Nehemiah 8

Lahu Bible Edited © Thailand Bible Society and Bible Society of Myanmar, 2010, 2020.

← Chapter 7 Jump to: Chapter 9 →

1Ha pa suhˍ maˬ teˇ maˬ hkʼaw gaˬ ve teˇ yanˇ, Iˉsaˍreˍlaˆ chaw teˇ hpaˍ lehˬ, a shu yawˇ ve venˇ hkʼaw chehˇ taˍ peuˬ ve yoˬ. Ha pa oˇ ve teˇ maˬ awˬ hkuiˉ puiˍ teˇ nyi htaˇ, yawˇ hui hkʼa peu-eˬ Yeˍruˆsaˍlehnˍ venˇ lo hpawnˬ laˬ leh, Iˉ kaˆ taˍ meu‸ hpe‸ paˇ lo hpoˆ chehˇ taˍ ve yoˬ. Yawˇ hui lehˬ, Gʼuiˬsha Moˉseˍ hta‸ piˇ taˍ ve awˬliˇtawˇhkawˇ gʼaw maˍ laˇ tuˬ, paw hkuˇ Eˇzaˍraˆ hta‸ li‸ daw ca yuˬ tcuh ve yoˬ.

2Hkʼe te leh Eˇzaˍraˆ lehˬ, awˬliˇtawˇhkawˇ bvuh‸ taˍ ve li‸ daw hta‸ yuˬ leh, yawˇ hui geh kʼaw‸ la ve yoˬ. Oˇ kaˬ lo hawˉ hkʼaˆ, yaˇ miˇ, leh chaw hkawˇ nawˇ la peuˬ ve yaˇ ehˉ teˇ hpaˍ hpoˆ chehˇ taˍ ve yoˬ.

3Yawˇ lehˬ venˇ taˍ meu‸ hpe‸ lo chehˇ taˍ leh, mvuhˇ shawˉ htaˇ ka‸ te leh mvuhˇ law‸ kʼaw tcuhˆ htaˇ hkʼa gaˬ, yawˇ hui hta‸ awˬliˇtawˇhkawˇ gʼaw maˍ piˇ ve yoˬ. Chaw hkʼa peu-eˬ hkʼa deh‸ na taˍ ve yoˬ.

4Eˇzaˍraˆ lehˬ, shu gu taˍ piˇ ve bon maˍ kui kʼaw jaw hkʼoˆ huˉ taˍ leh gʼaw maˍ piˇ chehˇ ve yoˬ. Maˍhtaˍtiˆ, Sheˍmaˆ, Aˍnaˍyaˆ, Uˇriˇya‸, Hiˇlaˍhkiˆ, leh Maˍseˍyaˆ hui lehˬ, yawˇ ve la‸ sha paˉ hpawˇ lo huˉ taˍ leh, Peˍdaˍyaˆ, Miˆsheˍlaˆ, Maˍlaˍhkiˇyaˆ, Haˍsonˍ, Haˍshaˍbaˆdaˍnaˆ, Zaˍhkaˍ riˆ, lehˬ Meˍshuˆlanˍ hui yawˇ ve la‸ mehˍ paˉ hpawˇ lo huˉ taˍ ve yoˬ

5Eˇzaˍraˆ bon maˍ kuiˬ kʼaw jaw hkʼoˆ lo huˉ chehˇ taˍ ve hta‸ chaw hkʼa peu-eˬ nyi chehˇ ve yoˬ. Yawˇ li‸ daw hta‸ hpeu‸ ve teˇ yanˇ, yawˇ hui hkʼa peu-eˬ tu la ve yoˬ.

6Uiˍ jaˇ mvuh jaˇ ve Gʼuiˬsha hta‸ chiˇ mvuh-o, teh‸ Eˇzaˍraˆ kʼoˆ ve yoˬ. Oˇ htaˇ chaw hkʼa peu-eˬ a shu yawˇ ve la‸ sheh chiˇ leh, A menˬ, A menˬ, teh‸ kʼoˆ ve yoˬ. Oˇ ve hkʼaw nawˉ, yawˇ hui miˬ chaˆ hkʼoˆ boˆ taˍ leh oˉ kʼoˍ pui ve yoˬ.

7Chaw yaˇ teˇ hpaˍ teˇ pawˆ kʼaw‸ tu la leh, a shu yawˇ ve chehˇ kuiˬ lo huˉ taˍ ve yoˬ. Oˇ htaˇ Leˍviˆ chaw Yawˇsuˆ, Beˍniˆ, Sheˍraˍbiˆ, Yaˍmenˍ, Aˍkoˆ, Shaˍbeˍtehˇ, Hawˇdiˇyaˆ, Maˍseˍyaˆ, Keˍliˇtaˆ, Aˍzaˍriˆ, Yawˇzaˍbaˆ, Haˍnanˍ leh Peˍlaˍyaˆ hui chaw moˍ lonˉ hta‸ awˬliˇtawˇhkawˇ gʼaw maˍ piˇ ve yoˬ.

8Yawˇ hui lehˬ, chaw yaˇ teˇ hpaˍ na gʼa tuˬ, awˬliˇtawˇhkawˇ oˇ ve teˇ hpaˍ hta‸ tcuhˉ kuiˬ kʼaw‸ yuˬ tawˆ maˍ piˇ ve yoˬ.

9Chaw moˍ lonˉ lehˬ, awˬliˇtawˇhkawˇ oˇ ve teˇ hpaˍ hta‸ gʼa kaˇ ve teˇ yanˇ, nyi ma hta‸ heuˆ jaˇ leh hawˬ ve yoˬ. Oˇ htaˇ Neˍhaˍmiˆ, Eˇzaˍraˆ leh yawˇ hui hta‸ tcuhˉ kuiˬ yuˬ tawˆ maˍ piˇ chehˇ ve Leˍviˆ chaw oˇ ve teˇ hpaˍ, yawˇ hui hta‸ chi hkʼe kʼoˆ maˍ piˇ ve yoˬ. Ya‸ nyi lehˬ, nawˬ hui ve jawˇmawˇ Gʼuiˬsha ve da‸ kehˬ ve awˬ nyi hpeh‸ ve yoˬ. Ngaˬ hui dawˇ haˍ leh hawˬ maˇ cawˇ.

10Chi beu‸ a shu yawˇ ve yehˬ lo kʼo‸-e leh, hti caˇ hti dawˬ ve pawehˇ te tuˬ ca kʼaw‸ gu loˬ. Caˇ tuˬ dawˬ tuˬ maˇ cawˬ ve chaw hui hta‸, nawˬ hui ve caˇ tuˬ leh a pehˉ meuˇ gʼuiˬ pehˬ piˇ-oˆ. Ya‸ nyi lehˬ Gʼuiˬsha ve da‸ kehˬ ve awˬ nyi hpeh‸ ve pa taw, teˇ gʼaˇ ka‸ taˇ dawˇ haˍ chehˇ. Gʼuiˬsha pe‸ laˇ ve ha lehˬ tuˬ awˬ ceuˬ lehˬ, nawˬ hui hta‸ awˬ gʼaˇ uiˍ la piˇ tuˬ yoˬ, teh‸ yawˇ hui hta‸ kʼoˆ piˇ ve yoˬ.

11Leˍviˆ chaw teˇ hpaˍ lehˬ, yawˇ hui geh kʼai leh awˬ nyi oˇ ve da‸ kehˬ ve awˬ nyi hpeh‸ ve pa taw, chaw teˇ gʼaˇ ka‸ maˇ gʼa dawˇ haˍ tuˬ, ca kʼoˆ piˇ toˇ ve yoˬ.

12Hkʼe te leh, chaw oˇ ve teˇ hpaˍ a shu yawˇ ve yehˬ lo kʼo‸-e leh, hti caˇ hti dawˬ ve pawehˇ te tuˬ ca kʼaw‸ gu ve yoˬ. Yawˇ hui lehˬ, gʼaw maˍ laˇ ve awˬliˇtawˇhkawˇ teˇ hpaˍ hta‸ na gʼa peuˬ ve pa taw, a shu yawˇ geh cawˬ ve caˇ tuˬ, shu hta‸ ka‸ pehˬ caˍ piˇ ve yoˬ.

13Shawˉ pawˍ teˇ nyi, Iˉsaˍreˍlaˆ awˬ hoˉ awˬ naˬ teˇ hpaˍ lehˬ, paw hkuˇ leh Leˍviˆ chaw hui hta‸ shiˍ veu leh, awˬliˇtawˇhkawˇ hta‸ ca henˇ tuˬ, Eˇzaˍraˆ geh kʼai ve yoˬ.

14Aˉ po kʼo pawehˇ te htaˇ, Iˉsaˍreˍlaˆ chaw teˇ hpaˍ lehˬ, aˉ po kʼo hkʼaw lo chehˇ taˍ cawˇ ve awˬ lawn, Gʼuiˬsha Moˉseˍ hta‸ piˇ taˍ ve awˬliˇtawˇhkawˇ awˬ hkʼaw lo bvuh‸ taˍ ve hta‸ yawˇ hui gʼa mawˬ ve yoˬ.

15Hkʼe te leh, yawˇ hui lehˬ Yeˍruˆsaˍlehnˍ venˇ leh awˬ nu ve venˇ teˇ hpaˍ hkʼaw chehˇ ve chaw hui hta‸ chi hkʼe kʼoˆ feu piˇ ve yoˬ. Heh puiˉ hkʼaw lo kʼai leh shaˍlonˍ kʼaˉ, htawˇ kʼaˉ, hpa‸ vaw kʼaˉ, tcuhˉ pui kʼaˉ teˇ hpaˍ ca tawˆ veu laˇ leh, awˬliˇtawˇhkawˇ li‸ daw awˬ hkʼaw lo bvuh‸ taˍ ve hkʼe, a shu yawˇ ve aˉ po kʼo te taˍ-o‸, teh‸ kʼoˆ feu piˇ ve yoˬ.

16Hkʼe te leh chaw yaˇ teˇ hpaˍ lehˬ, suhˆ kʼaˉ ca tawˆ veu laˇ leh, a shu yawˇ ve yehˬ paˇ lo maˇ kʼoˆ, bon yehˬ paˇ lo maˇ kʼoˆ, Iˉ kaˆ taˍ meu‸ hpe‸ leh Eˇhpaˍrenˍ taˍ meu‸ hpe‸ lo maˇ kʼoˆ, a shu yawˇ ve aˉ po kʼo te ve yoˬ.

17Shu mvuhˇmiˬ lo kʼaw‸ la taˍ ve chaw hkʼa peu-eˬ, a shu yawˇ ve aˉ po kʼo te leh, oˇ ve hkʼaw chehˇ taˍ ve yoˬ. Chi ve lehˬ, Nunˍ ve yaˇ Yawˇsuˆ suh peuˬ hkʼaw‸ nawˉ, yawˇ hui kʼaw‸ tanˬ te ve aˉ po kʼo pawehˇ awˉ lawˉ teˇ pawˆ hpeh‸ ve yoˬ. Chaw te gʼaˇ le le ha lehˬ jaˇ ve yoˬ.

18Pawehˇ tanˬ te ve teˇ nyi hta‸ te leh, awˬ leh ve teˇ nyi hkʼa gaˬ, yawˇ hui lehˬ teˇ nyi le le awˬliˇtawˇhkawˇ teˇ tawn peuˬ teˇ tawn hta‸ gʼaw ve yoˬ. Yawˇ hui suhˍ nyi hkʼa gaˬ pawehˇ te leh, hiˉ nyi teˇ nyi gaˬ htaˇ, awˬliˇtawˇhkawˇ li‸ daw hkʼaw bvuh‸ taˍ ve hkʼe, yawˇ hui hoˆ pawehˇ te ve yoˬ.

← Chapter 7 Jump to: Chapter 9 →