Judges 20

Lahu Bible Edited © Thailand Bible Society and Bible Society of Myanmar, 2010, 2020.

1Oˇ htaˇ, awˬ na hpawˇ Danˍ venˇ hta‸ te leh awˬ hawˉ hpawˇ Beˍraˍsheˍbaˆ venˇ lo hkʼa gaˬ, leh mvuhˇ nyi tawˆ hpawˇ Giˇlaˆ mvuhˇmiˬ hkʼaw chehˇ ve Iˉsaˍreˍlaˆ chaw hkʼa peu-eˬ, nyi ma teˇ shiˍ tiˉ te leh Gʼuiˬsha mehˆ gʼuˇ suhˍ Miˆsaˍpaˍ venˇ lo laˬve yoˬ.

2Iˉsaˍreˍlaˆ chaw hui ve awˬ hoˉ awˬ naˬ hkʼa peu-eˬ, Gʼuiˬsha ve chaw hui geh chehˇ taˍ ve yoˬ. Oˇ kaˬ lo ma‸ yaˇ awˇ shehnˉ gʼaˇ chehˇ taˍ ve yoˬ.

3Awˬ nu ve Iˉsaˍreˍlaˆ chaw hkʼa peu-eˬ Miˆsaˍpaˍ venˇ lo kʼai peuˬ ve hta‸ Beˍyaˍmenˍ chaw hui gʼa kaˇ ve yoˬ. Oˇ htaˇ Iˉsaˍreˍlaˆ chaw teˇ hpaˍ lehˬ, Chi taw taw haiˬ ve kanˉ hkʼaˬ hkʼe hpeh‸ tawˆ la ve awˬ lawn, ngaˬ hui hta‸ a ciˉ kʼoˆ maˍ laˇ-oˆ, teh‸ kʼoˆ ve yoˬ.

4Oˇ htaˇ, shu tiˇ pehˍ ve hta‸ gʼa hkanˍ ve yaˇ miˇ ma oˇ ve awˬ hpawˇ Leˍviˆ chaw kʼoˆ ve, Ngaˬ miˇ ma ngaˬ huiˉ maˬ Beˍyaˍmenˍ chaw hui ve mvuhˇmiˬ Giˇbaˍ venˇ hkʼaw ca haˉ tuˬ kʼai ve yoˬ.

5Mvuhˇ hpeu‸ htaˇ Giˇbaˍ venˇ yaˇ teˇ hpaˍ lehˬ, ngaˬ hui haˉ chehˇ taˍ ve yehˬ hta‸ caw hoˆ taˍ leh, ngaˬ hta‸ ca hpeh la ve yoˬ. Yawˇ hui ngaˬ hta‸ tiˇ pehˍ tuˬ laˬ leh, ngaˬ miˇ ma hta‸ htawˇ hkʼa mvuhˇ hkʼa na te piˇ ve yoˬ. Hkʼe te leh yawˇ suh-e ve yoˬ.

6Chi hta‸ pa taw, ngaˬ yawˇ ve awˬ to hta‸ yuˬ leh tawˆ cheˆ peuˬ hkʼaw‸ nawˉ, Iˉsaˍreˍlaˆ chaw teˇ chi nyiˇ ceuˬ geh lo feu kʼai ve yoˬ. Ngaˬ hui awˬ hkʼaw lo, chaw chi teˇ hpaˍ lehˬ haiˬ leh cha‸ chiˆ jaˇ ve kanˉ hta‸ te peuˬ.

7Nawˬ hui hkʼa peu-eˬ ve lehˬ, Iˉsaˍreˍlaˆ chaw deˇ deˇ hpeh‸ ve yoˬ. Awˬ lawn chi hta‸ caˉ da‸ leh, ngaˬ hui hkʼaˬ hkʼe gʼa te tuˬ ve le, teh‸ kʼoˆ ve yoˬ.

8Oˇ htaˇ Iˉsaˍreˍlaˆ chaw hkʼa peu-eˬ tu la leh kʼoˆ ve, Ngaˬ hui teˇ gʼaˇ ka‸ a shu yawˇ ve yehˬ, maˇ heˆ ko, aˉ po kʼo lo kʼo‸-e tuˬ ve maˇ heˆ.

9Ngaˬ hui chi hkʼe te tuˬ yoˬ. Chaw teˇ hpaˍ hpaˍ hta‸ ngaˬ hui leuˆ yuˬ leh, Giˇbaˍ venˇ hta‸ ca bawˆ tcuh tuˬ yoˬ.

10Iˉsaˍreˍlaˆ chaw hui awˬ hkʼaw lo ve chaw teˇ chi pun teˇ pun lehˬ, ma‸ yaˇ teˇ hpaˍ awˬ pon caˇ tuˬ gʼa gu piˇ tuˬ yoˬ. Awˬ nu ve chaw teˇ hpaˍ lehˬ, Iˉsaˍreˍlaˆ chaw hui awˬ hkʼaw lo cha‸ chiˆ ve kanˉ chi hta‸ te tawˆ la ve Giˇbaˍ venˇ yaˇ teˇ hpaˍ hta‸ gʼa ca te luˬ piˇ tuˬ yoˬ, teh‸ kʼoˆ ve yoˬ.

11Hkʼe te leh, Iˉsaˍreˍlaˆ chaw hkʼa peu-eˬ venˇ oˇ ve hta‸ ca bawˆ tuˬ nyi ma teˇ shiˍ tiˉ te leh, teˇ geh hpawnˬ laˬ ve yoˬ.

12Oˇ ve hkʼaw‸ nawˉ, Iˉsaˍreˍlaˆ chaw teˇ hpaˍ Beˍyaˍmenˍ awˬ ceuˬ awˬ hkʼaˇ teˇ hpaˍ geh tawˇ shanˍ feu piˇ leh kʼoˆ ve, Nawˬ hui awˬ hkʼaw lo hpeh‸ tawˆ la ve cha‸ chiˆ ve kanˉ chi lehˬ, hkʼaˬ hkʼe ve le.

13Giˇbaˍ venˇ hkʼaw chehˇ ve haiˬ ve chaw oˇ ve teˇ hpaˍ ngaˬ hui hta‸ chiˇ a‸ laˇ-oˆ. Ngaˬ hui yawˇ hui hta‸ tiˇ pehˍ leh, haiˬ ve kanˉ chi Iˉsaˍreˍlaˆ chaw hui awˬ hkʼaw lo yuˬ baˬ tuˬ yoˬ, teh‸ kʼoˆ feu piˇ ve yoˬ. Ya‸ hkʼaˇ Beˍyaˍmenˍ chaw hui lehˬ, Iˉsaˍreˍlaˆ chaw hui kʼoˆ ve tawˇ hta‸ maˇ na yuˬ.

14Beˍyaˍmenˍ mvuhˇmiˬ hkʼaw chehˇ ve chaw hkʼa peu-eˬ, Iˉsaˍreˍlaˆ chaw hui hta‸ bawˆ da‸tuˬ, Giˇbaˍ venˇ lo hpawnˬ laˬ ve yoˬ.

15Oˇ ve teˇ nyi tiˉ awˬ hkʼaw lo, yawˇ hui lehˬ ma‸ yaˇ 26,000 gʼaˇ shawˍ gʼa ve yoˬ. Chi awˬ hkʼoˆ, Giˇbaˍ venˇ yaˇ teˇ hpaˍ lehˬ, cheuˬ jaˇ ve ma‸ yaˇ 700 gʼaˇ hta‸ hkʼa deh‸ shawˍ teh taˍ ve yoˬ.

16Ma‸ yaˇ oˇ ve teˇ hpaˍ lehˬ, la‸ mehˍ paˉ awˬ gʼaˇ uiˍ ve chaw teˇ hpaˍ hpeh‸ ve yoˬ. Yawˇ hui lehˬ cheuˬ jaˇ ve ma‸ yaˇ hpeh‸ leh, uˉ hkeh mvuh teˇ mvuh hta‸ ka‸ hawˉ ma bawˆ heuˆ gʼa ve yoˬ.

17Beˍyaˍmenˍ awˬ ceuˬ awˬ hkʼaˇ teˇ hpaˍ hta‸ maˇ shawˍ ve, Iˉsaˍreˍlaˆ chaw ma‸ yaˇ 400,000 gʼaˇ cawˬ ve yoˬ.

18Oˇ ve hkʼaw‸ nawˉ, Iˉsaˍreˍlaˆ chaw hui lehˬ Gʼuiˬsha hta‸ oˉ kʼoˍ pui kuiˬ Beˍteˍlaˆ venˇ lo kʼai ve yoˬ. Oˇ kaˬ lo yawˇ hui Gʼuiˬsha hta‸ na nyi lehˬ, Chaw hkʼa ve teˇ ceuˬ Beˍyaˍmenˍ chaw hta‸ awˉ lawˉ gʼa ca bawˆ tuˬ le, teh‸ kʼoˆ ve yoˬ. Oˇ htaˇ Gʼuiˬsha lehˬ, Yuˇda‸ chaw teˇ hpaˍ yoˬ, teh‸ kʼaw‸ yaw hkʼaw‸ piˇ ve yoˬ.

19Hkʼe te leh, Iˉsaˍreˍlaˆ chaw teˇ hpaˍ shawˉ pawˍ teˇ na‸ tu leh Giˇbaˍ venˇ paˇ lo ca deh taˍ ve yoˬ.

20Yawˇ hui Beˍyaˍmenˍ chaw hui hta‸ ca bawˆ tuˬ tawˆ kʼai leh, Giˇbaˍ venˇ paˇ lo chehˇ kuiˬ yuˬ taˍ ve yoˬ.

21Beˍyaˍmenˍ chaw teˇ hpaˍ venˇ hkʼaw tawˆ la leh, oˇ ve teˇ nyi tiˉawˬ hkʼaw lo Iˉsaˍreˍlaˆ chaw 22,000 gʼaˇ hta‸ tiˇ pehˍ piˇ ve yoˬ.

22Iˉsaˍreˍlaˆ chaw teˇ hpaˍ lehˬ, Gʼuiˬsha hta‸ oˉ kʼoˍ pui kuiˬ lo kʼaw‸ kʼo‸-e leh, mvuhˇ hpeu‸ la htaˇ hkʼa gaˬ Gʼuiˬsha mehˆ gʼuˇ suhˍ dawˇ haˍ leh hawˬ chehˇ taˍ ve yoˬ. Oˇ htaˇ yawˇ hui lehˬ, Ngaˬ hui ve awˬ viˉ awˬ nyi Beˍyaˍmenˍ chaw hui hta‸ ma‸ teˇ pawˆ gʼa ca kʼaw‸ bawˆ tuˬ sheˍ ve laˇ, teh‸ Gʼuiˬsha hta‸ na nyi ve yoˬ. Gʼuiˬsha lehˬ, Yoˬ, teh‸ kʼaw‸ yaw hkʼaw‸ piˇ ve yoˬ.

23Oˇ htaˇ Iˉsaˍreˍlaˆ chaw teˇ hpaˍ awˬ gʼaˇ kʼaw‸ cawˬ la leh, ma‸ ca bawˆ tuˬ kʼaw‸ gu taˍ ve yoˬ.

24Iˉsaˍreˍlaˆ chaw teˇ hpaˍ lehˬ, Beˍyaˍmenˍ chaw hui hta‸ ma‸ nyiˇ pawˆ teˇ pawˆ ca kʼaw‸ bawˆ-e ve yoˬ.

25Beˍyaˍmenˍ chaw teˇ hpaˍ Giˇbaˍ venˇ hkʼaw tawˆ la leh, Iˉsaˍreˍlaˆ chaw hui ve ma‸ yaˇ 18,000 gʼaˇ hta‸ tiˇ pehˍ piˇ ve yoˬ.

26Oˇ htaˇ Iˉsaˍreˍlaˆ chaw teˇ hpaˍ Beˍteˍlaˆ venˇ lo kʼaw‸ kʼaw‸ la leh, oˇ kaˬ lo dawˇ haˍ leh hawˬ chehˇ ve yoˬ. Oˇ kaˬ lo yawˇ hui Gʼuiˬsha mehˆ gʼuˇ suhˍ mui taˍ leh, mvuhˇ hpeu‸ la htaˇ hkʼa gaˬ te‸ chiˉ caˇ tuˬ maˇ caˇ. Yawˇ hui Gʼuiˬsha mehˆ gʼuˇ suhˍ tuˉ tanˇ tuˬ ve awˬ ceuˬ yuˬ laˬ leh, tuˉ tanˇ piˇ ve yoˬ.

27Oˇ hkʼe te peuˬ hkʼaw‸ nawˉ, Yawˇ hui Gʼuiˬsha hta‸ na nyi ve yoˬ. Awˬ yanˇ oˇ ve awˬ hkʼaw lo Gʼuiˬsha ve ka ti‸ shaˉ caˆ ta kʼoˍ lehˬ, Beˍteˍlaˆ venˇ hkʼaw cawˬ taˍ sheˍ ve yoˬ.

28Aˍronˍ ve awˬ hawehˍ, Eˇlaˍsaˍ ve yaˇ Hpiˇnaˍhaˆ lehˬ ta kʼoˍ oˇ ve hta‸ ha‸ shaˉ chehˇ taˍ ve yoˬ. Oˇ htaˇ yawˇ hui lehˬ, Ngaˬ hui ve awˬ viˉ awˬ nyi Beˍyaˍmenˍ awˬ ceuˬ awˬ hkʼaˇ teˇ hpaˍ hta‸ ma‸ gʼa ca kʼaw‸ bawˆ tuˬ sheˍ laˇ. Maˇ heˆ kʼo, gʼa jehˇ taˍ tuˬ ve laˇ, teh‸ na nyi ve yoˬ. Oˇ htaˇ Gʼuiˬsha lehˬ, Kʼai loˬ. Shawˉ pawˍ kʼo, yawˇ hui hta‸ ngaˬ nawˬ hui ve la‸ sheh hkʼaw lo chiˇ a‸ laˇ tuˬ yoˬ, teh‸ kʼoˆ piˇ ve yoˬ.

29Hkʼe te leh, Iˉsaˍreˍlaˆ chaw hui lehˬ yawˇ hui ve ma‸ yaˇ teˇ hpaˍ hta‸ Giˇbaˍ venˇ paˇ lo ca va‸ tcuh taˍ ve yoˬ.

30Shehˆ nyi teˇ nyi gaˬ ve teˇ yanˇ, yawˇ hui Beˍyaˍmenˍ chaw hui hta‸ ca bawˆ tuˬ tawˆ kʼai lehˬ, ponˬ laˬ htaˇ te jaw ve hkʼe, Giˇlaˆ venˇ paˇ lo ma‸ bawˆ tuˬ gu chehˇ ve yoˬ.

31Oˇ htaˇ Beˍyaˍmenˍ chaw teˇ hpaˍ tawˆ la leh, venˇ hta‸ vuiˇ kuiˬ lo hkʼa gaˬ gʼa‸ bawˆ kʼai ve yoˬ. Ponˬ laˬ htaˇ hkʼa shuˍ, yawˇ hui lehˬ Beˍteˍlaˆ venˇ leh Giˇbaˍ venˇ lo kʼai ve ya‸ kʼaw hpuiˇ lo Iˉsaˍreˍlaˆ chaw 30 gʼaˇ hta‸ tiˇ pehˍ piˇ ve yoˬ.

32Hkʼe te leh Beˍyaˍmenˍ chaw teˇ hpaˍ lehˬ, Chi teˇ pawˆ ka‸ Iˉsaˍreˍlaˆ chaw hui shonˇ kʼai chehˇ ve yoˬ, teh‸ kʼoˆ ve yoˬ. Ya‸ hkʼaˇ, Iˉsaˍreˍlaˆ chaw teˇ hpaˍ lehˬ, ma‸ bawˆ shonˇ ve hkʼe te leh, hkʼaw‸ nawˉ hpawˇ lo gʼuiˇ kʼo‸-e maˍ piˇ tuˬ gu taˍ ve yoˬ.

33Hkʼe te leh, Iˉsaˍreˍlaˆ chaw teˇ hpaˍ awˬ hkʼaw‸ nawˉ hpawˇ lo hpfuhˆ kʼo‸-e leh, Baˍlaˍtaˍmaˍ teh‸ kʼoˆ ve chehˇ kuiˬ lo hpoˆ chehˇ taˍ ve yoˬ. Oˇ htaˇ, venˇ paˇ lo va‸ chehˇ taˍ ve ma‸ yaˇ teˇ hpaˍ a shu yawˇ va‸ taˍ kuiˬ lo tu la leh, Giˇbaˍ venˇ hkʼaw gʼuiˇ lo‸-e ve yoˬ.

34Iˉsaˍreˍlaˆ chaw hui awˬ hkʼaw lo, hkʼa deh‸ leuˆ yuˬtaˍ ve ma‸ yaˇ 10,000 gʼaˇ lehˬ, Giˇbaˍ venˇ hkʼaw lo‸-e leh gʼaˇ hte‸ bawˆ da‸ chehˇ ve yoˬ. Beˍyaˍmenˍ chaw teˇ hpaˍ lehˬ, yawˇ hui shonˇ la paˇ neˇ ve hta‸ maˇ shiˍ sheˍ.

35Gʼuiˬsha lehˬ, Beˍyaˍmenˍ chaw hui hta‸ Iˉsaˍreˍlaˆchaw hui ve la‸ sheh hkʼaw lo chiˇ a‸ piˇ ve yoˬ. Oˇ ve teˇ nyi tiˉ awˬ hkʼaw lo, canˇ paˍ 25,100 gʼaˇ hta‸ tiˇ pehˍ piˇ ve yoˬ.

36Oˇ htaˇ, Beˍyaˍmenˍ chaw teˇ hpaˍ lehˬ, yawˇ hui shonˇ kʼai peuˬ ve hta‸ shiˍ la ve yoˬ. Iˉsaˍreˍlaˆ chaw teˇ hpaˍ lehˬ, Giˇbaˍ venˇ paˇ lo va‸ chehˇ taˍ ve ma‸ yaˇ teˇ hpaˍ hta‸ gʼaˇ va chehˇ ve pa taw, yawˇ hui Beˍyaˍmenˍ chaw hui mehˆ gʼuˇ suhˍ gʼuiˇ hpaw-e maˍ piˇ ve yoˬ.

37Va‸ chehˇ taˍ ve ma‸ yaˇ oˇ ve teˇ hpaˍ Giˇbaˍ venˇ hkʼaw gʼuiˇ lo‸-e leh, venˇ hkʼaw chehˇ taˍ ve chaw teˇ hpaˍ hta‸ tiˇ pehˍ piˇ ve yoˬ.

38Iˉsaˍreˍlaˆ chaw teˇ hpaˍ lehˬ, venˇ paˇ lo va‸ taˍ ve ma‸ yaˇ teˇ hpaˍ hta‸ awˬ heˆ te da‸ taˍ ve cawˬ ve yoˬ. Venˇ hkʼaw lo mvuhˇ hkʼawˇ naˆ dawˇ lonˉ tawˆ la ve teˇ yanˇ,

39Iˉsaˍreˍlaˆ chaw hkʼa peu-eˬ kʼaw‸ hpfuhˆ kʼaw‸ la tuˬ kʼoˆ da‸ taˍ ve yoˬ. Chi teˇ pawˆ htawˇ Beˍyaˍmenˍ chaw hui lehˬ, Iˉsaˍreˍlaˆ chaw 30 gʼaˇ hta‸ tiˇ pehˍ taˍ peuˬ ve yoˬ. Hkʼe te leh yawˇ hui lehˬ, Chi teˇ pawˆ ka‸ Iˉsaˍreˍlaˆ chaw hui shonˇ kʼai chehˇ ve yoˬ, teh‸ kʼoˆ ve yoˬ.

40Oˇ htaˇ yawˇ hui kʼoˆ da‸ taˍ ve hkʼe awˬ heˆ tawˆ la ve yoˬ. Venˇ hkʼaw lo mvuhˇ hkʼawˇ naˆ dawˇ lonˉ tawˆ la ve yoˬ. Beˍyaˍmenˍ chaw teˇ hpaˍ hkʼaw‸ nawˉ hpfuhˆ nyi leh, venˇ aˬ miˍ to‸ chehˇ ve hta‸ gʼa mawˬ ve teˇ yanˇ anˇ jaˇ ve yoˬ.

41Oˇ htaˇ Iˉsaˍreˍlaˆ chaw teˇ hpaˍ kʼaw‸ hpfuhˆ kʼaw‸ la ve yoˬ. Beˍyaˍmenˍ chaw teˇ hpaˍ lehˬ, yawˇ hui shonˇ la paˇ neˇ ve hta‸ gʼa shiˍ leh kawˆ jaˇ ve yoˬ.

42Hkʼe te leh yawˇ hui heh puiˉ hkʼaw lo gʼuiˇ hpaw-e ve yoˬ. Ya‸ hkʼaˇ yawˇ hui ponˬ kuiˬ maˇ cawˬ. Yawˇ hui lehˬ Iˉsaˍreˍlaˆ chaw leh venˇ hkʼaw tawˆ la chehˇ ve ma‸ yaˇ nyiˇ moˍ awˬ kaˍ lo hpeh‸ sheˬ ve yoˬ. Hkʼe te leh yawˇ hui lehˬ te luˬ te sheˆ ve hta‸ gʼa hkanˍ ve yoˬ.

43Iˉsaˍreˍlaˆ chaw teˇ hpaˍ lehˬ, canˇ paˍ hta‸ teˇ hpawˇ le le lo hoˆ taˍ leh, Giˇbaˍ venˇ mvuhˇ nyi tawˆ hpawˇ lo hkʼa gaˬ yawˇ hui hta‸ gʼa‸ yuˬ leh tiˇ pehˍ piˇ ve yoˬ.

44Hkʼe te leh, Beˍyaˍmenˍ chaw hui ve ma‸ yaˇ 18,000 gʼaˇ suh-e ve yoˬ.

45Awˬ nu ve chaw teˇ hpaˍ heh puiˉ hkʼaw lo gʼuiˇ hpaw-e leh Riˇmonˍ teh‸ kʼoˆ ve haˉ hpawˇ hkʼoˆ hpaw taˆ-e ve yoˬ. Yawˇ hui ve ma‸ yaˇ 5,000 gʼaˇ lehˬ ya‸ kʼaw kʼaˉ lo tiˇ pehˍve hta‸ gʼa hkanˍ ve yoˬ. Iˉsaˍreˍlaˆ chaw teˇ hpaˍ lehˬ, awˬ nu ve ma‸ yaˇ teˇ hpaˍ hta‸ gʼa‸ yuˬ leh tiˇ pehˍ piˇ ve yoˬ. Yawˇ hui lehˬ, chaw 2,000 gʼaˇ hta‸ tiˇ pehˍ piˇ ve yoˬ.

46Oˇ ve teˇ nyi tiˉ awˬ hkʼaw lo, Beˍyaˍmenˍ chaw hui ve ma‸ yaˇ 25,000 tiˇ pehˍ ve hta‸ gʼa hkanˍ ve yoˬ. Ma‸ yaˇ oˇ ve teˇ hpaˍ lehˬ, ha‸ hanˉ jaˇ ve ma‸ yaˇ teˇ hpaˍ hpeh‸ ve yoˬ.

47Ya‸ hkʼaˇ, yawˇ hui ve ma‸ yaˇ 600 gʼaˇ lehˬ heh puiˉ hkʼaw lo gʼuiˇ hpaw-e leh, Riˇmonˍ teh‸ kʼoˆ ve haˉ hpawˇ hkʼoˆ hpaw taˆ-e ve yoˬ. Yawˇ hui oˇ kaˬ lo ha pa awˇ maˬ chehˇ taˍ ve yoˬ.

48Iˉsaˍreˍlaˆ chaw teˇ hpaˍ kʼaw‸ hpfuhˆ kʼaw‸ la leh, cawˬ taˍ sheˍ ve Beˍyaˍmenˍ chaw, yaˇ miˇ yaˇ nehˬ leh to nuˇ to shaˆ teˇ hpaˍ hta‸ tiˇ pehˍ piˇ peuˬ hkʼaw‸ nawˉ, venˇ teˇ hpaˍ hta‸ htawˇ aˬ miˍ tuˉ baˬ ve yoˬ.

← Chapter 19 Jump to: Chapter 21 →