Nehemiah 2

Lahu Bible Edited © Thailand Bible Society and Bible Society of Myanmar, 2010, 2020.

← Chapter 1 Jump to: Chapter 3 →

1Oˇ ve hkʼaw‸ nawˉ Niˆsanˇ ha pa htaˇ ngaˬ lehˬ jawˇmawˇ Aˍtaˍyeˍziˆ hta‸ a pehˉ meuˇ gʼuiˬ ca chiˇ taw piˇ ve yoˬ. Ponˬ laˬ htaˇ, yawˇ lehˬ ngaˬ dawˇ haˍ ve mehˆ hpfuhˇ hta‸ teˇ pawˆ ka‸ maˇ mawˬ jaw sheˍ.

2Hkʼe te leh yawˇ kʼoˆ ve, Aˬ hto‸ ma pa taw nawˬ dawˇ haˍ ve le. Nawˬ hta‸ nyi kʼo, chehˇ sha chehˇ ve ka‸ nyi ma hkʼaw dawˇ haˍ chehˇ ve hta‸ shuˍ ve yoˬ, teh‸ ngaˬ hta‸ na nyi laˇ ve yoˬ.

3Tawˇ oˇ ve hta‸ ngaˬ gʼa kaˇ htaˆ kawˆ jaˇ leh, Jawˇmawˇ nawˬ co zuhˬ ha zuhˬ cawˬ piˇ-oˆ. Ngaˬ ve awˬ puˍ awˬ pi teˇ hpaˍ tuˍ taˍ kuiˬ venˇ lehˬ, lu kʼai sheˆ kʼai peuˬ leh, venˇ taˍ meu‸ hpe‸ teˇ hpaˍ htawˇ aˬ miˍ to‸ baˬ peuˬ ve pa taw, ngaˬ hkʼaˬ hkʼe te ha lehˬ chehˇ hpeh‸ tuˬ ve le, teh‸ yawˇ hta‸ kʼaw‸ yaw hkʼaw‸ piˇ ve yoˬ.

4Oˇ htaˇ jawˇmawˇ lehˬ, Nawˬ hkʼaˬ hkʼe te gaˇ ve le, teh‸ ngaˬ hta‸ kʼaw‸ na nyi laˇ ve yoˬ.

5Mvuhˇ naw Gʼuiˬsha geh ngaˬ bon lawˬ ve yoˬ. Peuˬ hkʼaw‸ nawˉ, ngaˬ chi hkʼe kʼaw ‸ yaw hkʼaw‸ piˇ ve yoˬ. Jawˇmawˇ nawˬ ngaˬ hta‸ nyi ma cawˇ leh, ngaˬ lawˬ ve hkʼe pe‸ laˇ gaˇ ve kʼo, ngaˬ puˍ ngaˬ pi teˇ hpaˍ tuˍ taˍ kuiˬ venˇ oˇ ve hta‸ ca kʼaw‸ gu te tuˬ, ngaˬ hta‸ Yuˇda‸ mvuhˇmiˬ lo a ciˉ kʼaw‸ kʼo‸-e tcuh laˇ-oˇ, teh‸ jawˇmawˇ hta‸ kʼoˆ piˇ ve yoˬ.

6Jawˇmawˇ ma htawˇ, jawˇmawˇ paˇ lo mui chehˇ taˍ ve yoˬ. Oˇ htaˇ jawˇmawˇ lehˬ, Ngaˬ hkʼaˬ maw maw a hkaw-anˬ lawˬ gaˇ ve leh, hkʼaˬ htaˆ kʼaw‸ kʼaw‸ la tuˬ ve awˬ lawn, ngaˬ hta‸ na nyi laˇ ve yoˬ. Ngaˬ yawˇ hta‸ kʼaw‸ yaw hkʼaw‸ piˇ leh, yawˇ lehˬ ngaˬ lawˬ ve hta‸ nyi hkʼaˇ suh ve yoˬ.

7Oˇ ve hkʼaw‸ nawˉ, ngaˬ hta‸ Yuˇda‸ mvuhˇmiˬ lo kʼo‸-e tcuh taˍ ve awˬ lawn, Uˉhpaˍraˆ iˉ kaˆ lawˬ mvuhˇ nyi kʼehˬ hpawˇ lo uˉ peunˍ chehˇ ve jawˇmawˇ hta‸ bvuh‸ piˇ ve li‸ teˇ kʼoˆ hta‸ ngaˬ lawˬ yuˬ ve yoˬ.

8Bon yehˬ awˬ pon, lanˇ venˇ awˬ pon, leh ngaˬ ve yehˬ awˬ pon loˍ ve suhˆ teˇ hpaˍ hta‸ yuˬ hpeh‸ tuˬ, jawˇmawˇ ve suhˆ ha‸ shaˉ shehˍ hpaˇ Aˍsaˆ hta‸ bvuh‸ piˇ ve li‸ teˇ kʼoˆ hta‸ htawˇ ngaˬ kʼaw‸ lawˬ yuˬ ve yoˬ. Gʼuiˬsha ngaˬ geh chehˇ taˍ ve pa taw, jawˇmawˇ lehˬ ngaˬ hkʼa lawˬ ve hkʼa peu-eˬ te laˇ ve yoˬ.

9Jawˇmawˇ lehˬ, yawˇ ve ma‸ poˍ leh iˉ mvuhˇ ciˇ ve ma‸ yaˇ teˇ ta‸ ngaˬ geh peu laˇ ve yoˬ. Hkʼe te leh, Uˉhpaˍraˆ iˉ kaˆ lawˬ mvuhˇ nyi kʼehˬ hpawˇ lo te kʼo‸-e ve yoˬ. Oˇ kaˬ lo uˉ peunˍ chehˇ ve jawˇmawˇ hta‸, jawˇmawˇ lonˉ ve li‸ maˍ piˇ ve yoˬ.

10Ya‸ hkʼaˇ, Iˉsaˍreˍlaˆ chaw hui awˬ pon da‸ ve kanˉ te piˇ tuˬ chaw teˇ gʼaˇ kʼaw‸ la chehˇ ve awˬ hkawˇ hta‸, Beˍhawˉronˍ venˇ yaˇ Saˍbaˍlaˆ leh, Aˍmawˇniˆ chaw Tawˇbiˆ hui gʼa kaˇ ve teˇ yanˇ, yawˇ hui nyi ma maˇ sha ve yoˬ.

11Ngaˬ Yeˍruˆsaˍlehnˍ venˇ lo gaˬ leh oˇ kaˬ lo shehˆ nyi jehˇ taˍ ve yoˬ.

12Yeˍruˆsaˍlehnˍ venˇ lo ngaˬ aˬ hto‸ ma ca kʼaw‸ te la ve chaw teˇ gʼaˇ hta‸ ka‸ maˇ hto piˇ. Shehˍ kʼaw hkui gaˬ htaˇ, ngaˬ ve awˬ chawˇ teˇ hpaˍ hta‸ shiˍ leh tawˆ kʼai ve yoˬ. Ngaˬ ciˇ toˇ ve piˉ laˬ teˇ hkeh hta‸ ceh shiˍ kʼai ve yoˬ.

13Ngaˬ hui lehˬ, mvuhˇ nyi kʼehˬ hpawˇ lo cawˬ ve, Lawˬ hkʼo‸ taˍ meu‸ hpe‸ hta‸ te leh, awˬ hawˉ hpawˇ lo cawˬ ve Cawˇ shehˍ ma gʼuiˬ tuˇ lo te taˉ peuˬ hkʼaw‸ nawˉ, Cha‸ chiˆ ve taˍ meu‸ hpe‸ lo kʼai ve yoˬ. Ngaˬ hui kʼai chehˇ htaˇ, luˬ kʼai taˍ ve lanˇ venˇ teˇ hpaˍ leh, aˬ miˍ to‸ baˬ taˍ ve venˇ taˍ meu‸ hpe‸ teˇ hpaˍ hta‸ hkʼa deh‸ chaˬ nyi kʼai ve yoˬ.

14Oˇ ve hkʼaw‸ nawˉ, ngaˬ hui awˬ na hpawˇ lo kʼaw‸ taˆ-e leh, Iˉ kaˆ gʼuiˬ tuˇ taˍ meu‸ hpe‸ leh, Jawˇmawˇ ve iˉ kaˆ gʼuiˬ po lo kʼai ve yoˬ. Oˇ kaˬ lo ya‸ kʼaw maˇ cawˬ.

15Hkʼe te leh, ngaˬ hui lawˬ hkʼo‸ lo kʼaw‸ ya‸-e leh, lanˇ venˇ hta‸ chaˬ nyi kʼai ve yoˬ. Oˇ hkʼe te taˉ peuˬ hkʼaw‸ nawˉ, ngaˬ hui laˬ ve ya‸ kʼaw, Lawˬ hkʼo‸ taˍ meu‸ hpe‸ hta‸ te leh venˇ hkʼaw lo kʼaw‸ kʼo‸-e ve yoˬ.

16Venˇ hta‸ uˉ peunˍ chehˇ ve chaw teˇ gʼaˇ ka‸, ngaˬ hkʼaˬ lo kʼai ve leh, ngaˬ hkʼaˬ hkʼe te chehˇ ve hta‸ maˇ shiˍ. Ngaˬ aˬ hto‸ ma ca kʼaw‸ te la ve awˬ lawn, paw hkuˇ, awˬ hoˉ awˬ naˬ teˇ hpaˍ, leh Yuˇda‸ chaw teˇ gʼaˇ hta‸ ka‸ maˇ hto piˇ sheˍ.

17Oˇ ve hkʼaw‸ nawˉ, ngaˬ yawˇ hui hta‸ chi hkʼe kʼoˆ piˇ ve yoˬ. Chi beu‸ Yeˍruˆsaˍlehnˍ venˇ luˬ kʼai taˍ ve pa taw, ngaˬ hui hkʼaˬ hkʼe gʼa hkanˍ chehˇ ve hta‸ nawˬ hui mawˬ taˍ ve yoˬ. Ngaˬ hui lanˇ venˇ hta‸ kʼaw‸ gu kawˍ leh, ngaˬ hui awˬ me‸ awˬ hponˇ kʼaw‸ cawˬ la tuˬ te-a veuˬ, teh‸ yawˇ hui hta‸ kʼoˆ piˇ ve yoˬ.

18Gʼuiˬsha ngaˬ geh chehˇ leh, ngaˬ hta‸ hkʼaˬ hkʼe te ga laˇ chehˇ ve awˬ lawn maˇ kʼoˆ, jawˇmawˇ ngaˬ hta‸ hkʼaˬ hkʼe kʼoˆ laˇ taˍ ve tawˇ teˇ hpaˍ maˇ kʼoˆ, ngaˬ yawˇ hui hta‸ kʼoˆ maˍ piˇ ve yoˬ. Oˇ htaˇ chaw yaˇ teˇ hpaˍ lehˬ, Ngaˬ hui lanˇ venˇ hta‸ haˆ haˆ kʼaw‸ gu kawˍ-a veuˬ, teh‸ kʼoˆ leh, kanˉ te tuˬ tanˍ gu ve yoˬ.

19Ya‸ hkʼaˇ, Saˍbaˍlaˆ, Tawˇbiˆ, leh Aˬraˆ chaw Geˍshenˍ hui lehˬ, ngaˬ hui hkʼaˬ hkʼe te chehˇ ve awˬ hkawˇ hta‸ gʼa kaˇ ve teˇ yanˇ, yawˇ hui ngaˬ hui hta‸ gʼuiˬ yawˬ leh hkʼa mvuhˇ hkʼa na kʼoˆ laˇ ve yoˬ. Yawˇ hui kʼoˆ ve, Nawˬ hui aˬ hto‸ ma te chehˇ ve le. Nawˬ hui jawˇmawˇ hta‸ kʼaw‸ hpfuhˆ tuˬ te chehˇ ve laˇ, teh‸ kʼoˆ laˇ ve yoˬ.

20Oˇ htaˇ ngaˬ lehˬ, Mvuhˇ naw Gʼuiˬsha ngaˬ hui hta‸ ga laˇ chehˇ ve yoˬ. Ngaˬ hui lehˬ, yawˇ ve awˬ ceˬ teˇ hpaˍ hpeh‸ leh, lanˇ venˇ hta‸ kʼaw‸ gu kawˍ chehˇ ve yoˬ. Ya‸ hkʼaˇ, nawˬ hui lehˬ Yeˍruˆsaˍlehnˍ venˇ chi hta‸ maˇ caˉ da‸. Nawˬ hui te‸ chiˉ kʼoˆ tuˬ maˇ loˍ, teh‸ yawˇ hui hta‸ kʼaw‸ yaw hkʼaw‸ piˇ ve yoˬ.

← Chapter 1 Jump to: Chapter 3 →