Judges 18

Lahu Bible Edited © Thailand Bible Society and Bible Society of Myanmar, 2010, 2020.

1Awˬ yanˇ oˇ ve awˬ hkʼaw lo, Iˉsaˍreˍlaˆ chaw hui jawˇmawˇ teˇ gʼaˇ ka‸ maˇ cawˬ sheˍ. Danˍ awˬ ceuˬ awˬ hkʼaˇ teˇ hpaˍ lehˬ, yawˇ hui chehˇ tuˬ mvuhˇmiˬ teˇ peˆ ca chehˇ ve yoˬ. Awˬ yanˇ oˇ ve hkʼa gaˬ, Iˉsaˍreˍlaˆ chaw hui awˬ hkʼaw lo Danˍ awˬ ceuˬ awˬ hkʼaˇ teˇ hpaˍ lehˬ, mvuhˇmiˬ teˇ peˆ ka‸ maˇ gʼa sheˍ.

2Hkʼe te leh Danˍ awˬ ceuˬ awˬ hkʼaˇ teˇ hpaˍ lehˬ, yawˇ hui awˬ hkʼaw lo cheuˬ jaˇ ve chaw ngaˇ gʼaˇ hta‸ leuˆ yuˬ leh, mvuhˇmiˬ ca nyi tuˬ Zawˇraˍ venˇ leh Eˇshaˍtawˇlaˆ venˇ lo kʼai tcuh ve yoˬ. Hkʼe te leh yawˇ hui Eˇhpaˍrenˍ mvuhˇmiˬ hkʼaw gaˬ la leh, Miˆhkaˍ ve yehˬ hkʼaw chehˇ taˍ ve yoˬ.

3Yawˇ hui oˇ kaˬ lo chehˇ taˍ ve teˇ yanˇ, Leˍviˆ chaw haˉ paˍ oˇ ve tawˇ yaw ve awˬ hkawˇ hta‸ yawˇ hui teˇ cawˬ haˉ shiˍ ve yoˬ. Hkʼe te leh, yawˇ hui yawˇ geh kʼai leh, Nawˬ choˬ kaˬ aˬ hto‸ ma te chehˇ ve le. A shu nawˬ hta‸ choˬ kaˬ lo shiˍ laˬ ve le, teh‸ yawˇ hta‸ na nyi ve yoˬ.

4Yawˇ kʼaw‸ yaw hkʼaw‸ leh kʼoˆ ve, Ngaˬ lehˬ Miˆhkaˍ hta‸ ka ti‸ te da‸ taˍ ve yoˬ. Ngaˬ yawˇ ve paw hkuˇ te piˇ leh, yawˇ ngaˬ hta‸ gʼaˇ hpfuhˇ piˇ laˇ ve yoˬ, teh‸ kʼoˆ piˇ ve yoˬ.

5Oˇ htaˇ yawˇ hui lehˬ, Hkʼe te kʼo, ngaˬ hui ca te toˇ ve kanˉ chi awˬ bon tawˆ la tuˬ naˍ, Gʼuiˬsha hta‸ a ciˉ na nyi laˇ-oˆ, teh‸ yawˇ hta‸ kʼoˆ piˇ ve yoˬ.

6Paw hkuˇ oˇ ve kʼaw‸ yaw hkʼaw‸ leh kʼoˆ ve, Nawˬ hui te‸ chiˉ dawˇ hkiˉ tuˬ maˇ cawˬ. Gʼuiˬsha nawˬ hui hta‸ ha‸ shaˉ laˇ chehˇ ve yoˬ, teh‸ yawˇ hui hta‸ kʼoˆ piˇ ve yoˬ.

7Hkʼe te leh chaw oˇ ve ngaˇ gʼaˇ tawˆ kʼai leh Lehˇshaˆ venˇ lo kʼai ve yoˬ. Venˇ oˇ ve hkʼaw chehˇ ve chaw teˇ hpaˍ lehˬ, Siˉdonˍ chaw teˇ hpaˍ hkʼa shuˍ, te‸ chiˉ dawˇ haˍ tuˬ maˇ cawˬ leh gawˬ lehˍ gʼa chehˇ ve hta‸ yawˇ hui gʼa mawˬ ve yoˬ. Yawˇ hui lehˬ gawˬ lehˍ chehˇ puiˉ ve chaw hpeh‸ leh, chaw teˇ gʼaˇ hta‸ ka‸ maˇ ca ya‸ da‸ jaw ve chaw hpeh‸ ve yoˬ. Yawˇ hui loˍ ve awˬ ceuˬ hkʼa peu-eˬ yawˇ hui geh cawˬ taˍ ve yoˬ. Yawˇ hui lehˬ Siˉdonˍ chaw hui hta‸ vuiˇ da‸ jaˇ leh, awˬ nu ve chaw teˇ hpaˍ hta‸ htawˇ awˬ chawˇ ma ca te da‸.

8Chaw oˇ ve ngaˇ gʼaˇ Zawˇraˍ leh Eˇshaˍtawˇlaˆ venˇ lo kʼaw‸ gaˬ la ve teˇ yanˇ, venˇ yaˇ teˇ hpaˍ lehˬ yawˇ hui aˬ hto‸ ma gʼa mawˬ taˉ ve awˬ lawn yawˇ hui hta‸ na nyi ve yoˬ.

9Oˇ htaˇ yawˇ hui kʼoˆ ve, Laˍ-o‸. Ngaˬ hui Lehˇshaˆ venˇ hta‸ ca bawˆ yuˬ-a veuˬ. Yawˇ hui ve mvuhˇmiˬ hta‸ ngaˬ hui gʼa mawˬ taˉ peuˬ. Mvuhˇmiˬ oˇ ve lehˬ da‸ jaˇ ve yoˬ. Choˬ kaˬ lo chehˇ taˍ leh te‸ chiˉ taˇ ca te guiˇ chehˇ-oˆ. Ngaˬ hui haˆ kʼai leh venˇ oˇ ve hta‸ ca bawˆ yuˬ-a veuˬ.

10Chaw oˇ ve teˇ hpaˍ lehˬ, te‸ chiˉ maˇ dawˇ hkiˉ puiˉ ve chaw hpeh‸ ve yoˬ. Mvuhˇmiˬ oˇ ve lehˬ, uiˍ jaˇ ve mvuhˇmiˬ hpeh‸ leh, loˍ cawˇ ve mawˇ teˇ hpaˍ oˇ kaˬ lo hkʼa biˇ cawˬ taˍ ve yoˬ, teh‸ yawˇ hui hta‸ kʼoˆ piˇ ve yoˬ.

11Hkʼe te leh Danˍ awˬ ceuˬ awˬ hkʼaˇ, ma‸ yaˇ 600 gʼaˇ lehˬ ma‸ ca bawˆ tuˬ Zawˇraˍ leh Eˇshaˍtawˇ laˆ venˇ hkʼaw tawˆ kʼai ve yoˬ.

12Yawˇ hui lehˬ, Yuˇda‸ mvuhˇmiˬ hkʼaw cawˬ ve Kiˇriˇyaˆyaˍrenˍ venˇ hkʼaw deh chehˇ taˍ ve yoˬ. Chi hta‸ pa taw, chehˇ kuiˬ oˇ ve hta‸ ya‸ nyi hkʼa gaˬ Danˍ chaw hui ve fa la, teh‸ meh piˇ taˍ ve yoˬ.

13Yawˇ hui oˇ kaˬ lo kʼaw‸ tu leh, Eˇhpaˍrenˍ mvuhˇmiˬ hkʼaw cawˬ ve Miˆhkaˍ ve yehˬ lo gaˬ la ve yoˬ.

14Oˇ htaˇ Lehˇshaˆ venˇ hta‸ ca jaˆ nyi taˉ ve chaw jaˆ oˇ ve ngaˇ gʼaˇ, yawˇ hui ve awˬ chawˇ teˇ hpaˍ hta‸ chi hkʼe kʼoˆ piˇ ve yoˬ. Yehˬ chi ve hkʼaw lo, hpu oˍ taˍ ve shaˉ ho‸ teˇ maˬ cawˬ ve hta‸ nawˬ hui shiˍ-aˬ laˇ. Chi awˬ hkʼoˆ, awˬ nu ve shaˉ ho‸ teˇ hpaˍ htawˇ cawˬ sheˍ ve yoˬ. Ngaˬ hui hkʼa hkʼe te cawˇ ve le, teh‸ yawˇ hui hta‸ kʼoˆ piˇ ve yoˬ.

15Oˇ hkʼe kʼoˆ da‸ peuˬ hkʼaw‸ nawˉ, yawˇ hui Leˍviˆ chaw chehˇ taˍ kuiˬ Miˆhkaˍ ve yehˬ hkʼaw lo‸-e leh yawˇ hta‸ la‸ kʼawˍ caˉ piˇ ve yoˬ.

16Yawˇ hui oˇ hkʼe te chehˇ htaˇ, Danˍ chaw hui ve ma‸ yaˇ 600 gʼaˇ lehˬ, yehˬmiˉhpe‸ lo huˉ taˍ leh ma‸ bawˆ tuˬ gu taˍ ve yoˬ.

17Chaw jaˆ oˇ ve ngaˇ gʼaˇ lehˬ, yehˬ hkʼaw lo‸-e leh hpu oˍ taˍ ve shaˉ ho‸ oˇ ve hkʼa peu-eˬ hta‸ yuˬ kʼai ve yoˬ. Paw hkuˇ lehˬ, ma‸ yaˇ oˇ ve 600 gʼaˇ geh yehˬmiˉhpe‸ lo chehˇ taˍ ve yoˬ.

18Chaw oˇ ve teˇ hpaˍ Miˆhkaˍ ve yehˬ hkʼaw lo‸-e leh, shaˉ ho‸ oˇ ve teˇ hpaˍ hta‸ ca yuˬ chehˇ ve hta‸ paw hkuˇ oˇ ve gʼa mawˬ ve teˇ yanˇ, Nawˬ hui aˬ hto‸ ma te ve le, teh‸ yawˇ hui hta‸ kʼoˆpiˇ ve yoˬ.

19Oˇ htaˇ yawˇ hui kʼoˆ ve, Nawˬ ta‸ iˉ chehˇ taˍ-o‸. Tawˇ teˇ peu-eˬ ka‸ taˇ yaw. Nawˬ ngaˬ hui geh laˬ leh, ngaˬ hui ve paw hkuˇ leh, ngaˬ hui hta‸ dawˇ hkʼaˇ piˇ laˇ shehˍ hpaˇ te-o. Chaw teˇ gʼaˇ ve yehˬ hkʼaw paw hkuˇ te chehˇ ve a‸ kehˉ, Iˉsaˍreˍla‸ chaw chi ma ve awˬ hkʼoˆ paw hkuˇ gʼa te ve lehˬ, leuˉ leh da‸ ve maˇ heˆ laˇ, teh‸ yawˇ hta‸ kʼoˆ piˇ ve yoˬ.

20Tawˇ oˇ ve hta‸ paw hkuˇ gʼa kaˇ ve teˇ yanˇ, ha lehˬ jaˇ leh shaˉ ho‸ oˇ ve teˇ hpaˍ hta‸ yuˬ peuˬ hkʼaw‸ nawˉ, yawˇ hui geh kʼai ve yoˬ.

21Yawˇ hui lehˬ, laˬ ve ya‸ kʼaw hkʼaˇ suh kʼaw‸ kʼo‸-e ve yoˬ. Yawˇ hui ve miˇ yaˇ, ceˇ caˬ leh mawˇ jeˬ teˇ hpaˍ hta‸ yawˇ hui gʼuˇ suh lo kʼai peu taˍ ve yoˬ.

22Yawˇ hui Miˆhkaˍ ve yehˬ hta‸ a ciˉ vuiˇ kuiˬ lo gaˬ ve teˇ yanˇ, Miˆ hkaˍ lehˬ yawˇ awˬ paˇ awˬ kui lo chehˇ ve chaw hui hta‸ kuˬ yuˬ leh, Danˍ chaw hui hkʼaˇ suh gʼa‸ yuˬ kʼai ve yoˬ.

23Oˇ htaˇ Danˍ chaw teˇ hpaˍ lehˬ, Aˬ hto‸ ma hpeh‸ ve le. Aˬ hto‸ ma pa taw chaw moˍ lonˉ ngaˬ hui hkʼaˇ suh gʼa‸ yuˬ laˬ ve le, teh‸ Miˆhkaˍ hta‸ na nyi ve yoˬ.

24Oˇ htaˇ Miˆhkaˍ lehˬ, Aˬ hto‸ ma hpeh‸ ve le, teh‸ aˬ hto‸ ma pa taw nawˬ hui ngaˬ hta‸ kʼaw‸ na nyi laˇ chehˇ ve le. Nawˬ hui lehˬ ngaˬ ve paw hkuˇ leh ngaˬ ve shaˉ ho‸ teˇ hpaˍ hta‸ yuˬ kʼai ve yoˬ. Ngaˬ geh aˬ hto‸ ma cawˬ taˉ sheˍ ve le, teh‸ yawˇ hui hta‸ kʼoˆ piˇ ve yoˬ.

25Oˇ htaˇ Danˍ chaw teˇ hpaˍ lehˬ, Nawˬ te‸ chiˉ taˇ kʼaw‸ kʼoˆ loˬ. Oˇ hkʼe maˇ te kʼo, chaw chi teˇ hpaˍ nyi ma zuhˆ la leh, nawˬ leh nawˬ ve yehˬ yaˇ kʼa yaˇ hkʼa peu-eˬ gʼa suh tuˬ yoˬ, teh‸ yawˇ hta‸ kʼoˆ piˇ ve yoˬ.

26Oˇ hkʼe kʼoˆ piˇ peuˬ hkʼaw‸ nawˉ, Danˍ chaw teˇ hpaˍ awˬ gʼuˇ suhˍ kʼai ve yoˬ. Miˆhkaˍ lehˬ, yawˇ hui hta‸ bawˆ da‸ maˇ gʼaˇ taˬ ve hta‸ shiˍ leh aˉ hkʼaw lo kʼaw‸ kʼo‸-e ve yoˬ.

27Danˍ chaw teˇ hpaˍ lehˬ, Miˆhkaˍ te taˍve shaˉ ho‸ teˇ hpaˍ leh paw hkuˇ hta‸ yuˬ kʼai peuˬ hkʼaw‸ nawˉ, gawˬ lehˍ cawˬ ve Lehˇshaˆ venˇ hta‸ ca bawˆ yuˬ ve yoˬ. Yawˇ hui lehˬ venˇ yaˇ oˇ ve teˇ hpaˍ hta‸ tiˇ pehˍ leh, venˇ hta‸ aˬ miˍ tuˉ baˬ ve yoˬ.

28Yawˇ hui hta‸ ga piˇ paˍ teˇ gʼaˇ ka‸ maˇ cawˬ. Awˬ lawn kʼo, venˇ oˇ ve lehˬ Siˉdonˍ mvuhˇmiˬ hta‸ vuiˇ da‸ jaˇ ve awˬ hkʼoˆ, yawˇ hui lehˬ awˬ nu ve chaw teˇ hpaˍ hta‸ awˬ chawˇ maˇ te da‸ taˍ ve pa taw yoˬ. Venˇ oˇ ve lehˬ, Behˆreˍhawˇbaˆ venˇ awˬ paˇ lo cawˬ leh, venˇ oˇ ve nyiˇ venˇ lehˬ lawˬ hkʼo‸ teˇ maˬ hkʼaw tiˉ cawˬ ve yoˬ. Danˍ chaw teˇ hpaˍ lehˬ, venˇ oˇ ve hta‸ kʼaw‸ gu te leh oˇ kaˬ lo chehˇ taˍ ve yoˬ.

29Yawˇ hui lehˬ venˇ oˇ ve hta‸ yawˇ hui ve awˬ puˍ lonˉ Yaˍkoˆ ve yaˇ paˍ Danˍ ve awˬ meh hta‸ yuˬ leh, Danˍ venˇ teh‸ meh taˍ ve yoˬ. Ponˬ laˬ ve awˬ yanˇ awˬ hkʼaw lo, venˇ oˇ ve hta‸ Lehˇshaˆ teh‸ meh taˍ ve yoˬ.

30Danˍ chaw teˇ hpaˍ lehˬ, yawˇ hui oˉ kʼoˍ pui tuˬ shaˉ ho‸ te taˍ ve yoˬ. Yawˇ hui lehˬ, Moˉseˍ ve awˬ hawehˍ, Geˍraˍsonˍ ve yaˇ paˍ, Yawˇnaˆtanˍ hta‸ paw hkuˇ te tcuh ve yoˬ. Shu yawˇ hui hta‸ awˬ nu ve mvuhˇmiˬ lo hpeh kʼai ve awˬ yanˇ hkʼa gaˬ, yawˇ ve awˬ ceuˬ awˬ hkʼaˇ teˇ hpaˍ lehˬ, Danˍ chaw ceuˬ geh paw hkuˇ te chehˇ ve yoˬ.

31Gʼuiˬsha ve aˉ po kʼo bon yehˬ Shiˉlonˍ venˇ hkʼaw cawˬ chehˇ sheˍ ve awˬ yanˇ hkʼa gaˬ, Miˆhkaˍ ve shaˉ ho‸ htawˇ oˇ kaˬ lo cawˬ taˍ ve yoˬ.

← Chapter 17 Jump to: Chapter 19 →