Nehemiah 1

Lahu Bible Edited © Thailand Bible Society and Bible Society of Myanmar, 2010, 2020.

Jump to: Chapter 2 →

1Chi ve lehˬ, Haˍhkaˍliˆ ve yaˇ Neˍhaˍmiˆ awˬ lawn hpeh‸ ve yoˬ. Aˍtaˍyeˍziˆ jawˇmawˇ te ve 20 hkʼaw‸ biˇ ve teˇ hkʼaw‸, Kiˇsaˍliˆ ha pa htaˇ ngaˬ lehˬ Suˇsanˍ venˇ lonˉ hkʼaw chehˇ taˍ ve yoˬ.

2Ngaˬ ve awˬ nyi paˍ Haˍnanˍ lehˬ, awˬ nu ve Yuˇda‸ chaw hui geh teˇ geh Yuˇda‸ mvuhˇmiˬ hkʼaw tawˆ la leh, ngaˬ geh gaˬ la ve yoˬ. Hkʼe te leh ngaˬ lehˬ, Yeˍruˆsaˍlehnˍ venˇ awˬ lawn leh, Baˍbuˍlonˍ mvuhˇmiˬ hkʼaw ca chehˇ taˉ leh kʼaw‸ la ve Yuˇda‸ chaw teˇ hpaˍ awˬ lawn yawˇ hui hta‸ na nyi ve yoˬ.

3Chaw oˇ ve teˇ hpaˍ lehˬ hpeh‸ haˍ jaˇ chehˇ leh, awˬ nu ve chaw ceuˬ teˇ hpaˍ yawˇ hui hta‸ taˍ nehˬ piˇ chehˇ ve awˬ lawn maˇ kʼoˆ, Yeˍruˆsaˍlehnˍ lanˇ venˇ paˆ kʼai peuˬ leh, venˇ taˍ meu‸ hpe‸ teˇ hpaˍ htawˇ luˬ kʼai peuˬ ve awˬ lawn maˇ kʼoˆ, yawˇ hui ngaˬ hta‸ hto laˇ ve yoˬ.

4Awˬ lawn chi teˇ hpaˍ hta‸ ngaˬ gʼa kaˇ ve pa taw, ngaˬ gʼaˇ hte‸ hawˬ ve yoˬ. Awˬ yanˇ maw chaweh ngaˬ caˇ tuˬ maˇ caˇ leh, dawˇ haˍ ve awˬ hkʼaw lo Gʼuiˬsha geh bon chi hkʼe lawˬ ve yoˬ.

5Mvuhˇ naw ma Gʼuiˬsha-oˬ, Nawˬ lehˬ uiˍ jaˇ mvuh jaˇ ve Gʼuiˬsha hpeh‸ ve pa taw, ngaˬ hui nawˬ hta‸ kawˆ leh nawˬ mehˆ gʼuˇ suhˍ huˉ taˍ ve yoˬ. Nawˬ lehˬ ka ti‸ yeˬ jaˇ ve pa taw, nawˬ hta‸ ha‸ ve chaw leh nawˬ ve tawˇ hkawˇ hta‸ na yuˬ ve chaw hui hta‸ nawˬ te piˇ taˍ ve ka ti‸ hta‸ nawˬ maˇ te luˬ.

6Gʼuiˬsha-oˬ, ngaˬ hta‸ a ciˉ nyi laˇ leh, nawˬ ve awˬ ceˬ Iˉsaˍreˍlaˆ chaw hui awˬ pon tanˇ hkuinˇ tanˇ vanˇ ngaˬ lawˬ hkawˉ chehˇ ve bon lawˬ hkawˇ hta‸ a ciˉ na yuˬ laˇ-oˆ. Ngaˬ hui lehˬ venˇbaˆ te peuˬ. Ngaˬ ve awˬ puˍ awˬ pi teˇ hpaˍ leh, ngaˬ awˬ to htawˇ venˇbaˆ te peuˬ.

7Ngaˬ hui nawˬ hta‸ te ya‸ jaˇ peuˬ leh, nawˬ kʼoˆ taˍ ve hkʼe ngaˬ hui maˇ te. Nawˬ ve awˬ ceˬ paˍ Moˉseˍ hta‸ cuˇ leh, nawˬ ngaˬ hui hta‸ piˇ laˇ taˍ ve awˬliˇtawˇhkawˇ teˇ hpaˍ hta‸ ngaˬ hui maˇ na yuˬ.

8Nawˬ Moˉseˍ hta‸ kʼoˆ piˇ taˍ peuˬ ve tawˇ chi teˇ hpaˍ hta‸ a ciˉ kʼaw‸ dawˇ nawˇ-oˆ. Nawˬ hui Iˉsaˍreˍlaˆ chaw teˇ hpaˍ lehˬ, ngaˬ hta‸ ka ti‸ maˇ yeˬ ve kʼo, ngaˬ nawˬ hui hta‸ shu ve mvuhˇmiˬ lo hpaˆ da‸ guiˇ da‸ kʼai piˇ lawˬ tuˬ yoˬ.

9Ya‸ hkʼaˇ, nawˬ hui ngaˬ geh kʼaw‸ hpfuhˆ kʼaw‸ la leh, ngaˬ kʼoˆ taˍ ve hkʼe te ve kʼo, nawˬ hui hkʼaˬ hpawˇ chi hpawˇ lo hpaˆ da‸ kʼai taˍ ve htawˇ, ngaˬ nawˬ hui hta‸ Yeˍruˆsaˍlehnˍ venˇ lo kʼaw‸ shiˍ hkʼaw‸ veu laˇ tuˬ yoˬ. Chehˇ kuiˬ oˇ ve lehˬ, ngaˬ hta‸ oˉ kʼoˍ pui tuˬ ngaˬ leuˆ yuˬ taˍ ve chehˇ kuiˬ hpeh‸ ve yoˬ, teh‸ nawˬ kʼoˆ taˍ peuˬ ve yoˬ.

10Gʼuiˬsha-oˬ, chaw chi teˇ hpaˍ lehˬ, nawˬ ve chaw ceuˬ hpeh‸ leh, nawˬ ve awˬ ceˬ hpeh‸ ve yoˬ. Nawˬ ve kanˇ paˆ leh nawˬ ve awˬ gʼaˇ awˬ shaˉ hta‸ cuˇ ve awˬ hkʼaw lo, nawˬ yawˇ hui hta‸ htaiˍ hkʼaw‸ piˇ taˍ ve yoˬ.

11Ngaˬ ve bon lawˬ hkawˇ leh, nawˬ hta‸ yawˆ yan chehˇ ve nawˬ ve awˬ ceˬ teˇ hpaˍ ve bon lawˬ hkawˇ hta‸ a ciˉ na yuˬ laˇ-oˆ. Ya‸ nyi ngaˬ hta‸ ga laˇ leh, jawˇmawˇ ngaˬ hta‸ ha kʼaˉ ve nyi ma cawˬ la tuˬ a ciˉ te piˇ-oˆ, teh‸ kʼoˆ leh bon lawˬ ve yoˬ.

Jump to: Chapter 2 →