Nehemiah 4

Lahu Bible Edited © Thailand Bible Society and Bible Society of Myanmar, 2010, 2020.

← Chapter 3 Jump to: Chapter 5 →

1Ngaˬ hui Yuˇda‸ chaw teˇhpaˍ, lanˇ venˇ hta‸ kʼaw‸ gu kawˍ chehˇ ve awˬ hkawˇ hta‸ Saˍbaˍlaˆ gʼa kaˇ ve teˇ yanˇ, yawˇ nyi ma zuhˆ jaˇ leh ngaˬ hui hta‸ hkʼa mvuhˇ hkʼa na kʼoˆ ve yoˬ.

2Yawˇ ve awˬ chawˇ teˇ hpaˍ leh, Saˍmaˍriˆ ma‸ yaˇ teˇ hpaˍ mehˆ gʼuˇ suhˍ lo yawˇ chi hkʼe kʼoˆ ve yoˬ. Yuˇda‸ chaw chi teˇ hpaˍ hkʼaˬ hkʼe dawˇ leh chi hkʼe te chehˇ ve le. Yawˇ hui venˇ hta‸ kʼaw‸ gu te chehˇ ve laˇ. Yawˇ hui tuˉ tanˇ chehˇ ve pa taw, teˇ nyi tiˉ awˬ hkʼaw lo yawˇ hui lanˇ venˇ hta‸ kʼaw‸ gu kawˍ peuˬ tuˬ yoˬ, teh‸ dawˇ chehˇ ve hehˉ laˇ. Awˬ puiˍ taˆ hkʼaw lo aˬ miˍ to‸ baˬ taˍ ve haˉ pui shiˍ teˇ hpaˍ hta‸ yawˇ hui yuˬ leh, lanˇ venˇ kawˍ gʼa tuˬ ve leh laˇ, teh‸ kʼoˆ ve yoˬ.

3Aˍmawˇniˆ chaw Tawˇbiˆ htawˇ yawˇ awˬ paˇ lo huˉ taˍ leh, Yawˇ hui hkʼaˬ hkʼe ve lanˇ venˇ hta‸ kawˍ tuˬ ve le. Yawˇ hui kawˍ taˍ ve lanˇ venˇ lehˬ, heh hpuiˇ pawˆ naˆ ka‸ paiˍ tuˬ yoˬ, teh‸ kʼoˆ ve yoˬ.

4Oˇ htaˇ ngaˬ Gʼuiˬsha geh bon lawˬ ve yoˬ. Gʼuiˬsha-oˬ, yawˇ hui ngaˬ hui teˇ hpaˍ hta‸ hkʼa mvuhˇ hkʼa na kʼoˆ chehˇ ve hkawˇ hta‸ a ciˉ na sheˍ. Yawˇ hui kʼoˆ chehˇ ve tawˇ oˇ ve teˇ hpaˍ yawˇ hui awˬ hkʼoˆ kʼaw‸ gaˬ la piˇ-oˆ. Yawˇ hui lehˬ shu hiˉ yuˬ lu yuˬ ve hta‸ gʼa hkanˍ leh, shu mvuhˇmiˬ lo hpeh kʼai ve hta‸ gʼa hkanˍ piˇ-oˆ.

5Yawˇ hui te taˍ ve haiˬ ve kanˉ teˇ hpaˍ hta‸ venˇbaˆ taˇ hpehˇ piˇ-oˆ. Awˬ lawn kʼo, yawˇ hui lehˬ lanˇ venˇ kʼaw‸ gu kawˍ chehˇ ve ngaˬ hui hta‸ hkʼa mvuhˇ hkʼa na kʼoˆ laˇ ve yoˬ, teh‸ kʼoˆ ve yoˬ.

6Oˇ ve hkʼaw‸ nawˉ, ngaˬ hui lanˇ venˇ hta‸ kʼaw‸ caˉ kawˍ ve yoˬ. Chaw yaˇ teˇ hpaˍ lehˬ, kanˉ te ve nyi ma pfuhˇ jaˇ ve pa taw, lanˇ venˇ teˇ hkoˇ hkʼa gaˬ kawˍ peuˬ sheˬ ve yoˬ.

7Ngaˬ hui lanˇ venˇ hta‸ kʼaw‸ gu kawˍ leh peuˬ la chehˇ ve awˬ hkawˇ hta‸ Saˍbaˍlaˆ, Tawˇbiˆ leh Aˍraˆ chaw, Aˍmonˍ chaw, Aˍshoˆ chaw hui gʼa kaˇ ve teˇ yanˇ, yawˇ hui nyi ma zuhˆ jaˇ ve yoˬ.

8Hkʼe te leh yawˇ hui Yeˍruˆsaˍlehnˍ venˇ hta‸ ca bawˆ la leh, ngaˬ hui hta‸ ca te sho‸ sha‸ laˇ tuˬ hkʼawˇ jehˬ da‸ ve yoˬ.

9Ya‸ hkʼaˇ, ngaˬ hui Gʼuiˬsha geh bon lawˬ leh, tanˇ hkuinˇ tanˇ vanˇ shaw shehˍ hpaˇ teˇ hpaˍ hta‸ hkʼa deh‸ shaw tcuh taˍ ve yoˬ.

10Yuˇda‸ chaw teˇ hpaˍ lehˬ, kʼa muiˬ hkawˇ chi hkʼe kʼoˆ kʼa chehˇ ve yoˬ. Ngaˬ hui gʼa taˆ chehˇ ve awˬ vuiˬ hawˇ jaˇ ve pa taw, ngaˬ hui gʼaˇ nuˇ jaˇ peuˬ. Ngaˬ hui gʼa ji baˬ tuˬ ve awˬ puiˍ taˆ cawˬ maˇ jaˇ sheˍ. Hkʼaˬ hkʼe te leh ngaˬ hui ya‸ nyi lanˇ venˇ kawˍ gʼa tuˬ le, teh‸ kʼoˆ kʼa ve yoˬ.

11Canˇ paˍ teˇ hpaˍ lehˬ, ngaˬ hui maˇ shiˍ maˇ jawˬ sheˍ htaˇ, ngaˬ hui geh lo‸ la leh, ngaˬ hui te chehˇ ve kanˉ hta‸ te luˬ tuˬ dawˇ nyi chehˇ ve yoˬ.

12Canˇ paˍ teˇ hpaˍ geh chehˇ taˍ ve Yuˇda‸ chaw teˇ hpaˍ hpaˍ, teˇ hkui teˇ hkui ngaˬ hui geh laˬ leh, yawˇ hui hkʼaˬ hkʼe te tuˬ dawˇ nyi chehˇ ve awˬ lawn ngaˬ hui hta‸ ca kʼaw‸ hto laˇ chehˇ ve yoˬ.

13Chi hta‸ pa taw, ngaˬ lehˬ lanˇ venˇ kawˍ maˇ peuˬ sheˍ ve chehˇ kuiˬ lo, la‸ caˉ pfuhˇ leh shaw shehˍ hpaˇ teˇ hpaˍ teh taˍ ve yoˬ.

14Chaw yaˇ teˇ hpaˍ lehˬ, heuˬ jaˇ peuˬ ve hta‸ ngaˬ gʼa mawˬ ve yoˬ. Hkʼe te leh, ngaˬ yawˇ hui leh yawˇ hui ve awˬ hoˉ awˬ naˬ teˇ hpaˍ hta‸ chi hkʼe kʼoˆ piˇ ve yoˬ. Ngaˬ hui ve canˇ paˍ teˇ hpaˍ hta‸ taˇ kawˆ. Ngaˬ hui ve Gʼuiˬsha lehˬ, hkʼaˬ ma uiˍ jaˇ mvuh jaˇ ve hta‸ dawˇ nawˇ leh, nawˬ hui ve awˬ viˉ awˬ nyi, nawˬ hui ve miˇ yaˇ leh, nawˬ hui ve yehˬ teˇ hpaˍ awˬ pon ma‸ bawˆ-oˆ, teh‸ kʼoˆ piˇ ve yoˬ.

15Oˇ htaˇ ngaˬ hui ve canˇ paˍ teˇ hpaˍ lehˬ, yawˇ hui hkʼawˇ jehˬ da‸ chehˇ ve awˬ lawn hta‸ ngaˬ hui shiˍ peuˬ ve hta‸ maˇ kʼoˆ, yawˇ hui te tuˬ dawˇ nyi chehˇ ve kanˉ hta‸ Gʼuiˬsha te luˬ piˇ peuˬ ve hta‸ maˇ kʼoˆ, yawˇ hui shiˍ la jawˬ la ve yoˬ. Oˇ ve hkʼaw‸ nawˉ, ngaˬ hui lehˬ lanˇ venˇ hta‸ kʼaw‸ caˉ leh kawˍ kʼai ve yoˬ.

16Oˇ ve teˇ nyi hta‸ te leh, ngaˬ lehˬ chaw teˇ hkoˇ hta‸ ceh tiˉ kanˉ te tcuh leh, awˬ nu ve chaw teˇ hkoˇ hta‸ la‸ caˉ pfuhˇ leh shaw tcuh taˍ ve yoˬ.

17Awˬ hoˉ awˬ naˬ teˇ hpaˍ htawˇ, lanˇ venˇ hta‸ kʼaw‸ gu kawˍ chehˇ ve Yuˇda‸ chaw hui hta‸ awˬ gʼaˇ piˇ chehˇ ve yoˬ. Chaw oˇ ve teˇ hpaˍ lehˬ, la‸ sheh teˇ paˉ lanˇ venˇ kawˍ leh, awˬ nu ve teˇ paˉ la‸ caˉ ka taˍ ve yoˬ.

18Yawˇ hui hkʼa peu-eˬ a shu yawˇ ve aˉhtaw pfuhˇ taˍ ve yoˬ. Nuˇ hkaw meuˆ shehˍ hpaˇ lehˬ ngaˬ geh chehˇ taˍ ve yoˬ.

19Ngaˬ yawˇ hui hta‸ chi hkʼe kʼoˆ piˇ taˍ ve yoˬ. Lanˇ venˇ zuhˬ jaˇ ve pa taw, ngaˬ hui lehˬ teˇ gʼaˇ teˇ hpawˇ lo kanˉ gʼa te chehˇ ve yoˬ.

20Nawˬ hui nuˇ hkaw meuˆ hkawˇ gʼa kaˇ ve kʼo, ngaˬ geh gʼuiˇ laˬ-o‸. Ngaˬ hui ve Gʼuiˬsha lehˬ, ngaˬ hui awˬ pon ma‸ bawˆ laˇ tuˬ yoˬ, teh‸ yawˇ hui hta‸ kʼoˆ piˇ taˍ ve yoˬ.

21Hkʼe te leh, mvuhˇ htiˇ la ve awˬ yanˇ hta‸ te leh, mvuhˇ hpeu‸ meu‸ keu shiˍ tawˆ la htaˇ hkʼa gaˬ, ngaˬ hui ve chaw teˇ hkoˇ lehˬ lanˇ venˇ kawˍ leh, awˬ nu ve teˇ hkoˇ lehˬ la‸ caˉ pfuhˇ leh shaw chehˇ taˍ ve yoˬ.

22Awˬ yanˇ oˇ ve awˬ hkʼaw lo, ngaˬ hui mvuhˇ law‸ kʼaw htaˇ kanˉ hkʼa deh‸ te hpeh‸ leh, mvuhˇ hpeu‸ htaˇ venˇ hta‸ hkʼa deh‸ shaw taˍ hpeh‸ tuˬ, chaw teˇ gʼaˇ le le Yeˍruˆsaˍlehnˍ venˇ hkʼaw ceh tiˉ chehˇ taˍ-o‸, teh‸ ngaˬ yawˇ hui hta‸ kʼoˆ piˇ ve yoˬ.

23Ngaˬ awˬ to maˇ kʼoˆ, ngaˬ ve chaw hkʼa peu-eˬ maˇ kʼoˆ, mvuhˇ hpeu‸ htaˇ a shu yawˇ ve veu‸ kʼaˇ hta‸ maˇ kʼehˆ zuh‸. A shu yawˇ ve la‸ caˉ hta‸ hkʼa deh‸ vawˆ taˍ leh zuh‸ ve yoˬ.

← Chapter 3 Jump to: Chapter 5 →