Nehemiah 3

Lahu Bible Edited © Thailand Bible Society and Bible Society of Myanmar, 2010, 2020.

← Chapter 2 Jump to: Chapter 4 →

1Lanˇ venˇ hta‸ kʼaw‸ gu kawˍ ve awˬ hkʼaˇ lehˬ chi hkʼe yoˬ. Paw hkuˇ lonˉ Eˇlaˍsheˆ lehˬ, awˬ nu ve paw hkuˇ teˇ hpaˍ hta‸ shiˍ leh, Yawˬ taˍ meu‸ hpe‸ hta‸ kʼaw‸ gu te peuˬ hkʼaw‸ nawˉ, Gʼuiˬsha hta‸ chiˇ a‸ piˇ ve yoˬ. Yawˇ hui lehˬ lanˇ venˇ hta‸ htawˇ, Haˍnaˍneˍ ta‸ yehˬ lo hkʼa gaˬ gu kawˍ ve yoˬ.

2Awˬ nu ve teˇ tawn hta‸ Yeˍriˆhkoˇ venˇ yaˇ teˇ hpaˍ kʼaw‸ caˉ leh gu kawˍ ve yoˬ. Awˬ nu ve teˇ tawn hta‸ Iˉmaˍriˍ ve yaˇ Zaˍkuˇraˆ kʼaw‸ caˉ leh kawˍ ve yoˬ.

3Haˍseˍnaˍ ve awˬ ceuˬ awˬ hkʼaˇ teˇ hpaˍ, Ngaˇ taˍ meu‸ hpe‸ hta‸ kʼaw‸ gu te ve yoˬ. Yawˇ hui lehˬ, yehˬ miˉ awˬ suhˉ kʼaw‸ te keu leh, yehˬ miˉ hoˆ tuˬ suhˆ baˉ teˇ hpaˍ te ve yoˬ.

4Haˍkoˆ ve awˬ hawehˍ Uˇriˇya‸ ve yaˇ Meˍraˍmoˆ lehˬ, awˬ nu ve lanˇ venˇ teˇ tawn hta‸ kʼaw‸ caˉ leh kawˍ ve yoˬ. Meˍsaˍbeˍlaˆ ve awˬ hawehˍ, Beˍraˍhkiˆ ve yaˇ Meˍshuˆlanˍ lehˬ, awˬ nu ve lanˇ venˇ teˇ tawn hta‸ kʼaw‸ caˉ leh kawˍ ve yoˬ. Awˬ nu ve teˇ tawn hta‸ Baˍnaˍ ve yaˇ Zaˍdoˆ kʼaw‸ caˉ leh kawˍ ve yoˬ.

5Teˍkawˇ venˇ yaˇ teˇ hpaˍ lehˬ, awˬ nu ve lanˇ venˇ teˇ tawn hta‸ kawˍ ve yoˬ. (Ya‸ hkʼaˇ, venˇ oˇ ve awˬ hoˉ awˬ naˬ teˇ hpaˍ lehˬ, shu geh lanˇ venˇ hta‸ maˇ gʼa ga kawˍ piˇ.)

6Taˍ meu‸ hpe‸ awˬ piˍ teˇ maˬ hta‸ Paˍseˍ ve yaˇ Yawˇyaˍdaˆ leh, Beˍtawˇdeˍyaˆ ve yaˇ Meˍshuˆlanˍ hui kʼaw‸ gu te ve yoˬ. Yawˇ hui lehˬ yehˬ miˉ awˬ suhˉ kʼaw‸ te keu leh, yehˬ miˉ hoˆ tuˬ suhˆ baˉ teˇ hpaˍ te ve yoˬ.

7Awˬ nu ve teˇ tawn hta‸ Giˇbonˍ venˇ yaˇ Meˍlaˍtiˆ, Meˍrawˇnoˆ venˇ yaˇ Yaˍdonˍ leh, Giˇbonˍ leh Miˆsaˍpaˍ venˇ yaˇ teˇ hpaˍ kʼaw‸ caˉ leh kawˍ ve yoˬ. Yawˇ hui lehˬ Uˉhpaˍraˆ iˉ kaˆ lawˬ mvuhˇ nyi kʼehˬ hpawˇ teˇ tawn hta‸ uˉ peunˍ chehˇ ve jawˇmawˇ ve yehˬ lo hkʼa gaˬ kawˍ ve yoˬ.

8Awˬ nu ve teˇ tawn hta‸ shi lawˍ paˍ Haˍhaˍyaˆ ve yaˇ Awˇzeˍlaˆ kʼaw‸ caˉ leh kawˍ ve yoˬ. Awˬ nu ve teˇ tawn hta‸ naˍ manˇ hawnˉ te paˍ Haˍnanˍ lehˬ, kʼehˬ ve gʼo‸ pa teh‸ kʼoˆ ve chehˇ kuiˬ lo hkʼa gaˬ kawˍ ve yoˬ.

9Yeˍruˆsaˍlehnˍ venˇ teˇ hkoˇ hta‸ uˉ peunˍ chehˇ ve Huˉraˆ ve yaˇ Yeˍhpaˍyaˆ lehˬ, awˬ nu ve lanˇ venˇ teˇ tawn hta‸ gu kawˍ ve yoˬ.

10Awˬ nu ve teˇ tawn hta‸ Haˍruˆmaˆ ve yaˇ Yeˍdaˍyaˆ kʼaw‸ caˉ leh kawˍ ve yoˬ. Oˇ ve teˇ tawn lehˬ, yawˇ ve yehˬ paˇ lo cawˬ ve yoˬ. Awˬ nu ve teˇ tawn hta‸ Haˍsaˍbaˍniˆ ve yaˇ Haˍkoˆ kʼaw‸ caˉ kawˍ ve yoˬ.

11Haˍrenˍ ve yaˇ Maˍlaˍhkiˇyaˆ leh, Paˍhaˆmawˇbaˆ ve yaˇ Haˍshoˆ hui lehˬ, awˬ nu ve teˇ tawn hta‸ kawˍ leh, Aˬ miˍ tcuh kuiˬ ta‸ yehˬ hta‸ htawˇ kʼaw‸ gu kawˍ ve yoˬ.

12Awˬ nu ve Yeˍruˆsaˍlehnˍ venˇ teˇ hkoˇ hta‸ uˉ peunˍ chehˇ ve Haˍlawˇhehˆ ve yaˇ Shaˍlonˍ lehˬ, lanˇ venˇ awˬ nu ve teˇ tawn hta‸ gu kawˍ ve yoˬ. Yawˇ ve yaˇ miˇ htawˇ gʼa ga piˇ ve yoˬ.

13Haˍnunˍ leh Zaˍnaˍ venˇ yaˇ teˇ hpaˍ lehˬ, Lawˬ hkʼo‸ taˍ meu‸ hpe‸ hta‸ kʼaw‸ gu te ve yoˬ. Yawˇ hui lehˬ, yehˬ miˉ awˬ suhˉ kʼaw‸ te keu ve yoˬ. Oˇ ve hkʼaw‸ nawˉ, yawˇ hui lehˬ lanˇ venˇ hta‸ htawˇ, Cha‸ chiˆ ve taˍ meu‸ hpe‸ lo hkʼa gaˬ, teˇ hinˉ shaw‸ kʼaw‸ gu kawˍ ve yoˬ.

14Beˍtaˍkaˍrenˍ venˇ hta‸ uˉ peunˍ chehˇ ve Reˍhkaˆ ve yaˇ Maˍlaˍhkiˇyaˆ lehˬ, Cha‸ chiˆ ve taˍ meu‸ hpe‸ hta‸ hta‸ kʼaw‸ gu te ve yoˬ. Yawˇ lehˬ, yehˬ miˉ awˬ suhˉ kʼaw‸ te keu ve yoˬ.

15Miˆsaˍpaˍ venˇ hta‸ uˉ peunˍ chehˇ ve Kawˇlaˆhawˇzaˆ ve yaˇ Shaˍlunˍ lehˬ, Iˉ kaˆ gʼuiˬ tuˇ taˍ meu‸ hpe‸ hta‸ kʼaw‸ gu te leh, yehˬ miˉ awˬ suhˉ kʼaw‸ te keu ve yoˬ. Peuˬ hkʼaw‸ nawˉ, yawˇ lehˬ jawˇmawˇ ve hko lonˉ awˬ paˇ lo cawˬ ve Siˉlonˍ gʼuiˬ po hta‸ te leh, Daˍviˆ ve venˇ lo ya‸ la ve go hkʼeh‸ leh kuiˬ lo hkʼa gaˬ, lanˇ venˇ kʼaw‸ gu kawˍ ve yoˬ.

16Awˬ gʼuˇ suhˍ teˇ tawn hta‸ Behˆzuˇraˆ venˇ teˇ hkoˇ hta‸ uˉ peunˍ chehˇ ve Aˍzaˍboˆ ve yaˇ Neˍhaˍmiˆ lehˬ, Daˍviˆ ve tuˍ hpfuh, iˉ kaˆ gʼuiˬ po, leh ma‸ yaˇ hui ve yehˬ lo hkʼa gaˬ, lanˇ venˇ kʼaw‸ gu kawˍ ve yoˬ.

17Leˍviˆ chaw teˇ hpaˍ htawˇ, lanˇ venˇ hta‸ gʼa ga kawˍ piˇ ve yoˬ. Baˍniˆ ve yaˇ Reˍhonˍ lehˬ, awˬ nu ve lanˇ venˇ teˇ tawn hta‸ kʼaw‸ gu kawˍ ve yoˬ. Awˬ gʼuˇ suhˍ lo cawˬ taˍ ve teˇ tawn hta‸ Kiˇlaˆ venˇ teˇ hkoˇ hta‸ uˉ peunˍ chehˇ ve Haˍsaˍbiˆ kʼaw‸ gu kawˍ ve yoˬ.

18Awˬ gʼuˇ suhˍ ve teˇ tawn hta‸, awˬ nu ve Kiˇlaˆ venˇ teˇ hkoˇ hta‸ uˉ peunˍ chehˇ ve Heˍnaˍdaˆ ve yaˇ Baˍveˍ kʼaw‸ gu kawˍ ve yoˬ.

19Awˇ gʼuˇ suhˍ lo cawˬ taˍ sheˍ ve teˇ tawn hta‸, Miˆsaˍpaˍ venˇ hta‸ uˉ peunˍ chehˇ ve Yawˇsuˆ ve yaˇ Eˇzaˍ lehˬ, la‸ caˉ teh kuiˬ yehˬ gʼuˇ suhˍ lo te leh, lanˇ venˇ awˬ ceˍ kʼaweh‸ lo hkʼa gaˬ kʼaw‸ gu kawˍ ve yoˬ.

20Zaˍbiˆ ve yaˇ Baˍruˆ lehˬ, paw hkuˇ lonˉ Eˇlaˍsheˆ ve yehˬ gʼuˇ suhˍ lo hkʼa gaˬ, lanˇ venˇ hta‸ kʼaw‸ gu kawˍ ve yoˬ.

21Haˍkoˆ ve awˬ hawehˍ, Uˇriˆyaˆ ve yaˇ Meˍraˍmoˆ lehˬ, paw hkuˇ lonˉ Eˇlaˍsheˆ ve yehˬ hkʼaw‸ nawˉ lo hkʼa gaˬ, lanˇ venˇ hta‸ kʼaw‸ gu kawˍ ve yoˬ.

22Paw hkuˇ teˇ hpaˍ htawˇ, lanˇ venˇ hta‸ gʼa ga gu kawˍ piˇ ve yoˬ. Yeˍruˆsaˍlehnˍ venˇ awˬ jaˇ awˬ ji lo chehˇ taˍ ve paw hkuˇ teˇ hpaˍ lehˬ, awˬ nu ve lanˇ venˇ teˇ tawn hta‸ kʼaw‸ gu kawˍ ve yoˬ.

23Awˬ gʼuˇ suhˍ lo cawˬ taˍ sheˍ ve teˇ tawn hta‸, Beˍyaˍmenˍ leh Haˍshoˆ lehˬ, a shu yawˇ yehˬ gʼuˇ suhˍ lo cawˬ ve lanˇ venˇ hta‸ kʼaw‸ gu kawˍ ve yoˬ. Aˍnaˍniˆ ve awˬ hawehˍ, Maˍseˍyaˆ ve yaˇ Aˍzaˍriˆ lehˬ, yawˇ ve yehˬ gʼuˇ suhˍ lo cawˬ ve lanˇ venˇ hta‸ kʼaw‸ gu kawˍ ve yoˬ.

24Beˍnaˍdaˆ ve yaˇ Beˍniˍ lehˬ, Aˍzaˍriˆ ve yehˬ hta‸ te leh lanˇ venˇ awˬ ceˍ kʼaweh‸ lo hkʼa gaˬ kʼaw‸ gu kawˍ ve yoˬ.

25Uˇzehˆ ve yaˇ Paˍlaˍlaˆ lehˬ, lanˇ venˇ awˬ ceˍ kʼaweh‸ hta‸ te leh htawnˍ yehˬ awˬ paˇ lo cawˬ ve lanˇ venˇ hta‸ kʼaw‸ gu kawˍ ve yoˬ.

26Paˍroˆ ve yaˇ Peˍdaˍyaˆ lehˬ, bon yehˬ paˇ lo te taˍ ve ta‸ yehˬ lo hkʼa gaˬ, lanˇ venˇ hta‸ kʼaw‸ gu kawˍ ve yoˬ. (Chi teˇ tawn lehˬ, bon yehˬ hkʼaw kanˉ te chehˇ ve chaw hui chehˇ kuiˬ, Awˇhpeˍlaˆ teh‸ kʼoˆ ve chehˇ kuiˬ lo cawˬ ve yoˬ.)

27Teˍkawˇ venˇ yaˇ nyiˇ moˍ teˇ moˍ lehˬ, bon yehˬ paˇ lo te taˍ ve ta‸ yehˬ hta‸ te leh, Awˇhpeˍlaˆ teh‸ kʼoˆ ve chehˇ kuiˬ lo hkʼa gaˬ, lanˇ venˇ kʼaw‸ gu kawˍ ve yoˬ.

28Paw hkuˇ teˇ moˍ lehˬ, oˇ kaˬ lo kʼaw‸ te leh awˬ na hpawˇ lo cawˬ ve Iˉ mvuhˇ taˍ meu‸ hpe‸ lo hkʼa gaˬ, a shu yawˇ ve yehˬ paˇ lo cawˬ ve lanˇ venˇ hta‸ gu kawˍ ve yoˬ.

29Iˉmeˍraˆ ve yaˇ Zaˍdoˆ lehˬ, yawˇ ve yehˬ gʼuˇ suhˍ lo cawˬ ve lanˇ venˇ hta‸ kʼaw‸ gu kawˍ ve yoˬ. Mvuhˇ nyi tawˆ taˍ meu‸ hpe‸ hta‸ ha‸ shaˉ shehˍ hpaˇ Sheˍkaˍniˆ ve yaˇ Sheˍmaˍyaˆ lehˬ, awˬ gʼuˇ suhˍ teˇ tawn lo cawˬ ve lanˇ venˇ hta‸ kʼaw‸ gu kawˍ ve yoˬ.

30Sheˍlaˍmiˆ ve yaˇ Haˍnaˍniˆ leh, Zaˍlaˆ ve yaˇ hkaw‸ gʼaˇ teˇ gʼaˇ hpeh‸ ve Haˍnonˍ lehˬ, awˬ nu ve lanˇ venˇ teˇ tawn hta‸ teˇ pawˆ kʼaw‸ gu kawˍ ve yoˬ. Beˍraˍhkiˆ ve yaˇ Meˍshuˆlanˍ lehˬ, yawˇ ve yehˬ gʼuˇ suhˍ lo cawˬ ve lanˇ venˇ hta‸ kʼaw‸ gu kawˍ ve yoˬ.

31Shi lawˍ paˍ Maˍlaˍhkiˇyaˆ lehˬ, oˇ kaˬ lo kʼaw‸ te leh, bon yehˬ hkʼaw kanˉ te ve chaw leh tanˇ kaˬ paˍ hui chehˇ ve yehˬ lo hkʼa gaˬ, lanˇ venˇ hta‸ gu kawˍ ve yoˬ. Yehˬ oˇ ve lehˬ, bon yehˬ lonˉ ve yehˬmiˉhpe‸ paˇ lo cawˬ leh, lanˇ venˇ awˬ na hpawˇ awˬ ceˍ kʼaweh‸ lo te taˍ ve bawehˇ paˇ lo cawˬ ve yoˬ.

32Shi lawˍ paˍ teˇ hpaˍ leh tanˇ kaˬ paˍ teˇ hpaˍ lehˬ oˇ kaˬ lo kʼaw‸ te leh, Yawˬ taˍ meu‸ hpe‸ lo hkʼa gaˬ lanˇ venˇ gu kawˍ ve yoˬ.

← Chapter 2 Jump to: Chapter 4 →