Judges 21

Lahu Bible Edited © Thailand Bible Society and Bible Society of Myanmar, 2010, 2020.

← Chapter 20 Jump to:

1Iˉsaˍreˍlaˆ chaw teˇ hpaˍ Miˆsaˍpaˍ lo kʼo‸-e leh, Ngaˬ hui lehˬ Beˍyaˍmenˍ chaw teˇ hpaˍ hta‸ ngaˬ hui ve yaˇ miˇ teˇ gʼaˇ ka‸ piˇ tuˬ ve maˇ heˆ, teh‸ Gʼuiˬsha mehˆ gʼuˇ suhˍ ka ti‸ te ve yoˬ.

2Yawˇ hui Beˍteˍlaˆ venˇ lo kʼai leh, mvuhˇ hpeu‸ la htaˇ hkʼa gaˬ, Gʼuiˬsha mehˆ gʼuˇ suhˍ mui taˍ ve yoˬ. Yawˇ hui dawˇ haˍ jaˇ leh, gʼaˇ hte‸ kuˬ hawˬ chehˇ ve yoˬ.

3Oˇ htaˇ yawˇ hui lehˬ, Gʼuiˬsha-oˬ, aˬ hto‸ ma pa taw chi hkʼe gʼa hpeh‸ ve le. Aˬ hto‸ ma pa taw, Iˉsaˍreˍlaˆ chaw teˇ hpaˍ awˬ hkʼaw lo Beˍyanˍmenˍ chaw teˇ ceuˬ mehˉ kʼai chehˇ ve le, teh‸ kʼoˆ ve yoˬ.

4Chaw oˇ ve teˇ hpaˍ shawˉ pawˍ mvuhˇ shawˉ teˇ na‸ tu la leh, oˇ kaˬ lo tuˉ tanˇ kuiˬ teˇ maˬ te ve yoˬ. Peuˬ hkʼaw‸ nawˉ, yawˇ hui tuˉ tanˇ tuˬ awˬ ceuˬ teˇ hpaˍ yuˬ laˬ leh Gʼuiˬsha hta‸ tuˉ tanˇ piˇ ve yoˬ.

5Oˇ htaˇ yawˇ hui lehˬ, Iˉsaˍreˍlaˆ chaw teˇ hpaˍ awˬ hkʼaw lo, choˬ kaˬ ngaˬ hui geh Gʼuiˬsha mehˆ gʼuˇ suhˍ maˇ ca hpawnˬ da‸ la ve chaw a shu cawˬ le, teh‸ kʼoˆ ve yoˬ. (Miˆsaˍpaˍ venˇ lo Gʼuiˬsha mehˆ gʼuˇ suhˍ maˇ gaˬ la ve chaw hkʼaˬ ve teˇ gʼaˇ hta‸ maˇ kʼoˆ, yawˇ hui tiˇ pehˍ tuˬ ka ti‸ te ve yoˬ.)

6Iˉsaˍreˍlaˆ chaw teˇ hpaˍ lehˬ, yawˇ hui ve awˬ viˉ awˬ nyi Beˍyaˍmenˍ chaw teˇ hpaˍ awˬ pon dawˇ haˍ jaˇ ve yoˬ. Hkʼe te leh yawˇ hui kʼoˆ ve, Ya‸ nyi Iˉsaˍreˍlaˆ chaw awˬ hkʼaw lo chaw teˇ ceuˬ mehˉ kʼai peuˬ.

7Cawˬ taˍ sheˍ ve Beˍyaˍmenˍ chaw hui awˬ pon, ngaˬ hui awˬ miˇ ma hkʼaˬ hkʼe te ca piˇ tuˬ ve le. Ngaˬ hui ve yaˇ miˇ teˇ gʼaˇ ka‸ yawˇ hui hta‸ maˇ heuˆ tcuh, teh‸ Gʼuiˬsha mehˆ gʼuˇ suhˍ ka ti‸ gʼa te taˍ peuˬ, teh‸ kʼoˆ ve yoˬ.

8Oˇ htaˇ yawˇ hui lehˬ, Iˉsaˍreˍlaˆ chaw awˬ hkʼaw lo, Gʼuiˬsha mehˆ gʼuˇ suhˍ Miˆsaˍpaˍ lo maˇ hpawnˬ gaˬ la ve a shu cawˬ le, teh‸ kʼoˆ ve yoˬ. Yawˇ hui gʼa‸ chaˬ nyi leh, Giˇlaˆ mvuhˇmiˬ hkʼaw chehˇ ve Yaˍbehˆ venˇ yaˇ teˇ gʼaˇ ka‸ oˇ kaˬ lo maˇ gaˬ la ve hta‸ yawˇ hui gʼa mawˬ ve yoˬ.

9Iˉsaˍreˍlaˆ chaw hkʼa peu-eˬ hta‸ kuˬ hpawnˬ nyi ve teˇ yanˇ, Yaˍbehˆ venˇ yaˇ teˇ gʼaˇ hta‸ ka‸ maˇ mawˬ.

10Hkʼe te leh, yawˇ hui ha‸ hanˉ jaˇ ve ma‸ yaˇ 12,000 gʼaˇ hta‸ tawˇ hkʼa deh‸ shanˍ piˇ leh Yaˍbehˆ venˇ lo kʼai tcuh ve yoˬ. Yawˇ hui kʼoˆ ve, Yaˍbehˆ venˇ lo kʼai leh, hawˉ hkʼaˆ, yaˇ miˇ, yaˇ ehˉ yaˇ nehˬ hkʼa peu-eˬ ve hta‸ tiˇ pehˍ piˇ-oˆ.

11Hawˉ hkʼaˆ hkʼa peu-eˬ leh, yaˇ miˇ haˉ maˇ heˆ ve yaˇ miˇ hkʼa peu-eˬ hta‸ tiˇ pehˍ piˇ-oˆ, teh‸ yawˇ hui hta‸ kʼoˆ piˇ ve yoˬ.

12Hkʼe te leh, yawˇ hui kʼai leh Yaˍbehˆ venˇ hkʼaw lo yaˇ miˇ haˉ 400 gʼaˇ hta‸ gʼa mawˬ ve yoˬ. Yawˇ hui lehˬ, yaˇ miˇ haˉ oˇ ve teˇ hpaˍ hta‸ Hkaˍnanˍ mvuhˇmiˬ hkʼaw cawˬ ve Shiˉlonˍ venˇ lo shiˍ laˬ ve yoˬ.

13Oˇ htaˇ Iˉsaˍreˍlaˆ chaw teˇ hpaˍ lehˬ, Riˇmonˍ teh‸ kʼoˆ ve haˉ hpawˇ hkʼaw va‸ chehˇ taˍ ve Beˍyaˍmenˍ chaw teˇ hpaˍ hta‸ tawˇ shanˍ feu leh, ma‸ bawˆ ve hta‸ jehˇ taˍ tuˬ kʼoˆ piˇ ve yoˬ.

14Hkʼe te leh Beˍyaˍmenˍ chaw teˇ hpaˍ kʼaw‸ ya‸ la ve yoˬ. Oˇ htaˇ Iˉsaˍreˍlaˆ chaw teˇ hpaˍ lehˬ, Yaˍbehˆ venˇ hkʼaw yawˇ hui ponˬ piˇ taˍ ve yaˇ miˇ haˉ oˇ ve teˇ hpaˍ, yawˇ hui hta‸ piˇ ve yoˬ. Ya‸ hkʼaˇ, yaˇ miˇ oˇ ve teˇ hpaˍ lehˬ yawˇ hui awˬ pon maˇ law‸ taˬ sheˍ.

15Gʼuiˬsha lehˬ, Iˉsaˍreˍlaˆ chaw hui hta‸ chi hkʼe hpaˆ da‸ kʼai piˇ lawˬ ve pa taw, Iˉsaˍreˍlaˆ chaw teˇ hpaˍ lehˬ Beˍyaˍmenˍ chaw hui awˬ pon dawˇ haˍ jaˇ ve yoˬ.

16Chi hta‸ pa taw, Iˉsaˍreˍlaˆ chaw awˬ hoˉawˬ naˬ teˇ hpaˍ kʼoˆ ve, Beˍyaˍmenˍ awˬ ceuˬ awˬ hkʼaˇ awˬ hkʼaw lo yaˇ miˇ teˇ gʼaˇ ka‸ maˇ cawˬ-o. Awˬ miˇ ma maˇ gʼa sheˍ ve awˬ nu ve Beˍyaˍmenˍ chaw teˇ hpaˍ hta‸, ngaˬ hui awˬ miˇ ma hkʼa hkʼe te ca piˇ tuˬ le.

17Iˉsaˍreˍlaˆ chaw teˇ chi nyiˇ ceuˬ awˬ hkʼaw lo, chaw teˇ ceuˬ ka‸ maˇ gʼa mehˉ kʼai piˇ. Beˍyaˍmenˍ chaw teˇ ceuˬ kʼaw‸ cawˬ la tuˬ, ngaˬ hui awˬ hkʼaˇ teˇ ceuˬ ceuˬ gʼa gu piˇ tuˬ yoˬ.

18Ya‸ hkʼaˇ, yawˇ hui hta‸ ngaˬ hui ve yaˇ miˇ piˇ maˇ hpeh‸. Awˬ lawn kʼo, Beˍyaˍmenˍ chaw hta‸ a shu yawˇ ve yaˇ miˇ piˇ ve chaw lehˬ, hkeu ve hta‸ gʼa hkanˍ tuˬ yoˬ, teh‸ kʼoˆ taˍ ve pa taw yoˬ.

19Oˇ htaˇ yawˇ hui lehˬ, Shiˉlonˍ venˇ hkʼaw teˇ hkʼaw‸ teˇ pawˆ bon pawehˇ te ve awˬ yanˇ gaˬ la paˇ neˇ ve yoˬ, teh‸ kʼoˆ ve yoˬ. (Shiˉlonˍ venˇ lehˬ, Beˍteˍlaˆ venˇ awˬ na hpawˇ leh, Leˍboˇnaˍ venˇ awˬ hawˉ hpawˇ lo cawˬ leh, Beˍteˍlaˆ leh Sheˍhkenˍ venˇ lo kʼai ve ya‸ kʼaw mvuhˇ nyi tawˆ hpawˇ lo cawˬ ve yoˬ.)

20Hkʼe te leh yawˇ hui Beˍyaˍmenˍ chaw hui hta‸ kʼoˆ piˇ ve, Nawˬ hui kʼai leh a pehˉ meuˇ hko hkʼaw ca va‸ taˍ-o‸.

21Pawehˇ te ve awˬ yanˇ gaˬ la leh, Shiˉlonˍ venˇ hkʼaw chehˇ ve yaˇ miˇ haˉ teˇ hpaˍ pawehˇ te tuˬ tawˆ la ve teˇ yanˇ, nawˬ hui nyiˉ yuˬ veu leh, nawˬ hui ve mvuhˇmiˬ lo kʼo‸-e loˬ.

22Yawˇ hui ve awˬ pa, maˇ heˆ kʼo, awˬ viˉ awˬ nyi teˇ hpaˍ nawˬ hui geh laˬ leh venˇbaˆ ca taˍ la ve kʼo, yawˇ hui hta‸ chi hkʼe kʼaw‸ kʼoˆ piˇ-oˆ. Nawˬ hui ve yaˇ miˇ ngaˬ hui hta‸ piˇ laˇ-oˆ. Awˬ lawn kʼo, yawˇ hui hta‸ ma‸ bawˆ kuiˬ hkʼaw lo ngaˬ hui hinˉ yuˬ taˍ ve maˇ heˆ. Nawˬ hui lehˬ yaˇ miˇ oˇ ve teˇ hpaˍ ngaˬ hui hta‸ piˇ laˇ taˍ ve maˇ heˆ ve pa taw, nawˬ hui te taˍ ve ka ti‸ hta‸ te luˬ ve maˇ heˆ, teh‸ kʼoˆ piˇ-oˆ, teh‸ yawˇ hui hta‸ kʼoˆ piˇ ve yoˬ.

23Beˍyaˍmenˍ chaw teˇ hpaˍ htawˇ yawˇ hui kʼoˆ ve hkʼe, pawehˇ te chehˇ ve yaˇ miˇ haˉ teˇ hpaˍ hta‸ hkʼawˇ yuˬ leh, yawˇ hui ve mvuhˇmiˬ lo kʼo‸-e ve yoˬ. Oˇ ve hkʼaw‸ nawˉ, yawˇ hui ve venˇ teˇ hpaˍ hta‸ kʼaw‸ gu te leh, oˇ kaˬ lo chehˇ taˍ ve yoˬ.

24Iˉsaˍreˍlaˆ chaw teˇ hpaˍ htawˇ, a shu yawˇ ve mvuhˇmiˬ, a shu yawˇ ve chaw ceuˬ, leh a shu yawˇ ve yehˬ lo kʼaw‸ kʼo‸-e ve yoˬ.

25Awˬ yanˇ oˇ ve awˬ hkʼaw lo, Iˉsaˍreˍlaˆ chaw lehˬ jawˇmawˇ maˇ cawˬ. Chaw teˇ gʼaˇ le le a shu yawˇ te gaˇ ve hkʼe te chehˇ ve yoˬ.

← Chapter 20 Jump to: