Nehemiah 13

Lahu Bible Edited © Thailand Bible Society and Bible Society of Myanmar, 2010, 2020.

← Chapter 12 Jump to:

1Awˬ yanˇ oˇ ve hkʼaw, yawˇ hui lehˬ chaw yaˇ teˇ hpaˍ hta‸ Moˉseˍ ve awˬliˇtawˇhkawˇ gʼaw maˍ piˇ chehˇ ve yoˬ. Aˍmawˇniˆ chaw leh Mawˇbaˆ chaw hui Gʼuiˬsha ve chaw hta‸ ca pawnˇ da‸ la tuˬ a hkaw-anˬ maˇ gʼa piˇ, teh‸ bvuh‸ taˍ ve hta‸ yawˇ hui gʼa mawˬ ve yoˬ.

2Awˬ lawn kʼo, chaw chi teˇ hpaˍ lehˬ Iˉsaˍreˍlaˆ chaw hui Eˇjiˇtu‸ mvuhˇmiˬ hkʼaw tawˆ la chehˇ htaˇ, yawˇ hui hta‸ caˇ tuˬ dawˬ tuˬ maˇ piˇ ve pa taw yoˬ. Chi awˬ hkʼoˆ, yawˇ hui lehˬ Baˍlanˍ hta‸ awˬ hpfuhˇ piˇ leh, yawˇ hui hta‸ hkeu tcuh ve yoˬ. Ya‸ hkʼaˇ, ngaˬ hui ve Gʼuiˬsha lehˬ, yawˇ hkeu ve tawˇ hta‸ bon na‸ hkawˇ kʼaw‸ hpeh‸ piˇ lawˬ ve yoˬ.

3Iˉsaˍreˍlaˆ chaw teˇ hpaˍ lehˬ, awˬliˇtawˇhkawˇ chi ve teˇ hkaw hta‸ gʼa kaˇ ve teˇ yanˇ, awˬ nu ve chaw ceuˬ teˇ hpaˍ hta‸ yawˇ hui shawˍ baˬ ve yoˬ.

4Bon yehˬ hkʼaw ve mawˇ teˇ hpaˍ hta‸ ha‸ shaˉ shehˍ hpaˇ Eˇlaˍsheˆ lehˬ, awˬ yanˇ maw chaweh Tawˇbiˆ hta‸ awˬ chawˇ te da‸ chehˇ ve yoˬ

5Yawˇ lehˬ, bon yehˬ hkʼaw lo awˬ shiˍ awˬ nu leh sha hawnˉ teˇ hpaˍ, bon yehˬ hkʼaw yehˇ tuˬ ve awˬ hkʼeun teˇ hpaˍ, paw hkuˇ awˬ pon tanˇ tuˬ teˇ hpaˍ, Leˍviˆ chaw kʼa muiˬ hkawˇ kʼa paˍ leh, bon yehˬ ha‸ shaˉ paˍ hui hta‸ piˇ tuˬ ve awˬ shiˍ awˬ nu teˇ hpaˍ ha‸ shaˉ taˍ kuiˬ bawehˇ teˇ maˬ, yawˇ Tawˇbiˆ hta‸ chehˇ tcuh taˍve yoˬ.

6Chi hkʼe te chehˇ ve awˬ yanˇ hkʼaw, ngaˬ lehˬ Yeˍruˆsaˍlehnˍ venˇ hkʼaw maˇ chehˇ. Awˬ lawn kʼo, Baˍbuˍlonˍ mvuhˇmiˬ hta‸ Aˍtaˍzeˍyiˆ jawˇmawˇ te ve 32 hkʼaw‸ gaˬ ve teˇ hkʼaw‸ htaˇ, ngaˬ yawˇ geh kʼaw‸ kʼo‸-e chehˇve pa taw yoˬ.

7Maˇ maw maw ngaˬ a hkaw-anˬ kʼaw‸ gʼa leh, Yeˍruˆsaˍlehnˍ venˇ lo kʼaw‸ la ve yoˬ. Eˇlaˍsheˆ lehˬ, Tawˇbiˆ hta‸ awˬ bawehˇ teˇ maˬ yehˇ tcuh taˍ ve hta‸ ngaˬ gʼa shiˍ ve yoˬ.

8Oˇ htaˇ ngaˬ nyi ma zuhˆ jaˇ leh, Tawˇbiˆ ve mawˇ hkʼa peu-eˬ hta‸ gʼawˆ baˬ piˇ ve yoˬ.

9Bon yehˬ ve mawˇ teˇ hpaˍ, awˬ shiˍ awˬ nu teˇ hpaˍ, leh sha hawnˉ teˇ hpaˍ oˇ kaˬ lo kʼaw‸ keu tuˬ, bawehˇ oˇ ve hta‸ ngaˬ da‸ kehˬ tuˬ te tcuh ve yoˬ.

10Chi hkʼoˆ ka‸, chaw yaˇ teˇ hpaˍ hkʼa deh‸ maˇ caˍ piˇ ve pa taw, Leˍviˆ chaw leh kʼa muiˬ hkawˇ kʼa paˍ teˇ hpaˍ, Yeˍruˆsaˍlehnˍ venˇ hkʼaw tawˆ-e leh, ti mi ca kʼaw‸ te caˇ kʼai peuˬ ve hta‸ htawˇ ngaˬ gʼa shiˍ ve yoˬ.

11Bon yehˬ hta‸ hkʼa deh‸ maˇ nyi ha‸ shaˉ ve pa taw awˬ hoˉ awˬ naˬ teˇ hpaˍ hta‸ ngaˬ deˇ maˍ piˇ ve yoˬ. Hkʼe te leh, ngaˬ lehˬ kʼo‸-e taˍ ve Leˍviˆ chaw leh kʼa muiˬ hkawˇ kʼa paˍ hui hta‸ kʼaw‸ kuˬ hkʼaw‸ leh, yawˇ hui hta‸ kanˉ kʼaw‸ chiˇ a‸ piˇ ve yoˬ.

12Oˇ htaˇ Iˉsaˍreˍlaˆ chaw hui lehˬ, awˬ shiˍ awˬ nu teˇ hpaˍ, a peh meuˇ gʼuiˬ leh shaˍ lonˍ chu teˇ hpaˍ bon yehˬ lo kʼaw‸ yuˬ laˬ ve yoˬ.

13Paw hkuˇ Sheˍlaˍmiˆ, awˬliˇtawˇhkawˇ shiˍ paˍ Zaˍdoˆ, Leˍviˆ chaw Peˍdaˍyaˆ hui hta‸ ngaˬ leuˆ yuˬ leh, mawˇ ha‸ shaˉ shehˍ hpaˇ kʼaw‸ te tcuh ve yoˬ. Yawˇ hui hta‸ ga piˇ tuˬ, Maˍtaˍniˆ ve awˬ hawehˍ, Zaˍkuˇraˆ ve yaˇ Haˍnanˍ hta‸ ngaˬ leuˆ yuˬ taˍ ve yoˬ. Chaw chi teˇ hpaˍ lehˬ, kanˉ te shehˍ hpaˇ teˇ hpaˍ hta‸ hkʼa deh‸ nyi leh, pehˬ caˍ piˇ gʼa ve chaw teˇ hpaˍ hpeh‸ ve hta‸ ngaˬ shiˍ taˍ ve yoˬ.

14Ngaˬ ve Gʼuiˬsha-oˬ, nawˬ ve bon yehˬ awˬ pon ngaˬ te taˍ peuˬ ve kanˉ teˇ hpaˍ hta‸ a ciˉ dawˇ nawˇ laˇ-oˆ.

15Awˬ yanˇ oˇ ve hkʼaw Yuˇda‸ chaw teˇ hpaˍ lehˬ, shinˉ nyi htaˇ a pehˉ meuˇ gʼuiˬ nyiˉ chehˇ ve hta‸ ngaˬ gʼa mawˬ ve yoˬ. Awˬ nu ve chaw teˇ hpaˍ lehˬ, a shu yawˇ ve caˬ shiˍ, a pehˉ meuˇ shiˍ, maˉ nawˆ shiˍ leh awˬ nu ve mawˇ teˇ hpaˍ piˉ laˬ hkʼoˆ taˆ leh, Yeˍruˆsaˍlehnˍ venˇ lo laˬ chehˇ ve hta‸ htawˇ ngaˬ gʼa mawˬ ve yoˬ. Shinˉ nyi htaˇ mawˇ oˇ ve teˇ hpaˍ hta‸ maˇ gʼa hawˇ tuˬ, ngaˬ yawˇ hui hta‸ shaˍ ti‸ piˇ ve yoˬ.

16Tuˇruˆ venˇ yaˇ teˇ hpaˍ hpaˍ, Yeˍruˆsaˍlehnˍ venˇ hkʼaw chehˇ taˍ ve yoˬ. Yawˇ hui lehˬ, shinˉ nyi htaˇ ngaˇ leh awˬ nu ve caˇ tuˬ teˇ hpaˍ venˇ hkʼaw yuˬ laˬ leh hawˇ chehˇ ve yoˬ.

17Hkʼe te leh ngaˬ lehˬ, Yuˇda‸ chaw awˬ hoˉ awˬ naˬ teˇ hpaˍ hta‸ chi hkʼe kʼoˆ deˇ maˍ piˇ ve yoˬ. Nawˬ hui te chehˇ ve cha‸ chiˆ ve kanˉ teˇ hpaˍ hta‸ nyi sheˍ. Nawˬ hui lehˬ, shinˉ nyi htaˇ cha‸ chiˆ tuˬ te chehˇ ve yoˬ.

18Nawˬ hui ve awˬ puˍ awˬ pi teˇ hpaˍ chi hkʼe te ve pa taw, Gʼuiˬsha yawˇ hui hta‸ ciˍ yanˍ piˇ leh, venˇ chi hta‸ te luˬ piˇ taˍ ve yoˬ. Hkʼe ka‸, nawˬ hui lehˬ shinˉ nyi hta‸ cha‸ chiˆ tuˬ kʼaw‸ te leh, Gʼuiˬsha nyi ma zuhˆ ve teˇ ceuˬ chaw yaˇ teˇ hpaˍ awˬ hkʼoˆ lo kʼaw‸ gaˬ la tuˬ te piˇ chehˇ ve yoˬ, teh‸ yawˇ hui hta‸ kʼoˆ piˇ ve yoˬ.

19Hkʼe te leh, ngaˬ lehˬ shinˉ nyi gaˬ la ve teˇ pawˆ le le venˇ taˍ meu‸ hpe‸ teˇ hpaˍ hta‸ hoˆ taˍ tcuh leh, shinˉ nyi peuˬ htaˇ heh‸ kʼaw‸ hpaw tcuh ve yoˬ. Shinˉ nyi htaˇ, te‸ chiˉ mawˇ maˇ gʼa yuˬ lo‸ la tuˬ, ngaˬ ve chaw teˇ hpaˍ hta‸ venˇ taˍ meu‸ hpe‸ teˇ hpaˍ lo nyi tcuh taˍ ve yoˬ.

20Mawˇ laiˉ ceuˬ ca hawˇ la ve tanˇ kaˬ paˍ teˇ hpaˍ lehˬ, ngaˇ nyi mvuhˇ hpeu‸ htaˇ teˇ, nyiˇ pawˆ hkʼe lanˇ venˇ baˬ lo gʼa haˉ ve yoˬ.

21Hkʼe te leh, ngaˬ yawˇ hui hta‸ chi hkʼe shaˍ ti‸ piˇ ve yoˬ. Mvuhˇ htiˇ la tuˬ, nawˬ hui oˇ hkʼe ca te haˉ chehˇ ve lehˬ, te‸ chiˉ awˬ bon maˇ cawˬ. Nawˬ hui teˇ pawˆ oˇ hkʼe kʼaw‸ te ve kʼo, ngaˬ hehnˇ chaweh te laˇ tuˬ yoˬ, teh‸ yawˇ hui hta‸kʼoˆ piˇ ve yoˬ. Oˇ ve teˇ nyi hta‸ te leh, shinˉ nyi htaˇ yawˇ hui maˇ kʼaw‸ laˬ-o.

22Ngaˬ lehˬ, Leˍviˆ chaw teˇ hpaˍ hta‸ da‸ kehˬ tuˬ te tcuh leh, venˇ taˍ meu‸ hpe‸ teˇ hpaˍ hta‸ ca shaw tcuh taˍ ve yoˬ. Gʼuiˬsha-oˬ, ngaˬ chi hkʼe te taˍ peuˬ ve pa taw, ngaˬ hta‸ a ciˉ dawˇ nawˇ laˇ leh, nawˬ ha‸ pehnˇ uiˍ ve pa taw, ngaˬ hta‸ a ciˉ ponˬ laˇ-oˆ.

23Awˬ yanˇ oˇ ve hkʼaw, Yuˇda‸ chaw maˇ maˇ, Aˍshoˆ, Aˍnonˍ leh Mawˇbaˆ venˇ hkʼaw chehˇ ve yaˇ miˇ teˇ hpaˍ hta‸ ca heuˆ chehˇ ve awˬ hkawˇ ngaˬ gʼa kaˇ ve yoˬ.

24Yawˇ hui ve yaˇ teˇ hkoˇ lehˬ, Aˍshoˆ chaw hui ve tawˇ, maˇ heˆ kʼo, awˬ nu ve tawˇ hta‸ tiˉ yaw leh, ngaˬ hui ve tawˇ hta‸ maˇ yaw puiˉ.

25Ngaˬ lehˬ chaw oˇ ve teˇ hpaˍ hta‸ deˇ maˍ piˇ leh, yawˇ hui hta‸ hkeu piˇ ve yoˬ. Ngaˬ yawˇ hui hta‸ jaw‸ hpehˇ leh, yawˇ hui ve uˉ hkeh mvuh hta‸ gʼawˬ baˬ piˇ ve yoˬ. Yawˇ hui oˇ hkʼe maˇ kʼaw‸ gʼa te tuˬ, ngaˬ yawˇ hui hta‸ Gʼuiˬsha ve awˬ meh hta‸ cuˇ leh hkanˍ tcuh ve yoˬ.

26Peuˬ hkʼaw‸ nawˉ, ngaˬ yawˇ hui hta‸ chi hkʼe kʼoˆ piˇ ve yoˬ. Jawˇmawˇ lonˉ Sawˉla‸monˍ lehˬ, awˬ nu ve jawˇmawˇ teˇ hpaˍ a‸ kehˉ uiˍ jaˇ leh, Gʼuiˬsha ha‸ jaˇ ve jawˇmawˇ hpeh‸ ve htawˇ, yawˇ hta‸ venˇbaˆ te piˇ lawˬ ve chaw lehˬ, buiˇshaˆaˉnaˆ yaˇ miˇ teˇ hpaˍ hpeh‸ ve yoˬ.

27Ngaˬ hui hkʼa peu-eˬ htawˇ, chi beu‸ nawˬ hui te chehˇ ve hkʼe, buiˇshaˆaˉnaˆ chaw hta‸ heuˆ leh, Gʼuiˬsha ve tawˇ hta‸ ponˬ leuˉ tuˬ ve laˇ, teh‸ yawˇ hui hta‸ kʼoˆ piˇ ve yoˬ.

28Yawˇyaˍda‸ lehˬ, paw hkuˇ lonˉ Eˇlaˍsheˆ ve yaˇ hpeh‸ ve yoˬ. Ya‸ hkʼaˇ, Yawˇyaˍdaˆ ve yaˇ teˇ gʼaˇ lehˬ, Beˍtaˍhawˇronˍ venˇ yaˇ Saˍbaˍlaˆ ve yaˇ miˇ hta‸ heuˆ ve pa taw, ngaˬ yawˇ hta‸ Yeˍruˆsaˍlehnˍ venˇ hkʼaw tawˆ kʼai tcuh ve yoˬ.

29Gʼuiˬsha-oˬ, chaw oˇ ve teˇ hpaˍ lehˬ, paw hkuˇ lonˉ aˉ yaˇ leh nawˬ yawˇ hui hta‸ te piˇ taˍ ve ka ti‸ hta‸ maˇ shawˍ maˇ caˆ te ve pa taw, yawˇ hui hta‸ a ciˉ tawnˇ taˍ-o‸.

30Chaw yaˇ teˇ hpaˍ awˬ nu ve awˬ liˇ hta‸ maˇ gʼa yehˇ tuˬ, ngaˬ yawˇ hui hta‸ da‸ kehˬ la piˇ taˍ peuˬ. Paw hkuˇ leh Leˍviˆ chaw teˇ hpaˍ, a shu yawˇ ve kanˉ hta‸ shiˍ la tuˬ, ngaˬ yawˇ hui awˬ pon awˬ liˇ awˬ hkʼaˇ hkʼa deh‸ gu teh piˇ taˍ ve yoˬ.

31Bon yehˬ hkʼaw loˍ ve suhˉ veˆ teˇ hpaˍ, awˬ yanˇ cawˇ cawˇ yuˬ laˬ tuˬ leh, awˉ lawˉ peuˇ naw‸ la ve awˬ shiˍ awˬ nu teˇ hpaˍ bon yehˬ lo yuˬ laˬ tuˬ, ngaˬ awˬ hkʼaˇ hkʼa deh‸ gu teh taˍ piˇ peuˬ ve yoˬ. Gʼuiˬsha-oˬ, awˬ ceuˬ chi hkʼa peu-eˬ hta‸ a ciˉ dawˇ nawˇ taˍ leh, ngaˬ hta‸ awˬ bon na‸ laˇ-oˆ.

← Chapter 12 Jump to: