Judges 19

Lahu Bible Edited © Thailand Bible Society and Bible Society of Myanmar, 2010, 2020.

← Chapter 18 Jump to: Chapter 20 →

1Iˉsaˍreˍlaˆ chaw hui jawˇmawˇ maˇ cawˬ sheˍ htaˇ, Eˇhpaˍrenˍ mvuhˇmiˬ hkʼaw Leˍviˆ chaw teˇ gʼaˇ cawˬ ve yoˬ. Yawˇ lehˬ, Yuˇda‸ mvuhˇmiˬ Behˍlehˍhehnˍ venˇ lo kʼai leh awˬ miˇ ma i teˇ gʼaˇ ca heuˆ ve yoˬ.

2Ya‸ hkʼaˇ, yaˇ miˇ oˇ ve yawˇ hta‸ nyi ma zuhˆ leh yawˇ ve awˬ pa geh Behˍlehˍhehnˍ venˇ lo kʼaw‸ hpaw kʼo‸-e leh oˇ kaˬ lo ha pa awˇ maˬ chehˇ taˍ ve yoˬ.

3Chaw oˇ ve lehˬ, yawˇ ve awˬ miˇ ma i hta‸ ca kʼaw‸ beˬ hkʼaw‸ tuˬ, yawˇ ve awˬ ceˬ paˍ leh piˉ laˬ nyiˇ hkeh hta‸ shiˍ kʼai ve yoˬ. Yawˇ ve awˬ puˍ yawˇ hta‸ gʼa mawˬ htaˇ, yawˇ hta‸ ha lehˬ ha kʼa ha‸ yuˬ piˇ ve yoˬ.

4Yawˇ ve awˬ puˍ yawˇ hta‸ la‸ haˉ maˇ kʼo‸-e tuˬ lawˍ hkawˉ piˇ ve pa taw, yawˇ oˇ kaˬ lo shehˆ nyi chehˇ taˍ ve yoˬ.

5Awˇ nyi teˇ nyi gaˬ htaˇ, yawˇ hui teˇ na‸ tu leh kʼaw‸ kʼo‸-e tuˬ hkʼa deh‸ gu taˍ ve yoˬ. Ya‸ hkʼaˇ, yawˇ ve awˬ puˍ lehˬ, caˇ tuˬ hkʼa deh‸ caˇ leh awˬ gʼaˇ cawˬ la htaˇ heh‸ kʼo‸-e tuˬ kʼoˆ piˇ ve yoˬ.

6Hkʼe te leh yawˇ hui hti caˇ hti dawˬ chehˇ ve yoˬ. Oˇ ve hkʼaw‸ nawˉ yawˇ ve awˬ puˍ lehˬ, Ya‸ puiˉ ka‸ choˬ kaˬ lo haˉ leh, ha lehˬ ha kʼa te chehˇ-oˆ, teh‸ yawˇ hta‸ kʼaw‸ kʼoˆ piˇ ve yoˬ.

7Chaw oˇ ve lehˬ, kʼo‸-e gaˇ ve htawˇ yawˇ ve awˬ puˍ hkawˇ leuˉ maˇ gʼa leh, oˇ ve teˇ haˉ oˇ kaˬ lo kʼaw‸ haˉ ve yoˬ.

8Ngaˇ nyi teˇ nyi yawˇ hui mvuhˇ shawˉ teˇ na‸ tu leh kʼo‸-e tuˬ gu chehˇ ve teˇ yanˇ, yawˇ ve awˬ puˍ lehˬ, Caˇ tuˬ hkʼa deh‸ caˇ sheˍ. Mvuhˇ hpeu‸ hpawˇ heh‸ kʼo‸-e loˬ, teh‸ yawˇ ve awˬ maˉ paˍ hta‸ kʼoˆ piˇ ve yoˬ. Hkʼe te leh yawˇ hui kʼaw‸ jehˇ taˍ ve yoˬ.

9Chaw oˇ ve lehˬ, yawˇ ve awˬ miˇ ma leh yawˇ ve awˬ ceˬ hta‸ shiˍ leh tu kʼo‸-e tu gu chehˇ ve teˇ yanˇ, yawˇ ve awˬ puˍ lehˬ, Nyi sheˍ. Mvuhˇ hpeu‸ la paˇ neˇ ve yoˬ. Ya‸ puiˉ ka‸ choˬ kaˬ lo haˉ cawˇ sheˍ ve yoˬ. Choˬ ka‸ lo chehˇ taˍ leh ha lehˬ ha kʼa te chehˇ-oˆ. Shawˉ pawˍ kʼo, nawˬ hui teˇ na‸ tu kʼo‸-e hpeh‸ ve yoˬ, teh‸ yawˇ hta‸ kʼoˆ piˇ ve yoˬ.

10Ya‸ hkʼaˇ chaw oˇ ve lehˬ, oˇ kaˬ lo maˇ haˉ chehˇ gaˇ ve pa taw, yawˇ ve awˬ miˇ ma hta‸ shiˍ veu leh kʼo‸-e ve yoˬ. Yawˇ lehˬ awˬ an hkʼa deh‸ tcuhˉ taˍ ve piˉ laˬ nyiˇ hkeh cawˬ ve yoˬ. Yawˇ hui kʼo‸-e leh Yeˍbuˆ teh‸ kʼoˆ ve Yeˍruˆsaˍlehnˍ venˇ paˇ lo gaˬ la ve yoˬ.

11Yawˇ hui oˇ kaˬ lo gaˬ ve teˇ yanˇ, mvuhˇ hpeu‸ la paˇ neˇ ve yoˬ. Oˇ htaˇ yawˇ ve awˬ ceˬ paˍ lehˬ, Ngaˬ hui ya‸ puiˉ choˬ kaˬ Yeˍbuˇsiˆ chaw hui ve venˇ hkʼaw ca haˉ taˉ-a veuˬ, teh‸ yawˇ hta‸ kʼoˆ piˇ ve yoˬ.

12Ya‸ hkʼaˇ yawˇ kʼoˆ ve, Iˉsaˍreˍlaˆ chaw hui ve venˇ hkʼaw maˇ heˆ kʼo, ngaˬ hui ca haˉ maˇ hpeh‸.

13Ngaˬ hui awˬ gʼuˇ suhˍ a ciˉ kʼaw‸ kʼai leh, Giˇbaˍ maˇ heˆ kʼo, Raˍmaˆ venˇ hkʼaw ca haˉ tuˬ yoˬ, teh‸ yawˇ hta‸ kʼaw yaw hkʼaw‸ piˇ ve yoˬ.

14Hkʼe te leh yawˇ hui Yeˍbuˆ venˇ hta‸ hpanˍ kʼai ve yoˬ. Yawˇ hui Beˍyaˍmenˍ chaw hui ve mvuhˇmiˬ Giˇbaˍ venˇ hkʼaw gaˬ htaˇ, mvuhˇ nyi lo‸-e peuˬ.

15Oˇ htaˇ yawˇ hui venˇ oˇ ve hkʼaw ca haˉ tuˬ venˇ hkʼaw lo‸-e ve yoˬ. Ya‸ hkʼaˇ, chaw teˇ gʼaˇ ka‸ yawˇ hta‸ maˇ ha‸ yuˬ piˇ ve pa taw, venˇ kʼaw ji lo mui taˍ ve yoˬ.

16Oˇ htaˇ heh hkʼaw kanˉ ca te kʼaw‸ la ve lawˇ puˍ teˇ gʼaˇ hta‸ yawˇ hui gʼa mawˬ ve yoˬ. Yawˇ lehˬ ponˬ laˬ htaˇ Eˇhpaˍrenˍ mvuhˇmiˬ hkʼaw chehˇ jaw ve chaw hpeh‸ ve yoˬ. Ya‸ hkʼaˇ, chi beu‸ yawˇ Giˇbaˍ venˇ hkʼaw chehˇ taˍ ve yoˬ. (Venˇ yaˇ oˇ ve teˇ hpaˍ lehˬ, Beˍyaˍmenˍ awˬ ceuˬ awˬ hkʼaˇ teˇ hpaˍ hpeh‸ ve yoˬ.)

17Lawˇ puˍ oˇ ve lehˬ, venˇ hkʼaw mui chehˇ ve chaw oˇ ve teˇ hpaˍ hta‸ gʼa mawˬ ve teˇ yanˇ, Nawˬ hui hkʼaˬ lo laˬ leh, hkʼaˬ lo kʼai toˇ ve le, teh‸ yawˇ hui hta‸ na nyi ve yoˬ.

18Oˇ htaˇ Leˍviˆ chaw oˇ ve kʼaw‸ yaw hkʼaw‸ leh kʼoˆ ve, Ngaˬ hui lehˬ Yuˇda‸ mvuhˇmiˬ Behˍlehˍhehnˍ venˇ hkʼaw tu leh, ngaˬ hui ve chehˇ kuiˬ Eˇhpaˍrenˍ mvuhˇmiˬ lo kʼo‸-e toˇ ve yoˬ. Chaw teˇ gʼaˇ ka‸ ngaˬ hui hta‸ maˇ ha‸ yuˬ laˇ.

19Ngaˬ awˬ to, ngaˬ miˇ ma, leh ngaˬ ve awˬ ceˬ paˍ awˬ pon hkaoˍmonˇ leh a pehˉ meuˇ gʼuiˬ hkʼa law‸ cawˬ taˍ ve yoˬ, teh‸ yawˇ hta‸ kʼoˆ piˇ ve yoˬ.

20Oˇ htaˇ lawˇ puˍ oˇ ve lehˬ, Nawˬ hui ngaˬ ve yehˬ hkʼaw lo ca haˉ la hpeh‸ ve yoˬ. Ngaˬ nawˬ hui hta‸ ha‸ shaˉ laˇ tuˬ yoˬ. Choˬ kaˬ venˇ kʼaw ji lo haˉ chehˇ tuˬ maˇ loˍ, teh‸ yawˇ hui hta‸ kʼoˆpiˇ ve yoˬ.

21Hkʼe te leh, yawˇ lehˬ chaw oˇ ve teˇ hpaˍ hta‸ shiˍ kʼai leh, yawˇ hui ve piˉ laˬ teˇ hpaˍ hta‸ caˇ tuˬ caˍ piˇ ve yoˬ. Chaw oˇ ve teˇ hpaˍ lehˬ, a shu yawˇ ve hkui sheh tsuhˇ taˉ leh aˉ hkʼaw lo‸-e ve yoˬ.

22Yawˇ hui ha lehˬ ha kʼa caˇ chehˇ dawˬ chehˇ ve teˇ yanˇ, venˇ hkʼaw chehˇ taˍ ve chaw haiˬ teˇ hpaˍ yehˬ hta‸ caw hoˆ taˍ leh, yehˬ miˉ hta‸ hpoˆ dawˆ chehˇ ve yoˬ. Yawˇ hui yehˬ shehˍ hpaˇ hta‸ kuˬ leh, Nawˬ geh chehˇ taˍ ve chaw hta‸ ngaˬ hui awˬ chawˇ gʼa te da‸ tuˬ, chaw oˇ ve hta‸ shiˍ tawˆ laˇ-oˆ, teh‸ kʼoˆ ve yoˬ.

23Ya‸ hkʼaˇ lawˇ puˍ oˇ ve yehˬ awˬ baˬ lo tawˆ-e leh, Ngaˬ ve awˬ chawˇ teˇ hpaˍ-oˬ, chi hkʼe cha‸ chiˆ ve kanˉ hta‸ a ciˉ taˇ te laˇ-oˆ. Chaw chi ve lehˬ ngaˬ ve hkehˉ chaw hpeh‸ ve yoˬ.

24Nyi loˬ. Choˬ kaˬ lo yawˇ ve awˬ miˇ ma i leh, ngaˬ ve yaˇ miˇ chehˇ taˍ ve yoˬ. Ngaˬ yawˇ huiˉ maˬ hta‸ shiˍ tawˆ laˇ tuˬ yoˬ. Nawˬ hui te gaˇ ve hkʼe, yawˇ huiˉ maˬ hta‸ te piˇ-oˆ, teh‸ yawˇ hui hta‸ kʼoˆ piˇ ve yoˬ. Ya‸ hkʼaˇ, cha‸ chiˆ ve kanˉ chi hkʼe ve chaw chi hpaˇ hta‸ a ciˉ taˇ te piˇ-oˆ, teh‸ yawˇ hui hta‸ kʼoˆ piˇ ve yoˬ.

25Ya‸ hkʼaˇ, chaw oˇ ve teˇ hpaˍ lehˬ yawˇ kʼoˆ ve tawˇ hta‸ maˇ na yuˬ. Hkʼe te leh Leˍviˆ chaw oˇ ve lehˬ, yawˇ ve awˬ miˇ ma i hta‸ awˬ baˬ hpawˇ lo yawˇ hui geh yuˬ tawˆ piˇ ve yoˬ. Yawˇ hui lehˬ yaˇ miˇ oˇ ve hta‸ mvuhˇ htiˇ la htaˇ hkʼa gaˬ hkʼa mvuhˇ hkʼa na te piˇ ve yoˬ.

26Mvuhˇ htiˇ la ve teˇ yanˇ, yaˇ miˇ oˇ ve lehˬ yawˇ awˬ hpawˇ chehˇ taˍ kuiˬ lo kʼo‸-e leh, yehˬmiˉhpe‸ lo zuh‸ taˍ ve yoˬ.

27Mvuhˇ htiˇ la leh yawˇ ve awˬ hpawˇ lehˬ kʼo‸-e tuˬ yehˬ miˉ hkʼaw tawˆ la ve teˇ yanˇ, yawˇ ve awˬ miˇ ma lehˬ yehˬmiˉhpe‸ lo zuh‸ taˍ laˇ ve hta‸ gʼa mawˬ ve yoˬ.

28Oˇ htaˇ yawˇ lehˬ, Tu-o. Ngaˬ hui kʼo‸-e veuˬ, teh‸ yawˇ hta‸ kʼoˆ piˇ ve yoˬ. Ya‸ hkʼaˇ, yaˇ miˇ oˇ ve te‸ chiˉ kʼaw‸ yaw hkʼaw‸ maˇ puiˉ-o. Hkʼe te leh, yawˇ lehˬ yaˇ miˇ oˇ ve hta‸ piˉ laˬ hkʼoˆ teh leh yawˇ ve yehˬ lo kʼaw‸ la ve yoˬ.

29Yawˇ aˉ hkʼaw lo kʼaw‸ gaˬ la ve teˇ yanˇ, aˉhtaw yuˬ leh yawˇ ve awˬ miˇ ma hta‸ teˇ chi nyiˇ tawn te tawˆ cheˆ peuˬ hkʼaw‸ nawˉ, Iˉsaˍreˍlaˆ chaw hui ve mvuhˇmiˬ hkʼaˬ ti chi ti lo feu piˇ ve yoˬ.

30Oˇ ve hta‸ hkʼa gʼa mawˬ ve chaw hkʼa peu-eˬ, Ngaˬ hui chi hkʼe ve awˬ ceuˬ hta‸ teˇ pawˆ ka‸ maˇ mawˬ jaw. Iˉsaˍreˍlaˆ chaw hui Eˇjiˇtu‸ mvuhˇmiˬ hkʼaw tawˆ la ve teˇ nyi hta‸ te leh ya‸ nyi hkʼa gaˬ, chi hkʼe teˇ pawˆ ka‸ maˇ hpeh‸ la jaw. Ngaˬ hui hkʼaˬ hkʼe gʼa te tuˬ le. Teˇ geh hpoˆ dawˇ nyi-o, teh‸ kʼoˆ ve yoˬ.

← Chapter 18 Jump to: Chapter 20 →