Judges 8

Lahu Bible Edited © Thailand Bible Society and Bible Society of Myanmar, 2010, 2020.

← Chapter 7 Jump to: Chapter 9 →

1Oˇ htaˇ Eˇhpaˍrenˍ chaw teˇ hpaˍ Giˉdonˍ hta‸ kʼoˆ piˇ ve, Aˬ hto‸ ma pa taw nawˬ Meˇdiˍanˍ chaw hui hta‸ ca bawˆ htaˇ, ngaˬ hui hta‸ maˇ kuˬ laˇ ve le. Aˬ hto‸ ma pa taw, nawˬ ngaˬ hui hta‸ chi hkʼe te laˇ ve le, teh‸ Giˉdonˍ hta‸ kʼoˆ piˇ leh yawˇ hta‸ venˇbaˆ taˍ ve yoˬ.

2Giˉdonˍ yawˇ hui hta‸ kʼoˆ piˇ ve, Nawˬ hui te peuˬ ve kanˉ hta‸ shawˍ nyi ve kʼo, ngaˬ te taˍ ve kanˉ lehˬ aˬ hto‸ ma kʼoˆ tuˬ cawˬ le. Nawˬ hui Eˇhpaˍrenˍ chaw teˇ hpaˍ te taˍ ve a ciˉ ceh tiˉ ve kanˉ lehˬ, ngaˬ ve awˬ ceuˬ awˬ hkʼaˇ hkʼa peu-eˬ te taˍ ve kanˉ a‸ kehˉ maˇ jaˇ ve yoˬ.

3Gʼuiˬsha lehˬ, Meˇdiˍanˍ ma‸ poˍ lonˉ Awˇreˍbaˆ leh Zeˍbaˆ hta‸ nawˬ hui ve la‸ sheh hkʼaw lo chiˇ a‸ piˇ ve yoˬ. Nawˬ hui te gʼa ve kanˉ hkʼe taw uiˍ ve kanˉ, ngaˬ aˬ hto‸ ma teˇ ceuˬ te gʼa taˍ ve cawˬ le, teh‸ yawˇ hui hta‸ kʼoˆ piˇ ve yoˬ. Tawˇ oˇ ve hta‸ yawˇ hui gʼa kaˇ ve teˇ yanˇ, yawˇ hui nyi ma gawˬ kʼai ve yoˬ.

4Giˉdonˍ leh yawˇ ve ma‸ yaˇ 300 gʼaˇ lehˬ, Yawˇdanˍ iˉ kaˆ lawˬ lo gaˬ leh coˇ paˉ hpawˇ lo hkanˍ tawˆ-e ve yoˬ. Yawˇ hui heuˬ jaˇ peuˬ ve htawˇ, canˇ paˍ teˇ hpaˍ hta‸ gʼa‸ yuˬ chehˇ sheˍ ve yoˬ.

5Yawˇ Suˇkoˆ venˇ yaˇ teˇ hpaˍ hta‸ kʼoˆ piˇ ve, Awˬ bon te leh ngaˬve ma‸ yaˇ teˇ hpaˍ hta‸ hkaoˍmonˇ a ciˉ caˍ piˇ-oˆ. Yawˇ hui heuˬ jaˇ peuˬ. Ngaˬ lehˬ Meˇdiˍanˍ jawˇmawˇ Zeˍbaˍ leh Zaˍmuˍnaˍ hui hta‸ gʼa‸ yuˬ chehˇ ve yoˬ, teh‸ kʼoˆ piˇ ve yoˬ

6Ya‸ hkʼaˇ, Suˇkoˆ venˇ hta‸ uˉ peunˍ chehˇ ve awˬ hoˉ awˬ naˬ teˇ hpaˍ kʼoˆ ve, Aˬ hto‸ ma pa taw ngaˬ hui nawˬ ve ma‸ yaˇ teˇ hpaˍ hta‸ caˇ tuˬ gʼa caˍ piˇ tuˬ ve le. Nawˬ hui lehˬ, Zeˍbaˍ leh Zeˍmuˍnaˍ hta‸ hpeh yuˬ maˇ gʼa sheˍ, teh‸ yawˇ hta‸ kʼaw‸ yaw hkʼaw‸ piˇ ve yoˬ.

7Oˇ htaˇ Giˇdonˍ lehˬ, Hkʼe kʼo da‸-a. Gʼuiˬsha lehˬ, Zeˍbaˍ leh Zeˍmuˍ naˍ hta‸ ngaˬ hui ve la‸ sheh hkʼaw lo chiˇ a‸ laˇ ve teˇ yanˇ, heh puiˉ hkʼaw lo cawˬ ve aˉ chuˇ te hta‸ yuˬ veu laˇ leh, nawˬ hui hta‸ jaw‸ maˍ laˇ tuˬ yoˬ, teh‸ yawˇ hui hta‸ kʼoˆ piˇ ve yoˬ.

8Oˇ ve hkʼaw‸ nawˉ Giˉdonˍ lehˬ Peˍnoeˍlaˆ venˇ lo kʼai leh, oˇ ve hkʼa shuˍ ca kʼaw‸ lawˬ ve yoˬ. Ya‸ hkʼaˇ Peˍnoeˍlaˆ venˇ yaˇ teˇ hpaˍ htawˇ, Suˇkoˆ venˇ yaˇ teˇ hpaˍ hkʼa shuˍ, kʼaw‸ yaw hkʼaw‸ piˇ ve yoˬ.

9Oˇ htaˇ yawˇ lehˬ, Ngaˬ teˇ pawˆ kʼaw‸ la tuˬ sheˍ ve yoˬ. Ngaˬ kʼaw‸ gaˬ la ve teˇ yanˇ, ta‸ yehˬ lon ˉ chi ve hta‸ ngaˬ te luˬ tuˬ yoˬ, teh‸ yawˇ hui hta‸ kʼoˆ piˇ ve yoˬ.

10Zeˍbaˍ leh Zeˍmuˍnaˍ hui lehˬ, yawˇ hui ve ma‸ moˍ hta‸ shiˍ leh Kaˍkawˍ venˇ hkʼaw chehˇ taˍ ve yoˬ. Yawˇ hui ve ma‸ yaˇ 120,000 gʼaˇ lehˬ bawˆ da‸ kuiˬ lo suh-e leh, yawˇ huiˉ maˬ geh ma‸ yaˇ 15,000 gʼaˇ ceh tiˉ chehˇ taˍ ve yoˬ.

11Giˉdonˍ lehˬ Nawˇbaˆ leh Yuˇbeˍhaˆ venˇ mvuhˇ nyi tawˆ hpawˇ lo cawˬ ve hteunˍ lon ˉ hta‸ hpanˍ kʼai leh, yawˇ hui hta‸ lo‸ bawˆ piˇ ve yoˬ.

12Meˉdiˍanˍ jawˇmawˇ Zeˍbaˍ leh Zeˍmuˍnaˍ gʼuiˇ hpaw-e ve yoˬ. Ya‸ hkʼaˇ, yawˇ hui gʼa‸ yuˬ leh jawˇmawˇ oˇ ve nyiˇ gʼaˇ hta‸ hpeh gʼa ve yoˬ. Yawˇ hui ve ma‸ yaˇ teˇ hpaˍ htawˇ kawˆ jaˇ leh gʼuiˇ hpaw-e ve yoˬ.

13Giˉdonˍ lehˬ, ma‸ bawˆ taˉ peuˬ hkʼaw‸ nawˉ, Heˍrehˆ teh‸ kʼoˆ ve kʼaˍ le‸ hta‸ hpanˍ kʼaw‸ la ve yoˬ.

14Suˇkoˆ venˇ hkʼaw chehˇ ve chaw haˉ paˍ teˇ gʼaˇ hta‸ yawˇ hpeh yuˬ leh tawˇ na nyi ve yoˬ. Chaw haˉ paˍ oˇ ve lehˬ, Suˇkoˆ venˇ hkʼaw chehˇ ve awˬ hoˉ awˬ naˬ 77 gʼaˇ ve awˬ meh bvuh‸ maˍ piˇ ve yoˬ.

15Oˇ htaˇ Giˉdonˍ Suˇ koˆ venˇ lo kʼai leh, Nawˬ hui ngaˬ hta‸ maˇ shawˍ maˇ caˆ kʼoˆ laˇ ve tawˇ hta‸ nawˬ hui dawˇ nawˇ chehˇ sheˍ laˇ. Zeˍbaˍ leh Zeˍmuˍnaˍ hta‸ ngaˬ maˇ hpeh gʼa sheˍ ve pa taw, nawˬ hui lehˬ ngaˬ ve ma‸ yaˇ teˇ hpaˍ hta‸ caˇ tuˬ maˇ piˇ teh‸ kʼoˆ laˇ ve yoˬ.

16Oˇ hkʼe kʼoˆ peuˬ hkʼaw‸ nawˉ, heh puiˉ hkʼaw lo cawˬ ve aˉ chuˇ te hta‸ yuˬ leh, Suˇkoˆ venˇ hta‸ uˉ peunˍ chehˇ ve awˬ hoˉ awˬ naˬ teˇ hpaˍ hta‸ ciˍ yanˍ piˇ ve yoˬ.

17Peˍnoeˍlaˆ venˇ hkʼaw cawˬ ve ta‸ yehˬ lonˉ hta‸ htawˇ yawˇ te luˬ piˇ leh, hawˉ hkʼaˆ teˇ hpaˍ hta‸ tiˇ pehˍ piˇ ve yoˬ.

18Oˇ ve hkʼaw‸ nawˉ yawˇ Zeˍbaˍ leh Zeˍmuˍnaˍ hui hta‸ kʼoˆ piˇ ve, Nawˬ huiˉ maˬ Taˍbawˇraˆ hkʼaw hkʼoˆ lo tiˇ pehˍ piˇ taˉ ve chaw teˇ hpaˍ a shu hta‸ shuˍ ve le, teh‸ na nyi piˇ ve yoˬ. Yawˇ huiˉ maˬ kʼaw‸ yaw hkʼaw‸ leh kʼoˆ ve, Yawˇ hui lehˬ nawˬ hta‸ shuˍ ve yoˬ. Yawˇ hui lehˬ jawˇmawˇ yaˇ teˇ hpaˍ hta‸ shuˍ ve yoˬ, teh‸ yawˇ hta‸ kʼoˆ piˇ ve yoˬ.

19Oˇ htaˇ Giˉdonˍ kʼoˆ ve, Yawˇ hui lehˬ ngaˬ ve awˬ nyi paˍ teˇ hpaˍ hpeh‸ leh, ngaˬ e ve yaˇ teˇ hpaˍ hpeh‸ ve yoˬ. Nawˬ huiˉ maˬ yawˇ hui hta‸ maˇ tiˇ pehˍ piˇ ve hkʼe kʼo, ngaˬ ka‸ nawˬ hui hta‸ maˇ tiˇ pehˍ taˬ, teh‸ kʼoˆ ve yoˬ.

20Oˇ hkʼe kʼoˆ peuˬ hkʼaw‸ nawˉ yawˇ lehˬ, Tu leh yawˇ huiˉ maˬ hta‸ tiˇ pehˍ-o‸, teh‸ yawˇ ve yaˇ paˍ uiˍ Yeˍtaˆ hta‸ kʼoˆ piˇ ve yoˬ. Ya‸ hkʼaˇ, yawˇ ve yaˇ paˍ lehˬ yaˇ ehˉ hpeh‸ ve pa taw, yawˇ huiˉ maˬ hta‸ tiˇ pehˍ piˇ maˇ haˆ.

21Oˇ htaˇ Zeˍbaˍ leh Zeˍmuˍnaˍ lehˬ, Nawˬ awˬ to ngaˬ huiˉ maˬ hta‸ tiˇ pehˍ laˇ-oˆ. Chaw mawˇ te tuˬ ve kanˉ hta‸ chaw mawˇ te-o, teh‸ yawˇ hta‸ kʼoˆ piˇ ve yoˬ. Hkʼe te leh Giˉdonˍ lehˬ, Zeˍbaˍ leh Zeˍmuˍnaˍ hta‸ tiˇ pehˍ leh, yawˇ hui ve kaˍlaˍoˆ hkʼoˆ taˆ taˍ ve mawˇ teˇ hpaˍ hta‸ hpui yuˬ ve yoˬ.

22Oˇ htaˇ Iˉsaˍreˍlaˆ chaw teˇ hpaˍ lehˬ, Nawˬ awˬ to leh nawˬ ve awˬ ceuˬ awˬ hkʼaˇ teˇ hpaˍ, ngaˬ hui awˬ hkʼoˆ jawˇmawˇ te-o. Awˬ lawn kʼo, nawˬ lehˬ ngaˬ hui hta‸ Meˉdiˍanˍ chaw hui ve la‸ sheh hkʼaw htaiˍ hkʼaw‸ laˇ peuˬ, teh‸ Giˉdonˍ hta‸ kʼoˆ piˇ ve yoˬ.

23Oˇ htaˇ Giˉdonˍ lehˬ, Ngaˬ awˬ to maˇ kʼoˆ, ngaˬ ve yaˇ maˇ kʼoˆ, nawˬ hui awˬ hkʼoˆ jawˇmawˇ te laˇ tuˬ ve maˇ heˆ. Gʼuiˬsha lehˬ, nawˬ hui ve Jawˇmawˇ hpeh‸ ve yoˬ, teh‸ yawˇ hui hta‸ kʼaw‸ kʼoˆ piˇ ve yoˬ.

24Peuˬ leh yawˇ kʼoˆ ve, Ngaˬ nawˬ hui geh teˇ ceuˬ lawˬ gaˇ ve yoˬ. Nawˬ hui gʼa taˍ ve naˍ vawˇ teˇ hpaˍ ngaˬ hta‸ pe‸ laˇ-oˆ, teh‸ yawˇ hui hta‸ kʼoˆ piˇ ve yoˬ. (Meˉdiˍanˍ chaw hui lehˬ, heh puiˉ hkʼaw lo chehˇ ve chaw teˇ hpaˍ hkʼa shuˍ, shi naˍ vawˇ hkʼa biˇ cawˬ ve yoˬ.)

25Oˇ htaˇ yawˇ hui lehˬ, Naˍ vawˇ oˇ ve teˇ hpaˍ ngaˬ hui nawˬ hta‸ ha lehˬ ha kʼa piˇ laˇ tuˬ yoˬ, teh‸ yawˇ hta‸ kʼoˆ piˇ ve yoˬ. Yawˇ hui lehˬ, hpa teˇ maˬ hpe hkʼawˇ sheˬ leh, yawˇ hui gʼa taˍ ve naˍ vawˇ teˇ hpaˍ oˇ kaˬ lo keu piˇ ve yoˬ.

26Giˉdonˍ gʼa ve naˍ vawˇ oˇ ve teˇ hpaˍ hkʼa peu-eˬ, 10 cawehˬ hkʼe cawˬ ve yoˬ. Naˬ vawˇ oˇ ve teˇ hpaˍ hta‸ maˇ shawˍ ve, awˬ nu ve hpu hkʼeun shi hkʼeun teˇ hpaˍ, kʼaw peˍ pfuhˇ caˆ teˇ hpaˍ, Meˉdiˍanˍ jawˇmawˇ teˇ hpaˍ veu‸ ve nyi naˆ meuˉ lehˍ ve veu‸ kʼaˇ teˇ hpaˍ, leh kaˍlaˍoˆ teˇ hpaˍ hta‸ tcuhˉ taˍ ve awˬ hkʼeun teˇ hpaˍ hkʼa biˇ cawˬ sheˍ ve yoˬ.

27Giˉdonˍ lehˬ, shi oˇ ve teˇ hpaˍ hta‸ yuˬ leh shaˉ ho‸ teˇ maˬ te peuˬ hkʼaw‸ nawˉ, yawˇ chehˇ kuiˬ Awˇhpaˍraˆ venˇ hkʼaw teh taˍ ve yoˬ. Iˉsaˍreˍlaˆ chaw hkʼa peu-eˬ Gʼuiˬsha hta‸ baˬ taˉ leh, shaˉ ho‸ oˇ ve hta‸ oˉ kʼoˍ ca pui la ve yoˬ. Yawˇ oˇ hkʼe te ve lehˬ, yawˇ leh yawˇ ve yehˬ yaˇ kʼa yaˇ teˇ hpaˍ awˬ pon va htaw taˍ ve hkʼe hpeh‸ ve yoˬ.

28Iˉsaˍreˍlaˆ chaw teˇ hpaˍ lehˬ, Meˇdiˍanˍ chaw hui hta‸ ma‸ bawˆ gʼaˇ peuˬ ve pa taw, yawˇ hui lehˬ Iˉsaˍreˍlaˆ chaw hui hta‸ kʼaw‸ te sho‸ sha‸ piˇ maˇ hpeh‸ ve yoˬ. Hkʼe te leh Giˉdonˍ suh htaˇ hkʼa gaˬ, mvuhˇmiˬ hkʼaw 40 hkʼaw‸ hkʼa gaˬ gawˬ lehˍ cawˬ ve yoˬ.

29Giˉdonˍ lehˬ yawˇ ve aˉ hkʼaw lo kʼo‸-e leh oˇ kaˬ lo chehˇ taˍ ve yoˬ.

30Yawˇ lehˬ awˬ miˇ ma cawˬ maˇ ve pa taw, yawˇ ve yaˇ paˍ 70 gʼaˇ cawˬ ve yoˬ.

31Chi awˬ hkʼoˆ, Sheˍhkenˍ venˇ awˬ hkʼaw lo htawˇ, awˬ miˇ ma i teˇ gʼaˇ cawˬ leh, yaˇ miˇ oˇ ve yawˇ awˬ pon yaˇ paˍ teˇ gʼaˇ paw la piˇ ve yoˬ. Hkʼe te leh yaˇ paˍ oˇ ve hta‸ yawˇ Aˍbiˆmaˍlehˆ teh‸ meh piˇ ve yoˬ.

32Yawˇshaˆ ve yaˇ Giˉdonˍ lehˬ, mawˇ jaˇ peuˬ ve teˇ yanˇ suh-e leh, Awˇhpaˍraˆ venˇ hkʼaw cawˬ ve yawˇ awˬ pa Yawˇshaˆ ve tuˍ hpfuh hkʼaw ca tuˍ piˇ ve yoˬ. Venˇ oˇ ve lehˬ, Aˍbeˍsaˍ awˬ ceuˬ awˬ hkʼaˇ ve miˬguiˬ hkʼaw lo cawˬ ve yoˬ.

33Giˉdonˍ suh peuˬ hkʼaw‸ nawˉ, Iˉsaˍreˍlaˆ chaw teˇ hpaˍ Gʼuiˬsha hta‸ baˬ taˉ leh Baˍlaˆ gʼuiˬsha teˇ hpaˍ hta‸ oˉ kʼoˍ pui ve yoˬ.

34Yawˇ hui lehˬ, yawˇ hui awˬ paˇ awˬ kui lo chehˇ ve canˇ paˍ teˇ hpaˍ ve la‸ sheh hkʼaw lo, yawˇ hui hta‸ ponˬ piˇ shehˍ hpaˇ Gʼuiˬsha hta‸ chiˇ baˬ ve yoˬ.

35Chi awˬ hkʼoˆ, yawˇ hui lehˬ Iˉsaˍreˍlaˆ chaw hui awˬ pon Giˉdonˍ ve yehˬ yaˇ kʼa yaˇ teˇ hpaˍ te piˇ taˍ ve da‸ jaˇ ve kanˉ teˇ hpaˍ hta‸ htawˇ leunˇ kʼai ve yoˬ.

← Chapter 7 Jump to: Chapter 9 →