Judges 14

Lahu Bible Edited © Thailand Bible Society and Bible Society of Myanmar, 2010, 2020.

← Chapter 13 Jump to: Chapter 15 →

1Teˇ nyi htaˇ Sanˍsonˍ Tiˉmaˍnaˆ venˇ lo kʼai leh, oˇ kaˬ lo Hpiˇliˇtiˆ yaˇ miˇ teˇ gʼaˇ hta‸ mawˬ ve yoˬ.

2Hkʼe te leh yawˇ awˬ pa awˬ e geh kʼo‸-e leh, Tiˉmaˍnaˆ venˇ hkʼaw lo ngaˬ yaˇ miˇ haˉ teˇ gʼaˇ hta‸ mawˬ taˉ peuˬ. Yawˇ hta‸ ca lawˬ laˇ-oˆ. Ngaˬ yawˇ hta‸ heuˆ gaˇ ve yoˬ, teh‸ kʼoˆ piˇ ve yoˬ.

3Ya‸ hkʼaˇ yawˇ ve awˬ pa awˬ e kʼaw‸ yaw hkʼaw‸ leh kʼoˆ ve, Aˬ hto‸ ma pa taw nawˬ awˬ miˇ ma ca tuˬ, buiˇshaˆaˉnaˆ chaw hpeh‸ ve Hpiˇliˇtiˆ chaw hui geh kʼai ve le. Nawˬ ve chaw ceuˬ, nawˬ ve awˬ viˉ awˬ nyi teˇ hpaˍ awˬ hkʼaw lo yaˇ miˇ haˉ teˇ gʼaˇ hta‸ ka‸ nawˬ ca maˇ mawˬ laˇ, teh‸ yawˇ hta‸ kʼoˆ piˇ ve yoˬ. Ya‸ hkʼaˇ Sanˍsonˍ lehˬ, Yawˇ teˇ gʼaˇ hta‸ ceh tiˉ ngaˬ ca lawˬ tcuh gaˇ ve yoˬ. Ngaˬ yawˇ hta‸ nyi ma cawˇ jaˇ ve yoˬ, teh‸ yawˇ huiˉ maˬ hta‸ kʼoˆ piˇ ve yoˬ.

4Chi hkʼe hpeh‸ la tuˬ, Gʼuiˬsha Sanˍsonˍ hta‸ awˬ hkʼaˇ gu piˇ chehˇ ve hta‸ yawˇ ve awˬ pa awˬ e maˇ shiˍ. Awˬ lawn kʼo Gʼuiˬsha lehˬ, Hpiˇliˇtiˆ chaw hui hta‸ ma‸ bawˆ tuˬ da‸ ve awˬ yanˇ hta‸ ca chehˇ ve yoˬ. Awˬ yanˇ oˇ ve awˬ hkʼaw lo Hpiˇliˇ tiˆ chaw lehˬ, Iˉsaˍreˍlaˆ chaw hta‸ uˉ peunˍ chehˇ ve yoˬ.

5Sanˍsonˍ lehˬ, yawˇ ve awˬ pa awˬ e hta‸ shiˍ veu leh Tiˉmaˍnaˆ venˇ lo ya‸-e ve yoˬ. Yawˇ hui lehˬ, a pehˉ meuˇ hko hta‸ hpanˍ kʼai chehˇ ve teˇ yanˇ, laˇ caˬ shiˉ teˇ hkeh kuˬ chehˇ ve awˬ hkawˇ hta‸ yawˇ gʼa kaˇ ve yoˬ.

6Oˇ htaˇ, Gʼuiˬsha ve kanˇ paˆ yawˇ hta‸ awˬ gʼaˇ uiˍ la piˇ ve yoˬ. Aˉ che‸ ehˉ hta‸ tzuh‸ suhˍ ve hkʼa shuˍ, yawˇ lehˬ laˇ caˬ shiˉ oˇ ve hta‸ tzuh‸ suhˍ piˇ ve yoˬ. Ya‸ hkʼaˇ, yawˇ chi hkʼe te taˍ peuˬ ve awˬ lawn yawˇ ve awˬ pa awˬ e hta‸ maˇ hto piˇ.

7Peuˬ hkʼaw‸ nawˉ, yawˇ yaˇ miˇ oˇ ve geh kʼai leh na‸ uˉ te da‸ ve yoˬ. Yawˇ lehˬ, yaˇ miˇ oˇ ve hta‸ nyi ma cawˇ jaˇ ve yoˬ.

8Awˬ hkʼaw‸ nawˉ maˇ maw maw, Sanˍsonˍ lehˬ yaˇ miˇ oˇ ve hta‸ ca heuˆ tuˬ tawˆ kʼai ve yoˬ. Ya‸ kʼaw kʼaˉ lo yawˇ tiˇ pehˍ taˉ ve laˇ caˬ shiˉ hta‸ ca kʼaw‸ nyi ve teˇ yanˇ, laˇ caˬ shiˉ ve oˉ kʼoˍ hkʼaw pehˇ teˇ hpoˆ gaˬ leh, pehˇ gʼuiˬ hkʼa biˇ cawˬ taˍ laˇ ve hta‸ yawˇ gʼa mawˬ leh anˇ jaˇ ve yoˬ.

9Hkʼe te leh, yawˇ pehˇ gʼuiˬ oˇ ve hta‸ hkaˆ chiˇ veu leh, ya‸ kʼaw kʼaˉ lo caˇ kʼai ve yoˬ. Yawˇ ve awˬ pa awˬ e hta‸ htawˇ caˍ piˇ leh, yawˇ huiˉ maˬ htawˇ caˇ ve yoˬ. Ya‸ hkʼaˇ yawˇ huiˉ maˬ lehˬ, pehˇ gʼuiˬ oˇ ve suh taˍ ve laˇ caˬ shiˉ awˬ to hkʼaw yuˬ veu laˇ ve hta‸ maˇ shiˍ.

10Yawˇ ve awˬ pa lehˬ yaˇ miˇ ve yehˬ lo kʼai leh, Sanˍsonˍ lehˬ te muiˬ te jaw ve hkʼe hti caˇ hti dawˬ chehˇ ve yoˬ.

11Hpiˇliˇtiˆ chaw teˇ hpaˍ yawˇ hta‸ awˬ chawˇ te piˇ tuˬ chaw haˉ paˍ 30 gʼaˇ hta‸ yawˇ geh shiˍ veu laˇ piˇ ve yoˬ.

12Oˇ htaˇ Sanˍsonˍ yawˇ hui hta‸ kʼoˆ piˇ ve, Ngaˬ hui tawˇ kuˇ da‸-a veuˬ. Pawehˇ te chehˇ ve awˬ yanˇ chi ve suhˍ nyi awˬ hkʼaw lo, nawˬ hui ngaˬ kʼoˆ ve tawˇ hta‸ tcuhˉ kuiˬ yuˬ tawˆ laˇ gʼa ve kʼo, ngaˬ nawˬ hui hta‸ da‸ jaˇ ve hpa teˇgʼaˇ teˇ cheˆ leh, veu‸ kʼaˇ teˇ gʼaˇ teˇ cuˍ piˇ laˇ tuˬ yoˬ.

13Ya‸ hkʼaˇ, nawˬ hui lehˬ tawˇ oˇ ve tcuhˉ kuiˬ yuˬ tawˆ laˇ maˇ gʼa ve kʼo, ngaˬ hta‸ da‸ jaˇ ve hpa 30 cheˆ leh, veu‸ kʼaˇ 30 cuˍ gʼa piˇ laˇ ve yoˬ, teh‸ yawˇ hui hta‸ kʼoˆ piˇ ve yoˬ. Oˇ htaˇ yawˇ hui lehˬ, Nawˬ kʼoˆ gaˇ ve tawˇ hta‸ kʼoˆ hkʼa nyi. Ngaˬ hui na taˍ ve yoˬ, teh‸ yawˇ hta‸ kʼoˆ piˇ ve yoˬ.

14Oˇ htaˇ Sanˍsonˍ lehˬ, Caˇ shehˍ hpaˇ awˬ hkʼaw lo caˇ tuˬ tawˆ la leh, awˬ gʼaˇ uiˍ ve awˬ ceuˬ awˬ hkʼaw lo mehˬ jaˇ ve awˬ ceuˬ tawˆ la ve yoˬ, teh‸ kʼoˆ ve yoˬ. Shehˆ nyi ponˬ peuˬ ve htawˇ, yawˇ hui lehˬ tawˇ oˇ ve tcuhˉ kuiˬ hta‸ yuˬ tawˆ maˇ gʼa.

15Awˇ nyi teˇ nyi gaˬ ve teˇ yanˇ, yawˇ hui Sanˍsonˍ miˇ ma geh laˬ leh, Tawˇ oˇ ve tcuhˉ kuiˬ yawˇ nawˬ hta‸ hto maˍ laˇ tuˬ, nawˬ ve awˬ hpawˇ hta‸ beˬ na nyi-o. Nawˬ oˇ hkʼe maˇ te ve kʼo, nawˬ hta‸ ka‸ nawˬ pa hta‸ ka‸ ngaˬ hui aˬ miˍ tuˉ baˬ laˇ tuˬ yoˬ. Nawˬ huiˉ maˬ lehˬ, ngaˬ hui ve mawˇ jeˬ teˇ hpaˍ hta‸ hinˉ yuˬ tuˬ ngaˬ hui hta‸ choˬ ka‸ lo kuˬ yuˬ taˍ laˇ ve law, teh‸ yawˇ hta‸ kʼoˆ piˇ ve yoˬ.

16Hkʼe te leh, Sanˍsonˍ miˇ ma lehˬ yawˇ ve awˬ hpawˇ geh hawˬ laˬ leh, Nawˬlehˬ ngaˬ hta‸ maˇ ha‸. Ngaˬ hta‸ nyi bawˬ jaˇ ve law. Awˬ lawn kʼo, nawˬ lehˬ ngaˬ ve awˬ chawˇ teˇ hpaˍ hta‸ tawˇ kuˇ da‸ taˍ ve htawˇ, ngaˬ hta‸ tcuhˉ kuiˬ maˇ hto maˍ laˇ ve law, teh‸ yawˇ hta‸ kʼoˆ piˇ ve yoˬ. Oˇ htaˇ Sanˍsonˍ lehˬ, Tawˇ oˇ ve tcuhˉ kuiˬ ngaˬ pa ngaˬ e hta‸ ka ngaˬ maˇ hto piˇ. Hkʼaˬ hkʼe te leh nawˬ hta‸ hto laˇ hpeh‸ tuˬ ve le, teh‸ yawˇ hta‸ kʼaw‸ kʼoˆ piˇ ve yoˬ.

17Pawehˇ te chehˇ ve suhˍ nyi ve awˬ yanˇ awˬ hkʼaw lo, yaˇ miˇ oˇ ve hawˬ chehˇ taˍ ve yoˬ. Ya‸ hkʼaˇ, suhˍ nyi teˇ nyi gaˬ ve teˇ yanˇ, yawˇ lehˬ tcuhˉ kuiˬ oˇ ve teˇ hpaˍ yawˇ miˇ ma hta‸ kʼoˆmaˍ piˇ ve yoˬ. Awˬ lawn kʼo, yawˇ lehˬ tcuhˉ kuiˬ oˇ ve hta‸ shiˍ gaˇ jaˇ ve pa taw yoˬ. Hkʼe te leh, yaˇ miˇ oˇ ve yawˇ ve awˬ chawˇ teˇ hpaˍ hta‸ ca hto piˇ ve yoˬ.

18Suhˍ nyi teˇ nyi gaˬ leh, Sanˍsonˍ zuh‸ bawehˇ hkʼaw maˇ lo‸-e sheˍ htaˇ, venˇ yaˇ oˇ ve teˇ hpaˍ yawˇ hta‸ kʼoˆ piˇ ve, Pehˇ gʼuiˬ a‸ kehˉ mehˬ ve aˬ hto‸ ma cawˬ sheˍ le. Laˇ caˬ shiˉ a‸ kehˉ awˬ gʼaˇ uiˍ ve aˬ hto‸ ma cawˬ sheˍ le, teh‸ kʼoˆ piˇ ve yoˬ. Oˇ htaˇ Sanˍsonˍ lehˬ, Nawˬ hui ngaˬ ve nuˇ ma haˉ hta‸ yuˬ leh maˇ mehˇ ve hkʼe kʼo, tcuhˉ kuiˬ oˇ ve hta‸ shiˍ tuˬ ve maˇ heˆ, teh‸ yawˇ hui hta‸ kʼaw‸ yaw hkʼaw‸ piˇ ve yoˬ.

19Oˇ htaˇ, Gʼuiˬsha ve kanˇ paˆ yawˇ hta‸ awˬ gʼaˇ uiˍ la piˇ leh, yawˇ lehˬ Aˍshaˆkeˍlonˍ venˇ lo ya‸-e ve yoˬ. Oˇ kaˬ lo yawˇ chaw 30 gʼaˇ hta‸ tiˇ pehˍ leh, yawˇ hui ve veu‸ kʼaˇ teˇ hpaˍ hta‸ kʼehˆ yuˬ peuˬ hkʼaw‸ nawˉ, tcuhˉ kuiˬ yuˬ tawˆ gʼa ve chaw hui hta‸ piˇ ve yoˬ. Oˇ hkʼe te peuˬ hkʼaw‸ nawˉ, yawˇ beu‸ jaˇ leh aˉ hkʼaw lo kʼo‸-e ve yoˬ.

20Yawˇ hui lehˬ, Sanˍsonˍ ve awˬ miˇ ma hta‸ awˬ nu ve chaw teˇ gʼaˇ hta‸ kʼaw‸ heuˆ tcuh ve yoˬ.

← Chapter 13 Jump to: Chapter 15 →