaw hui hta‸ ca bawˆ tuˬ, iˉ kaˆ lawˬ hta‸ hkanˍ tawˆ-e ve yoˬ. Gʼuiˬsha lehˬ, yawˇ hta‸ gʼaˇ shehˍ hpaˇ hpeh‸ piˇ lawˬ ve yoˬ.

33Yawˇ lehˬ Aˍyawˍ venˇ hta‸ te leh Keˍraˍmenˍ lo hkʼa gaˬ, awˬ kaˍ lo cawˬ ve Miˇniˆ venˇ leh awˬ nu ve venˇ nyiˇ chi venˇ hta‸ te luˬ te sheˆ piˇ ve yoˬ. Iˉsaˍreˍlaˆ chaw hui lehˬ, Aˍmawˇniˆ chaw hui hta‸ tiˇ pehˍ leh, yawˇ hui hta‸ te luˬ te sheˆ piˇ ve yoˬ.

34Yeˍhpaˍtaˆ lehˬ, Miˆsaˍpaˍ venˇ lo kʼaw‸ la chehˇ ve teˇ yanˇ, yawˇ ve yaˇ miˇ lehˬ tinˍ hteˆ kʼaˍ hkʼeˆ leh, yawˇ hta‸ ca ha‸ yuˬ la ve yoˬ. Yeˍhpaˍtaˆ lehˬ, yaˇ chi teˇ gʼaˇ tiˉ cawˬ ve yoˬ.

35Yawˇ ve yaˇ miˇ hta‸ gʼa mawˬ ve teˇ yanˇ, Yeˍhpaˍtaˆ dawˇ haˍ jaˇ leh yawˇ ve veu‸ kʼaˇ hta‸ tzuh‸ suhˍ leh kʼoˆ ve, Yaˇ miˇ-oˬ, nawˬ lehˬ ngaˬ ve nyi ma hta‸ pe‸ hkoˇ tuˬ te laˇ ve yoˬ. Aˬ hto‸ ma pa taw, nawˬ ngaˬ hta‸ dawˇ haˍ tuˬ te laˇ ve le. Ngaˬ Gʼuiˬsha hta‸ ka ti‸ te taˍ peuˬ. Ka ti‸ oˇ ve hta‸ ngaˬ te luˬ maˇ hpeh‸, teh‸ kʼoˆ piˇ ve yoˬ.

36Oˇ htaˇ yawˇ ve yaˇ miˇ lehˬ, Ngaˬ pa-oˬ, nawˬ Gʼuiˬsha hta‸ ka ti‸ te taˍ peuˬ ve kʼo, nawˬ te taˍ ve ka ti‸ hkʼa shuˍ ngaˬ hta‸ te laˇ-oˆ. Awˬ lawn kʼo, Gʼuiˬsha lehˬ nawˬ ve canˇ paˍ Aˍmawˇniˆ chaw hui hta‸ nawˬ ve la‸ sheh hkʼaw chiˇ a‸ laˇ peuˬ ve yoˬ, teh‸ yawˇ ve awˬ pa hta‸ kʼoˆ piˇ ve yoˬ.

37Oˇ ve hkʼaw‸ nawˉ yaˇ miˇ chi yawˇ ve awˬ pa hta‸ lawˬ hkawˉ leh kʼoˆ ve, Ngaˬ pa-oˬ, ngaˬ nawˬ geh teˇ ceuˬ lawˬ gaˇ ve yoˬ. Ngaˬ lehˬ yaˇ miˇ haˉ hpeh‸ leh gʼa suh-e tuˬ ve pa taw, ngaˬ maˇ suh sheˍ gʼuˇ suhˍ ngaˬ ve awˬ chawˇ teˇ hpaˍ geh hkʼaw hkʼoˆ lo ca hawˬ toˇ tuˬ, awˬ yanˇ nyiˇ ha pa hkʼe piˇ laˇ-oˆ, teh‸ kʼoˆ ve yoˬ.

38Yawˇ ve awˬ pa htawˇ yawˇ lawˬ ve hkʼe, awˬ yanˇ nyiˇ ha pa piˇ ve yoˬ. Hkʼe te leh yaˇ miˇ oˇ ve lehˬ, yawˇ ve awˬ chawˇ teˇ hpaˍ hta‸ shiˍ veu leh, ha pa nyiˇ maˬ hkʼa biˇ hkʼaw hkʼoˆ lo chehˇ taˍ ve yoˬ.

39Ha pa nyiˇ maˬ peuˬ kʼai ve teˇ yanˇ, yaˇ miˇ oˇ ve yawˇ awˬ pa geh kʼaw‸ la ve yoˬ. Yeˍhpaˍtaˆ lehˬ, yawˇ Gʼuiˬsha hta‸ ka ti‸ te taˍ ve hkʼe te ve yoˬ. Yawˇ ve yaˇ miˇ lehˬ yaˇ miˇ haˉ ceh tiˉ hpeh‸ taˉ leh suh-e ve yoˬ.

40Oˇ ve teˇ nyi hta‸ te leh Iˉsaˍreˍlaˆ yaˇ miˇ teˇ hpaˍ lehˬ, teˇ hkʼaw‸ awˬ hkʼaw lo awˇ nyi heh puiˉ hkʼaw lo kʼai leh, Giˇlaˆ venˇ yaˇ Yeˍhpaˍtaˆ yaˇ miˇ pon dawˇ haˍ leh ca paˆ hawˬ toˇ ve awˬ liˇ cawˬ la ve yoˬ.

← Chapter 10 Jump to: Chapter 12 →