Judges 16

Lahu Bible Edited © Thailand Bible Society and Bible Society of Myanmar, 2010, 2020.

← Chapter 15 Jump to: Chapter 17 →

1Oˇ ve hkʼaw‸ nawˉ, Sanˍsonˍ Gaˍsaˍ venˇ lo kʼai ve yoˬ. Oˇ kaˬ lo yawˇ meh maˬ lanˉ teˇ gʼaˇ hta‸ mawˬ leh, yawˇ geh ca zuh‸ taˍ ve yoˬ.

2Sanˍsonˍ oˇ kaˬ lo chehˇ taˍ ve hta‸ Gaˍsaˍ venˇ yaˇ teˇ hpaˍ gʼa shiˍ ve teˇ yanˇ, yawˇ hui yawˇ hta‸ caw hoˆ taˍ leh teˇ haˉ tanˇ hkuinˇ venˇ taˍ meu‸ hpe‸ lo shaw taˍ ve yoˬ. Mvuhˇ htiˇ la kʼo, yawˇ hta‸ hpeh yuˬ gʼa tuˬ yoˬ, teh‸ dawˇ taˍ ve yoˬ.

3Ya‸ hkʼaˇ Sanˍsonˍ lehˬ, shehˍ kʼaw hkui htaˇ hkʼa gaˬ ceh tiˉ oˇ kaˬ lo ca zuh‸ taˍ ve yoˬ. Oˇ ve hkʼaw‸ nawˉ yawˇ tu la leh, venˇ taˍ meu‸ hpe‸ lo kʼai ve yoˬ. Venˇ taˍ meu‸ hpe‸ yehˬ hkuiˉ daw leh shawˇ keu taˍ ve teˇ hpaˍ hta‸ yawˇ gʼawˬ taˆ veu leh, Heˍbronˍ venˇ coˇ paˇ hpawˇ lo cawˬ ve hkʼaw hkʼoˆ lo baˬ taˉ ve yoˬ.

4Oˇ ve hkʼaw‸ nawˉ, Sanˍsonˍ lehˬ Sawˇrehˆ lawˬ hkʼo‸ hkʼaw chehˇ ve yaˇ miˇ teˇ gʼaˇ hta‸ kʼaw‸ maˆ ve yoˬ. Yawˇ ve awˬ meh lehˬ, Deˍleˍlaˆ hpeh‸ ve yoˬ.

5Oˇ htaˇ, Hpiˇliˇtiˆ jawˇmawˇ ngaˇ gʼaˇ yaˇ miˇ oˇ ve geh laˬ leh kʼoˆ ve, Aˬ hto‸ ma pa taw chaw oˇ ve awˬ gʼaˇ chi taw taw uiˍ ve leh naˍ, nawˬ a ciˉ beˬ na nyi-o. Oˇ hkʼe te ve kʼo, ngaˬ hui yawˇ hta‸ hpeh yuˬ gʼa tuˬ yoˬ. Nawˬ chi hkʼe te laˇ ve kʼo, ngaˬ hui teˇ gʼaˇ ve nawˬ hta‸ hpu 1,100 piˇ laˇ tuˬ yoˬ, teh‸ yawˇ hta‸ kʼoˆ piˇ ve yoˬ.

6Hkʼe te leh Deˍleˍlaˆ Sanˍsonˍ hta‸ kʼoˆpiˇ ve, Aˬ hto‸ ma pa taw nawˬ awˬ gʼaˇ chi taw taw uiˍ ve ngaˬ hta‸ awˬ bon te leh a ciˉ hto laˇ-oˆ. Chaw teˇ gʼaˇ gʼaˇ nawˬ hta‸ hpeh yuˬ gaˇ ve kʼo, hkʼaˬ hkʼe gʼa te tuˬ ve le, teh‸ yawˇ hta‸ na nyi ve yoˬ.

7Sanˍsonˍ kʼaw‸ yaw hkʼaw‸ leh kʼoˆ ve, Maˇ goˇ sheˍ ve hkaˆ caˆ awˬ suhˉ suhˍ caˆ yuˬ leh ngaˬ hta‸ hpeh ve kʼo, ngaˬ lehˬ awˬ gʼaˇ nuˇ kʼai leh awˬ nu ve chaw teˇ hpaˍ hkʼa shuˍ hpeh‸ la tuˬ yoˬ, teh‸ yawˇ hta‸ kʼoˆ piˇ ve yoˬ.

8Hkʼe te leh, Hpiˇliˇtiˆ jawˇmawˇ teˇ hpaˍ maˇ goˇ sheˍ ve hkaˆ caˆ awˬ suhˉ suhˍ caˆ Deˍlaˍlaˆ hta‸ piˇ leh, yawˇ lehˬ hkaˆ caˆ oˇ ve teˇ hpaˍ yuˬ leh Sanˍsonˍ hta‸ hpeh ve yoˬ.

9Ma‸ yaˇ teˇ hpaˍ hta‸ awˬ nu ve bawehˇ teˇ maˬ hkʼaw va‸ taˍ tcuh ve yoˬ. Oˇ htaˇ yawˇ lehˬ, Sanˍsonˍ oˬ, Hpiˇliˇtiˆ chaw teˇ hpaˍ gaˬ la peuˬ, teh‸ kʼoˆ ve yoˬ. Oˇ htaˇ, yawˇ lehˬ gʼo‸ hkeh hta‸ aˬ miˬ to‸ cheˆ ve hkʼe, aˉ caˆ hkeh oˇ ve teˇ hpaˍ hta‸ gʼawˬ cheˆ ve yoˬ. Hkʼe te leh yawˇ ve awˬ gʼaˇ awˬ shaˉ hkʼaˬ lo cawˬ ve hta‸ yawˇ hui maˇ gʼa shiˍ.

10Oˇ ve hkʼaw‸ nawˉ Deˍleˍlaˆ kʼoˆ ve, Nyi sheˍ. Nawˬ lehˬ ngaˬ hta‸ heˍ laˇ leh ngaˬ hta‸ ya‸ taw tuˬ te laˇ ve yoˬ. Chaw teˇ gʼaˇ gʼaˇ nawˬ hta‸ hpeh yuˬ gaˇ ve kʼo, hkʼaˬ hkʼe gʼa te tuˬ ve le. Awˬ bon te leh ngaˬ hta‸ a ciˉ hto laˇ-oˆ, teh‸ Sanˍsonˍ hta‸ kʼaw‸ kʼoˆ piˇ ve yoˬ.

11Sanˍsonˍ kʼaw‸ yaw hkʼaw‸ leh kʼoˆ ve, Shu teˇ pawˆ ka‸ maˇ yehˇ jaw sheˍ ve aˉ caˆ hkeh awˬ suhˉ teˇ hpaˍ yuˬ leh ngaˬ hta‸ hpeh ve kʼo, ngaˬ lehˬ awˬ gʼaˇ nuˇ kʼai leh awˬ nu ve chaw teˇ hpaˍ hkʼa shuˍ hpeh‸ la tuˬ yoˬ, teh‸ yawˇ hta‸ kʼoˆ piˇ ve yoˬ.

12Hkʼe te leh, Deˍleˍlaˆ lehˬ aˉ caˆ hkeh awˬ suhˉ teˇ hpaˍ hta‸ yuˬ veu laˇ leh yawˇ hta‸ hpeh ve yoˬ. Oˇ ve hkʼaw‸ nawˉ, Sanˍsonˍ-oˬ, Hpiˇliˇtiˆ chaw teˇ hpaˍ gaˬ la peuˬ, teh‸ kʼoˆ piˇ ve yoˬ. Ma‸ yaˇ teˇ hpaˍ lehˬ awˬ nu ve teˇ bawehˇ hkʼaw va‸ chehˇ taˍ ve yoˬ. Yawˇ lehˬ la‸ sheh hta‸ hpeh taˍ ve aˉ caˆ hkeh teˇ hpaˍ hta‸, gʼo‸ hkeh hkʼa shuˍ cheˆ kʼai piˇ ve yoˬ.

13Oˇ ve hkʼaw‸ nawˉ, Deˍleˍlaˆ Sanˍsonˍ hta‸ kʼaw‸ kʼoˆ piˇ ve, Nawˬ lehˬ ngaˬ hta‸ teˇ pawˆ kʼaw‸ heˍ laˇ leh, ngaˬ hta‸ ya‸ taw tuˬ te laˇ chehˇ sheˍ ve yoˬ. Nawˬ hta‸ hkʼaˬ hkʼe te hpeh yuˬ gʼa tuˬ, ngaˬ hta‸ kʼoˆ maˍ laˇ-oˆ, teh‸ kʼoˆ piˇ ve yoˬ. Sanˍsonˍ kʼoˆve, Ngaˬ ve uˉ hkeh mvuh suhˍ dawˇ ve hta‸ hpa chiˇ kuiˬ hkʼaw keu chiˇ ve kʼo, ngaˬ lehˬ awˬ gʼaˇ nuˇ kʼai leh awˬ nu ve chaw hkʼa shuˍ hpeh‸ la tuˬ yoˬ, teh‸ yawˇ hta‸ kʼoˆ piˇ ve yoˬ.

14Oˇ htaˇ Deˍleˍlaˆ yawˇ ve awˬ hpawˇ hta‸ zuh‸ muiˉ kʼa tuˬ tuˬ te piˇ leh, yawˇ zuh‸ muiˉ kʼa chehˇ htaˇ, yawˇ ve uˉ hkeh mvuh suhˍ dawˇ ve hta‸ yuˬ leh hpa chiˇ kuiˬ hkʼaw keu chiˇ ve yoˬ. Peuˬ hkʼaw‸ nawˉ, Sanˍsonˍ-oˬ, Hpiˇliˇtiˆ chaw gaˬ la peuˬ, teh‸ kʼoˆ piˇ ve yoˬ. Hkʼe te leh yawˇ pawˆ tu la leh, yawˇ ve uˉ hkeh mvuh teˇ hpaˍ, hpa chiˇ kuiˬ hkʼaw shoˆ tawˆ-e peuˬ sheˬ ve yoˬ.

15Oˇ htaˇ Deˍleˍlaˆ Sanˍsonˍ hta‸ kʼoˆ piˇ ve, Nawˬ lehˬ ngaˬ hta‸ maˇ ha‸ ve ka‸ aˬ hto‸ ma pa taw ngaˬ hta‸ ha‸ ve yoˬ teh‸ kʼoˆ laˇ ve le. Nawˬ lehˬ shehˆ pawˆ hkʼa gaˬ ngaˬ hta‸ ya‸ taw tuˬ te laˇ ve yoˬ. Aˬ hto‸ ma pa taw, nawˬ awˬ gʼaˇ chi taw taw uiˍ ve awˬ lawn ngaˬ hta‸ teˇ pawˆ ka‸ maˇ kʼoˆ laˇ sheˍ, teh‸ yawˇ hta‸ kʼoˆ piˇ ve yoˬ.

16Yawˇ lehˬ teˇ nyi peuˬ teˇ nyi Sanˍsonˍ hta‸ oˇ hkʼe tiˉ kʼoˆ piˇ tcuhˉ taˍ ve yoˬ. Yawˇ hta‸ oˇ hkʼe tiˉ kʼoˆ leh te sho‸ sha‸ piˇ chehˇ ve pa taw, Sanˍsonˍ hpeh‸ bawˬ jaˇ ve yoˬ.

17Hkʼe te leh, yawˇ Deˍleˍlaˆ hta‸ hteˇ lehˍ kʼoˆ piˇ ve yoˬ. Yawˇ kʼoˆ ve, Ngaˬ ve uˉ hkeh mvuh hta‸ teˇ pawˆ ka‸ maˇ nuˆ baˬ jaw. Ngaˬ paw la ve teˇ nyi hta‸ te leh, Naˍzaˍriˆ chaw teˇ gʼaˇ hkʼa shuˍ, ngaˬ ve awˬ to Gʼuiˬsha hta‸ chiˇ a‸ piˇ taˍ ve yoˬ. Ngaˬ ve uˉ hkeh mvuh hta‸ nuˆ baˬ ve kʼo, ngaˬ lehˬ awˬ gʼaˇ nuˇ kʼai leh awˬ nu ve chaw teˇ hpaˍ hkʼa shuˍ hpeh‸ la tuˬ yoˬ, teh‸ yawˇ hta‸ kʼoˆ piˇ ve yoˬ.

18Chi teˇ pawˆ Sanˍsonˍ yawˇ hta‸ hteˇ lehˍ kʼoˆ laˇ chehˇ ve hta‸ Deˍleˍlaˆ gʼa shiˍ ve teˇ yanˇ, yawˇ Hpiˇliˇtiˆ jawˇmawˇ teˇ hpaˍ geh lo tawˇ chi hkʼe shanˍ feu piˇ ve yoˬ. Ngaˬ geh teˇ pawˆ kʼaw‸ laˬ-o‸. Yawˇ lehˬ, ngaˬ hta‸ hteˇ lehˍ kʼoˆ laˇ taˍ peuˬ, teh‸ kʼoˆ feu piˇ ve yoˬ. Yawˇ hui a shu yawˇ ve hpu yuˬ leh yawˇ geh laˬ ve yoˬ.

19Yawˇ lehˬ Sanˍsonˍ ve oˉ kʼoˍ yawˇ ve pfuhˬ tehˉ kʼu hkʼoˆ taˍ leh, yawˇ hta‸ zuh‸ muiˉ kʼa tuˬ te piˇ ve yoˬ. Oˇ ve hkʼaw‸ nawˉ, chaw teˇ gʼaˇ hta‸ kuˬ leh Sanˍsonˍ ve uˉ hkeh mvuh suhˍ dawˇ ve hta‸ nuˆ baˬ tcuh ve yoˬ. Oˇ hkʼe te peuˬ hkʼaw‸ nawˉ, yawˇ Sanˍsonˍ hta‸ nawˍ tu piˇ ve yoˬ. Chi teˇ pawˆ yawˇ lehˬ awˬ gʼaˇ nuˇ kʼai peuˬ.

20Sanˍsonˍ-oˬ, Hpiˇliˇtiˆ chaw teˇ hpaˍ gaˬ la peuˬ, teh‸ yawˇ hta‸ kʼoˆ piˇ ve yoˬ. Yawˇ pawˆ tu la leh, ponˬ laˬ htaˇ hkʼe gʼuiˇ hpaw-e tuˬ dawˇ nyi ve yoˬ. Ya‸ hkʼaˇ, Gʼuiˬsha yawˇ hta‸ chiˇ baˬ peuˬ ve hta‸ yawˇ maˇ shiˍ.

21Hkʼe te leh Hpiˇliˇtiˆ chaw teˇ hpaˍ yawˇ hta‸ hpeh yuˬ leh, yawˇ ve mehˆ shiˍ nyiˇ paˉ paˉ hta‸ juˆ pe‸ piˇ ve yoˬ. Peuˬ hkʼaw‸ nawˉ yawˇ hta‸ kuiˇ caˆ yuˬ hpeh leh Gaˍsaˍ venˇ lo shiˍ kʼai ve yoˬ. Yawˇ lehˬ htawnˍ hkʼaw chehˇ taˍ leh, caˬ gʼa geuˆ chehˇ ve yoˬ.

22Ya‸ hkʼaˇ, yawˇ ve uˉ hkeh mvuh shaˬ te shaˬ kʼaw‸ zuhˬ la chehˇ ve yoˬ.

23Hpiˇliˇtiˆ jawˇmawˇ teˇ hpaˍ lehˬ, yawˇ hui ve Daˍgonˍ gʼuiˬsha hta‸ tuˉ tanˇ leh ha lehˬ ha kʼa pawehˇ te tuˬ teˇ geh hpawnˬ laˬ ve yoˬ. Yawˇ hui kʼa muiˬ leh kʼoˆ ve, Ngaˬ hui ve gʼuiˬsha lehˬ, ngaˬ hui ve canˇ paˍ lonˉ Sanˍsonˍ hta‸ ngaˬ hui ve la‸ sheh hkʼaw lo chiˇ a‸ laˇ peuˬ, teh‸ kʼoˆ ve yoˬ.

24Yawˇ hui Sanˍsonˍ hta‸ gʼa mawˬ ve teˇ yanˇ, yawˇ hui ve gʼuiˬsha hta‸ chiˇ mvuh leh kʼoˆ ve, Ngaˬ hui ve gʼuiˬsha lehˬ, ngaˬ hui ve mvuhˇmiˬ hta‸ te luˬ leh chaw laiˉ gʼaˇ hta‸ tiˇ pehˍ ve canˇ paˍ lonˉ hta‸ ngaˬ hui ve la‸ sheh hkʼaw lo chiˇ a‸ laˇ peuˬ, teh‸ kʼoˆ ve yoˬ.

25Yawˇ hui ha lehˬ ha kʼa te chehˇ leh, Ngaˬ hui yawˇ hta‸ hkʼa mvuhˇ hkʼa na gʼa te piˇ tuˬ, Sanˍsonˍ hta‸ shiˍ tawˆ la-o, teh‸ kʼoˆ ve yoˬ. Hkʼe te leh, yawˇ hui Sanˍsonˍ hta‸ htawnˍ hkʼaw shiˍ tawˆ la leh, hkʼa mvuhˇ hkʼa na te piˇ ve yoˬ. Peuˬ hkʼaw‸ nawˉ, yawˇ hta‸ yehˬ hkuiˉ daw lonˉ nyiˇ maˬ awˬ kaˍ lo huˉ tcuh taˍ ve yoˬ.

26Oˇ htaˇ Sanˍsonˍ lehˬ yawˇ hta‸ sheh toˇ chehˇ ve yaˇ paˍ hta‸ kʼoˆ piˇ ve, Ngaˬ hta‸ yehˬ hkuiˉ daw lonˉ cawˬ kuiˬ lo shiˍ kʼai laˇ-oˆ. Ngaˬ oˇ ve teˇ hpa hta‸ ngeh taˍ gaˇ ve yoˬ, teh‸ kʼoˆ piˇ ve yoˬ.

27Yehˬ lonˉ oˇ ve awˬ hkʼaw lo hawˉ hkʼaˇ, yaˇ miˇ hkʼa biˇ chehˇ taˍ ve yoˬ. Hpiˇliˇtiˆ chaw hui ve jawˇmawˇ lonˉ ngaˇ gʼaˇ htawˇ, oˇ kaˬ lo chehˇ taˍ ve yoˬ. Oˇ kaˬ lo Sanˍsonˍ hta‸ nyi taˍ leh, hkʼa mvuhˇ hkʼa na te piˇ chehˇ ve chaw hkʼa peu-eˬ 3,000 gʼaˇ hkʼe cawˬ ve yoˬ.

28Oˇ htaˇ Sanˍsonˍ bon lawˬ leh kʼoˆ ve, Jawˇmawˇ Gʼuiˬsha-o, ngaˬ hta‸ a ciˇ dawˇ nawˇ laˇ-oˆ. Gʼuiˬsha-oˬ, ngaˬ ve mehˆ shiˍ hta‸ juˆ pe‸ laˇ ve Hpiˇliˇtiˆ chaw chi teˇ hpaˍ hta‸ ngaˬ kʼaw‸ te hkʼaw‸ piˇ hpeh‸ tuˬ, ngaˬ hta‸ teˇ pawˆ ceh awˬ gʼaˇ kʼaw‸ cawˬ la piˇ-oˆ, teh‸ kʼoˆ ve yoˬ.

29Oˇ hkʼe kʼoˆ peuˬ hkʼaw‸ nawˉ Sanˍsonˍ lehˬ, yehˬ hkuiˉ daw lonˉ oˇ ve nyiˇ maˬ hta‸ yawˇ ve la‸ sheh teˇ paˉ teˇ maˬ vawˆ taˍ leh,

30Hpiˇliˇtiˆ chaw hui geh ngaˬ hta‸ suh-e tcuh laˇ-oˆ, teh‸ kʼoˆ ve yoˬ. Oˇ htaˇ yawˇ lehˬ, awˬ gʼaˇ awˬ shaˉ hkʼa cawˬ ve hkʼa peu-eˬ yuˬ tawˆ leh, yeh hkuiˉ daw lonˉ oˇ ve nyiˇ maˬ hta‸ buiˆ paˍ ve yoˬ. Hkʼe te leh yehˬ lonˉ oˇ ve paiˍ leh, oˇ kaˬ lo chehˇ ve chaw hkʼa peu-eˬ suh-e ve yoˬ. Chi teˇ pawˆ yawˇ shu hta‸ tiˇ pehˍ ve lehˬ, yawˇ a sha‸ te‸ chehˇ htaˇ tiˇ pehˍ piˇ ve a‸ kehˉ maˇ jaˇ ve yoˬ.

31Yawˇ ve awˬ viˉ awˬ nyi leh yawˇ ve yehˬ yaˇ kʼa yaˇ teˇ hpaˍ laˬ leh, yawˇ hta‸ yuˬ kʼo‸-e peuˬ hkʼaw‸ nawˉ, Zawˇraˍ leh Eˇshaˍtawˇlaˆ venˇ awˬ kaˍ lo cawˬ ve, yawˇ awˬ pa Maˍnawˍ ve tuˍ hpfuh hkʼaw tuˍ piˇ ve yoˬ. Yawˇ lehˬ Iˉsaˍreˍlaˆ chaw hta‸ nyiˇ chi hkʼaw‸ uˉ peunˍ ve yoˬ.

← Chapter 15 Jump to: Chapter 17 →