Judges 4

Lahu Bible Edited © Thailand Bible Society and Bible Society of Myanmar, 2010, 2020.

← Chapter 3 Jump to: Chapter 5 →

1Eˇhuˆ suh peuˬ hkʼaw‸ nawˉ, Iˉsaˍreˍlaˆ chaw hui Gʼuiˬsha hta‸ kʼaw‸ te ya‸ ve yoˬ.

2Oˇ htaˇ Gʼuiˬsha lehˬ yawˇ hui hta‸ Haˍzawˇ venˇ hta‸ uˉ peunˍ chehˇ ve Hkaˍnaˍniˆ jawˇmawˇ Yaˍbenˍ ve la‸ sheh hkʼaw lo chiˇ a‸ piˇ ve yoˬ. Jawˇmawˇ chi ve lehˬ, Haˍyawˇshehˆgawˇ venˇ hkʼaw chehˇ ve Siˉsaˍraˆ teh‸ kʼoˆ ve ma‸ poˍ lonˉ teˇ gʼaˇ cawˬ ve yoˬ.

3Jawˇmawˇ Yaˍbenˍ lehˬ, sho te taˍ ve iˉ mvuhˇ lawˬ 900 cawˬ leh, Iˉsaˍreˍlaˆ chaw hui hta‸ nyiˇ chi hkʼaw‸ hkʼa gaˬ hehnˇ chaweh uˉ peunˍ ve yoˬ. Oˇ htaˇ Iˉsaˍreˍlaˆ chaw teˇ hpaˍ Gʼuiˬsha hta‸ kuˬ ve yoˬ.

4Laˍhpiˇdoˆ ve awˬ miˇ ma Deˍboˇraˍ lehˬ, Gʼuiˬsha ve tcuh kaˍ ma hpeh‸ ve yoˬ. Awˬ yanˇ oˇ ve awˬ hkʼaw lo, yawˇ lehˬ Iˉsaˍreˍlaˆ chaw hui hta‸ suhˉ jehˬ piˇ chehˇ ve yoˬ.

5Eˇhpaˍrenˍ chaw hui ve mvuhˇmiˬ Raˍmaˆ venˇ leh Beˍteˍlaˆ venˇ awˬ kaˍ lo tcuhˉ pui cehˬ teˇ cehˬ cawˬ ve yoˬ. Yawˇ lehˬ suhˆ cehˬ oˇ ve awˬ hawˉ lo mui taˍ leh, Iˉsaˍreˍlaˆ chaw hui hta‸ suhˉ jehˬ piˇ ve yoˬ.

6Yawˇ lehˬ Naˍtaˍliˆ chaw hui ve mvuhˇmiˬ, Keˍdeˍshaˆ venˇ hkʼaw chehˇ ve Aˍbiˆnonˍ ve yaˇ paˍ Baˍrehˆ hta‸ ca kuˬ tcuh ve yoˬ. Yawˇ gaˬ la htaˇ Deˍboˇraˍ yawˇ hta‸ kʼoˆ piˇ ve, Iˉsaˍreˍlaˆ chaw hui ve Gʼuiˬsha chi hkʼe kʼoˆ ve yoˬ. Naˍtaˍliˆ leh Zaˍbuˆlonˍ chaw teˇ meunˍ gʼaˇ hta‸ shiˍ veu leh, Taˍbawˇraˆ hkʼaw lo kʼai-o.

7Nawˬ hta‸ ca bawˆ la tuˬ, jawˇmawˇ Yaˍbenˍ ve ma‸ poˍ lonˉ Siˇsaˍraˆhta‸ Kiˇshonˍ iˉ kaˆ lawˬ lo ngaˬ shiˍ veu laˇ tuˬ yoˬ. Yawˇ lehˬ, iˉ mvuhˇ lawˬ leh ma‸ yaˇ maˇ maˇ cawˬ ve yoˬ. Ya‸ hkʼaˇ, nawˬ yawˇ hta‸ bawˆgʼaˇ tuˬ yoˬ, teh‸ Baˍrehˆ hta‸ kʼoˆ piˇ ve yoˬ.

8Ya‸ hkʼaˇ Baˍrehˆ lehˬ, Nawˬ ngaˬ geh kʼai ve kʼo ngaˬ kʼai tuˬ yoˬ. Nawˬ ngaˬ geh maˇ kʼai ve kʼo, ngaˬ ka‸ maˇ kʼai, teh‸ Deˍboˇraˍ hta‸ kʼoˆ piˇ ve yoˬ.

9Oˇ htaˇ Deˍboˇraˍ lehˬ, Oˇ hkʼe yoˬ kʼo ngaˬ nawˬ geh kʼai tuˬ yoˬ. Ya‸ hkʼaˇ, nawˬ Siˇsaˍraˆ hta‸ bawˆ gʼaˇ ve htawˇ, nawˬ te‸ chiˉ awˬ me‸ awˬ hponˇ maˇ cawˬ. Awˬ lawn kʼo, Gʼuiˬsha lehˬ ma‸ poˍ lonˉ oˇ ve hta‸ yaˇ miˇ teˇ gʼaˇ ve la‸ sheh hkʼaw lo chiˇ a‸ piˇ tuˬ yoˬ, teh‸ kʼoˆ ve yoˬ. Oˇ ve hkʼaw‸ nawˉ, Deˍboˇraˍ tu leh Baˍrehˆ geh teˇ geh Keˍdeˍshaˆ venˇ lo kʼai ve yoˬ.

10Baˍrehˆ lehˬ, Zaˍbuˆlonˍ leh Naˍtaˍliˆ chaw teˇ meunˍ hta‸ shiˍ veu leh Keˍdeˍshaˆ venˇ lo kʼai ve yoˬ. Deˍroˇraˍ htawˇ yawˇ geh kʼai ve yoˬ.

11Oˇ htaˇ Keˍniˆ awˬ ceuˬ awˬ hkʼaˇ Heˍbaˍ lehˬ, Keˍdeˍshaˆ venˇ hta‸ maˇ vuiˇ maˇ neˇ kuiˬ lo cawˬ ve Zaˍnaˍnenˍ teh‸ kʼoˆ ve maˉ kuˇ cehˬ cawˬ kuiˬ lo, aˉ po kʼo te leh chehˇ taˍ ve yoˬ. Yawˇ lehˬ Moˉseˍ ve awˬ puˍ Hawˇbaˆ ve awˬ ceuˬ awˬ hkʼaˇ, Keˍniˆ chaw hui hta‸ hpaˆ da‸ taˉ leh tawˆ la taˍ ve chaw hpeh‸ ve yoˬ.

12Baˍrehˆ lehˬ, Taˍbawˇraˆ hkʼaw lo kʼai peuˬ ve awˬ lawn hta‸ Siˉsaˍraˆ gʼa kaˇ ve yoˬ.

13Hkʼe te leh, yawˇ lehˬ sho te taˍ ve iˉ mvuhˇ lawˬ 900 leh ma‸ yaˇ teˇ hpaˍ hta‸ shiˍ veu leh, Haˍyawˇshehˆgawˇ venˇ hkʼaw tu leh Kiˇshonˍ iˉ kaˆ lawˬ lo kʼai ve yoˬ.

14Oˇ htaˇ Deˍboˇraˍ kʼoˆ ve, Kʼai loˬ. Ya‸ nyi Gʼuiˬsha nawˬ hta‸ Siˇsaˍraˆ hta‸ bawˆ gʼaˇ tcuh laˇ tuˬ yoˬ. Gʼuiˬsha lehˬ nawˬ hta‸ shiˍ kʼai laˇ chehˇ ve yoˬ, teh‸ Baˍrehˆ hta‸ kʼoˆ piˇ ve yoˬ. Hkʼe te leh, Baˍrehˆ lehˬ yawˇ ve chaw 10,000 hta‸ shiˍ leh Taˍbawˇraˆ hkʼaw hkʼoˆ ya‸-e ve yoˬ.

15Baˍrehˆ leh yawˇ ve chaw teˇ hpaˍ tawˆ la ve teˇ yanˇ, Gʼuiˬsha lehˬ Siˇsaˍraˆ leh yawˇ ve ma‸ yaˇ teˇ hpaˍ hta‸ kawˆ ve nyi ma cawˬ la piˇ ve yoˬ. Hkʼe te leh, Siˉsaˍraˆ lehˬ iˉ mvuhˇ lawˬ hkʼoˆ pawˆ ya‸-e leh gʼuiˇ hpaw-e ve yoˬ.

16Oˇ htaˇ, Baˍrehˆ lehˬ iˉ mvuhˇ lawˬ leh ma‸ yaˇ oˇ ve teˇ hpaˍ hta‸ Haˍyawˇshehˆgawˇ venˇ lo hkʼa gaˬ gʼa‸ bawˆ kʼai ve yoˬ. Siˇsaˍraˆ ve ma‸ yaˇ hkʼa peu-eˬ suh-e ve yoˬ.

17Siˇsaˍraˆ lehˬ, Keˍniˆ awˬ ceuˬ awˬ hkʼaˇ Heˍbaˍ miˇ ma Yeˍlaˆ ve aˉ po kʼo hkʼaw gʼuiˇ lo‸-e ve yoˬ. Awˬ lawn kʼo, Haˍzawˇ jawˇmawˇ Yaˍbenˍ lehˬ, Heˍbaˍ ve awˬ ceuˬ awˬ hkʼaˇ teˇ hpaˍ hta‸ awˬ chawˇ te da‸ taˍ ve hta‸ pa taw yoˬ.

18Yeˍlaˆ tawˆ-e leh Siˇsaˍraˆ hta‸ gʼa mawˬ ve teˇ yanˇ, Jawˇmawˇ-oˬ, taˇ kawˆ. Ngaˬ ve aˉ po kʼo hkʼaw lo‸ la-o, teh‸ yawˇ hta‸ kʼoˆ piˇ ve yoˬ. Hkʼe te leh yawˇ aˉ po hkʼaw lo‸-e leh, Yeˍlaˆ yawˇ hta‸ yuˬ faˉtaˍ ve yoˬ.

19Oˇ htaˇ Siˇsaˍraˆ lehˬ, Ngaˬ hta‸ iˉ kaˆ a ciˉ taw laˇ-oˆ. Ngaˬ iˉ kaˆ shiˉ jaˇ peuˬ, teh‸ yaˇ miˇ hta‸ kʼoˆ piˇ ve yoˬ. Hkʼe te leh yaˇ miˇ yawˇ hta‸ nuˇ cuˉ gʼuiˬ taw piˇ leh kʼaw‸ yuˬ faˉ taˍ ve yoˬ.

20Oˇ ve hkʼaw‸ nawˉ Siˇsaˍraˆ lehˬ, Nawˬ aˉ po kʼo yehˬmiˉhpe‸ lo huˉ taˍ-o‸. Chaw teˇ gʼaˇ gʼaˇ laˬ leh, Choˬ kaˬ lo chaw teˇ gʼaˇ ka‸ maˇ laˬ mawˬ laˇ, teh‸ na nyi laˇ ve kʼo, Maˇ laˬ mawˬ, teh‸ kʼaw‸ yaw hkʼaw‸ piˇ-oˆ, teh‸ yaˇ miˇ oˇ ve hta‸ kʼoˆ piˇ ve yoˬ.

21Siˇsaˍraˆ lehˬheuˬ jaˇ peuˬ ve pa taw zuh‸ muiˉ kʼa sheˬ ve yoˬ. Oˇ htaˇ, Yeˍlaˆ lehˬ hta tu leh juˇ hta‸ yuˬ veu laˇ leh yawˇ ve naˍ paw hkʼaw dawˆ keu piˇ ve yoˬ. Juˇ oˇ ve lehˬ oˉ kʼoˍ hta‸ pawnˍ tawˆ-e leh miˬguiˬ hkʼaw lo‸-e ve yoˬ. Hkʼe te leh yawˇ suh-e ve yoˬ.

22Baˍrehˆ lehˬ Siˉsaˍraˆ hta‸ gʼa‸ yuˬ leh oˇ kaˬ lo gaˬ la ve yoˬ. Yeˍlaˆ yawˇ hta‸ ha‸ yuˬ leh, Choˬ kaˬ laˬ-o‸. Nawˬ gʼa‸ ca chehˇ ve chaw ngaˬ nawˬ hta‸ maˍ laˇ tuˬ yoˬ, teh‸ yawˇ hta‸ kʼoˆ piˇ ve yoˬ. Hkʼe te leh yawˇ yaˇ miˇ oˇ ve geh aˉ po kʼo hkʼaw lo‸-e leh, Siˇsaˍraˆ lehˬ yawˇ ve naˍ paw hkʼaw juˇ dawˆ keu ve hta‸ gʼa hkanˍ leh suhˍ taˍ ve hta‸ yawˇ gʼa mawˬ ve yoˬ.

23Oˇ ve teˇ nyi awˬ hkʼaw lo, Gʼuiˬsha lehˬ Iˉsaˍreˍlaˆ chaw hui awˬ pon Hkaˍnaˍniˆ jawˇmawˇ Yaˍbenˍ hta‸ te luˬ te sheˆ piˇ ve yoˬ.

24Iˉsaˍreˍlaˆ chaw teˇ hpaˍ lehˬ, Yaˍbenˍ luˬ kʼai sheˆ kʼai htaˇ hkʼa gaˬ, yawˇ hta‸ shanˬ te shanˬ fawˉ mehˍ piˇ ve yoˬ.

← Chapter 3 Jump to: Chapter 5 →