Judges 15

Lahu Bible Edited © Thailand Bible Society and Bible Society of Myanmar, 2010, 2020.

← Chapter 14 Jump to: Chapter 16 →

1Maˇ maw maw caˬ gʼeu‸ ve awˬ yanˇ gaˬ la htaˇ, Sanˍsonˍ lehˬ aˉ che‸ ehˉ teˇ hkeh yuˬ veu leh, yawˇ ve awˬ miˇ ma geh kʼo‸-e ve yoˬ. Oˇ htaˇ Sanˍsonˍ lehˬ, Ngaˬ miˇ ma ve bawehˇ hkʼaw lo‸-e gaˇ ve yoˬ, teh‸ yawˇ ve awˬ puˍ hta‸ kʼoˆ piˇ ve yoˬ. Ya‸ hkʼaˇ yawˇ ve awˬ puˍ yawˇ hta‸ maˇ lo‸-e tcuh.

2Yawˇ koˆ ve, Nawˬ lehˬ ngaˬ yaˇ miˇ hta‸ awˬ tehˬ awˬ na nyi bawˬ jaˇpeuˬ hehˉ teh‸ dawˇ leh, yawˇ hta‸ nawˬ ve awˬ chawˇ teˇ gʼaˇ hta‸ piˇ peuˬ. Ya‸ hkʼaˇ, yawˇ ve awˬ nyi ma teˇ gʼaˇ cawˬ sheˍ. Yawˇ lehˬ leuˉ leh awˬ hkiˇ awˬ naˬ da‸ ve yoˬ. Yawˇ hta‸ nawˬ heuˆ hpeh‸ ve yoˬ, teh‸ Sanˍsonˍ hta‸ kʼoˆ piˇ ve yoˬ.

3Oˇ htaˇ Sanˍsonˍ lehˬ, Chi teˇ pawˆ ngaˬ Hpiˇliˇtiˆ chaw hui hta‸ te luˬ piˇ ve htawˇ, ngaˬ awˬ hkʼoˆ te‸ chiˉ venˇbaˆ maˇ cawˬ taˬ, teh‸ kʼoˆ ve yoˬ.

4Hkʼe te leh yawˇ tawˆ kʼai leh, heh hpuiˇ 300 hkeh ca hpeh yuˬ ve yoˬ. Yawˇ lehˬ, heh hpuiˇ nyiˇ hkeh ve teˇ ceh te leh, awˬ mehˍ tu hta‸ hpeh tsuh‸ da‸ piˇ peuˬ hkʼaw‸ nawˉ, awˬ kaˍ lo aˬ miˍ bawˇ hpeh keu taˍ ve yoˬ.

5Oˇ hkʼe te peuˬ hkʼaw‸ nawˉ, aˬ miˍ tuˉ leh Hpiˇliˇtiˆ chaw hui ve ti mi hkʼaw gʼa‸ peu ve yoˬ. Hkʼe te leh, gʼeu‸ taˍ peuˬ ve caˬ teˇ hpaˍ leh, maˇ gʼa gʼeu‸ sheˬ ve caˬ hkʼa peu-eˬ aˬ miˍ to‸ baˬ sheˬ ve yoˬ. Shaˍlonˍ cehˬ teˇ hpaˍ htawˇ aˬ miˍ chiˆ pehˍ ve yoˬ.

6Oˇ htaˇ Hpiˇliˇtiˆ chaw teˇ hpaˍ lehˬ, Chi hkʼe te ve a shu le, teh‸ kʼoˆ ve yoˬ. Tiˉmaˍnaˆ venˇ yaˇ, Sanˍsonˍ ve awˬ puˍ lehˬ, Sanˍsonˍ miˇ ma hta‸ awˬ nu ve chaw teˇ gʼaˇ hta‸ kʼaw‸ piˇ ve pa taw, Sanˍsonˍ chi hkʼe te ve hta‸ yawˇ hui shiˍ la ve yoˬ. Hkʼe te leh Hpiˇliˇtiˆ chaw teˇ hpaˍ lehˬ, yaˇ miˇ oˇ ve hta‸ aˬ miˍ tuˉ pehˍ leh, yawˇ awˬ paˍ ve yehˬ hta‸ htawˇ aˬ miˍ tuˉ baˬ ve yoˬ.

7Oˇ htaˇ Sanˍsonˍ lehˬ, Nawˬ hui chi hkʼe te ve pa taw, nawˬ hui hta‸ ngaˬ maˇ gʼa kʼaw‸ te hkʼaw‸ sheˍ ve ceh ceh, ngaˬ ta‸ iˉ chehˇ taˍ tuˬ ve maˇ heˆ, teh‸ yawˇ hui hta‸ kʼoˆ piˇ ve yoˬ.

8Hkʼe te leh, yawˇ nyi ma zuhˆ jaˇ ve awˬ hkʼaw lo, yawˇ hui hta‸ tiˇ pehˍ peuˬ hkʼaw‸ nawˉ, Eˇtanˍ teh‸ kʼoˆ ve haˉ kʼoˍ hkʼaw ca chehˇ taˍ ve yoˬ.

9Hpiˇliˇtiˆ chaw teˇ hpaˍ lehˬ, Yuˇda‸ mvuhˇmiˬ hkʼaw deh taˍ leh, Leˍhiˍ venˇ hta‸ ca bawˆ la ve yoˬ.

10Oˇ htaˇ Yuˇda‸ chaw teˇ hpaˍ lehˬ, Aˬ hto‸ ma pa taw nawˬ hui ngaˬ hui hta‸ ca bawˆ la ve le, teh‸ yawˇ hui hta‸ na nyi ve yoˬ. Yawˇ hui kʼaw‸ yaw hkʼaw‸ leh kʼoˆ ve, Sanˍsonˍ ngaˬ hui hta‸ te laˇ taˍ peuˬ ve hkʼe, yawˇ hta‸ hpeh yuˬ leh oˇ hkʼe kʼaw‸ te hkʼaw‸ piˇ tuˬ ngaˬ hui laˬ ve yoˬ, teh‸ kʼaw‸ kʼoˆ piˇ ve yoˬ.

11Oˇ htaˇ Yuˇda‸ chaw 3,000 gʼaˇ Sanˍsonˍ chehˇ taˍ kuiˬ Eˇtanˍ haˉ kʼoˍ lo kʼai leh, Hpiˇliˇtiˆ chaw teˇ hpaˍ ngaˬ hui hta‸ uˉ peunˍ chehˇ ve hta‸ nawˬ maˇ shiˍ laˇ. Ngaˬ hui hta‸ nawˬ hkʼaˬ hkʼe te laˇ ve le, teh‸ yawˇ hta‸ kʼoˆ piˇ ve yoˬ. Oˇ htaˇ Sanˍsonˍ lehˬ, Yawˇ hui ngaˬ hta‸ te laˇ ve hkʼe, ngaˬ yawˇ hui hta‸ kʼaw‸ te hkʼaw‸ piˇ ve yoˬ, teh‸ kʼoˆ ve yoˬ.

12Yawˇ hui kʼoˆ ve, Ngaˬ hui nawˬ hta‸ hpeh yuˬ leh, Hpiˇliˇtiˆ chaw hui ve la‸ sheh hkʼaw chiˇ a‸ piˇ tuˬ laˬ ve yo, teh‸ yawˇ hta‸ kʼoˆ piˇ ve yoˬ. Oˇ htaˇ Sanˍsonˍ lehˬ, Nawˬ hui ngaˬ hta‸ maˇ tiˇ pehˍ tuˬ ka ti‸ te laˇ-oˆ, teh‸ yawˇ hui hta‸ kʼoˆ piˇ ve yoˬ.

13Yawˇ hui lehˬ, Ngaˬ hui nawˬ hta‸ maˇ tiˇ pehˍ. Nawˬ hta‸ hpeh yuˬ leh, Hpiˇliˇtiˆ chaw hui ve la‸ sheh hkʼaw lo chiˇ a‸ piˇ tuˬ yoˬ, teh‸ yawˇ hta‸ kʼoˆ piˇ ve yoˬ. Hkʼe te leh yawˇ hui aˉ caˆ hkeh awˬ suhˉ nyiˇ caˆ yuˬ leh yawˇ hta‸ hpeh peuˬ hkʼaw‸ nawˉ, haˉ kʼoˍ hkʼaw shiˍ tawˆ-e ve yoˬ.

14Yawˇ Leˍhiˍ venˇ lo gaˬ la ve teˇ yanˇ, Hpiˇliˇtiˆ chaw teˇ hpaˍ gʼaˇ hte‸ kuˬ leh yawˇ geh gʼuiˇ kʼai ve yoˬ. Oˇ htaˇ, Gʼuiˬsha ve kanˇ paˆ yawˇ hta‸ awˬ gʼaˇ cawˬ la piˇ leh, yawˇ lehˬ aˉ caˆ hkeh oˇ ve teˇ hpaˍ hta‸ gʼawˬ cheˆ ve yoˬ. Aˉ caˆ hkeh oˇ ve teˇ hpaˍ lehˬ, aˬ miˍ to‸ hkeu‸ taˍ ve gʼo‸ hkeh hkʼe ceh hpeh‸ ve yoˬ.

15Oˇ htaˇ yawˇ lehˬ, piˉ laˬ paˇ kaˇ gʼawˇ teˇ maˬ hta‸ gʼawˆ yuˬ leh chaw 1,000 gʼaˇ hta‸ tiˇ pehˍ ve yoˬ.

16Oˇ hkʼe te peuˬ hkʼaw‸ nawˉ Sanˍsonˍ kʼa muiˬ leh kʼoˆ ve, Piˉ laˬ paˇ kaˇ gʼawˇ hta‸ cuˇ leh, ngaˬ chaw 1,000 gʼaˇ hta‸ tiˇ pehˍ peuˬ. Piˉ laˬ paˇ kaˇ gʼawˇ hta‸ cuˇ leh, ngaˬ yawˇ hui hta‸ awˬ hpoˆ lonˉ te gʼawˆ hpoˆ taˍ ve yoˬ, teh‸ kʼoˆ ve yoˬ.

17Oˇ ve hkʼaw‸ nawˉ, yawˇ paˇ kaˇ gʼawˇ oˇ ve hta‸ gʼawˆ baˬ ve yoˬ. Chehˇ kuiˬ oˇ ve hta‸ Raˍmaˆleˍhiˆ teh‸ meh piˇ ve yoˬ.

18Oˇ htaˇ Sanˍsonˍ lehˬ iˉ kaˆ shiˉ jaˇ ve pa taw Gʼuiˬsha hta‸ kuˬ leh, Gʼuiˬsha-oˬ, nawˬ lehˬ ngaˬ hta‸ gʼaˇ shehˍ hpaˇ hpeh‸ la piˇ ve yoˬ. Chi beu‸ ngaˬ iˉ kaˆ shiˉ jaˇ leh buiˇshaˆ aˉ naˆ chaw hpeh‸ ve Hpiˇliˇtiˆ chaw hui ve la‸ sheh hkʼaw gʼa gaˬ tuˬ ve laˇ, teh‸ kʼoˆ ve yoˬ.

19Oˇ htaˇ Gʼuiˬsha lehˬ, Leˍhiˍ venˇ awˬ paˇ lo cawˬ ve lawˬ hkʼo‸ hkʼaw iˉ kaˆ tawˆ la piˇ ve yoˬ. Sanˍsonˍ lehˬ iˉ kaˆ oˇ ve hta‸ dawˬ leh, awˬ gʼaˇ kʼaw‸ cawˬ la ve yoˬ. Hkʼe te leh, iˉ kaˆ gʼuiˬ tuˇ oˇ ve hta‸ Haˍkawˇraˆ teh‸ meh piˇ ve yoˬ. Ya‸ nyi hkʼa gaˬ iˉ kaˆ gʼuiˬ tuˇ oˇ ve Leˍhiˍ venˇ hkʼaw cawˬ taˍ sheˍ ve yoˬ.

20Iˉsaˍreˍlaˆ chaw hui ve mvuhˇmiˬ hta‸ Hpiˇliˇtiˆ chaw hui uˉ peunˍ chehˇ ve awˬ yanˇ awˬ hkʼaw lo, Sanˍsonˍ lehˬ Iˉsaˍreˍlaˆ chaw hui hta‸ nyiˇ chi hkʼaw‸ uˉ peunˍ ve yoˬ.

← Chapter 14 Jump to: Chapter 16 →